¹ Kena yesu o va yi nɔ, e kpɔn dahwe ɖe ke ye ji ŋuvanɔ. ² Onukplanvi etɔnye bo kan-ɛ se tun byo:"Hlabi, ɛmɛ lɛ wa onu nyamyla na ye do ji-i ŋuvanɔ, i tete wɛ loo alo ajitɔ etɔnye wɛ?" ³ Yesu bo ɖo ewu na ye byo:" E hɔn nyi itete, alo ajitɔ etɔn ye hwɛn wa onu nyinyla ɖe. Vɔ, na Mawu a do odan etɔnye sɔ xlɛ dogbɔn eji wɛ dɔn! ⁴ Syɛ ke ohwe gbɛ le ote, mi ɖo na wasi ɛmɛ ke ɖo-o ɖodan lɔ we odan, ɖo ozan ba do nɔ, ɛmɛ ti ko va kpevu wa odan ɖe nɔ. ⁵ Hwekenu na ko gbɛ kpɔtɔ le ɛgbɛ ke mɛ , bo wɛ nyi kinklɛn ɛgbɛ lɔ tɔn." ⁶ Kena yesu lɔ oxo ɖo emɔha vɔ, e tun otan do nyidan mɛ, bo do nya baba, bo si gbɔn ŋukunsin ji na ŋuva nɔ lɔ ⁷ E bo lɔ ni-i tun byo:" Ve fun ŋumɛ le kalogun silowe nu" silowe lɔ we gɔnmɛ wɛ nyi ɛmɛ din dɔn. Ŋuvanɔ lɔ yi, bo fun ŋumɛ, hwekenu na e trɔ vo, e bo kpɔn onu nɔ. ⁸ Hatɔye, kpo ɛmɛ ke nɔ kpɔn-ɛ saa, e mɔ no do byɔ onu nɔ ye, o kan se nɔ tun byo:" E hɔn nyi dahwe xin hwɛn nɔ xin nɔ nyi a do byɔ onu nɔ wɛɛ ?" ⁹ Ɛmɛ ɖeɖe lɔ tun: " iwɛ" Ɖeye bo lɔ tun:" Oo i hwɛn, e ɖi-i wɛ!" ¹⁰ iwɛ ye kan-ɛ se byo:" Syɛ ɖe, naɖe ŋukunsin tɔweye wa bo do hun?" ¹¹ E ɖo ewu na ye tun byo:" dahwe ke ye nɔ yɔ tun yesu, e nya baba, bi si gbɔn ŋukunsin ji na-a, bo lɔ na-a tun bo mɔ yi si lome mɔ ve fun ŋumɛ iwɛ ko yi, ke ko fun ŋumɛ lɔ vɔ, ko kpɔn onu nɔ!" ¹² ye mɔ kan-ɛ se byo: " fye lɛ dahwe xin lɔ le?" E bo ɖ'ewu na ye tun byo:" ko hɔn nyɔ" ¹³ ye kplɔ dahwe ke nyi ŋuvanɔ saa lɔ do yi Falizitɔye de. ¹⁴ Vɔ, gbɔjwɛzangbe wɛ yesu nya baba le, bo do hun ŋukunsin na dahwe lɔ. ¹⁵ Iwɛ Falizitɔye can kan dahwe lɔ se tun na ɖe lɛ onu lɔ jɔ ɖo na e do va jɛ onu kpinkɔn ji jaa? E bo ɖ'ewu na ye byo:" E si baba do ŋukunsin ji na-a, ko bo ve fun ŋumɛ, bo kpɔn onu nɔ" ¹⁶ Falizitɔ ɖeye mɔ lɔ ni-i tun byo:" Dahwe ke wasi onu xin lɔ, gbɔjwɛzangbe we osɛn lɔ ji" vɔ, ɛmɛ buye mɔ lɔ naɖe lɛ onu nyinylawatɔ na wa, a do wasi ŋudandonu xin ye?" Ogbe bo ma na ye. ¹⁷ Iwɛ, ye mɔ kan ɛmɛ ke vaŋu saa lɔ se tun byo:" lɔ tete ŋutɔ ɖe, naɖe o lɔ nɔ do ɛmɛ ke hun ŋukunsin na we xin lɔ wu?" E bo d'ewu na ye byo:" Mawu we ogbe ɖotɔ wɛ e nyi" ¹⁸ Ganke jwifuye hɔn jlo na kan do eji tun e mɔ nyi ŋuvanɔ saa, gbɔxwe va kpɔn onu nɔ syɛ. twɛ dɔn, ye yɔ ajitɔ etɔnye do va, ¹⁹ bo kan ye se nɔ tun byo: " Ovi miatɔn ke mi lɔ nɔ tun hiye mɔ ji ŋuvanɔ lɔ xɛn xojɔ xo? Naɖe lɛ e nyi ɖo na e do va kpɔn onu nɔ syɛ? " ²⁰ jitɔ etɔn lɛye bo ɖ'ewu na ye nɔ byo:" Ovi miatɔn wɛ xojɔxo, ŋuvanɔ wɛ e bo nyi na mi do ji-i. ²¹ Vɔ, kena enyi ɖo syɛ gbɔɔn e do va kpɔn onu nɔ, mi hɔn nyɔ-ɛ. Ɛmɛ ke hun ŋukunsin ni-i lɔ can, mi hɔn nyɔ-ɛ. Mi kan oxo wu-i se, e o hwɛn, itete ŋutɔ hɛn e na lɔ oxo do ede nu!" ²² Ajitɔ etɔn lɛye lɔ oxo d'emɔha nɔ, ɖo ye vɔ Jwifuye we ogaye nɔ. Ɖo oga lɛye o sɔ gbeta tun ɛmɛ ke na yi ogbe tun yesu mɛ mɔ nyi klisu lɔ, ye na nya-ɛ le okplityɔn lɔ tɛgbɛ. ²³ E xin lɔ wɛ dɔn na ajitɔ etɔnye do lɔ tun e mɔɔ hwɛn, ye mɔɔ kan oxo wu itete se. ²⁴ Falizitɔ lɛye mɔ yɔ dahwe ke vaŋu saa lɔ, zɔn owegɔ ke, mɔ lɔ ni-i tun byo:" Lɔ oxojɔxo le Mawu we ŋukɔn Miye, mi nyɔ-ɛ tun dahwe ke hun ŋunsin na we lɔ, onu nyinylawatɔ mɛ e mɔ nyi. ²⁵ Iwɛ e gbo d'ewu na ye byo:" E ko nyi onu nyinylawatɔ ma, ko hɔn nyɔ. Vɔ, onu ɖokpo ke, ko nyɔ wɛ nyi tun: ŋuvanɔ wɛ ko nyi saa, syɛ ko kpɔn onu nɔ" ²⁶ ye mɔ d'ewu ni-i tun byo:"ŋunɛ e wa na we? Naɖe lɛ ehun ŋukunsin lɔ na we ɖo? ²⁷ E bɔ ɖewu na ye tun:" ko o lɔ-ɛ na mi saa, vɔ, mi ko ɖo oto wu, ŋunɛ jɔ mi mɔ do kan nɔ na se-e? Alo miye can, mi jlo na trɔ zun onukplanvi etɔn ye wɛɛ?" ²⁸ ye bo ɖewu ni-i byo:" lɔ bɛ nyi onukplanvi etɔn o, miye, Mɔyizi we onukplanvi wɛ mi nyi ²⁹ Miye, mi nyɔ-ɛ tun Mawu mɔ lɔ oxo na Mɔyizi, vɔ elɔ, mi hɔn nyɔ ofi ke e sɔn". ³⁰ Dahwe lɔ bo ɖewu na ye byo:" oxo ke kpaca do ɛmɛ le oxo lɔ mɛ bɛ xin o mi hɔn nyɔ ofi ke esɔn, ganke e bo hun ŋukunsin na-a! ³¹ Mi nyɔ-ɛ tun Mawu hɔn nɔ ɖo oto wu onunyinyla watɔye, vɔ na ɛmɛ ɖe nɔ ɖo sisi ni-i, bo nɔ wasi ojlo etɔn ye, e nɔ do oto wu-i . ³² Mi hɔn se kpɔn tun ɛmɛ ɖe mɔ hun ŋukunsin na ɛmɛ ke ye ji ŋuvanɔ ³³ na ɛmɛ ke lɔ hɔn do sɔn Mawu de wɛ, e hɔn kpewu na wa onu ti!" ³⁴ ye bo ɖewu ni-i tun byo:" Lɔ tete ŋutɔ, onu nyinyla mɛ wɛ o le sɔn hwekenu na ye ji we gbɔɔn, o bo va kplan onu wu miye nɔ?" ye bo ɖee tɔn jɛ gaji ³⁵ Kena yesu se tun ye mɔ nya dahwe ke e mɔ hun ŋukunsin na lɔ, e ve kpɔn-ɛ bo lɔ ni-i byo: " O kan do gbɛtɔ we ovi lɔ ji?" ³⁶ Dahwe lɔ bo ɖewu ni-i byo:" ɛmɛ nɛ lɛ lɔ ɛmɛɖaxo? Lɔ-ɛ na-a ma kan do eji" ³⁷ yesu bo lɔ ni-i byo:" ɛɛn ɛmɛ ke o okpɔn nɔ ke wɛ, ɛmɛ ke lɔ oxo na we nɔ wɛ, ɛwɛ xɛn " ³⁸ iwɛ dahwe lɔ lɔ tun:" xwetɔ, ko kan do ji we" E bo do onu do ni-i, ³⁹ Iwɛ Yesu lɔ tun: " ko va ɛgbɛ lɔ mɛ na ɛmɛ ke hɔn kpɔn onu nɔ saa ye, a do kpɔn onu, na ɛmɛ ke olo kpɔn onu nɔ ye, a do trɔ zun ŋuvanɔ ye: kojoɖiɖo lɔ xɛn xin" ⁴⁰ Falizitɔ ɖeye ke le axa ni-i ye, se oxo xin lɛye, bo kan-ɛ se byo:" Miye can, ŋuvanɔye wɛ mi nyi ?" ⁴¹ Yesu mɔ ɖewu na ye byo:" Na do nyi ŋuvanɔye wɛ, bɛ ɛhwɛ hɔn mɔ le okɔ na mi nɔ, vɔ, ke mi tun mi kpɔn onu nɔ iwɛ dɔn ɛhwɛ lɔ do gbɛ kpɔtɔ le okɔ na mi"