¹ ^Gbeɖokpo, Yesu va le ofi ɖe bo xo ɛɖɛ nɔ. Kena e xo ɛɖɛ lɔ vɔ, onu kplanvi etɔn ɖokpo va lɔ ni-i tun:« Xwetɔ kplɔn ɛɖɛ xixo wu miye can ɖi ke na Jan nɔ kplan odansɔvi etɔnye ɖo ha.» ² Yesu bo yi ogbe ni tun:« Na mi va xo ɛɖɛ nɔ, mi lɔ tun: "Miatɔ, na na gbɛtɔye a nywɛ tun nyikɔ tɔwe mɔ nyi kinkwɛn. Na xɔluɖuɖu tɔwe ni va. ^{3 4} Na onu ɖuɖu egbetɔn wu mi. Sɔ ɛhwɛ miatɔn ye sɔ kɛ mi, ɖi ke na miye can mi nɔ sɔ kɛ ɛmɛ ke hu ɛhwɛ do mi ye ɖo ha. Bo ka va dɔn mi do yi titɛnkpɔn mɛ.» ⁵ Yesu bo mɔ va lɔ na ye tun:« Ɛmɛ nɛ lɛ le mia mɛ bo ɖo hadwe ɛ, e bo na yi e kɔn le ozanga wevɛ mɛ, bo na lɔ ni tun: "Hadwe tɛye, wyan kpɔnnɔ atɔn na, ⁶ ɖo hadwe tɛye ɖokpo gbɔn sɔn ɛhwɛnzɛgbeji bo va ba jonɔ wu syɛ, onu ti ko va le sye na ko na ni na e na ɖu." ⁷ Wɛ hadwe ke de e va lɔ na va yi ogbe ni tun "Ka mɔ do tagba na aKo o tun ohɔn tɛye, blɔ kpodo vikpɛ tɛye ye kpo bo si-in oxɔ. Ko hɔn kpewu na mɔ fɔn a do va na we kpɔnnɔ. ⁸ Ko lɔ na mi tun, e nyi e mɔ do gbɛ tun he mɔ hɔn hun ohɔn mɔ na kpɔnnɔ lɔ wu mi nɔ ɖo mi nyi hawe etɔn can, e nyi tun do vivɛnu bo tɛ do blɛ bo do tagba ni nɔ, e na va kpɔn do vivɛdonu miatɔn wu bo na va hun ohɔn lɔ bo na va na mi kpɔnnɔ nɛmu ke mi kan nɔ.» ⁹ I wɛ dɔn blɔ ko lɔ na mi nɔ tun:« Mi byɔ ye na na mi; mi ba mi na kpɔn; mi xuxu ohɔn ɖe ye na hun na mi. ¹⁰ Ɖo ɛmɛ ɖekpokpwe ke byɔ ye na ni-i; mɛ ke ba na kpɔn; ye bo na hun ohɔn lɔ na me ke gbe xuxu-i.» ¹¹ Ovitɔ nɛ lɛ le miamɛ, na e nyi tun ovi etɔn byɔ ohwe wi, e na kpewu a bo sɔ odan sɔ na ovi lɔ do ohwe we domɛ? ¹² Alɔ na e byɔ azin, e mɔ va sɔ kekle ni-i? ¹³ Hun e nyi tun gbɛtɔ adakahotɔ ke mi nyi, na nyɔ ke ye nɔ na onu nywɛ wu vikpɛ miatɔnye ɖo, na dɛ lɛ miatɔ ke le sɛxwe hɔn na kpewu na va na Gbigbɔ Kinkwɛn wu ɛmɛ ke na byɛ ye ɖo?» ¹⁴ Gbeɖokpo, Yesu va nya gbigbɔ nylakan ke hu ɛɖɛ kan na dahwe ɖe le e mɛ. Hwekenu na gbigbɔ nylakan lɔ tɔn le dahwe lɔ mɛ, dahwe lɔ bo va jɛ oxo lɔ ji. E bo va kpaca do togu lɔ bisese! ¹⁵ Vɔ mɛɖe ye bo lɔ nɔ le ye mɛ tun:« Do gbɔn Bɛlizebulu ke nyi awovi legba we vi we nyikɔ mɛ wɛ e nya gbigbɔ nylakan lɛye le nɔ.» ¹⁶ Ɛmɛ ɖeye bo jlo na tɛn kpɔn, i wɛ ye lɔ ni-i tun ni mɔ ɖe josi ɖe xlɛ do gbɔ ŋudandonu ke sɔ sɛxwe wiwasi mɛ. ¹⁷ Vɔ Yesu bo va nyɔ susu yetɔnye bo va lɔ na ye tun:« Xɔluɖuto ke mɛ na otovi lɛye tɔn ahwan yeɖe ye le, gba wɛ e nɔ gba, oxwe ke va cite do e dɛ ji hɔ wɛ e nɔ hɔ. ¹⁸ Na satana va cite do e ɖe ji, na ɖe lɛ xɔluɖuto etɔn na nɔte ɖo? Ɖo mi lɔ tun Bɛlizebulu mɛ mɔ na acɛ wu na ko mɔ do nya gbigbɔ nylakan ye nɔ. ¹⁹ E nyi tun Bɛlizebulu wɛ na acɛ wu na ko do nya gbigbɔ nylakan ye nɔ, mɛ nɛ we nyikɔ mɛ lɛ odansɔvi miatɔn ye nɔ nya gbigbɔ nylankan ye le hin? I wɛ dɔn, odansɔvi miatɔn ye tete wɛ na ɖo kojo na mi. ²⁰ Vɔ e nyi tun Mawu we acɛ wɛ ko do nya gbigbɔ nylakan ye nɔ, hun Mawu we xɔluɖuɖu lɔ na va kaka mia kɔn. ²¹ E nyi tun ɛmɛɖe ke ɖo hɔnhlɔn ganji bo sɔ ahwan wa nu etɔn ye sɔ kpla va cɔ oxwe etɔn nɔ, dɔkun nu etɔn ye hɔn bu nɔ. ²² Vɔ e nyi tun gbɛtɔ bu mɔ le bo mɔ ɖo hɔnhlɔn hugan wi-i, ɛmɛ xin lɔ na va ɖu le mɛɖyɔ ji, a bo fin onu etɔn ye. ²³ Ɛmɛ ke na hɔn le kpɔ kpo hun e fɔn ogu do ji ye wɛ, ɛmɛ ke gbɛ-ɔ ye, ye na gbado. ²⁴ Na gbigbɔ nylakan tɔn le ɛmɛ ɖe mɛ, e nɔ va yi zogbeji a bo ve ɖisa a do ba ofi kena e na gbɔjwɛ le nɔ. Na e hɔn va kpɔn ofi ɖe, e nɔ va lɔ na eɖe tun:"ko na mɔ lɛkɔ yi oxwe tɛye gbe, ofi ke na ko lɛ le lɔ." ²⁵ Na e trɔ va e nɔ kpɔn tun oxwe lɔ mɔ le ziza, onu bisese bo le tito nu le ofi lɔ, ²⁶ Na e kpɔn-ɛ ɖemɔha, e nɔ yi bo nɔ ve kplɔ gbigbɔ nylakan acowe, ke na nyla hun hugan wu itete ye, ye mɔ do ɖyɛ oxwe lɔ gbe a bo jɛ agban do blɛ. I wɛ vivɔnu etɔn ɛmɛ xin lɔ we ninɔmɛ mɔ nɔ va nyla hugan wu ke e nɔ saan.» ²⁷ E va jɛ, hwekenu na Yesu lɔ oxo xin lɔ we godo, nahwe ɖe va do axwa le otogun lɔ mɛ bo lɔ nɔ tun:« Nyɔnanɔ wɛ nyi nyɔnusi ke hɛn gomi gban tɔwe bo mɔ na we anɔ.» ²⁸ Vɔ Yesu bo ɖo e wu ni-i tun:« Nyɔna nɔ wɛ nyi ɛmɛ ke na nɔ se Mawu we oxo bo nɔ zɔn gbɔn e ji ye.» ²⁹ Kena togun susu geɖegeɖe va kple do Yesu Kɔ, e jɛ lilɔ ji na ye: Jijimɛvi egbetɔn ye, ɛmɛ ye wɛ ye. Ye bo mɔ kan josi nɔ, vɔ oxolɔɖenyitɔ Jonasi kɛɖɛ tɔ we ye na kpɔn? ³⁰ Ɖo ke na Jonasi nyi josina ninivu tɔ ye, ɖemɔha ke wɛ gbɛtɔ we vi lɔ na nyi josi ɖo na jijimɛvi kiye ɖo. ³¹ Le kojoɖozangbe, nahwe ke ɖu xɔlu saan le Saba we kansinmɛ, na cite le ŋukɔn na jijimɛvi kiye, a bo ɖo kojo na ye, ɖo kansin dindɛn mɛ wɛ e sɔn bo do va se onunyinyɔn we oxo Salumɔtɔn ye. ³² Ninivu we togun lɔ na va cite le huekenu na kojo ɖo zan lɔ na va i kpodo jiji mɛ vi kiye ye bo na va ɖo kojo na ye, ɖo ye na va ɖo lɛvɔjɔ do Jonasi we Mawu xo ke e o lɔ na ye lɔ wu, mi bo na kpɔn tun ɛmɛ ɖe le bwɛ bo hugan wu Jonasi. ³³ Ɛmɛ ɖe hɔn nɔ ta zogbɛn bo nɔ sɔ hwla do tavo gɔ alo bo na cɔn jaxwi do-e, vɔ ye nɔ sɔ-ɛ a sɔ ɖo tavo ji na ɛmɛ ke na ɖyɛ oxwe lɔ gbe bisese a do kpɔn onu ganji. ³⁴ Ŋukunsin tɔwe wɛ nyi zogbɛn tɔwe. E nyi tun ŋukunsin tɔwe le nywɛɖe, hun gbaza tɔwe can bi na nɔ klɛn. Vɔ na ŋukunsin tɔwe hɔn va le nywɛɖe, hun gbaza tɔwe bisese va ci vuvlu mɛ. ³⁵ Hɛn ɖiwe ganji, na Kinklɛn tɔwe ni ka do va nyi vuvlu . ³⁶ E nyi tun gbaza tɔwe bisese va nyi kinklɛn wɛ ofi ti le gbaza tɔwe wu hɔn va ci vuvlu mɛ, hun gbaza tɔwe bi na klɛn ɖi zogbɛn ha.» ³⁷ Hwekenu na Yesu lɔ oxo vɔ, Falizitɔ ɖokpo va yɔ-e tun ni mɔɔ va ɖu ɖu le he kɔnye le oxwe hetɛye gbe. E xin Yesu va yi oxwe etɔn lɔ gbe bo va le tavo kɔn bo va ɖu onu nɔ do kpɔkpɔ. ³⁸ Kena Falizitɔ lɔ va flin tun Yesu mɔ hɔn klɔ alɔ ɖi ke na e nyi le walɔ yetɔn mɛ ɖo gbɔxwe do jɛ onu ɖu ji, e kpaca do-e. ³⁹ Vɔ Xwetɔ lɔ lɔ ni lɔ byo:« Miye Falizitɔ ye mi nɔ klɔ goto na kɔfo kpodo gannu kpo na ye a do mɛ, vɔ oji miatɔnye bo gɔ kpo ofɛn kpodo danuwiwa. ⁴⁰ Yɛyinɔ ye wɛ mi nyi! Ɛme ke na wasi goto lɔ ke hwɛn wasi dɔmɛ lɔ can wɛ? ⁴¹ Mi sɔ onu ke le kɔfo lɔ kpodo gannu lɔ mɛ a sɔ na ayanɔye, hwexinu onu bisese mɔ va nyi onu kinkwɛn na mi. ⁴² Babaa na mi Falizitɔye, ɖo mi nɔ na maɖo owo amahwɛnyɛ mati kpodo hlu kpo tɔn, mi bo mɔ nɔ na maɖowo amaye tɔn, vɔ mi bo nɔ ɖe okɔ le onu jijwɛ kpodo owanyiyi na Mawu wu. Ke na mi ɖo na wasi lɛye be xin, e ko nyi tun mi na jo gbokpwe do hwɛn. ⁴³ Aheelu na mi mɛ Falizitɔye, ɖo mi nɔ yi owan na okpo tantɛn tɔn ye ji ninɔ le okpletyɔn miatɔn ye, mi bo mɔ nɔ yi owan na ye a nɔ do ogbe na mi kpodo sisi kpo le dogbaji. ⁴⁴ Aheelu na mi ɖo mi le ɖi yɔgun ke na ye hɔn ɖo josi wu ye ha, ɛmɛ ye bo nɔ gbɔn ye ji nɔ le manyɔ-ɛ mɛ.» ⁴⁵ I wɛ ɛmɛ ɖokpo le osɛnkplan-ɛmɛtɔ lɛye mɛ bo lɔ ni-i tun:« Onukplan-ɛmɛtɔ, na o lɔ oxo ɖemɛha nɔ, hun o zun miye can nɔ.» ⁴⁶ Yesu bo ɖo e wu ni tun lɔ byo:« Aheelu na miye osɛnkplan-ɛmɛtɔye can, mi nɔ do agban kpinkpɛn ke nɔ vɛ hinhɛn na ɛmɛye, vɔ miye tete ko nɔ ɖo alɔvi viɖe wu ye a do hɛn kpo ye can. ⁴⁷ Aheelu na mi, ɖo Mawu we oxolɔɖenyitɔ ke na miadagbwɔye hu ye, mi nɔ trɔ jla yɔgun yetɔnye ɖo, ⁴⁸ e xin lɔ bo ɖexlɛ tun miye mɔ yi ogbe na onu kena ye mɔ wasi ye, ɖo ye hu Oxolɔɖenyitɔ lɛye miye bo mɔ trɔ jla yɔgun yetɔnye ɖo. ⁴⁹ I wɛ dɔn Mawu do lɔ oxo do gbɔn onu nyinywɛ etɔn mɛ tun " Ko na ɖo oxolɔɖenyitɔ kpo ɛmɛdindɔn ye do dan ye, ye na hu ɛmɛ ɖeye le ye mɛ, a bo do aya na ɛmɛ ɖe ye." ⁵⁰ Do e xin lɔ wu, Mawu na byɔ oxolɔɖenyitɔ kena ye hu sɔn ɛgbɛ lɔ we titɔ e ji gbɔɔn, we ohlɔn do jijimɛvi egbetɔnye si, ⁵¹ sɔn Abɛli ji gbɔ do yi Zakali ke na ye hu le Mawu we oxwe gbe le avɔsinsan we agba lɔ kpodo tɛnxo kinkwɛn lɔ we gblamɛ ji. Ɛɛn: Ko lɔ na mi nɔ, jijimɛvi egbetɔnye wɛ ye na byɔ ohlɔn do. ⁵² Aheelu na mi osɛnkplan-ɛmɛtɔye, ɖo mi sɔ cavi ke nɔ hun onunyinywɛ we ohɔn lɔ. Miye teteye hɔn ɖyɛ emɛ nɔ, mi bo mɔ tu omɔ do ɛmɛ kena na ɖyɛ emɛ nɔ ye.» ^{53 54} Kena Yesu tɔn le oxwe xin lɔ gbe, osɛnkplan-ɛmɛtɔye kpo Falizitɔye jɛ ofun ɖiɖe ni-i ji taŋu, bo kan oxo wu wi se nɔ sɔn onu hamɛ-hamɛye wu. Ye do ɖo omɔ ni-i nɔ, a do kpɔn ofɛn ɖe le oxo etɔn mɛ, a bo do ɖo kojo ni-i.