¹ Le oxojɔxo mɛ, onu ke na va va lɛye we ninɔ tete hwɛn osɛn lɔ nyi, linwan yetɔn wɛ e nyi. Ɖo exin lɔ wu, avɔsinsan ɖokpo ŋumyɔ kena ye nɔ wasi nɔ tɛgbɛ-tɛgbɛ ye le xwesɔ-xwesɔ, osɛn lɔ hɔn kpewu, gbɔn ye ji a bo na na ɛmɛ ke na tɛkpɔ Mawu nɔ ye a do nyi ɛmɛ ke sɔgbeye kpɔn gbeɖe. ² E hɔn do nyi emɔ ha wɛ, hunbɛ ye bo na ɖo avɔsisan xin lɛye te, ɖo na e nyi ye sra ɛwu zɔn ɖokpo gee e bo vɔ do blɛ, ɛmɛ ke sɛn Mawu ɖo emɔ ha nɔ lɛye hɔn mɔ ɖo susu nɔ tun ɛhwɛ huhu hye tɔn mɔ mɔ gbɛ kpɔtɔ le okɔ na hye ³ Vɔ ye san avɔ xinye nɔ ganke bo nɔ ɖo flin onunyinyla yetɔn lɛye nɔ xwesɔ-xwesɔ. ⁴ Ɖo onyisuye kpo ogbɔsuye we ɛhun hɔn kpewu na ɖe onu nyinyla tɛ gbeɖe. ⁵ I wɛ dɔn hwekenu na Klisu lɔ o ɖyɛ ɛgbɛ lɔ mɛ nɔ, e lɔ lɔ byo:« o hɔn kan avɔsinsan gbɔɔn do kan onu nina, vɔ o wasi agbaza na-a.» ⁶ Avɔsinsan fifyɔ hɔn jɛŋu na we gbɔɔn avɔsinsan do ota na onunyinyla do jɛŋu na we can. ⁷ I wɛ ko lɔ tun byo: bo sɛn, ô Mawu ko va, a do wasi ojro tɔwe ( ɖo we oxo wɛ ye lɔ le vinwlan lɔ mɛ.) ⁸ Jɛ ŋukɔn, e lɔ tun byo: avɔsinsan, onunina, avɔsisan fifyɔ, avɔsinsan do ata na onuninyla, o hɔn ba e ko jɛŋu na we (co ganke ke osɛn lɔ byɔ ɖo jan wɛ ye na san avɔ xin lɛyɛ ɖo). ⁹ E mɔ lɔ tun byo:« bo xɛn, ko va a do wasi ojro tɔwe.» E tutu tito tantyɛn lɔ tɛ, bo sɔ owegɔ sɔ ɖo onyi. ¹⁰ Mawu we ojro xin lɔ wɛ Yesu-Klisu wasi bo do sra ɛwu na mí gbɔn gbaza e tɔn ke e do san avɔ zɔn ɖokpo gee e bo vɔ do blɛ lɔ ji. ¹¹ Avɔsantɔ ɖekpokpwe nɔ le ote gbe bi gbe a do wa odan etɔnye a bo wasi avɔsinsan ɖokpo ŋumyɔ lɛye nɔ zɔn nɛmu-nɛmu ɖe, avɔsisan xin lɛye ko kpewu na ɖe onunyinlaye tɛ kpɔn gbeɖe. ¹² Vɔ e lɔ ke e wasi ɖokpo ge do ota na onunyinla vɔ, e xlɔn onyi le aɖusi mɛ na Mawu tɛgbɛ. ¹³ Blɛ lɔ wɛ e le syɛ, bo le ote kpɔn Mawu ni a do sɔ kɛntɔ e tɔnye do wasi afɔɖejinu etɔn. ¹⁴ Le oxojoxo mɛ, do gbɔn avɔ ɖokpo gee ke e san mɛ, e na na ɛmɛ kena e sra ewu na ye sɔgbe tɛgbɛ. ¹⁵ E xin lɔ gbigbɔ kinkwɛn can o ɖo ɛkpɛn e ji na mi nɔ. Jɛ ŋukɔn e lɔ tun byo: ¹⁶ Xweto Mawu lɔ byo: « ocancica ke ko na wasi kpo we, le azan xin lɛye godo xɛn: ko na sɔ osen tɛye ye do ayixa yetɔn mɛ, a bo wlan ye do oji yetɔnye ji. ¹⁷ Onunyinyla ke ye wasi ye kpo ɛhwɛhuhu yetɔnye, ko hɔn mɔ ɖoŋu do ye wu nɔ.» ¹⁸ Vɔ syɛ, ofi kena ɛhwɛ sɔ kɛ ɛmɛ le, ye hɔn san avɔ do ota na onunyinyla. ¹⁹ Exin wu, nɔvi xɔse tɔye, do gbɔn Yesu we ɛhun ji, Mí ɖo kan do eji kpatakli byo mí na mɔ ɖyɛ tɛnxo kinkwɛn taŋu lɔ mɛ. ²⁰ E hun omɔ yɔyɔ ɛgbɛgbyo ɖe na mí do gbɔn cɔcixɔ we xɔmɛgbovɔ lɔ mɛ, e gɔnmɛ wɛ nyi i tete ŋutɔ we gbaza ji. ²¹ I wɛ nyi avɔsantɔ ɖaxo le Mawu we oxwe lɔ nu. ²² Mía tɛkpɔ Mawu kpo mía we oji le oxojɔoxo mɛ, kpodo xɔse kpikpe ke ɖo kandeji mɛ, oji kena ye sra ɛwu na le onú ɖekpokpwe kena nɔ do ɛhwɛ na ayixa mɛ, kpo gbaza kena ye lɛ ɛsin mimɛ na. ²³ Omɔkpinkpɔn ke we oxo na mi jra nɔ lɔ, mía hɛn ewu gbanŋu-gbanŋu, ɖo Mawu ke kan atanŋu lɔ ogbejinɔtɔ wɛ e nyi. ²⁴ Mía nɔ ŋuzɔn do míaɖeye ji, a mɔ ɖo wanyiyi kpo onú nywɛ-nywɛye wiwa akpakpa lanmɛ na míaɖeye. ²⁵ Mi ka luwɔn na mía nɔ gɔn cɔci míatɔnye yioyi ɖi kena ɛmɛ ɖeye sɔ do ɖo walɔ bo nɔ wasi ɖo ha. Vɔ mía nɔ na oji ɖiɖe wu mía ɖeye, ɖo xwetɔ lɔ we azan tɛkpɔ di kena míye teteye o kpɔn-ɛ ɖo nɔ ha. ²⁶ Ɖo syɛ kena mí nyɔ oxojoxo lɔ, na míye tete ŋutɔye mɔ kpɔtɔ wa onu nyanyla nɔle mía we jlo mɛ, avɔsinsan ti hɔn mɔ le na onunyinyla xin lɛye. ²⁷ Vɔ onu kena mí na tre kpɔn kpo vivɔ ɖaxo taŋu kpo wɛ nyi Mawu we kojoɖido kpodo ozo hlɛhlɛhlɛ Mawu we kɛntɔ ke fɔn ogu do e ji ye. ²⁸ Na ɛmɛ ɖe gba Mɔyizi we osɛn lɔ, na ɛmɛ owe alo atɔn gbɛ ɖe kunnu byo oxojoxo mwɛ, ye nɔ hu-i doŋuɖunu ma kpɔn ni-i. ²⁹ Naɖe lɛ ɛmɛ ke do vwɛ mawuvyɔ lɔ, ɛmɛ kena sɔ okancica we ɛhun kena ye sɔ do sra ɛwu ni-i do yɔ onú vɔvɔ bo gblɔn bo zun gbigbɔ kena nɔ na ɛfɛnu wu ɛmɛ lɔ, mi susu-i na ɖe lɛ iwe otodindɔn na syɛnxu ɖo? ³⁰ Ɖo mí nyɔ ɛmɛ kena lɔ byo: « Bo wɛ nɔ ɖe ohlɔn, bo wɛ nɔ tu axɔ ke je na ɛmɛ ɖokpo-dokpo». E bo mɔ lɔ tun byo: « Xwetɔ Mawu lɔ na ɖɔ ɛhwɛ na otogun etɔn. » ³¹ Onú kena ɖo vivɔ na taŋu wɛ nyi byo aflɛ jɛ Mawu ɛgbɛgbyo lɔ we alɔ mɛ. ³² Vɔ mi ɖo oŋudo azan ke va yi xoxo le bibɛmɛye wu, le hwekenou na mí kpɔn Mawu we kinkwɛn lɔ, mí ɖu aya taŋu bo oji le ahwan sinsyɛnxu mɛ. ³³ Le ogan ɖye me ye nɔ zun mí a bo ɖe ofun na mí le agbaŋugba, le ogan ɖye mɛ mí nɔ le ogbesisɔ a mɔ do gɔ alɔ na ɛmɛ ke na ye ɖe ofun na nɔ ye. ³⁴ Ɖo mí ɖo onu gantɔye we aya ɖuɖu mɛ, mí bo yi ogbe kpo jijwɛ le hwekenu na ye bɛ onu míatɔnye le mía si, ɖo mí nywɛ byo dokunnu ke mɔ nyɔhwɛn hugan exin laye bo nɔ onyi tɛgbɛ mɛ hye mɔ ɖo. ³⁵ Hubɛ mi bo ko bu kandeji miatɔn, ale ɖaxo le emɛ. ³⁶ Đo vivɛnu dido a do wa Mawu we ojro, a bo do yi onu ke we atanŋu na Mawu wɛ hu do mi. ³⁷ Ɖo, « e drɔn ogan xixo oviiɖe, ɛmɛ ke ɖo na va lɔ mɔ va, e hɔn mɔ dɛn nɔ. ³⁸ I wɛ ɛmɛ ke nyi ɛmɛ jijwɛ mɔ nɔ ɛgbɛ gbɔn xɔse mɛ, vɔ e gblɔn yi godo i we onu hɔn mɔ jɛ oŋu na-a nɔ.» ³⁹ Míye, mí hɔn le ɛmɛ ke nɔ gblɔn yi godo a mɔ ve bu nɔ ye mɛ vɔ mí le ɛmɛ ke ɖo xɔse okla yetɔnye mɔ do kpɔn hwlɛngan ye mɛ.