¹ Kena vivayi we oxwe lɔ drɔn onyi hinhɔn atrekpo, yesu yi Betani, ofi ke Lazaa ke e fɔn sɔn oku le ² ke eyi blɛ, ye wasi onu ɖuɖu ɖe, Mata bo o ma onuɖuɖu lɔ nɔ Lazaa can bo le ɛmɛ ke yi tɛnxo a do ɖu onu kpo-e lɛye mɛ. ³ Malya bo sɔ celu Ovivivɛtɔn lita mamɛ ke ye sɔ nalu a dodwe do wasi , bo sɔ do afɔ ye ji na yesu, bo sɔ oɖa etɔnye do tutu afɔ lɛye. Celu lɔ we owan bo gbakpe gbɔn oxwe lɔ gbe seŋu ⁴ Onukplanvi yesu tɔn ɖe ke ye nɔ yɔ yuda Isikalyɔtu ke na va sɔ yesu sɔ jo, lɔ tun byo: ⁵ "ŋunɛ dɔn ye hɔn do sa celu xin, a bo do yi ohogan sandi atɔn abo sɔ oho lɔ sɔ ma na ayanɔ ye?" ⁶ E hɔn nyi tun ayanɔye we onu hwɛn vɛ ni-i nɔ na e do lɔ emɔha, vɔ flanfinnɔ wɛ e nyi, ɖo elɔ wɛ nɔ hɛn ohohɛnnu lɔ, bo nɔ fin le kena ye sɔ do e mɛ lɔ wu. ⁷ Iwɛ yesu lɔ tun byo:" Jo nyɔnu lɔ do xwii, e wasi eke lɔ ɖonyi na ɖiɖizan gbe tɛye. ⁸ Ayanɔ le miakɔn tɛgbɛ. Vɔ blɔ, ko hɔn le miakɔn nɔ tɛgbɛ" ⁹ Jwifu susu gbagba se tun yesu mɔ le Betani ye bo va, e ko nyi yesu lɔ ɖoɖyo hwɛn dɔn na ye do va, vɔ a do va kpɔn Lazaa ke yesu fɔn sɔn oku lɔ can. ¹⁰ Iwɛ avɔsantɔ ɖaxoye sɔ ogbeta na do hu Lazaa lɔ can, ¹¹ ɖo, elɔɔ lɔ wɛ dɔn na Jwifu susu do lɛ le kɔnnɔ, bo ve kan do yesu ji nɔ ¹² Le onuhɔngbe etɔn, gbɛtɔ susu gbagba ke va oxwe ɖu gbe lɛye, se tun yesu mɔ gbɔn nɔ Jeluzalɛmu nɔ. ¹³ Ye kan ɛdemaye, bo tɔn a do ve kpe-e ye bo do axwa nɔ tun:" Gigoo na Mawu! Mawu ni do na ɛmɛ le gbɔn nɔ le xwetɔ Mawu lɔ we nyikɔ mɛ ! Mawu ni do na xɔlu Izrayɛli tɔn" ¹⁴ Vɔ, yesu hɔn osɔkɛtɛvi ɖe bo xinnɔ eji, ɖi ke winwlan lɔ lɔ ɖo ha byo:" ¹⁵ Mi ka vɔ, Jeluzalutɔye mi kpɔn xɔlu miatɔn gbɔn nɔ, bo xin nɔ osɔkɛtɛvi ji" ¹⁶ Jɛ ŋukɔn, onukplanvi etɔnye hɔn kpɔn onu jɛ onu ke jɔ nɔ lɛye wu, vɔ, le vivɔnu, ke Mawu va do giga na yesu bo do fɔn-ɛ sɔn oku, ye va flin tun winwlan kinkwɛn lɔ mɔ lɔ oxo xin lɔ ɖonyi saa do yesu wu, oxo xin lɛye ji bɛ ɛmɛ lɛye wasi do. ¹⁷ Ɛmɛ susu ke le ofi lɔ kpo yesu na e do yɔ Lazaa tɔn-ɛ le ofi le yɔ gun lɔ mɛ bo do fɔn-ɛ le ɛmɛ kukuye mɛ, o ɖe kunnu na yesu lɔ nɔ. ¹⁸ Iwɛ dɔn na ɛmɛ lɛye do va kpe-e, ɖo ye se tun-e mɔ ɖe josi xin lɔ sɔ xlɛ dogbɔn ŋudandonu wiwa mɛ. ¹⁹ Falizitɔye bo lɔ le ye ɖe mɛ nɔ tun byo: Mi kpɔn nɔ syɛ, mi hɔn kpe onu ti wu bo na wa mɔ ! ɛmɛ zɛtɛ biye xɛn xo do-e?" ²⁰ Ɛmɛ ɖeye ke hɔn nyi Jwifu, ɖeye le e ɛwɛ ke va sinsɛn gbe le Jeluzalɛmu le oxwe we gan lɔ mɛ ye, xɛn xin ²¹ ye ve kpɔn filipu ke sɔn bɛtisɛn yida le galile we kansinmɛ, ye bo byɔ-ɛ tun byo:" Ɛmɛ ɖaxo, mi jlo na kpɔn yesu" ²² filipu ve lɔ-ɛ na andle, ye bo zɔn kpɔkpɔ bo ve na yesu. ²³ Yesu bo ɖewu na ye tun byo:" Ogan lɔ xo na Mawu a do ɖe ɛgbɛtɔ we ovi we hɔnhlɔn sɔ xlɛ ! ²⁴ xojɔxo kpatakli xen ko o lɔ na mi nɔ:" na ɛjinukun ɖe jɛ nyidan gɔ, e ko ku, e hɔn nɔ na sin syɛn ti, vɔ na e ku e nɔ syɛn okun susu. ²⁵ Ɛmɛ ke yi owan na ɛgbɛ etɔn na bu-i, vɔ ɛmɛ ke na gbɛ owan na ɛgbɛ etɔn le ɛgbɛ ke mɛ, na nɔ ɛgbɛ gbɔɔn do yi ɛgbɛ Mavɔ mɛ. ²⁶ Na ɛmɛ ɖe jlo na nyi odansɔvi tɛye, ni xo ɖo-e E xin,ofi ke le, odanwavi tɛye mɔ va nɔ blɛ lɔ can. Na ɛmɛ de nyi odansɔvi tɛye, Didaye na va do bubu ewu. ²⁷ Syɛ okla tɛye le onulilo mɛ oxo nɛlɛ ko na lɔ? Otɔ, ka na vivɛsise we oganxixo ke lɔ a va ji ye wɛ ko na lɔ? Vɔ, Oganxixo ke lɔwɛ dɔn na ko do va. ²⁸ Otɔ ɖe hɔnhlɔn tɔwe sɔ xlɛ." iwɛ ogbe ɖe ɖile sɛxwe bo tun:" ko o ɖe hɔnhlɔn tɛye lɔ sɔ xlɛ, ko mɔ na mɔ ɖe xlɛ bu" . ²⁹ Ɛmɛ susu ke le ofi lɔ, bo se ogbe lɔ we ɖiɖi ye, lɔ tun:" Oju wɛ ɖe ogbe!" Ɖeye bo lɔ nɔ tun:" Mawu we ɛwɛn do tɔ ɖe wɛ lɔ oxo ni-i" ³⁰ Vɔ, yesu bo lɔ na ye tun byo:" E hɔn nyi bo hwɛn dɔn na ogbe xin lɔ do ɖi, vɔ miiye wɛ. ³¹ Hwekenu na Mawu na ɖo kojo na ɛgbɛ lɔ xɛn va, syɛ wɛ na ɛmɛ ke ke kpa ɛcɛ do ɛgbɛ lɔ ji, tɔn-ɛ ³² Hwekenu na ye na kɔ-ɔ tɛ le nyidan ji bwɛ, ko na dɔn gbɛtɔ zɛtɛye do va ji ye" ³³ Oku ke ha na e na va ku we oxo wɛ e o lɔ nɔ ɖemɔha ³⁴ Otogun lɔ bo ɖewu ni-i tun byo:"Mi se le osɛn wema lɔ mɛ tun klisu lɔ mɔ na nɔ ɛgbɛ tɛgbɛ, syɛ naɖe lɛ e nyi ɖo o mɔ do lɔ nɔ tun ye mɔ na kɔ ɛgbɛtɔ we ovi lɔ yi jihwe ? Ɛmɛ nɛ lɛ nyi Gbɛtɔ we ovi lɔ? ³⁵ Yesu bo ɖewu na lɔ byo:" kinklɛn lɔ gbɛ le kpodo mi na azan ovii ɖe. Mi zɔnlin le hwekenu na kinklɛn lɔ gbɛ le miakɔn, vuvlu ko mɔ do va cɔn mi le ajijimɛ nɔ o, ɖo, ɛmɛ ke zɔn zɔnlin le wulu mɛ nɔ, hɔn nyɔ ofi kena e o yi nɔ ³⁶ Iwɛ dɔn, syɛ ke kinklɛn lɔ le miakɔn, mi kan do eji, na mia do nyi kinklɛn vikpɛ ye" kena yesu lɔ oxo xin lɔ vɔ, e sɔn bo ve bɛ do ye. ³⁷ Yesu ɖe josi susu sɔ xlɛ dogbɔn ŋudandonu wiwa si mɛ le ŋumɛ na ye, ganke ye ko kan do eji. ³⁸ E xin, oxo ke xolɔɖonyitɔ E zayi a lɔ saa mɔ do cɛ, e lɔ tun byo:" xwetɔ Mawu, ɛmɛ nɛ lɛ kan do oxo ke mi lɔ lɔ ji? ³⁹ Ye ko kpewu na kan do e ji can, ɖo Ezayi lɔ mɔ tun byo:" ⁴⁰ Mawu gba ŋukunsin na ye, bo na na oto ye tun tri, na ye ko mɔ na do kpɔn Ayixa yetɔnye ko mɔ do kpɔn onu jɛ ewu nɔ, ye na gbɛ va lɛkɔ va Mawu kɔn, Mawu mɔ gɔn adɔn na ye" ⁴¹ Ezayi lɔ oxo xin lɔ, ɖo e kpɔn yesu we ninɔmɛ ɖaxo, bo lɔ oxo do yesu lɔ wu. ⁴² Ganke, le Jwifuye we oga lɛye tete mɛ, ɛmɛ susu kan do e ji, vo, do Falizitɔye wu, ye hɔn nɔ lɔ-ɛ le agbaŋugba. ɖo, ye vɔ nɔ tun ye mɔ na nya ye le okplityɔn lɔ tɛgbɛ-tɛgbɛ. ⁴³ Ɖo gbɛtɔ ye a kanfu wu ye wɛ ye nɔ yi owan na sɔ hugan tun Mawu a kanfu wu ye ⁴⁴ Yesu kɔ ogbe yi oji bo lɔ na ye tunbyo:" ɛmɛ ke kan do ji ye, e hɔn nyi blɔ ji ye hwɛn e kan do, vɔ, e kan do ɛmɛ ke dɔn-ɔ ɖodan lɔ can ji. ⁴⁵ Ɛmɛ ke kpɔn blɔ, e kpɔn ɛmɛ ke ɖo-o ɖodan can ⁴⁶ Blɔ kinklɛn lɔ, ko va ɛgbɛ lɔ mɛ, e xin, ɛmɛ ɖekpokpwe ke na kan do ji, hɔn mɔ nɔ vuvlu mɛ nɔ. ⁴⁷ Na ɛmɛ ɖe se oxo tɛye e ko wasi do eyi, e hɔn nyi bo hwɛn na do ɛhwɛ ni-i, ɖo, blɔ ko hɔn va na do do ɛhwɛ na ɛgbɛ lɔ, vɔ a do hwlɛn-ɛ gan wɛ dɔn ko do va ⁴⁸ Ɛmɛ ke gbɛ-ɔ, e ko yi ogbe na oxo tɛyee, onu ke na ɖo kojo ni-i, o le oxo ke ko lɔ, wɛ na ɖo kojo ni-i, le azan kpotwi lɔ gbe. ⁴⁹ Ɖo ko hɔn lɔ oxo le bo tete ŋutɔ we ɛcɛ mɛ, vɔ, Didaye ke sɔ-ɔ ɖodan, elɔ tete ŋutɔ wɛ ɖe ogbe na-a ma do lɔ onu zɛtɛbi ke ko ɖo na lɔ. ⁵⁰ Ko bo nyɔ-ɛ tun ogbe ɖiɖe etɔn nɔ na ɛgbɛ Mavɔ mavɔ. Onu ke we oxo kena ko o lɔ nɔ, ko lɔ-ɛ nɔ ɖi kena Didaye lɔ-ɛ na ɖo ha"