¹ Yesu lɔ na onukplanvi etɔnye tun:« Onu ɖeye hɛn ye na dɔn mi do onunyinyla wiwa mɛ, vɔ babaa na ɛmɛ ke ji na onunyinyla lɔ na gbɔn do va. ² E na nyɔ ni tun ye a sin ɛkpin ote tɔn do okɔ ni-i, a bo ve sɔ-ɛ sɔ flɛn do ɛxu mɛ, hugan tun e na va dɔn ɖokpo gee le vikpɛ kiye mɛ a do yi onunyinyla wiwa mɛ. ³ Na hawetɔ ɖe jɛ agɔ do we, yɔ-ɛ, a bo gbɛ onu ni-i, na e ɖɔli jijɔ, bo sɔ ɛhwɛ a sɔ kɛ-ɛ. ⁴ Na e mɔ do hu ɛhwɛ zɔn acowe do we le ŋukɔnɖiɖe ɖokpo lɔ mɛ can, bo mɔ trɔ va kɔnwe zɔn acowe ke, bo lɔ tun: "Ko ɖoli jijɔ", o ɖo na sɔ ɛhwɛ a sɔ kɛ-ɛ!» ⁵ Ɛmɛdindɔn lɛye lɔ na Xwetɔ lɔ tun:« Do xɔse xɔse ji na mi.» ⁶ Xwetɔ lɔ bo lɔ na ye tun:« Na mi ɖo xɔse ovi ɖe ɖi tinkun sisɛn kete-kete ha, mi na va lɔ na otin xin tun, "hɔn aɖɔ sɔn gunmɛ a bo ve jɛ ɛxu mɛ" e bo na nyi wiwasi ɖi ke na mi lɔ ɖo ha. ⁷ Yesu lɔ na ye tun:« Mɛnɛ lɛ le mia mɛ, bo na lɔ na odansɔvi etɔn ke nɔ lɛ ogle ni alo ke nɔ kpɔn kanlin ye ji ni-i, le hwekenu na e na lɛkɔ sɔn glegbe tun, "Va bleŋu, xinnɔnyi a bo ɖu onu?" ⁸ E ko nyi tun e na va lɔ ni-i tun, "Ɖa onu ɖe na na ma ɖu, sɔ onu do a bo va sɔ odan na-a, gbɔɔn do jɛ hwekenu na ko na ɖu nu bo na nu ɛxin vɔ. E xin we godo, o mɔ va ɖu onu a bo nu ɛsin?" ⁹ Na odansɔvi lɔ wasi onu ke ye dɔn-e vɔ, oga etɔn na va do ɛkpɛ ni-i wɛɛ? ¹⁰ Ɖemɔ ke wɛ e le ɖo na miye can, na mi wasi odan ke ye dɔn mi bisese vɔ, mi na lɔ tun: "Odansɔvi vɔvɔ wɛ mi nyi. Onu ke mi ɖo na wasi wɛ mi wasi."» ¹¹ E va jɛ tun, hwekenu na Yesu o si-in Jeluzalɛmu nɔ, e gbɔn Samali kpo Galile we ode ji. ¹² Ke e ɖyɛ otta ɖe mɛ, gudunɔ owo ɖeye va kpee. Ye bo tre le dindɛnnu le e wu ¹³ bo jɛ axwa do ji tun:« Yesu, cica onukplan-ɛmɛtɔ, kpɔn dɔŋuɖunu na mí!» ¹⁴ Ke Yesu kpɔn ye e lɔ na ye tun:« Mi ve sɔ mia ɖe a sɔ xlɛ avɔsantɔye.» Hwekenu na ye le mɔji bo sɔn nɔ, ye va kpɔn adɔngigɔ. ¹⁵ Kena mɛɖokpo va kpɔn tun adɔn he tɛye mɔ gɔ, e va lɛkɔ, bo jɛ Mawu kanfu ji kpo axwa kpo. ¹⁶ E bo va xwi bo wle afɔ na Yesu, bo do ɛkpɛ ni-i. Samalitɔ wɛ e nyi. ¹⁷ Yesu bo va yi ogbe ni tun:« Mi mɛ owo lɛye bisese hwɛn kpɔn adɔngigɔ wɛɛ? Fye lɛ ɛmɛ acɛnnɛ gbokpwe lɛye le? ¹⁸ Mɛ ti hɔn mɔ le bo na va do ɛkpɛ na Mawu bɔ do jonɔ ke lɔ wu wɛ? ¹⁹ E xin bo va lɔ ni-i tun:« Cite a bo sɔn; xɔse tɔwe gɔ adɔn na we.» ²⁰ Falizitɔye va kan Yesu se tun: « Ogan nɛ mɛ lɛ xɔluɖuɖu Mawutɔn lɔ na va ja, Yesu bo ɖo e wu na ye tun:« Xɔluɖuɖu Mawutɔn lɔ hɔn va nɔ ganna-ganna. ²¹ Ye ko mɔ va lɔ nɔ tun: "mi kpɔn-ɛ i xɛn yi ke", alo "mi kpɔn-ɛ i xɛn xin daan!" Ɖo xɔluɖuɖu Mawutɔn lɔ o le mia we dodo mɛ.» ²² E xin we godo, Yesu lɔ na onukplanvi etɔnye tun:« Azan ɖeye o gbɔnnɔ, mi bo na va jlo na kpɔn gbɛtɔ we vi lɔ we azan ɖokpo vɔvɔ, vɔ mi ko na va kpɔn-ɛ. ²³ Ye bo na va lɔ na mi tun: "Mi kpɔn blɛdaan! mi kpɔn bwɛ!" Vɔ mi ko tɔn gaji, mi ka do wedun le ɛtɛ na ye, ɖo, ²⁴ ɖi kena oju nɔ ɖe abi mlanŋu ɖo ha le jiŋukunsin le akpa ɖe ji a do va yi akpa bu ji, ɖemɔke wɛ e na nyi le gbɛtɔvi lɔ we azan gbɛ. ²⁵ Vɔ e ɖo na ɖu aya susu gbɔxwe, jijimɛvi gbɛtɔtɔn kiye bo na gbɛɛ. ²⁶ Ɖi kena e va jɔ ɖo le Nɔwe we hwenu ɖo ha, ɖemɔke we e na va nyi ɖo le gbɛtɔvi lɔ we azan gbe. ²⁷ Ye na ɖu onu nɔ, a bo nu nɔ, bo ɖe nyɔnu nɔ, bo sɔ vikpɛ yetɔnye sɔ na osu nɔ, gbɔɔn do jɛ hwekenu na Nɔwe va ɖyɛ tɔjihun lɔ mɛ (wɛ ɛsin lɔ bo va va bo gɔ gbɔɔn bo gu okun na ye mɛ bisese.) ²⁸ E na mɔ le ɖi Lɔtu we hwenu ha, ye na ɖu onu nɔ, a bo nu nɔ, a bo xɔ onu nɔ, a bo san onu ye nɔ, a bo do ɛjinukunye nɔ a bo gba oxɔye nɔ. ²⁹ Vɔ gbekegbe na Lɔtu tɔn le Sodɔmu, ozo we oju ɖe va ja sɔn jiŋukunsin bo va gu okun na ye lmɛ bisese. ³⁰ Ɖemɔke wɛ e na va nyi ɖo le gbekegbe na gbɛtɔ we vi lɔ na va ɖe eɖe sɔ xlɛ gbɛtɔye. ³¹ Le azan xin lɔ gbe, na ɛmɛ kena le oxɔta ni ka va tun he a mɔ jɛte a do va bɛ agban hetɛyee le xwegbe. Mɛ ke le glegbe can ni ka va tun he ma gbɔn va xwegbe can. ³² Mi flin onu ke jɔ do Lɔtu osyɔ ji. ³³ Mɛ ke na ba na hwlɛn ɛgbɛ etɔn, e na bu-i, vɔ mɛ ke ba na bu-i na kpɔn hwlɛngan. ³⁴ Ko o lɔ na mi nɔ, le ozan xin mɛ, ɛmɛ owe na va hlɛnnyi le batin ɖokpo lɔ ji. Ye bo na va sɔ mɛɖokpo a bo jo mɛɖokpo do. ³⁵ Nyɔnusi owe na va li owɔ nɔ, ye bo na sɔ mɛɖokpo a bo jo mɛɖokpo do. ³⁶ (Ŋusunglo owe na va le glegbe, ye bo na va sɔ mɛɖokpo a bo jo mɛɖokpo do.) ³⁷ Kena onukplanvi lɛye se xin lɔ, ye va kan-ɛ se tun:« Fye lɛ, Xwetɔ?» E bo ɖo e wu na ye tun:«fi ke na onukukuye le, blɛ wɛ aklasuye nɔ kple do.»