¹ E xin we godo, Xwetɔ lɔ mɔ v a can onukplanvi kanɖegban buye, bo va ɖoye ɖodan owe-owe na ye a do jɛ ŋukɔn ni-i a do yi toxo kpo ofi kena elɔ tete ɖo na yi ye. ² E bo lɔ na ye tun:«Ɛjinukun susu wɛ le ye bo na ɖe, vɔ odanwatɔ hɔn su. Mi ɖe kuku na Xwetɔ ke tɔn nyi ɛjinukun lɛye, na ni a sɔ odanwatɔ ɖodan ogle etɔn gbe. ³ Mi yi! Mi kpɔn, ko ɖo mi ɖodan nɔ ɖi lɛngbɔviye ha le dodomɛ na ohlaye. ⁴ Mi ka hɛn oho, mi ka hɛn oglo, mi ka hɛn fɔkpa, mi ka nɔ ote le mɔji a do do ogbe na mɛɖe can. ⁵ Oxwe ɖekpokpwe ke gbe mi na va ɖyɛ, mi lɔ gbɔxwe tun: "Na fifa ni nɔ oxwe ke ji." ⁶ Na gbɛtɔ fifa nɔ ɖe le blɛ lɔ, fifa miatɔn na ava nɔ kpo-e, na e hɔn nyi ɖemɔha, fifa miatɔn na mɔ va trɔ lɛkɔ va mia kɔn. ⁷ Mi nɔ oxwe xin lɔ gbe, a bo ɖu onu a bo nu onu ke ye na mi ye, ɖo odanwatɔ ɖo na yi odan ke e wa we axɔtu. Mi ka ve ɖisa gbɔn xwegbe-xwegbe nɔ. ⁸ Na mi va ɖyɛ oto ɖe mɛ, na ye bo yi mi, mi ɖu onu kena ye na va na mi ⁹ a bo gɔ adɔn na mɛ ke le blɛ ye. Mi lɔ na ye tun: "Xɔluɖuɖu Mawutɔn tɛkpɔ mi." ¹⁰ Vɔ toxo ɖekpokpe ke mɛ na mi na ɖyɛ ye ko na yi mi, mi yi hɔntunmɔ yetɔnye ji a bo lɔ tun: ¹¹ "Mí xuxu fifizɔ oto miatɔn tɔn ke le afɔ na mí ye kpanta mi! Vɔ mi nyɔ-ɛ lɔ byo xɔluɖuɖu Mawutɔn lɔ mɔ tɛkpɔ." ¹² Ma lɔ na mi tun le kojo ɖo zan gbe, oto dindɔn oto xin lɔ tɔn na syɛn hugan wu Sodɔmutɔn. ¹³ Babaa na we, Kolazɛn! Babaa na we, Bɛtisayida! E do nyi tun odan ɖaxo-ɖaxo xin ye ye do wa le Tilu kpo Sidɔn we nyidan ji wɛ, ye o na ɖɔli jijɔ xoxoxo boo na sɔ dɔkpoye sɔ do bo o na xlɛnnyi do zofin mɛ. ¹⁴ Vɔ ye na va kpɔn kojo lɔ a do ɖo na Tilu kpo Sidɔn le kojo ɖo zan gbe hugan wu miye. ¹⁵ Lɔ, Kapɛnawumu, o bu-i nɔ tun he mɔ na yi sɛxwe wɛ ha? Ee wo, kaka oku we agbadoye mɛ wɛ Mawu na va zin we do. ¹⁶ Mɛ ke na ɖo oto wu mi, e ɖo oto wu, mɛ ke na gbɛ mi e gbɛ bo can; mɛ ke gbɛ blɔ, e gbɛ mɛ ke ɖo o ɖodan.» ¹⁷ Onukplanvi kanɖegban lɛye lɛkɔ gbɔn kpo jijwɛ kpo bo lɔ nɔ tun:«Xwetɔ, gbɔɔn do jɛ gbigbɔ nylakanye ji, na mí ɖe ogbe do ye le nyikɔ tɔwe mɛ, ye nɔ jo ogbe le ŋukɔn na mí.» ¹⁸ Yesu bo lɔ na ye tun lɔ byo:«Ko kpɔn satana jɛnyi sɔ jihwe bo va gba do odo ɖi zoklɛnnyɛ ha. ¹⁹ Mi kpɔn, ko na mi acɛ na mi do zɔn zɔnlin gbɔn odanye ji, kekleye kpo hɔnhlɔn kɛntɔtɔn bisese ji, co onu nyinyla ti ko wa mi nɔ. ²⁰ E le emɔ co, mi ka kpɔn jijwɛ ɖo gbigbɔ nylakanye jo ogbe le ŋukɔn na mi wu, vɔ mi kpɔn jijwɛ ɖo Mawu o wlan nyikɔ miatɔnye do sɛxwe.» ²¹ Le ganxixo ɖokpo lɔ mɛ, Yesu bo kpɔn jijwɛ nɔ taŋu le Gbigbɔ Kinkwɛn lɔ mɛ bo lɔ nɔ tun:«Ko kanfu wu we nɔ, O Otɔ, Xwetɔ jiŋukunsin kpo nyidan kpo tɔn, ɖo o sɔ onu klɛye sɔ hwla do mɛ ke ɖo zinzinye kpo mɛ ke ɖo onunyinyɔye, bo va sɔ-ɛ sɔ xlɛ mɛ ke ɖo onunyinyɔ vitweɖe ɖi vikpɛviviye ha. Ɛɛn, Otɔ, ɖo ke e nyɔ le ŋumɛ na we ɖo xɛn xin.» ²² «Didaye sɔ onu bisese bo sɔ naa, mɛ ko va nyɔ mɛ ke nyi Ovi lɔ na e hɔn nyi Otɔ lɔ kɛɖɛ; mɛ ti ko nyɔn mɛ ke nyi Otɔ lɔ na e hɔn nyi Ovi lɔ kɛɖɛ, kpodo mɛɖekpokpwe ke na Ovi lɔ jlo na sɔ eɖe sɔ xlɛ.» ²³ Yesu va trɔ kpan ŋukɔn wu onukplanvi etɔnye, bo lɔ na yeɖoɖyo tun:«Nyɔnanɔ wɛ nyi mɛ ke kpɔn onu kena mi kpɔn nɔ kiye. ²⁴ Ko lɔ na mi nɔ tun oxolɔɖenyitɔ susu ye kpo xɔlu susu ye ba na kpɔn onu ke mi kpɔn nɔ klɛye co, ye co kpewu bo kpɔn ye, kpo onu ke na mi se nɔ klɛye co ye ko kpewu bo se ye.» ²⁵ Osɛnkplan-ɛmɛtɔ Jwifutɔn ɖe cite bo yi oxo na do tɛn Yesu kpɔn bo va kan-ɛ se tun:«Cica, ŋunɛ ko na wa na do kpɔn ɛgbɛ mavɔmavɔ?» ²⁶ Yesu bo lɔ ni-i tun:«Ŋunɛ ye wlan do osɛn lɔ mɛ? Ŋunɛ mi nɔ xlɛ?» ²⁷ E bo va ɖo e wu ni-i tun:«O ɖo na yi owan na Xwetɔ Mawu tɔwe kpo oji tɔwe bisese, kpo okla tɔwe bisese, kpo hɔnhlɔn tɔwe bisese kpo ayixa tɔwe bisese, a bo yi owan na owegɔ tɔwe ɖi lɔ tete ha.» ²⁸ Yesu bo lɔ ni-i tun:«O lɔ-ɛ nywɛɖe, wasi demɔha o bo na va nɔ ɛgbɛ.» ²⁹ Vɔ onukplan-ɛmɛtɔ lɔ, bo jlo na ɖe xlɛ tun ɛhwɛ hetɛye mɔ jɔ, e va kan Yesu tun:«Mɛnɛ lɛ nyi hayetɔ lɔ?» ³⁰ Bo na do ɖo e wu ni-i, Yesu lɔ ni-i tun:«Dahwe ɖe jɛte le Jeluzalɛmu na da va yi Jeliko. Bo va ɖyɛ ajotɔye mɛ ye bo va bɛ dɔkunnu etɔnye bisese le e si, bo xo-e gbɔɔn e bo kpɔ kuku ye bo jo-e do. ³¹ Le vlavo mɛ, Mawu we avɔsantɔ ɖe bo gbɔn omɔ lɔ ji bo va sɔn nɔ, wɛ hwekenu e va kpɔn-ɛ, e gbɔn zɔga ni-i. ³² Ɖemɔke, ke Levi nu ɖokpo can gbɔn omɔ lɔ ji va sɔn nɔ bo kpɔn-ɛ, i can gba gbɔn zɔga ni-i. ³³ Vɔ dahwe Samalitɔ ɖe bo ke o yi omɔ ji nɔ, gbɔn omɔ xin lɔ ɖokpo ke ji bo va yi nɔ. Ke e kpɔn-ɛ, i we nu ɖu dɔnu ni-i. ³⁴ E bo tɛkpɔ-ɛ bo klɔ abi lɛye mɛ ni-i kpo vɛn kpo ami kpo bo va vun avɔ vu bo do bla abi lɔ ni-i. E bo kɔ-ɛ do osɔkɛtɛ etɔn ji, bo kplɔ-ɛ do yi omɔjiyitɔye we oxwe ɖokpo gbe na ye a do kpe ŋukunsin do ewu ganji. ³⁵ Ŋukɔnɖiɖe etɔn gbe, dahwe Samalitɔ lɔ bo sɔ ohogan owe bo sɔ na oxwejikpɔtɔ lɔ bo lɔ ni tun: "Wle byo ni-i na o mɔ do va zan oho bu ye can, na ko lɛkɔ, ko na tu ye wu we." ³⁶ Le ɛmɛ atɔn xin ye mɛ, mɛ lɛ o lin tun, e mɔ nyi ɛmɛ ke ɖyɛ jagudaye mɛ lɔ we hatɔ?» ³⁷ Onukplan-ɛmɛtɔ lɔ bo lɔ tun:«Ɛmɛ ke kpɔn dɔŋuɖunu ni-i lɔ.» Yesu bo lɔ ni-i tun:«Yi a bo ve wasi ɖo ɛmɔha.» ³⁸ Syɛ, kena ye le mɔ ji bo sɔn nɔ, ye va ɖyɛ toxo vitwe ɖe mɛ, nahwe ɖe ke ye nɔ yɔ tun Mati bo va yi-i do oxwe etɔn gbe. ³⁹ E bo ɖo nɔvi nyɔnusi ɖe ye bo nɔ yɔ-ɛ tun Mali e bo xinnɔ onyi le afɔ kɔn na Yesu bo do se oxo etɔn nɔ. ⁴⁰ Mati bo jɛ tagba nɔ a do ɖa onuɖuɖu ɖe a do yi jonɔ na Yesu. E bo va va Yesu kɔn bo lɔ ni-i tun:«Xwetɔ, ke nɔvye lɔ jo odan lɔ bisese do okɔ ji na bo ɖokpo gee, e hɔn ɖi nu ti na we wɛɛ? Lɔ ni-i tun: ni mɔɔ kpedo wu ye.» ⁴¹ Vɔ Xwetɔ lɔ bo va ɖo e wu ni-i tun:«Mati, Mati, jikan o so we nɔ din o bo jɛ tagba na onu susu nɔ, ⁴² vɔ onu ɖokpo gee wɛ bo le vivɛ ɖe. Mali bo o sɔ adodwe lɔ, ɛ mɛ ti ko kpewu na va yi-i le e si.»