¹ Le hwexinlɔ nu, ɛmɛ ɖeye va lɔ oxo na Yesu do kena Pilati ɖe ogbe ye bo hu Galiletɔ ɖeye, le hwekenu na ye san vɔ na Mawu nɔ. ² Yesu bo ɖo e wu na ye tun:« mi bu-i nɔ tun Galiletɔ ke ye hu xin lɛye nyi onu nyinylawatɔ hugan Galiletɔ gbokpwe ye wɛ? ³ Eewo! Ko o lɔ na mi nɔ tun ye hɔn hu ehwɛ hugan wu ye. Vɔ na mi hɔn dɔli jijɔ, mi na crɔn ɖi ye ha.» ⁴ Mi bu-i tun ɛmɛ fɔtɔn nukun atɔn keye ji na oxɔ kikɔ ke le Silowe mu jɛ, ye bo ku, ye nyi onu nyinla wasitɔ hugan wu ɛmɛ ke le Jeluzalɛmu ye ha wɛ? ⁵ Ee wo, ko lɔ na mi nɔ. E nyi tun mi hɔn ɖɔli jijɔ, mi ye can mi na va ku ɖi ye ha.» ⁶ E xin we godo Yesu mɔ do olo ke na ye:« Dahwe ɖe do figitin do vɛntin we ogle etɔn mɛ, e bo va va figi we sinsɛn lɔ gbɛn gbe vɔ e ko mɔ va kpɔn ti le otin lɔ ji. ⁷ I wɛ e lɔ na vɛnglejikpɔntɔ lɔ tun: "Kpɔn, e wasi oxwe atɔn xin gbɔn na ko do va figi gbɛn gbe le figitin ke ji nɔ vɔ ko ko kpɔn ti le e ji gbeɖe. Gbo-e tɛ. Ŋunɛ jɔ na o do jo-e do e bo yi tɛxo vɔvɔ le glegbe na a?" ⁸ Vɛnglejikpɔntɔ lɔ va yi gbe bo lɔ tun:« Xwetɔ, jo-e do na oxwe ɖokpo ke na ma kun ogun lɛ do-e, a bo bɛ odun do e mɛ. ⁹ E nyi e va sɛn okun le oxwe ke gbɔn nɔ mɛ, hun e nyɔ, vɔ na e hɔn va na sinsɛn, o mɔ va gbo-e tɛ!» ¹⁰ Yesu va kplan onu wu Jwifuye nɔ le okpletyɔn yetɔn le gbɔjwɛ zan yetɔn gbe. ¹¹ Nahwe ɖe bo le ofi lɔ ke na gbigbɔ nylakan do adɔn wu, e bo ɖo okpo e ko mɔ kpewu na jlɔ a bo nɔ ote gaga can. ¹² Kena Yesu kpɔn nahwe lɔ, e yɔ-ɛ bo lɔ ni-i tun:« Nahwe adɔn tɔwe gɔ. ¹³ Yesu bo va ɖo alɔ ota ni, zɔnɖokpo, e bo jlɔ, bo jɛ Mawu kanfu ji. ¹⁴ Vɔ e vɛ le okpletɛnxo lɔ we oga wu, ɖo Yesu gɔ adɔn na ɛmɛ le gbɔjwɛ zan gbe. I wɛ e lɔ na ɛmɛ lɛye tun ŋukɔn ɖiɖe atrekpo wɛ ye nɔ wa odan na. Mi va gɔ adɔn na ɛmɛye le azan xin lɛye mɛ e hɔn gbɔjwɛ zan gbe hwɛn. ^{15 16} Xwetɔ lɔ bo o e wu ni tun:« Ɛyɛmɛnuwatɔye wɛ mi nyi! Mɛnɛ lɛ le mia mɛ e ko kpewu na kplɔ osɔkɛtɛ etɔn a lo ŋibu etɔn do yi ɛsin nu gbe le gbɔjwɛ zan gbe? Nahwe ke lɔ ke nyi jiji mɛ vi Ablaxamutɔn kena gbigbɔ nylaka bla sɔn oxwe fɔtɔn nukun atɔn xɛn, e hɔn jɛ na ye na tun okan xin lɔ ni-i le gbɔjwɛ zan gbe wɛɛ?» ¹⁷ Kena Yesu lɔ ɖemɔha na ye mɛ ke cite kpanta wi nɔ ye vɔ, ŋunya wa ye mɛ bi, vɔ otogun lɔ bisese ye kpɔn jijwɛ nɔ do onu nywɛ kena e wasi nɔ ye wu. ¹⁸ Yesu bo va lɔ na ye nɔ syɛ tun:« Ŋunɛ wu lɛ xɔluɖuɖu Mawutɔn lɔ ci ɖi, alo ŋunɛ wu lɛ ye na sɔ jlɛ do? ¹⁹ Xɔluɖuɖu Mawutɔn lɔ, e ci ɖi ahwa kun ke na dahwe ɖe do do ɛjikpa etɔn mɛ ha e bo va nyi otin ɖaxo wɛ oxɛye va wasi adɔ yetɔnye do alwɛ etɔnye wu.» ²⁰ Yesu bo mɔ lɔ na ye tun:« Ŋunɛ wu lɛ ko na kpewu na sɔ xɔluɖuɖu Mawutɔn lɔ sɔ jlɛ do? ²¹ E ci ɖi kpɔnnɔtinkɛn ke na nahwe ɖe va kɔn do yevowɔ nyinya susu mɛ ha, owɔ nyinya lɔ bisese bo va fɔn jekee.» ²² Yesu hle Jeluzalɛmu we omɔ lɔ bo sɔn nɔ le omɔ ji e nɔ tre le ototaye kpo toxoye mɛ a bo do kplan onu wu ye nɔ. ²³ Ɛmɛ ɖe bo kan-ɛ se tun: « Xwetɔ, ɛmɛ ɖeye kpowu wɛ na kpɔn hwlɛngan?» E xin e bo va lɔ na ye tun: ²⁴ « Mi do hɔnhlɔn a bo gbɔn agbo ovii lɔ nu ɖo ɛmɛ susu na ba tun hiye a mɔ ɖyɛ e mɛ vɔ ye ko na va kpewu.» ²⁵ Hwekenu na mɛ ke ɖo oxwe lɔ na va tu agbo lɔ kpo cavi, mi na va ci gaji, a bo xuxu-i nɔ, a bo lɔ nɔ tun:« Xwetɔ, Xwetɔ, hun agbo na mi.» E bo ba va yi ogbe na ye a bo lɔ na ye tun:« Ko hɔn nyɔ mi, fye mi sɔn? ²⁶ E xin mi na va yi gbe ni-i tun:« Mi ɖu nu bo nu ahan kpo we, o bo mɔ kplan onu wu ɛmɛye le omɔ ye ji le toxo miatɔn mɛ.» ²⁷ E bo na va yi gbe na mi tun:« Ko lɔ na mi nɔ tun, ko mɔɔ nyɔ mi, ko ko mɔ nyɔ fi ke mi sɔn can. Mi tɛyi le wu ye, miye, onunyinylawatɔye.» ²⁸ Blɛ wɛ mi na vi avi le, a bo ɖu aɖu kunkun le hwekenu na mi na kpɔnb Ablaxamu, Izaki, Jakɔbu kpo Mawu we oxolɔɖenyitɔye bisese le xɔluduɖu Mawutɔn mɛ, vɔ, miye ye na va sɔ mi sɔ flɛn do agbo godo. ²⁹ Ɛmɛye na sɔn hwezɛdo, hweyixɔ, otagbe kpo afɔgbe, a bo yi tɛnxo ke mɛ na agɔɖuɖu le xɔluɖuɖu Mawutɔn lɔ mɛ. ³⁰ Hwexinnu, le mɛ ke na nyi kpotwi ye mɛ, ɖeye na va nyi tantɛn tɔn ye, demɔke ɛmɛ ke na nyi tantɛntɔnye, ɖeye na va nyi ɛmɛ kpotwi. ³¹ Hwekenu na Yesu o lɔ oxo xin ye nɔ, Falizitɔ ɖeye va bo va lɔ ni-i nɔ tun:« Lɛ le bwɛ a bo sin fi bu, ɖo xɔlu Elodu va hu we nɔ.» ³² Yesu bo ɖo e wu na ye tun:« Mi ve lɔ na dahwe xin ke nyi ɛmɛblɛɖutɔ ɖi owɔ ha tun:"Ko na nya gbigbɔ nyinyla ye nɔ, a bo gɔ adɔn na ɛmɛye le egbe kpo swɛ, sɔmɔ, ko na wa odan tɛye vɔ". ³³ Vɔ, egbe, swɛ kpo sɔmɔɔ ko na ɖo ŋukɔn yiyi le omɔ zinzɔn tɛye mɛ, ɖo e hɔn jɛ tun ye a hu oxolɔɖenyitɔ Mawutɔn le ofi bu ti zɛgbɔn Jeluzalɛmu wu. ³⁴ Jeluzalɛmutɔye! Jeluzalɛmutɔye! Mi nɔ hu Mawu we oxolɔɖenyitɔye, a bo tɔn ahwan wu ɛmɛ kena Mawu sɔ ɖodan mi ye gbɔɔn ye mɔ ku! zɔnnɛmu ɖe wɛ ko jlo na kple mi do kɔnye, ɖi kena goklonɔ nɔ kple vikpɛ etɔnye do axwe etɔnye gɔ ɖo ha, vɔ mi ko jlo. ³⁵ Kena e nyi ɖemɔha hun Mawu na jo oxwe miatɔn do na mi. Ma lɔ na mi tunmi hɔn mɔ kpɔn-ɛ nɔ gbɔn do jɛ hwekenu na mi na va lɔ tun: " donanɔ ẅe nyi ɛmɛ ke gbɔnnɔ le Xwetɔ Mawu we nyikɔ mɛ.