^{1 2} I wɛ Yesu lɔ na onukplanvi etɔn tun,:« Dahwe dɔkunnɔ ɖe le, bo ɖo onujikpɔntɔ ɖe. Ɛmɛye bo va jɛ ɛhwɛ ni tun onujikpɔntɔ lɔ mɔ zan onu etɔnye nɔ ɖejan-ɖejan. E bo va yɔ-ɛ, bo lɔ ni-i tun: "Oxo nɛ xin lɛye na ko se do wu we nɔ? Va jo akɔnŋuta na do ke na o zan onu lɛye ɖo, ɖo hɔn mmɔ kpewu na nyi onujikpɔntɔ tɛye." ³ Onujikpɔntɔ lɔ bo lɔ le eɖe mɛ tun, Xwetɔ tɛye hɔn mɔ jlo na ma nɔ onu etɔnye nu, naɖe ko na hɛn ɖo syɛ? Ogledan wɛ ko na ve wa? Ko hɔn ɖo hɔnhlɔn etɔn, ŋunya na waa na ma nyi onubyɔɖutɔ. ⁴ E nyɔ, ko nyɔ onu ke na ko na wa, e xin na xwetɔ tɛye na le dan mɛ, ɛmɛ ɖeye mɔ le a bo yi-u do oxwe yetɔn ye gbe." ⁵ I wɛ e yɔ ɛmɛ ke ɖu axɔ do xwetɔ etɔn lɛye, ɖe kplɔ ɖe do, bo lɔ na ɛmɛ tantɛntɔn tun: "Axɔ nɛmu lɛ o ɖu do xwetɔ tɛye? E lɔ bo ɖo e wu ni-i tun: ⁶ « Ami kpinkpan kanwe ko (100) wɛ ko ɖu do-e.»" Onujikpɔntɔ lɔ bo lɔ ni-i tun: "Yi wema ke a bo xinnɔ nyi a bo wlan kanɖe ko (50). ⁷ " Onujikpɔntɔ lɔ mɔ kan mɛ bu se tun: " Nɛmu lɔ oɖu do xwetɔ teye." E lɔ bo lɔ tun, "Yɛvo wɔ we okun gannu kanwe ko (100)". E bo lɔ na e lɔ tun: "Sɔ wema tɔwe a bo wlan kanwe (80)". ⁸ Xwetɔ lɔ bo kanfu wu onujikpɔntɔ ogbejinɔtɔ do ke e ɖe bibi we afɔ ɖo. Ɖo ɛgbɛ ke mɛ we vikpɛye, ye nɔ bi le onuwiwa yetɔnye mɛ kpan ŋkɔn yeɖeye sɔ hugan kinklɛn mɛ we vikpɛye. ⁹ Yesu bo lɔ tun ko lɔ na mi nɔ tun, mi zan dɔkunnu ke na mi ɖo do gbɔn ɛmɛ blɛɖu mɛ lɛye a do ɖo hadwe, e xin na dɔkunnu xin lɛye mɔ va vɔ can, ye mɔ va yi mi do tɛnxo mavɔmavɔ ye mɛ. ¹⁰ Ɛmɛ ke nɔ gbeji le onu ovi ye mɛ, e mɔ nɔ gbeji le onu susuye mɛ, ɖemɔke wɛ ɛmɛ ke hɔn nɔ gbeji le onu vitwe ye mɛ hɔn kpewu na mɔ nɔ gebji le onu susu ye mɛ. ¹¹ Na mi hɔn kpe bo nɔ gbeji le dɔkunnu ke na mi blɛ ɛmɛɖu bo do yi ye mɛ, mɛnɛ lɛ na ɖe oji do mia wu a bo sɔ dɔkun jɔ dɔkun a bo sɔ do asi na mi? ¹² Na mi hɔn kpewu na nɔ gbeji le ɛmɛ bu ye we onuye mɛ, mɛnɛ lɛ na sɔ mitɔn sɔ na mi. ¹³ Ɖo odansɔvi ti hɔn kpewu na sɔ odan na xwetɔ owe do kpɔkpɔ, ɖo e na va gbɛ owan na ɛmɛ ɖokpo, a bo yi owan na mɛ ɖokpo, alo e na wle byo na mɛ ɖokpo, a bo do vwɛ na mɛ ɖokpo. Mi hɔn kpewu na wa odan na Mawu kpo dɔkun kpo do kpɔ.» ¹⁴ Falizitɔye bo se oxo xin lɛye nɔ, bo ko Yesu nɔ, ɖo ye yi owan na oho din. ¹⁵ E bo lɔ na ye tun:« Mi ye mi nɔ kpɔn miaɖe ye le gbɛtɔye we ŋukɔn ɖi ɛmɛ jijwɛ ye ha, vɔ Mawu bo nyɔ oji miatɔnye ganji. onu kena gbɛtɔye nɔ do kpɔn onu nywɛ a bo ɖo sisi na wɛ Mawu nɔ do kpɔn onu ke xyɛwu le ŋumɛ etɔn. ¹⁶ Onu ke na Mɔyizi we osɛn kpodo onu ke oxolɔɖenyitɔ Mawutɔnye lɔ ye wɛ le ote gbɔɔn do jɛ hwekenu na Jan Mawu we ɛsinlɛn-ɛmɛtɔ lɔ do va. Vɔ sɔn hwexinnu, ye nɔ jla Mawu we xɔluɖuɖu lɔ we ɛwɛn nywɛ lɔ nɔ, ɛmɛ susu bo nɔ do hɔnhlɔn nɔ a do ɖyɛ emɛ. ¹⁷ E na fa na jiŋukunsin kpo nyidan kpo na do va yi, vɔ ɛxwi ɖokpo tete hɔn kpewu na tutu le Mawu we osɛn ke nyi wiwlan lɛye mɛ. ¹⁸ Mɛɖe kpokpwe ke gbɛ osyɔ bo ve ɖe nyɔnu bu, e do afɔgbe alo mɛ ke ve ɖe nyɔnu ke gbɛ oswɔ can do afɔgbe. ¹⁹ Dahwe dɔkunnɔ ɖokpo le bo nɔ do awu jɔ awu ke vɛho taŋu ye, a bo nɔ ɖu agɔ nɔ le ŋukɔnɖiɖe-ŋukɔnɖiɖe do dɔkunnu susu ke e ɖo ye wu. ²⁰ Dahwe ayanɔ ɖokpo bo le ye bo nɔ yɔ-ɛ tun Laza e bo hlɛnnyi le agbo etɔn ji, bo gɔ kpo abi le goto, ²¹ e bo nɔ va jlo tun he a mɔ ɖu onuɖukyin ke nɔ flɛ do dɔkunnɔ lɔ we tavo gɔ, na e le blɛ lɔ, ovunye mɔ nɔ va ɖiɖɔ abi lɛye mɛ ni-i nɔ. ²² E va jɔ wɛ ayanɔ Laza lɔ va ku wɛ Mawu we ɛwɛndotɔye va kplɛ do siin Ablaxamu we akɔnmɛ. Dɔkunnɔ lɔ can bo va ku ye bo ɖi do yɔgun mɛ. ²³ Le kutomɛ, dɔkunnɔ lɔ va se vivɛ nɔ taŋu. E bo va kɔ okɔetɔn bo va kpɔn Laza le akɔnnu na Ablaxamu. ²⁴ E bo va je axwa do ji bo lɔ nɔ tun: "Otɔ Ablaxamu, kpɔn dɔŋuɖunu na a bo ɖo Laza dodan na ni a do do lɔvi etɔn ɖokpo ɛsin mɛ a bo va ja do ɛdɛ ji na-a, ɖo ko se vivɛ nɔ le ozo ke mɛ nɔ di-in." ²⁵ Vɔ Ablaxamu bo va yi ogbe ni-i tun: "Ovi tɛye, flin tun le ɛgbɛ hwenu tɔwe, o ɖo dɔkunnu susu vɔ Laza ko ɖo ti bo nyi ayanɔ. Vɔ syɛ, e kpɔn akɔnfifa nɔ, lɔ o bo va se vivɛ nɔ. ²⁶ Ke mɔ bɔ do e wu wɛ nyi tun ogun ɖaxo ɖe le dodomɛ na mi, i wɛ mɛ ti hɔn kpewu na ta ogun lɔ a do va mia kɔn, ɖemɔke mɛ ti ko kpewu na mɔ na sɔn miye kɔn a bo mɔ va miye can kɔn." ²⁷ Dɔkunnɔ lɔ bo lɔ tun: "Ko ɖe kuku na we, otɔ Ablaxamu, ɖo-e dodan didaye we xwegbe ²⁸ ɖo ko ɖo nɔvi ŋusunglo atɔɔn na ni a ve tɔ ogbe wu ye, na ye can gba ni ko va va ofi ke na vivɛsise le ke."» ²⁹ Vɔ Ablaxamu va lɔ ni-i tun: « Mɔyizi kpo Mawu we oxolɔɖenyitɔye le ye kɔn, ye ni se oxo keye na ye lɔ na ye nɔ." ³⁰ Dɔkunnɔ lɔ mɔ va lɔ nɔ tun: "Ee wo, Otɔ Ablaxamu, e nyi tun ɛme ɖe fɔn sɔn ɛmɛ kukuye mɛ bo ve lɔ oxo na ye, ye na va ɖɔli jijɔ." ³¹ Vɔ Ablaxamu lɔ ni-i tun: "Na ye hɔn ɖo oto wu Mɔyizi kpo oxolɔɖenyitɔye, na ɛmɛɖe mɔ do fɔn sɔn kutomɛ mɔ ve lɔ na ye can, ye hɔn kan do e ji nɔ."