¹ Le Jwifutɔye we gbɔjwɛzangbe ɖe gbe, Yesu ɖyɛ Falizitɔye we oga ɖe we xwegb a do ɖu onu, wɛ ɛmɛ ke na le oxwe lɔ gb e ye bo hyɔ bo kpɔn-ɛ nɔ. ² Dahwe ɖe kena gigɔdɔn o do tagba na nɔ le ŋukɔn ni-i. ³ Yesu yi oxo bio lɩ na osɛnkplanɛtɔye kpodo Falizitɔye tun:« osɛn miatɔn na ogbe tun ye mɔɔ gɔ adɔn na emɛ le gbɔjwezangbe alo e gbɛ? ⁴ Ye bo bɔ onu xwii. Yesu bo ɖo alɔ ota na adɔnnɔ lɔ, bo gɔ adɔn ni-i, bo lɔ ni tun ni mɔ va siin xwegbe. ⁵ E xin we godo, Yesu bo lɔ na ye tun:« Mɛnɛ lɛ le mia mɛ wɛ na ovi etɔn alo nyibu etɔn flɛ jɛ dotɔ mɛ le gbojwɛzangbe e ko na ɖetɔn zɔnɖokpo?» ⁶ Ye hɔn kpewu bo ɖo oxo ti oxo xin lɛye wu. ⁷ Kena Yesu kpɔn ɛmɛ kena ye yɔ lɛye xinnɔ nyi do okpo tantɛntɔn lɛye ji nɔ ɖo, e do olo ke na ye bo lɔ nɔ tun: ⁸ « E nyi tun ɛmɛ ɖe va yɔ mi tun mi mɔ va alɔ wiwle we tɛnxo ɖe, mi ka nɔ xinnɔ onyi do zinkpwe tantɛntɔye ji, tanyɔ jonɔ ke owi le ota na hu mi tɛŋu gbɔn nɔ. ⁹ Hwekenu na ɛmɛ ke yɔ mi mɛ bisese lɔ na va, e na va lɔ na we tun: cite a bio sɔ tɛnxo tɔwe lɔ sɔ na mɛke,» kpo ŋuyan kpo, o bo na va cite a bo ve xinnɔ tɛnxo godo tɔn ke drɔn ji. ¹⁰ Vɔ na ye yɔ we, nɔ xinnɔ nyi le okpo kpotwi lɔ ji, e xin, hwekenu na mɛ ke yɔ we lɔ na va, e na va lɔ na we tun:« Hadwe tɛye, cite a bo v a xinnɔ tɛnxo adodwe mɛ le ŋukɔn.» Hwexinnu e na nyi owi le ota na we le i kpodo mɛ ke na xinnɔ onyi le tavo dokpo lɔ ji bo do va ɖu onu nɔ ye. ¹¹ Ɖo, ɛmɛ ɖekpokpwe ke na ba na kɔ eɖe, ye na ziin do odo, ɛmɛ ɖekpokpwe ke na sɔ eɖe sɔ hwe, ye na kɔ-ɛ do oji.» ¹² Le e xin we godo, Yesu bo va lɔ na ɛmɛ ke yɔ ɛmɛ lɔ tun:« Na o ba na na onuɖuɖu linɖɔnmɛtɔn alo hwedotɔn wu ɛmɛye nɔ, ka mɔ nɔ yɔ hadwe tɔweye, alo nɔvweye alo ɛmɛ tɔwe alo hawetɔ dɔkunnɔye, ɖo ye can ye na va yɔ we , e bo na va nyi xɔtu na on u kena na we. ¹³ Vɔ na oɖo agɔɖuɖu ɖaxo ɖe, yɔ ayanɔye, afɔgbodonɔye, tɛkunɔye kpodo ŋuvanɔye. ¹⁴ Ɖo e xin wu, o na nyi nyɔnanɔ, ɖo yee hɔn kpewu na va tu axɔ etɔn na we. Mawu wɛ na tu axɔ xin lɔ na we le hwekenu na e na fɔ ɛmɛ jijwɛye sɔ oku.» ¹⁵ Ke ye se oxo xin lɛye vɔ, le mɛ ke le ofi lɔ bo do ɖu onu nɔ ye mɛ, ɛmɛɖe lɔ na Yesu tun:« Nyɔnanɔ wɛ nyi mɛ ke ɖu onuɖudu etɔn le Mawu we xɔluɖuɖu mɛ!» ¹⁶ Vɔ Yesu bo lɔ ni tun:« Dahwe ɖe ɖo oxweɖudu, bo yɔ ɛmɛ susu. ¹⁷ Hwekenu na onuɖuɖu lɔ va le gbesisɔ, e va ɖo odansɔvi etɔnye ɖodan ɛmɛ ke e yɔ lɛye bo lɔ na ye tun, " Mi va ɖo onu bi o le gbesisɔ syɛ." ¹⁸ Vɔ ye mɛ bisese bo jɛ ogbe byɔ ji ɖe kplɔ ɖe do. Ɛmɛ tantɛntɔn lɔ tun: " Ko xɔ ogle ɖe syɛ ko bo ɖo na ve kpɔn-ɛ. Ko ɖe kuku na we, sɔ kɛ-ɔ. ¹⁹ " Ɛmɛ bu bo lɔ tun: "Ko xɔ nyibu atɔn a do lɛ ogle, ko bo ɖo na ve kpɔn ye, ko ɖe kuku na we, sɔ kɛ-ɔ. ²⁰ " Ɛmɛ bu ke bo mɔ lɔ tun: "Syɛ wɛ ko ɖe nyɔnu yɔyɔ, i wɛ dɔn ko hɔn do kpewu na va." ²¹ Kena odansɔvi lɔ gbɔn, e lɔ oxo xin lɛye bisese na Xwetɔ etɔn lɔ, i wɛ aɖi wle Xwetɔ lɔ, e bo lɔ na odansɔvi etɔn lɔ tun: " Ya wu a bio yi dogbaye kpodo toxo we omɔye ji, a bo kplɔ ayanɔye, afɔgbodonɔye, ŋuvanɔye kpo tɛkunɔye. ²² Odansɔvi lɔ va yi ogbe na Xwetɔ lɔ tun: "Xwetɔ, Onu ke na o tun ko mɔɔ wasi lɔ, ko wasi gbɔn tɛnxo bo mɔ drɔn." ²³ Xwetɔ lɔ bo mɔ lɔ na odansɔvi lɔ tun: "Yi oglemɔ ye ji kpodo ɛjikpa ye we axa, a bo zin ɛmɛye ji na ye a do ɖyɛ oxwe tɛye gbe na ni a do gɔ. ²⁴ Ɖo ko lɔ na mi nɔ tun lɔ byo, ɛmɛ ke ko yɔ san ye mɛ ti hɔn tɔ onu wu onu ɖuɖu tɛye le ye mɛ nɔ.» ²⁵ Ɛme susu geɖe-geɖe bo zɔn omɔ kpo Yesu nɔ, e bo va trɔ okɔ bo lɔ na ye nɔ tun: ²⁶ « Na ɛmɛ ɖe va kɔn ye e ko yi owan na hugan wu otɔ, onɔ, osyɔ, vikpɛ etɔnye, nɔvyɔ ŋusungloye, nɔvyɔ nyɔnusiye alo elɔ tete ŋutɔ, we ɛgbɛ can, e hɔn kpewu na nyi onukplanvi tɛye. ²⁷ Na mɛ ɖe hɔn kɔ otinsogagban etɔn bo xodo, e hɔn kpewu na nyi onukplanvi tɛye. ²⁸ Ɖo ɛmɛ, na e va gba sanŋu ɖe nɔ, e ko nɔ xinnɔ onyi a bo bu tamɛ kpɔn do oho ke e va zan nɔ wu, a do kpɔn tun he na kpewu a hu e nu jaa. ²⁹ Na e hɔn nyi ɖemɔha e bo ɖo dodwe, vɔ e ko mɔ va kpa sanŋu gbigba, mɛ bisese ke kpɔn-ɛ ɛ mɔ a na jɛ kiko-e ji, ³⁰ a bo lɔ tun: "Dhwe xin jɛ sanŋu gbigba ji e ko mɔ va hu e nu." ³¹ Alo xɔlu nɛ lɛ le, na e va tɔn ahwan xɔlu bu nɔ, e ko na xinnɔ nyi a b o gbeje kpɔn tun sɔja akpo owo (10 000) tɛyee na kpewu na va fu ahwan kpo xɔlu ɖelɔ we sɔja akpo oko (20 000) wɛɛ? ³² Na e hɔn kpewu, hwekenu na ɛmɛ ɖe lɔ le dindɛn nu bo gbɔnnɔ, e na dɔn afɔsɔɖpotetɔ etɔn ɖodan-ɛ, a bo byɔ-ɛ tun hiye a mɔ wasi fifa. ³³ Ɖemɔ ke wɛ, na ɛmɛ ɖe le mia mɛ, e ko ɖe okɔ le onu ke na e ɖo ye bisese wu, e hɔn kpewu na nyi onukplanvi tɛye. ³⁴ Onu nywɛ wɛ nyi ojɛ, vɔ na ojɛ lɔ bu vivi etɔn ɖe, naɖe lɛ ye na hinɖo a do do vivi lɔ e mɛ? ³⁵ E hɔn mɔ nyɔ na nyidan gbɔɔn do nyɔ na ɛjinukunye can. Ye nɔ sɔ-ɛ sɔ kunhun do gaji. Na mɛ ke ɖo oto bo nɔ se nu ye ni se onu.»