1 Yesu bo va yɔ onukplanvi weve lɛye bo na ye acɛkpikpa do gbigbɔ nylakanye bisese ji kpo acɛ ke ye na do gɔ adɔn ye na ɛmɛye. 2 E ɖo ye dodan na ye a do ve lɔ xɔluɖuɖu Mawutɔn lɔ we oxo na ɛmɛye a bɔ mɔ gɔ adɔn na adɔnnɔ ye. 3 E lɔ na ye tun:«Mi ka sɔ onu ti a do zɛ ɛhwɛn lɔ, mi ka sɔ otinkpo ti, akpo ke mɛ na oho nɔ nɔ na mi ye ti, alo kpɔnnɔ ti, alo oho ti, alo mɛdɛ mɔ hɛn awu owe. 4 Oxwe ɖekpokpwe ke gbe mi na ɖyɛ, mi nɔ blɛ gbɔɔn do jɛ hwekenu mi na lɛ le tɛnxo xin lɔ mɛ do. 5 Mɛ keye na gbɛ mi yiyi ye le hwekenu na mi na va yi toxo lɔ mɛ, mi xuxu afɔkɔ miatɔnye e mɔ nyi josi kunnu ɖiɖe tɔn kpanta wu ye.» 6 E xin lɔ we godo, ye bo va siin oto lɛye mɛ, bo jɛ ɛwɛn nywɛ lɔ jijla ji bo gɔ adɔn can na ɛmɛye nɔ gbɔn fi bisese. 7 Elodu ke na ɖu oga le Galile we kansinmɛ, se onu ke o jɔ nɔ lɛye bisese, tamɛ etɔn bo hlu ɖo mɛɖeye o lɔ nɔ tun Jan mɔ fɔn sɔn oku, 8 mɛ bu ye bo lɔ nɔ tun, Eli mɔ sɔ eɖe mɔ sɔ xlɛ ɛmɛ bu ye can mɔ lɔ tun, oxolɔɖenyitɔ xoxoxo tɔn ye ɖokpo lɛkɔ va ɛgbɛ. 9 Elodu bo va lɔ tun:«Bo tete wɛ na ogbe ye hu Jan, vɔ mɛnɛ lɛ nyi ɛmɛ lɔ ke we oxo na ko se nɔ ke lɔ?» Elodu bo va jɛ ke e na hɛnɖo na do kpɔn Yesu kan ji. 10 Kena ɛmɛdindɔn lɛye lɛkɔ gbɔn, ye va jɛ onu ke ye wasi ye bisese we ogbe ɖiɖo ji na Yesu. E bo kplɔ ye, bo do tɛyi toxo ke ye nɔ yɔtun Bɛtisayida mɛ. 11 Vɔ kena togun lɔ se emɔɔ ye jɛ ɛtɛ ni-i, e bo va yi ye bo jɛ xɔluɖuɖu Mawutɔn we oxo lɔ na ye ji; e bo va gɔ adɔn na mɛ ke ɖo ohyan adɔngigɔ tɔn ye. 12 Ke ohwe jɛ oxɔ yi ji, Yesu we onukplanvi weve lɛye tɛkpɔ-ɛ bo lɔ ni-i lɔ byo:«Nya mɛ togun lɔ bi na ye a ve ba ofi ke ye na dɔ kpo onuɖuɖu, ɖo zogbeji wɛ mí le.» 13 Vɔ e bo lɔ na ye lɔ byo:«Miye, mi na ye on u ɖe na ye a ɖu.» Ye bo lɔ tun:« Mí hɔn ɖo onu ɖe e bo hugan wu kpɔnnɔ atɔɔn kpo ohwe owe, e nyi tun mi va tɔn bo na do xɔ onuɖuɖu na ɛmɛ susu klɛye jan e na nyi.» 14 Ye na yi ɖi gbɛtɔ akpo atɔɔn emɔha. E bo va lɔ na onukplanvi etɔnye tun:«Mi sɔ ye sɔ xinnɔnyi do gbɛta kanɖewo-kanɖewo.» 15 Ye bo va wasi ɖo emɔha ye mɛ bisese bo xinnɔ onyi. 16 Yesu bo va sɔ kpɔnnɔ atɔɔn lɛye kpo ohwe owe lɛye bo va kɔ ŋujunsin etɔnye bo kpɔn jihwe dodan, bo xo dona we ɛɖɛ do e ji, bo va kan do alɔmɛ na onukplnvi etɔn lɛye na ye can a do ma na togun lɔ. 17 Ye bo va ɖu onu lɔ gbɔɔn gomi bo gɔ ye wɛ kinkan-kinkan ke drɔn ye ye bo bɛɛ e bo yi jaxwi weve. 18 E va jɛ tun hwekenu na e xo ɛɖɛ nɔ i ɖokpo gee, onukplanvi lɛye le kpo-e e bo kanye se tun:«Oxo e nɛ lɛ ɛmɛ susu klɛye o lɔ do wu ye nɔ?» 19 Ye bo ɖo e wu ni-i tun:«Mɛɖeye nɔ lɔ tun lɔ mɔ nyi Jan Mawu we ɛsin lɛ na ɛmɛtɔ, vɔ mɛ bu ye bo nɔ lɔ tun i mɔ nyi Eli, wɛ mɛ bu ye can mɔ nɔ lɔ tun Mawu we oxolɔɖetɔ san xoxo tɔye ɖokpo mɔ fɔn sɔ oku.» 20 E bo va lɔ na ye tun:«Vɔ miye mɛnɛ lɛ mi nɔ lɔ tun ko mɔ nyi?» Piyɛ bo ɖo e wu ni-i tun:«Klisu ke sɔn Mawu de.» 21 Vɔ e bo va gbɛ na ye taŋu tun 22 ye ni mɔ ka lɔ na mɛ ti tun gbɛtɔ we vi lɔ mɔ na ɖu aya taŋu le onu susu mɛ wɛ ye bo na gbɛɛ, agumɛhyɔnye, Mawu we avɔsantɔ ɖaxo ye kpodo osɛnkplan-ɛmɛtɔye, ye bo na va hu-i wɛ azan atɔngɔgbe e bo na lɛkɔ va ɛgbɛ. 23 Yesu bo va lɔ na ye mɛ bisese tun:«Na mɛɖe va xodo nɔɔ, e dɔ na gbɛ eɖe, a bo sɔ otinsokpoli etɔn we agban a bo sɔ hɛn le hunkɔnɖiɖe-hunkɔnɖiɖe a bo xodoo. 24 Mɛɖekpokpwe ke ba na hwlɛn ɛgbɛ etɔngan na bu-i, vɔ mɛɖekpokpwe ke ba na bu ɛgbɛ etɔn do blɔ wuye na kpɔn hwlɛnga. 25 Ale nɛ lɛ mɛ ɖe na va kpɔn, hwekenu na e ɖo ɛgbɛ mɛ bwɛ we onu ye bisese bo va bu ɛgbɛ etɔn a lo bo va trɔn ɛgbɛ etɔn? 26 Mɛɖekpokpwe ke ŋunya na wa do blɔ kpodo oxo tɛyee wu, ovi gbɛtɔtɔn lɔ can ŋunya na va waɛ do ɛmɛ lɔ can wu le hwekenu na e na va va kpo gigɔ ɖaxo etɔn kpo gigo ɖaxo Otɔtɔn kpo ɛwɛndotɔ Mawutɔn ye kpo. 27 Vɔ le xojɔxo mɛ ko lɔ na mi nɔ, mɛɖeye le mia mɛ bo le bwɛ syɛ, ye kɔ ku nɔ keŋu gbɔxwe a do kpɔn xɔluɖuɖutɔn lɔ.» 28 Ke Yesu va lɔ oxo xin lɛye we godo le ŋukɔnɖiɖe atrotɔn we godo, e kplɔ Piyɛ, Jan kpodo Jaki bo do yi ɛɖɛ xo gbe le oso ɖe ji. 29 Hwekenu na e xo ɛɖɛ nɔ, ŋumɛ etɔ va ɖɔli wɛonu ke do e do lɛye bo va we kpekpekpe bo va klɛn nɔ. 30 Wɛ dahwe owe dɛye va lɔ oxo kpo-e nɔ, ye wɛ nyi Mɔyizi kpo Eli, 31 ye bo ze le gigo Mawutɔn ɖaxo ɖe mɛ.Ye bo lɔ oxo nɔ do sinsɔn etɔn a do vee wasi odan etɔn le Jeluzalɛmu. 32 Le ganxi lɔ mɛ, Piyɛ kpo mɛ ke le okpɔ kpo-e ye bo le dɔ awlɔn nɔ titeŋugbetɔn. Vɔ ke ye fɔn, ye kpɔn Yesu we gigo kpo ɛmɛ owe ke va ekɔn lɛye. 33 Hwekenu na Piyɛ kpo Eli kpo lɛ le Yesu kɔn nɔ, Piyɛ lɔ na Yesu tun:«Cica, ofi ke na mí le ke lɔ jɔhun taŋu. Na mía gba avɔxɔ atɔn do bwɛ. Ɖokpo mɔ nyi tɔwe, ɖokpo mɔ nyi Mɔyizitɔn, ɖokpo mɔ nyi Elitɔn.» Piyɛ ko nyɔ oxo kena e lɔ nɔ lɔ. 34 Hwekenu na e gbɛ lɔ oxo nɔ, sunwɔ ɖe va cɔn ye ji, ye bo vɔ ɖo sunwɔ lɔ lilɛ do ye. 35 Ogbe ɖe bo va ɖi le sunwɔ lɔ mɛ bo lɔ nɔ tun:«Ɛmɛ ke wɛ nyi ovi tɛye ke ko can. Mi ɖo oto wu-i.» 36 Hwekenu na ogbe lɔ bɔnu, ye bo va kpɔn Yesu ɖoɖyo gee. Ye bo bɔnu wɛ le azan lɛye mɛ ye hɔn kpewu bo va lɔ onu ke ye kpɔn lɛye ti na mɛɖe. 37 E va jɛ tun hwekenu ye va jɛte le oso lɔ ji le ŋukɔɖegbe etɔn, gbɛtɔ susu geɖegeɖe va kpe Yesu. 38 Dahwe ɖokpo le togun lɔ mɛ bo do axwa bo lɔ tun:«Cica, ko ɖekuku na we tun i mɔɔ kpɔn ovi tɛye ŋusunglo de na ɖo i ɖokpo gee wɛ nyi ovi ke na ko ɖo. 39 Kpɔn, gbigb ɔ ɖe nɔ jɛ e ji wɛ haŋu, e nɔ jɛnyi a bo jɛ axwa do ji; a bo hunhun nɔ tititi ɛdyɔ mɔ gbɔn onu ni-i nɔ. Gbigbɔ lɔ bo nɔ do vivɛsise ni-i taŋu gbɔxwe nɔ do va jo-e do. 40 Ko bo va ɖe kuku na onukplanvi tɔweye tun ye mɔɔ nya gbigbɔ lɔ tɔn sɔn ovi lɔ mɛ na, vɔ ye ko va kpewu.» 41 Yesu bo va yi oxo bo lɔ na ye tun:«Jijimɛvi ke hɔn ɖo kanɖeji kpo ke hlukɔ ye wɛ mi nyi, gbɔɔn do jɛ gannɛ mɛ lɛ ko na va nɔ mia kɔn jɛ alo mi na nɔ kɔji naa jɛ? E bo va lɔ na vitɔ lɔ tun ni mɔɔ kplɔ ovi lɔ do va bwɛ.» 42 Hwekenu na ovi lɔ o gbɔnnɔ, gbigbɔ lɔ kɔ-ɛ sɔ xunyi do ŋudanmɛ bo hunhun wu-i kpo adan kpo. Vɔ Yesu bo va ɖe ogbe do gbigbɔ nylakan lɔ, bo gɔ adɔn na ovi ŋusunglo lɔ bo sɔ-ɛ sɔ otɔ. 43 Ke Mawu we hɔhlɔn glo ɖo bo kpaca do ɛmɛ susu taŋu. Onu ke Yesu o wasi nɔ ye bo jɛŋu na ɛmɛye taŋu, e bo lɔ na onukplanvi etɔnye tun: 44 «Na oxo ke lɛye ni ɖyɛ oto miatɔnye mɛ ganji ɖo Gbɛtɔ we Vi lɔ ye na va sɔ-ɛ sɔ do alɔmɛ na gbɛtɔye.» 45 Vɔ ye ko va nyɔ gɔnmɛ na oxo xin lɛye, Mawu sɔ oxo xin lɛye we gɔnmɛsise sɔ hwla do ye na ye ni ka do nyɔ gɔnmɛ etɔn. Ye bo vɔ nɔ na do kan oxo wu-i se do oxo xin lɔ wu. 46 Onukplanvi lɛye jɛ onu dindɔn ji le yeɖeeye mɛ a do nyɔ mɛ ke nyi ɛmɛ ɖaxo le ye mɛ. 47 Vɔ Yesu, ke e o nyɔ susu ke ye lin nɔ le oji yetɔnye mɛ nɔ, e va kpɔ vikpɛvyu ɖe bo sɔ ɖo axa na ye. 48 Bo va lɔ na ye tun:«Na mɛɖe va yi vikpɛvyu ke ha le nyikɔ tɛye mɛ, hun e yi botete e nyi tun mɛɖe yi-u, e yi mɛ ke ɖo dodan. Ɖo mɛ ke nyi vikpɛvyu le mi mɛ bisese mɛ, wɛ nyi ɛmɛ ɖaxo lɔ.» 49 Jan bo ɖo e wu bo lɔ tun:«Cica, mi kpɔn mɛɖe e bo nya gbigbɔ nylakan nɔ le nyikɔ tɔwe mɛ nɔ mi bo glɔn omɔ ni-i ɖo e hɔn xodo mí.» 50 Vɔ Yesu bo va lɔ na ye tun:«Mi ka gbɛ ni-i, ɖo mɛ ke hɔn cite do mia wu, ɛmɛ miatɔn wɛ e nyi.» 51 Hwekenu na Yesu na siin jihwe o tɛkpɔ nɔ, e sɔ gbeta na do yi Jeluzalɛmu we toxo lɔ mɛ. 52 E bo sɔ ɛwɛndotɔye sɔ ɖodan na ye a do jɛ ŋukɔn ni-i ye bo sɔ nɔ gbɔɔn bo va ɖyɛ Samali we toxo vitwe ɖe mɛ bo na do jla tɛnxo ɖenyi ni-i. 53 Vɔ oto lɔ mɛ tɔye hɔn yi-i, ɖo e Jeluzalemu we omɔ wɛ e wle bo sɔn nɔ. 54 Ke onukplanvi etɔn Jaki kpo Jan kpo kpɔn ɖo emɔha, ye lɔ ni-i tun:«Xwetɔ o jlo tun mía ɖe ogbe na ozo a jɛte sɔn jihwe a bo fyɔ ye wɛɛ? 55 Vɔ e bo va lilɛ okɔ dodan ye bo gbɛ na ye. 56 E xin ye bo va lɛ le blɛ bo siin oto vitwe bu mɛ. 57 Hwekenu ye le omɔ ji bo sɔn nɔ, mɛ ɖokpo lɔ ni-i tun:«Ko na xodo ye gbɔn fiɖekpokpwe ke o na va yi.» 58 Yesu bo ɖo e wu ni-i tun:«Owɔye ɖo ogun ke mɛ na ye nɔ nɔ oxɛye can bo ɖo adɔ ke mɛ na ye nɔ ɖyɛ vɔ Gbɛtɔ we Vi lɔ hɔn ɖo ofi ke na e na sɔ ota a sɔ ɖo tete.» 59 E xin we godo e bo mɔ lɔ na mɛ bu tun:«Xodo.» Vɔ e bo lɔ tun:«Xwetɔ, kɛnklɛn na ogbe wu na ma ve ɖi didaye we ocɔ keŋu gbɔxwe.» 60 Vɔ Yesu bo lɔ ni-i tun:«Mi jo ɛmɛ kukuye do na ye a ɖi onukuku yetɔn, vɔ lɔ, yi a bo ve jla xɔluɖuɖu Mawutɔn gbɔn fi bisese.» 61 Mɛ bu can bo mɔ lɔ tun:«Ko na xodo we, xwetɔ, vɔ na ogbe wu na ma ve byɔ ogbe wu ɛmɛ tɛyee keŋu gbɔxwe.» 62 Vɔ Yesu bo lɔ ni-i tun:«Mɛ ke na lɛ ogle nɔ bo mɔ kpɔn godo nɔ, e hɔn jɛ na yi xɔluɖuɖu Mawutɔn lɔ.»