1 Le hwexinnu, ɛmɛ akpo donu nɛmu ɖe we va lɛ do Yesu, ye bo su gbɔɔn bo ɖo afɔ afɔji na yeɖeye nɔ, Yesu jɛ lilɔ ji na onukplanvi etɔnye ji tun:« Jɛ ŋukɔn mi cɔ miaɖe do kpɔnnɔ tinkɛn Falizitɔyetɔn wu, kena nyi ɛyɛmɛnu wiwa. 2 Onu ti hɔn le hwihwla e ko va jɛ gbaŋugba nɔ kpɔn gbeɖe, ɖemɔha ke onu ti hɔ le bibɛtyɔn na ye ko va nywɛ nɔ kpɔɔn. 3 I wɛ dɔn oxo ɖekpokpwe ke na mi nɔ lɔ le vuvlu mɛ, ye na se le kinklɛn nu. Ɖemɔha ke wɛ oxo kena mi na ɖekpa do lɔ le oxɔ miatɔn ye mɛ, ye na va jla ye le dogba ye ji. 4 Mi mɛ hadwe tɛye ye ko lɔ na mi nɔ tun , mi ka vɔ na ɛmɛ kena nɔ hu gbaza lɔ, ye ko kpewu na mɔ wa onu ti bɔ do e xin lɔ wu. 5 Ma xlɛ mi ɛmɛ kena mi ɖo na vɔ. Mi vɔ ɛmɛ kena kpewu na hu ɛmɛ a bo mɔ sɔ flɛn do ozo maci lɔ mɛ. Ɛɛn! Ko lɔ na mi nɔ tun lɔ byo, mi vɔ na mɛ xin lɔ. 6 Wisiwisi atɔɔn ye hɔn sa oho gan owe tete can? E le ɖemɔ co, Mawu bo nɔ kpe ŋukunsin do ɖokpo ɖokpo ye tɔn we wu. Oɖa kena le ota na mi ye can bi wɛ nyi xixlɛ. 7 Mi ka mɔ vɔ ɖo mi vɛ na Mawu hugan wu Wisiwisi ye. 8 Ko o lɔ na mi nɔ tun, mɛɖe kpokpwe kena na ɖekunnu na le ɛmɛye we ŋukɔn tun he mɔ nyi tɛye, gbɛtɔ we vi lɔ na ɖe kunnu ni-i le Mawu we ɛwɛndotɔ ye we ŋumɛ tun e mɔ nyi ɛmɛtɛye. 9 Vɔ ɛmɛ ɖe kpokpwe ke na gbɛ-ɔ le gbɛtɔye we ŋumɛ, bo can ko na va gbɛ-ɛ le Mawu we ɛwɛndotɔ ye we ŋumɛ. 10 Ɛmɛ ɖekpokpwe kena na va lɔ oxo ɖekpokpwe do gbɛtɔ we vi lɔ wu, ye na sɔ abo sɔ kɛ-ɛ, vɔ mɛɖe kpokpwe kena na va kɔn acɔn do Gbigbɔ Kinkwɛn wu, ye hɔn sɔ a sɔ kɛ-ɛ nɔ. 11 Hwekenu na ye na va kplɔ mi do yi kojo ɖo gbe na mi le okpletyɔn ye le agunkplɔtɔye kpodo otogaye we ŋukɔn, mi ka vɔ do kena mi na hwɛn ota miatɔn ɖo wu, alo oxo kena mi na va lɔ wu, 12 ɖo le ganxin lɔ mɛ Gbigbɔ Kinkwɛ na va kplan mi oxo kena mi na lɔ.» 13 Ɛmɛ ɖe le togun lɔ mɛ bo lɔ na Yesu tun:« cica onukplan-emɛtɔ, lɔ na nɔvye na ni a ma cinnɔ tɛye na.» 14 Yesu bo va yi gbe ni tun lɔ byo:« Dahwe, mɛ nɛ lɛ sɔ do ɖo ɛhwɛɖɔtɔ alo cinnɔ matɔ do mia nu?» 15 E bo mɔ lɔ na ye tun:« Mi ɖo ayi te; mi cɔ miaɖɛ do owanyiyi na dɔkunnu ɖiɖo wu, ɖo na gbetɔ mɔ do ɖo acɛ do dɔkunnu etɔnye ji can, e hɔn kpewu na ɖo acɛ do ɛgbɛ etɔn ji.» 16 Yesu bo va do olo ke na ye tun:« Dahwe dɔkunnɔ ɖe ɖo ogle, ɛji bo jɛ ni-i taŋu, 17 e bo va bu tamɛ nɔ tun:" Naɖe ko na na hɛn ɖo, ɖo bo hɛn hɔn ɖo ofi kena ko na bɛ ɛjinukun lɛye bisese do?" 18 E va lɔ le eɖe mɛ tun: "mi kpɔn onu kena ko na wasi xɛn nyi ke. Ko na hɔ ava tɛye-e a bo va wasi bu ke na hugan hu tantɛn tɔn lɛye, a bo va bɛ ɛjinukun tɛyee kpo dɔkunnu tɛyee do ɛmɛ. 19 "Ko mɔ va lɔ na okla tɛye tun: "okla tɛye, dɔkunnu susu le siwe syɛ, o na zan nɔ gbɔɔn na oxwe susu. Gbɔjwɛ, ɖunu, nu ahan, a bo ɖu ɛgbɛ." 20 Vɔ Mawu bo lɔ ni-i tun: "Dahwe oklenɔ ke, ozan ke mɛ ko na byɔ okla tɔwe wu we, onu ke na o bɛ ɖenyi xin lɛye, mɛ nɛ tɔn lɛ e na va nyi?" 21 Yesu bo va lɔ na ye tun ɖemɔha ke wɛ e na nyi na ɛmɛ ke nɔ kple dɔkun na eɖe, vɔ, e ko ɖo dɔkunnu ti le Mawu de.» 22 E xin we godo, Yesu bo va lɔ na onukplanvi etɔnye tun:« I wɛ dɔn ko do lɔ na mi nɔ tun miye mɔɔ ka mɔ bu tamɛ kpɔn do onu kena mi na ɖu a do nɔ ɛgbɛ, alo do gbaza miatɔn wu tun awu nɛ mi na do wu. 23 Ɖo ɛgbɛ ninɔ le vivɛɖe hu onu ɖuɖu, gbaza lɔ can bo le vivɛɖe hugan hu onu dido. 24 Mikpɔn canŋukpoliye, ye hɔ nɔ hwa onu, ye ko nɔ ɖe onu. Ye hɔn ɖo ofi kena ye nɔ bɛ onuɖuɖu do, ye ko nɔ ɖo ava, vɔ Mawu bo nɔ na ye onuɖuɖu. Miye mi hugan hu oxɛye zɔn nɛmu ɖe! 25 Mɛ nɛ lɛ le mia mɛ bo na kpewu a do oganxixo viɖe wu ɛgbɛ ninɔ etɔn ji do gbɔn tamɛ bu kpɔn etɔn wu? 26 Kena e nyi tun onu ovi xin vɔvɔ mi hɔn kpewu na wasi, ŋu ne jɔ na mi do bu tamɛ kpɔn nɔ na onu gbokpwe ye? 27 Mi kpɔn flawaye, ye hɔn nɔ wa odan ti, ye ko nɔ lɔn avɔ. Ganke,ko o lɔ na mi nɔ tun Xɔlu Salumɔ tete can, ke na ɖo dɔkunnu susu, e hɔn va ɖo acɔ ɖi ɖokpo yetɔn can. 28 Na e nyi tun Mawu ɖo acɔ emɔha na ogbeeke na le nugbyo ye le egbe, vɔ, ye bo na va sɔ ye sɔ flɛn do ozo mɛ le swɛ, ɔn nemu lɛ e hɔn na ɖo acɔ na miye xɔsetɔye o gbɛtɔ xɔse vitwe nɔ ye! 29 Miye mi ka mɔ bu tamɛ kpɔn do onu kena mi na va ɖu, ke mi na nu alo onu kena mi na do wu. 30 Ɖo onu xin ye bisese, mɛ ke hɔn nyɔ Mawu le ɛgbɛ ke mɛ ye, wɛ nɔ kan ye nɔ gbɔxwe a ɖo, vɔ miye Miatɔ nywɛ tun mi mɔ ɖo ohyan etɔn. 31 Vɔ mi ba xɔluɖuɖu etɔn, e xin e bo na va sɔ onu ke drɔn ye a sɔ do e ji na mi. 32 Mi ka mɔ vɔ, miye oviɖe ke na nyi ogbɛta tɛta tɛye, ɖo miatɔ sɔ gbeta na mia do ɖu xɔlu kpo-e. 33 Mi sa onu kena mi ɖo ye, a bo ma oho lɔ na ayanɔ ye. Mi wasi ohohɛnnu ke na hɔn nɔ gu gbeɖe na miaɖe ye; a bo kple dɔkun kena hɔn nɔ vɔ gbeɖe do sɛxwe, ofi kena ajotɔ ti hɔn nɔ fi onu le, kɔsu kɔsu can ko mɔ nɔ hɛn onu gu le blɛ. 34 Ɖo ofi kena mia we dɔkun le, blɛ wɛ oji miatɔ can na le. 35 Na mi do awu gaga miatɔnye, mi bo sɔ akpakan miatɔnye a sɔ bla e ji ganji na zogbɛn miatɔnye ni ta ganji; 36 na mia ci ɖi odansɔvi ke tre kpɔ xwetɔ etɔn nɔ ha na ogan ɖekpokpwe ke mɛ e na va gbɔn sɔn alɔ wiwle gbe le, bo na xuxu agbo, ye mɔ do hun-i ni-i. 37 Nyɔnanɔ wɛ na nyi odansɔvi kena Xwetɔ lɔ na kpɔn le ŋuzɔn hwekenu na e na gbɔn. Le xojɔxo mɛ ko lɔ na mi nɔ tun, Xwetɔ lɔ le awu gaga etɔn mɛ e na bla alin ji, a bo ɖo tɛnxo na ye, ye mɔ do ɖu onu, e mɔ tɛkpɔ ye a do na onu ɖuɖu wu ye. 38 Na e gbɔn le zangan weve mɛ, alo na e mɔ do gbɔn le ozan mima mɛ hugan emɔha can, bo va kpɔnye le ŋuzɔn, hun nyɔnanɔ ye wɛ ye na nyi. 39 Mi nyɔ-ɛ ganji tun, e nyi tun xwetɔ ɖe do nyɔ gankeme na ajotɔtɔ na va do wɛ, e hɔn jo-e do na e wɔ ado bo ɖyɛ oxwe etɔn gbe nɔ. 40 Miye can mi nɔ gbesisɔ mɛ ɖo gbɛtɔ we vi lɔ na va ajiji hwekenu na mi hɔn lɛn do.» 41 I wɛ Piyɛ lɔ ni-i tun:« Xwetɔ, miye wɛ o do olo xin lɔ na nɔ alo mɛ bisese?» 42 Xwetɔ lɔ bo ɖo e wu ni tun:« Ma lɔ ɛmɛ kena onujikpɔntɔ ogbejinɔtɔ kena ɖo onunyinyɔ ɖi na mi: e le ɖi ɛmɛ kena xwetɔ etɔn sɔ ɖo oxwe etɔn nu a do ma onuɖuɖu le oganxixo kena jɛ mɛ, na odansɔvi gbɔkpwe ye ha. 43 Nyɔnanɔ wɛ nyi odansɔvi ke le odan lɔ ji, na xwetɔ etɔn lɔ gbɔn bo va kpɔn-ɛ. 44 Ko o lɔ na mi nɔ le xojɔxo mɛ tun, e na sɔ-ɛ sɔ ɖo dɔkun etɔn bisese nu.» 45 Vɔ e nyi tun odansɔvi xin lɔ lɔ le eɖe mɛ tun:« Xwetɔ tɛye hɔn nɔ ya wu gbɔn», e bo jɛ odansɔvi ŋusunglo kpo nyɔnnusi ye xixo ji, bo jɛ onuɖuɖu kpodo ahan nunu ji, gbɔɔn a bo mu, 46 Xwetɔ etɔn na va le azan ke ji na e hɔn lɛn do kpo hwekenu na e hɔn nyɔ, e bo na va dɔn oto ni taŋu, e lɔ kpodo ogbeji ma nɔ tɔye mɔ va do vivɔnu ɖokpo lɛye. 47 Odansɔvi kena nyɔ Xwetɔ etɔn we ojlo nu, vɔ e ko jla onu ti ɖo ɖenyi, e ko mɔ wasi do ojlo nu etɔn ji, e na ɖu oxa taŋu. 48 Vɔ, ɛmɛ ke na hɔn nyɔ-ɛ, e bo wasi onu kena jɛ na oxa, e na ɖu oxa viɖe. Ye na byɔ onu susu wu ɛmɛ ke ye na onu susu ye bo na mɔ byɔ onu susu wu mɛ kena ye mɔ sɔ susu sɔ na. 49 Ko va na do do ozo wu nyidan lɔ, ojlo tɛye wɛ nyi tun ozo lɔ o do na wle. 50 Vɔ ye ɖo na nylɔ-ɔ do vivɛsise mɛ ɖi kena ye nɔ nylɔ ɛmɛ do ɛsin mɛ ɖo ha, ko bo bu tamɛ kpɔn nɔ taŋu gbɔɔn a do yi hwekenu na vivɛsise xin lɔ na va ji ye do! 51 Fifa wɛ ko hen do va nyidan ji we mi bu-i? Ee wo, ma lɔ na mi tun kinklan mɛ ko mɔ hɛn do va. 52 Bɛ sɔn egbe, oxwe ke gb e na ɛmɛ atɔɔn le na klan do ɛmɛ atɔn na cite do ɛmɛ owe ji, alo ɛmɛ owe mɔ cite do ɛmɛ atɔn ji. 53 Vitɔ na va cite do ovi etɔn ŋusunglo ji, ovi ŋusunglo mɔ cite do otɔ ji, vinɔ na cite do ovyɔ nyɔnnusi ji, ovi nyɔŋusi mɔ va cite do onɔ ji, sunɔ na cite do visyɔ ji, visi bo bo cite do sunɔ ji.» 54 Yesu bo lɔ na togun lɔ tun: «Na mi kpɔn sunwɔ cite le ohweyixɔ, mi nɔ lɔ zɔnɖokpo tun: «oju mɔ va ja nɔ», e bo nɔ ja xojɔxo. 55 Na mi kpɔ tun jɛhɔn mɔ bɛ xixo sɔ afɔgbe, mi nɔ lɔ tun zozo mɔ va tɔn nɔ, e bo nɔ va xojɔxo. 56 Ɛyemɛnuwatɔye, na jiŋukunsin kpo nyidan kpo na ci ɖo ɖe mi nɔ kpɔn onu jɛ e wu, bo nɔ nyɔ onu ke ha na e nyi, ŋu nɛ jɔ na mi hɔn do kpɔn onu jɛ ogan ke xo nɔ ke wu. 57 Ŋunɛ jɔ na mi hɔn sɔ gbeta do nyɔ onu kena jɛ ke ye? 58 E nyi emɛɖe yɔ ɛhwɛ wu we sɔ yi ɛhwɛ ŋukunnɔ, tɛnkpɔn na mi a lɔ, a bo gbo, le hwekenu na e dɔn we do sɔn nɔ. Na e hɔn nyi ɖemɔha, e na kplɔ we sɔ do alɔmɛ na ɛhwɛɖɔtɔ, ɛhwɛɖɔtɔ mɔ sɔ we do asi na sɔja, sɔja lɔ mɔ we flɛn do gankpa mɛ. 59 Ko lɔ na we nɔ tun, keŋu gbɔxwe na o na do tɔn le gankpa lɔ mɛ, flan ɖokpo hɔn drɔn le okɔ na we nɔ.»