¹ Le kɔsi ɖa gbe kɛklɛnu, le hwexenu na vuvlu mɔ gbɛ lete, Malya Madalatɔn yi yɔgun lɔ to. ² Iwɛ e do weɖun bo ve kpɔn simɔ Piyɛ, kpo do onukplanvi ɖe lɔ, ke yesu yi owan na, e bo lɔ na ye tun byo:" ye kɔ xwetɔ lɔ we ocɔ le yɔ do lɔ mɛ, mi ko nyɔ ofi ke yɔ sɔ-ɛ ɖo" ³ Piyɛ kpodo onukplanvi ɖe lɔ, tɔn a do yi yɔ do lɔto. ⁴ Ye ɛmɛ owe lɛye bɛ wedun kpɔkpɔ, onukplanvi ɖe lɔ, bo do wedun hugan hu Piyɛ bo jɛ te do yɔhun lɔ to jɛ ŋukɔn ni-i. ⁵ E xwi bo kpɔn yɔgun lɔ mɛ, bo kpɔn avɔvinu lɛye le ofi lɔ, vɔ e ko ɖyɛ e mɛ. ⁶ Simɔ Piyɛ, ke le ɛte ni-i, va va, bo ɖyɛ yɔgun lɔ mɛ. Ebo kpɔn avɔvinu lɛye le ofi lɔ, ⁷ kpodo avɔ ke ye axa na avɔ vi nu lɛye, e le xixotɛle ovo, le ofi bu. ⁸ Iwɛ onukplanvi ɖelɔ, ke va jɛ ŋukɔn lɔ can ɖyɛ yɔgun lɔ mɛ, e bo kpɔn, bo kan deji. ⁹ Ɖo, gbɔɔn do va jɛ hwexin lɔnu onukplanviye hɔn kpɔn onu jɛ oxo ke le winwlan kinkwɛn lɔ mɛ wu, tun yesu mɔ ɖo na fɔn sɔn oku. ¹⁰ Exin godo, onukplanvi ye owe lɛye bo trɔ sin oxwe ye tɔn gbe. ¹¹ Malaya le yɔgun lɔ to bo viavi nɔ. Le hwexinnu e vi avi nɔ lɔ, e xwi a do kpɔn yɔ gun lɔ mɛ, ¹² iwɛ e kpɔn Mawu we ɛwɛn-dotɔ owe, ye bo do onu owe pepe, bo xinnɔ nyi ofi ke na ye sɔ ocɔ yesu tɔn sɔ ɖo saa lɔ. Ɛmɛ ɖokpo le tagbe, omɛ owegɔ lɔ bo le afɔgbe. ¹³ Ye bo lɔ ni-i nɔ tun byo:" nyɔnu, ŋunɛ jɔ o vi avi nɔ?" E bo ɖewu na ye tun byo:" Ye kɔ xwetɔ tɛye we ocɔ, ko ko nyɔ ofi kena ye kɔ-ɛ sɔ ɖo" ¹⁴ Kena e lɔ emɔha, vɔ, e trɔ okɔ kpɔn godo, bo kpɔn yesu le ote le blɛ, vɔ ehɔn nytwɛ tun yesu wɛ ¹⁵ yesu bo lɔ nu-i tun:" Nyɔnu ŋunɛ o do vi avi nɔ? ŋunɛ lɛ o kan nɔ? Malya bo bwi tun ɛjikpa lɔ ji kpɔn tɔ wɛ ha. e bo ɖewu ni-i tun: " ɛmɛɖaxo, e nyi yi wɛ kɔ-ɛ, bo lɔ ofi kena o sɔ-ɛ ɖo na ma ve kɔ-ɛ" ¹⁶ Yesu bo yɔ-ɛ bo tun:" Hlabuni" ke we gɔn mɛ nyi onukplan-ɛmɛtɔ. ¹⁷ Iwɛ lɔ ni-i tun byo:" ka hɛn-ɔ ɖo ote, ɖoko hɔn yi Didaye de hɔnde. Vɔ, nɔvwee de, a bo lɔ na ye tun ko mɔ yi Didaye ke mɔ nyi miatɔn de nɔ, iwɛ nyi Mawu tɛye bo mɔ nyi Mawu miatɔn" ¹⁸ iwɛ Malya Madala tɔn yi onukplanvi lɛye de bo lɔ na ye tunhe mɔ kpɔn xwetɔ lɔ. E bo lɔ oxo kena yesu lɔ, ni-i na ye ¹⁹ Le kɔsiɖa gbe nyi lɔ ke we hwedo, onukpanvi lɛye kpli le oxwe ɖe gbe bo do ogan agboji we ohwɔn lɔ mɛ, ɖo ye vɔ jwifu ye we ogaye nɔ. Yesu va, bo nɔ ote le dodomɛ na ye, bo lɔ na ye tun byo:" Fifa nami!" ²⁰ ke e lɔ emɔ ha vɔ, e sɔ alɔ etɔn ye kpo daya etɔye sɔ xlɛye ye. Oji bo jɔ ye taŋu do xwetɔ lɔ ke ye kpɔn wu. ²¹ Yesu mɔ lɔ na ye bu tun byo:" Fifa ni nɔ kpodo mi. Ɖo kena Otɔ lɔ ɖo-o ɖodan ɖo ha, bo can ko o ɖo mi ɖodan nɔ" ²² kena e lɔ oxo xin lɛye vɔ, e ɖe fufu do ye ji bo lɔ byo:" Mi yi Gbi gbɔ kinkwɛn! ²³ Na mi sɔ onu nyinyla sɔ kɛ ɛmɛ ɖe, ye na sɔ kɛ-ɛ, na mi hɔn sɔ onu nyinyla sɔ kɛ ɛmɛɖe, yehɔn sɔ kɛ-ɛ nɔ" ²⁴ Vɔ, ɛmɛ ɖokpo le onukplanvi weve lɛye mɛ, bo nyi toma, ye mɔ nɔ yɔ-ɛ tun togbo su ehɔn le yekɔn yesu lɔ do va. ²⁵ Onukplanvi gbokpwe ye bo lɔ ni-i tun byo:" Mi kpɔn xwetɔ lɔ!" vɔ, Toma bo ɖewu na ye byo:" Na ko hɔn kpɔn ganso we abikpa lɔ le alɔ mɛ ni-i, ko ko zin lɔvi tɛye do ofi kena ye xo ganso do ni-i lɔ, ko ko mɔ, zin lɔvi tɛye do daya we abimɛ can ni-i, bɛ ko hɔn kan do eji nɔ kpɔn gbeɖe" ²⁶ Kɔsiɖa dokpo we godo, yesu we onukplanvi lɛye mɔ va kpli le oxwe lɔ gbe, Toma bo le mɛ. Ye bo do ogan agbonu hɔn lɔ mɛ, ganke yesu bo va nɔ ote le dodomɛ na ye bo tun:" Fifa ni nɔ kpo mi!" ²⁷ E bo lɔ na toma tun byo:" drɛn lɔvi tɔwe lɔ do daja tɛye mɛ, jo onuxokpɔn do, a bo ɖo xɔse !" ²⁸ Toma bo ɖewu ni-i tun byo:" xwetɔ tɛye, Mawu tɛye !" ²⁹ Yesu bo lɔ ni-i tun byo:" E tɔn na o kpɔn-ɔ hin, hwɛn o do va kan do eji wɛɛ ! Nyɔna nɔ wɛ nyi ɛmɛ kena hɔn kpɔn co ganke bo kan de ji ye !" ³⁰ Yesu mɔ wasi ŋu dan donu susu buye le ŋumɛ na onukplanvi etɔnye, ye ko wlan ye bi do wemake mɛ ³¹ Vɔ ye wlan ke ye, na mi a do kan do eji tun yesu mɛ mɔ nyi klisi, Mawu we ovi lɔ. Na mi kan do ji ye, mi mɔ do kpɔn ɛgbɛ do gbɔn nyikɔ etɔn mɛ.