¹ Okancica tantyɛn lɔ can ɖo osɛn ke ji na ye nɔ wasi do, bo mɔ ɖo sinsɛnxɔ nyidan ji tɔn. ² Ɖo ye wasi avɔxɔ ɖokpo tɛnxo tantyɛn tɔn ke le e mɛ lɔ nɔ nyi tɛnxo kinkwɛn. Blɛ lɔ wɛ zogbɛnhɛntin, tavo kpɔnnɔ ke ye sɔ na Mawu ye. ³ Le tɛnxo owegɔ ke ye yɔ tun kinkwɛn taŋu bo le xɔmɛgbovɔ lɔ we godo owegɔ ke ma avɔ lɔ mɛ, ⁴ Blɛ lɔ wɛ zruyamɛnu sika tɔn kpo okancica we ɖaka kena sika gbɔn fi bi na le. Le okancica we ɖaka lɔ mɛ, ozɛn sika tɔn ke mɛ na mana le, le e mɛ, tinkpo Arɔn tɔn ke trɔ jɛ can le e mɛ kpo ɛkpɛn we tɛkpoye ke ji na ye wlan osɛnye do. ⁵ Gigo we Celubɛnye le ota okancica we ɖaka lɔ bo sɔ oxwè yetɔnye sɔ vlu cɔn ofi ke ye nɔ kɔn avɔsinsan we ɛhun do, a do sɔn onyinylaye we ɛhwɛ sɔ kɛ ɛmɛ. Vɔ syɛ hwɛn ko na hun onu bi mɛ. ⁶ Kena onu bisese le tito ɖo emɔha, avɔsantoye nɔ ɖyɛ avɔxɔ lɔ we tɛnxo tantyɛn lɔ mɛ le hweɖe kpokpwe nu a do wa odan yetɔn. ⁷ Vɔ tɛnxo owegɔ lɔ avɔsantɔye we aga lɔ ɖokpo gee jan we nɔ ɖyɛ e mɛ zɔnɖokpo gee le oxwè mɛ. E ko nɔ ɖyɛ e mɛ ma hɛn kanlin we ɛhun a do san avɔ do ota na eɖe do i we onunyinylaye kpo otogun nwe onunyinylaye wu. ⁸ Gbigbɔ kinkwɛn gbɔn blɛ do ɖexlɛ byo na avɔxɔ tantyɛn tɔn lɔ do gbɛ le, omɔ a do ɖyɛ tɛnxo kinkwɛn taŋu lɔ mɛ hɔn mɔ le hunhun. ⁹ Onu xin lɔ nyi na egbe we hwenu. I wɛ nyi byo, onu kena ye nɔ na Mawu ye kpo avɔ kena ye no san ni-i ye, hɔn kpewu na na na ɛmɛ ke sɛn Mawu ɖo omɔ nɔ we ayixa na sɔ bi sese. ¹⁰ Ɛgbɛtɔ we osɛn ke nɔ kplɔ sinsɛn lɔ jan wɛ nyi exinye, xlɔn onyi do onu ji. Exin lɛye bo nɔ'nyi gbɔɔn do jɛ gankemɛ na Mawu trɔ to onu bi do. ¹¹ Vɔ klisu va bo nyi avɔsantɔye we oga na onu nywɛnywɛ kena va ye. E gbɔn avɔxɔ ke glo bo sɔgbe, alɔ ɛgbɛ tɔn ko wesi mɛ, e gɔnmɛ wɛ nyi byo avɔxɔ nyi lɔ hɔn nyi ɛgbɛ ke mɛ tɔn. ¹² E ɖyɛ tɛnxo ke nyi kinkwɛn taŋu lɔ mɛ zɔn ɖokpo gee e bo vɔ do blɛ. E hɔn ogbɔsuye a lo onyi viviye we ɛhun do ɖyɛ e mɛ, vɔ in tete we ɛhun wɛ e hɛn bo sɔ do tu axɔ do ota na mi kaka do sɔn. ¹³ Ɖo na e nyi ye nɔ kɔn ogbɔsuye kpo onyisuye we ɛhun kpo onyi sixwe ke na ye fyɔ ye we ofin do ɛmɛ kena ɖu osuye ji, a bo do sra ɛwu na ye, ye mɔ do trɔ jɛ okpɔ kpo Mawu. ¹⁴ Klisu we ɛhun lɔ hɔn na mɔ wa odan hugan e mɔ ha wɛɛ? e lɔ ke gbɔn gbigbɔ mavɔmavɔ ji bo sɔ eɖe do san avɔ na Mawu le ɖi avɔsinsan ke wu na ofɛn ti hɔn le ha, hubɛ ɛhun e tɔn hɔn na sra ɛwu na ayixa míatɔnye a bo mɔ ɖe odan kena nɔ kplɔ ɛmɛ do yi oku ye tɛ e xin, mí mɔ do wa odan na Mawu ɛgbɛgbyo lɔ wu? ¹⁵ I wɛ dɔn e do nyi okancica lɔ we ɛmɛmɛjraɖotɔ. klisu lɔ ku do tu axɔ d'ota na onunyinyla kena ye wa la okancica tantyɛn tɔn lɔ we ɛcɛ gɔ ye, e xin, ɛmɛ kena Mawu yɔ ye mɔ do yi cinɔn mavɔmavɔ ke we atanŋu Mawu kan na ye lɔ. ¹⁶ Ɖo ofi kena cinnɔsisɔ we wema le, e le dandan mɛ na ye na do ɖexlɛ byo ɛmɛ kena mɔ wlan wema lɔ mɔ o ku. ¹⁷ ɖo cinnɔsisɔ we wema lɔ, hwekenu na ɛmɛ ke wlan wema lɔ ku wɛ wema lɔ we'danwiwa nɔ bɛ, ɖo na e nyi byo ɛmɛ ke wlan wema lɔ gbɛ le ɛgbɛ, wema lɔ hɔn nɔ wa odan kpɔn gbeɖe. ¹⁸ I wɛ wanu na ɛhun do kɔn ɖo onyi gbɔxwe okancica tantyɛn lɔ do bɛ odan. ¹⁹ Ɖo kena Mɔyizi xlɛ osɛn wema seŋu na otogun lɔ bi ɖi kena osɛn wema lɔ lɔ ɖo ha vɔ, e sɔ onyiviye kpo ogbɔsuye we ɛhun kpo ɛsin, e bo sɔ ogbɔfun ove cɛcɛ ɖe kpo hunma, bo hu na wema lɔ tete kpo otogun lɔ bi seŋu, ²⁰ e bo lɔ tun byo: e ke wɛ nyi okancica we ɛhun ke Mawu ɖe ogbe etɔn na mi. ²¹ E bo mɔ hu ɛhun lɔ na avɔxɔ lɔ kpo onu ke ye nɔ do wasi sinsɛnye bi. ²² Le osɛn lɔ mɛ, ɛhun wɛ ye nɔ do ɖibla sra ɛwu na onu bi. Na ɛhun hɔn kɔn ɖo onyi, hun bɛ ɛhwɛsɔkɛ hɔn le. ²³ Na e nyi byo, akɔnu wiwa xinlɛye wɛ ye nɔ wasi a do sra ɛwu na onu ke le sɛxweye we oyɛ le nyidan ji, hun bɛ e le vivɛ ɖe tun onu kena le sɛxwe lɛye tete, avɔsinsan adodweye wɛ ye na wasi ado sra ɛwu na ye. ²⁴ Ɖo e hɔn nyi tɛnxo kinkwɛn ke na ɛgbɛtɔ we alɔ wasi, e bo nyi ke le sɛxwe lɔ we oyɛ mɛ kpoŋu hwɛn klisu lɔ ɖyɛ, vɔ sɛxwe lɔ tete wɛ e ɖyɛ a do nɔ ŋukɔn na Mawu do mía we ota mɛ. ²⁵ E ko nyi byo e ɖyɛ e mɛ a do sɔ eɖe do san avɔ zɔn susu ɖi kena avɔsantɔye we oga lɔ nɔ ɖyɛ tɛnxo kinkwɛn taŋu lɔ mɛ oxwesɔ-oxwesɔ kpo ɛhun bu kena hɔn yi tete ŋutɔ tɔn ha. ²⁶ E do nyi e mɔ ha wɛ hubɛ sɔn ɛgbɛ lɔ wɛ bibɛ gbɔn e o na ɖu aya zɔn nɛmu-nɛmuɖe. Vɔ syɛ, ɛgbɛ lɔ we vivɔnu wɛ e va ɖe eɖe sɔ xlɛ zɔn ɖokpo kpoŋu e bo vɔ do blɛ, e mɔ gu okun na onu nyinnyla gbɔn i tete ŋutɔ we avɔ sinsan mɛ. ²⁷ E le tito mɛ na Mawu byo ɛgbɛtɔ ɖokpo na mɔ ku zɔn ɖokpo gee, e xin godo kojo ɖiɖo mɔ va ²⁸ Emɔke wɛ, Klisu kena sɔ eɖe do san avɔ zɔn ɖokpo gee amɔ do ɖe ɛgbɛtɔ susu gbagba we onu nyinylaye tɛ, e mɔ na va ɖe eɖe sɔ xlɛ zɔn owe gɔ bu, e ko nyi onu nyinyla hwɛn dɔn na e mɔ na do va, vɔ e na va a do va kplɔ ɛmɛ ke kan do eji bo tre kpɔn-ɛ nɔ ye.