¹ Bo wɛ nyi vɛntin adodwe lɔ, Didaye bo nyi vɛnglejikpɔntɔ lɔ. ² Alɔklan ɖekpokpwe ke le ewu ye, e ko syɛn oku nɔ, vɛngle ke nɔ syɛn okunye, e na gbo ota na ye a bo jla ye ɖe, na ye a mɔ do syɛn hu emɔ. ³ Oxo eke ko lɔ na miye, O sra ɛwu na mi. ⁴ Mi nɔ mɛye ɖi ke ko le mia mɛ ɖo ha Di kena alɔklan ɖe hɔn kpewu na syɛn okun na e hɔn le vɛntin lɔ wu, e mɔ ha ke wɛ miye can, mihɔn kpewu na syɛn okun na mi hɔn nɔ mɛ ye ⁵ Bo wɛ nyi vɛntin lɔ, miye bo nyi alɔklan tɛye, ɛmɛ ke le mɛye, blɔ can bo le elɔ mɛ, mɛ xin lɔ nɔ syɛn okun susu, ɖo, blo mɛ vo mi hɔn kpe onu ti wu bo na wasi. ⁶ Na ɛmɛ ɖe hɔn le mɛ ye, ye nɔ gbo-e flɛn ɖi alɔklan ha, e mɔ xu; ye nɔ bɛ alɔklan lɛye a bo sɔ ye flɛn do ozo mɛ, ye mɔ bi. ⁷ Na mi le mɛ ye, oxo tɛye bo le ayixa miatɔn mɛ, mi byɔ onu kena mi jlo, mi na kpɔn yi. ⁸ Na mi syɛn okun susu, e ne ɖe Didaye we gigo sɔ xlɛ, abo ɖe xlɛ tun miye mɔ nyi onukplanvi tɛyee. ⁹ Di kena nyi owan na-a ɖo, bo can, ko yi owan na mi, nɔ wanyiyi tɛye mɛ. ¹⁰ Na mi zɔn gbɔn osɛn tɛyee ji, bɛ mi na nɔ wanyiyi tɛye mɛ, ɖi, kena blɔ, ko zɔn gbɔn Didaye we osɛnye ji mɔ le wayiyi etɔn mɛ ɖo ha. ¹¹ Ko lɔ oxo ke na mi nɔ, na jijwɛ tɛye a do nɔ miamɛ, oji mɔ do jɔ mi nɔ taŋu ¹² Osɛn tɛye xɛn: Mi yi owan na mi nɔ niɔye ɖi kena ko yi owan na mi ha. ¹³ Owan yi yi ti hɔn mɔ hugan hu ye a sɔ ɛgbɛ ɛmɛ tɔn a sɔ na do ota na hadwe ɛmɛ tɔnye. ¹⁴ Na mi zɔn do ogbeɖiɖi tɛye ji, bɛ mi bo nyi hadwe tɛyee ¹⁵ ko hɔn mɔ mi tunn odan sɔviye nɔ, ɖo odansɔvi hɔn nɔ nyɔ onu ke xwetɔ etɔn nɔ wasi: ko na yɔ mi tun hadwo tɛyee, ɖo, ko na na mi nyɔ onu zɛtɛye ke ko se le Didaye kɔnɔ ¹⁶ Miye hwɛn can blɔ, bo wɛ can mi, bo sɔ mi ɖenyi, na mia do yi, abo syɛn okun, okun sinsyɛn lɛye mɔ le gbɔɔn do yi e xin, onu ɖekpokpwe ke mi na byɔ otɔ lɔ le nyikɔ tɛye mɛ e mɔ sɔ na mi. ¹⁷ Ogbe ɖiɖe ke ko na mi nɔ wɛ nyi tun: mi na yi owan na minɔniɔye ¹⁸ Ɛmɛ gbɛtɔye gbɛ owan na mi miɖo na nyɔ-ɛ tun ye o gbɛ owan na bo can ¹⁹ na mi do nyi ɛgbɛtɔ tɔn wɛ, gbɛtɔye na yi owan na ɛmɛ ke nyi ɛgbɛ lɔ tɔn ye vɔ, mi hɔn nyi ɛgbɛ lɔ tɔn, bo wɛ can mi bo ɖe mi ɖo ovo le ɛgbɛ lɔ wu, onu ke dɔn na gbɛtɔye do gbɛ owan na mi lɔ xɛn nyi xin ²⁰ Mi nɔ flin oxo kena ko lɔ na mi :" O dansɔvi hɔn hugan hu xwetɔ etɔn. " kena e nyi byo ye ɖe o fun na-a, ye na ɖe na ɖe ofun na miye can; na ye do zɔn do oxo tɛye ji wɛ, ye na zɔn do oxo mia tɔn can ji ²¹ vɔ, do nyi kɔ tɛye wu wɛ, ye na wasi onu xin lɛye zɛtɛ kpo mi, ɖo ye hɔn nyɔ ɛmɛ ke na dɔn-ɔ dɔdan. ²² Na ko hɔn do va bo do lɔ oxo na ye wɛ, bɛ onu nyinyla we ɛhwɛ hɔn mɔ le okɔ na ye nɔ. Vɔ, syɛ oxo ti hɔn le na ye na va lɔ a do kan ɛhwɛ ji jɔ do onu nyinyla yetɔnye wu ²³ Ɛmɛ ke na gbɛ owan na-a e gbɛ owan na Didaye can. ²⁴ Na ko hɔn do wasi odan ke na ɛmɛ ɖe hɔn wasi le ye mɛ kpɔn wɛ, bɛ ye hɔn do onu nyinla we ɛhwɛ na ye nɔ, vɔ, le syɛ ye kpɔn odan tɛyee, ganke bo gbɛ owan na bo kpo Didaye kpo. ²⁵ Onuxin lɛye jɔ ɖemɔlɔ, na oxo ke ye wlan do osɛn wema yetɔn mɛ a do cɛ. Ye wlan tun:" ye gbɛ owan na do onu ɖe ma sɔn onuɖe wu. ²⁶ Ko na sɔ akɔn fana-ɛmɛtɔ sɔ ɖodan mi sɔn Didaye de. Hwekenu na e na va, Gbigbɔ xojɔxotɔn ke nɔ sɔn Didaye de lɔ, e lɔ wɛ na ɖe kunnu na-a. ²⁷ Miye can mɔ ɖe kunnu na-a ɖo mi le kpo-o sɔn dojɛ gbɔɔn"