¹ Takwɛjɔtɔ susu kpodo onu nyinylawatɔ susu tɛkpɔ Yesu bo na do ɖo oto wu-i. ² Falizitɔye kpo osɛnkplan-ɛmɛtɔye bo hlu bo lɔ oxo do e wu nɔ tun: « Dahwe ke e nɔ yi onu nyinylawatɔye gangi a bo ɖu onu kpo ye.» ³ I wɛ Yesu do olo ke na ye tun: ⁴ « Mɛnɛ lɛ le mia mɛ na e ɖo lingbɔ kanwe-ko (100), ɖokpo bo va bu le e wu, e ko na va jo lingbɔ kanwe-fɔtɔn-nukun-ɛnɛ gbokpweye do gbɛfaa ji, a bo ve ba ɖokpo lɔ gbɔɔn a do jɛ hwekenu na e na bo kpɔn-ɛ do? ⁵ Na e kpɔn-ɛ, oji nɔ jɔ-ɛ, e bo nɔ kɔ-ɛ do kɔgbe. ^{6 7} Na e gbɔn va xwegbe, e nɔ yɔ hadwe etɔnye kpodo ɛmɛ ke le oxwe xa ni-i ye, a bo lɔ na ye tun: "Mi kpɔn jijwɛ kpo ɖo ko kpɔn lɛngbɔ tɛye ke bu saan lɔ." Ko o lɔ na mi nɔ tun ɖemɔha ke wɛ jijwɛ nɔ nɔ onyi ɖo le sɛxwe le hwekenu na onunyinylawatɔ ɖokpo gee na ɖɔli jijɔ etɔn, e na hugan wu jijwɛ ke na nɔ blɛ *do ota na ɛmɛ kanwe-fɔtɔn-nukun-ɛnɛ ke nyi emɛ jijwɛ ye. ⁸ Yesu mɔ yi e ji bo lɔ na ye tun, alo ŋunusi e nɛ le le, na e ɖo oho owo, na ɖokpo bo va bu le e wu, e ko na ta zogbɛn a bo za oxwe lɔ gbe bi, a bo kan-ɛ nywɛɖe, gbɔɔn a bo kpɔ-ɛ? ⁹ Na e va kpɔn-ɛ, e mɔ yɔ hadwe etɔnyeɛ kpodo ɛmɛ ke na le oxwe etɔn we axa ye, a bo lɔ na ye tun: "Mi kpɔn jijwɛ kpo-o, ɖo ko kpɔnn oho ke bu do saan lɔ." Ko o lɔ na mi nɔ tun: ¹⁰ "Ɖemɔha ke wɛ ɛwɛndotɔ Mawutɔnyenɔ kpɔn jijwɛ ɖo, do onunyinylawatɔ ɖokpo gee ke ɖɔli jijɔ wu.» ¹¹ Yesu mɔ lɔ na ye tun:« Dahwe ɖe ɖo ovi ŋusunglo owe, ¹² vikpɛvyu lɔ bo va lɔ na otɔ tun "Didaye, sɔ cinnɔ ke ɖo na nyi tɛye a sɔ na-a." Wɛ otɔ va ma cinnɔ etɔnye na ye mɛ owe lɛye. ¹³ Azan ɖe ma jɛ mɛ, vikpɛvyu lɔ bo va sa cinnɔ etɔn lɛye bisese, bo va siin oto dindɛn ɖe mɛ, bo ve sɔ oho lɔ bo do zan ɛgbɛ ɖejan-ɖejan, oho lɔ bo va vɔ bi. ¹⁴ Ke e zan oho lɔ bi vɔ hin, xovɛ ɖaxo ɖe va tɔn le oto lɔ mɛ, e bo va jɛ aya ɖu ji. ¹⁵ E bo gbɛ va jɛ odan wa ji na dahwe ɖe le oto lɔ mɛ kena nɔ sɔ-ɛ ɖodan ogle etɔn mɛ na ni a do ve na onuɖuɖu wu agluzavi ye. ¹⁶ Xovɛ nɔ ci-i gbɔɔn e bo nɔ ba na ɖu agluza lɛye we nuɖuɖu, vɔ mɛ ti ko nɔ va ni-i. ¹⁷ E va jɛ tamɛ bu kpɔn jio bo va lɔ tun: " Odanwatɔ ke na le didaye kɔn ye, bisese wɛ nɔ kpɔn onuɖuɖu, a bo ɖu gbɔɔn e mɔ drɔn, vɔ blɔ xovɛ bo va hu le bwɛ nɔ. ¹⁸ Ko na trɔ siin didaye kɔn, a bo lɔ ni-i tun: ¹⁹ "Didaye, ko jɛ agɔ do Mawu, bo jɛ agɔ do we. Ko hɔn mɔ jɛ na o na mɔ yɔ tun ovi tɔwe. Yi-u ɖi odansɔvi tɔwe ɖokpo ha." ²⁰ I wɛ e jɛ mɔ bo bɛ otɔ lɔ de we nu. Hwekenu na e le dindɛnnu bo gbɔnnɔ, otɔ lɔ kpɔn-ɛ dodan, onu etɔn bo ɖu dɔnu ni-i, e bo do wedun bo ve xotɛ-ɛ, bo kisi ni-i. ²¹ Ovi lɔ bo lɔ ni-i tun: "Didaye, ko jɛ agɔ do Mawu, bop jɛ agɔ do we. Ko hɔn mɔ jɛ na o na yɔ tun ovi tɔwe." ²² Vɔ, otɔ lɔ bo lɔ na odansɔvi etɔnye tun:" Mi ya wu a bo ve sɔ awu gaga ke nyɔhwɛn hugan wu bisese lɔ va, na mia do ni-i, mi mɔ sɔ alɔganvi a bo do ni-i, a bo do fɔkpa ni-i. ²³ Mi ve sɔ nyibu ke ɖo olan ganji lɔ a bo hwi, na mia ɖu-i, a bo kpɔn jijɛ. ²⁴ Ɖo ovi ke, e le na ɖi e o ku san ha, e bo va trɔ va ɛgbɛ.E bu san, syɛ ko bo va kpɔn-ɛ." Ye bo va jɛ agɔ ɖu ji. ²⁵ Vɔ, ovi tantɛn etɔn lɔ bo le nugbyo le hwexin lɔ nu, ke e lɛ kɔ bo tɛkpɔ oxwe lɔ gbe, e se onu xixo kpo oxwe ɖuɖu nɔ. ²⁶ I wɛ e yɔ mɛɖokpo le odansɔvi lɛye mɛ, bo kan-ɛ se tun: ŋunɛ o jɔ nɔ ja. ²⁷ Odansɔvi lɔ bo ɖo e wu ni tun: "Nɔvwe wɛ gbɔn, i wɛ didawe hu nyibu ke ɖo olan ganji lɔ, ɖo e kpɔn-ɛ tun e mɔ le nywɛɖe do gbɔn." ²⁸ Ke na e se oxo xin lɛye, homɛnsiin taŋu, e ko ba na ɖyɛ oxwe lɔ gbe, vɔ otɔ bo va tɔ bo ɖekuku ni-i tun ni mɔ ɖyɛ oxwe lɔ gbe. ²⁹ I wɛ ovi tantɛn lɔ lɔ na otɔ tun: " Sɔn oxwe nɛmu xɛn ko wa odan na we nɔ, ko ko gbɛ tonu sise na we kpɔn, vɔ o hɔn na ogbɔvi ɖokpo tete wu na ma do ɖu agɔ kpo hadwe tɛyee kpɔn can. ³⁰ Vɔ, ke ovi tɔwe ke lɔ gbɔn syɛ, e lɔ ke zan dɔkun towe kpo kpaconɔye kpo, o va hu nyibu ke do olan ganji ni-i." ³¹ I wɛ àotɔ lɔ ni-i tun: "Ovi teye, lɔ o le kɔnye tɛgbɛ, onu bisese wɛ nyi tɔwe. ³² Vɔ mi ɖo na ɖu agɔ, a bo kpɔn jijwɛ, ɖo nɔvwe ke lɔ, e le na ɖi tun e o ku san ha, bo va trɔ va ɛgbɛ, e bu san, syɛ, ko bo va kpɔn-ɛ."»