¹ Xɔse wɛ nyi kandeji kpatakli ɖiɖo do onu kena ye le omɔ kpinkpɔn mɛ na ye wu, e bo mɔ nyi onu kena ye hɔn kpɔn nɔ ye we ɖiɖexlɛ. ² Xɔse ke mía dagbwɔ ɖo wɛ dɔn na kunnuɖiɖe nywɛ do nɔ ye wu. ³ Xɔse ɖiɖo wɛ dɔn na mí do nywɛ byo oxo mwɛ Mawu mɔ sɔ do ɖo ɛgbɛ, e bo na na onu kena mí kpɔn nɔ jɔ sɔn onu kena mi hɔn kpɔn nɔ mɛ. ⁴ Xɔse kena Abɛli ɖo wɛ wanu na e do san avɔ ke nyɔhwɛn hugan Kanyɛ tɔn na Mawu. Xɔse xin lɔ wɛ dɔn na Mawu do ɖe kunnu do tun e mɔ nyi ɛmɛ jijwɛ, bo mɔ ɖe kunnu do onu nina e tɔnye wu. Xɔse lɔ wɛ wɛ dɔn na Abɛli lɔ ku ganke bo mɔ gbɛ lɔ oxo nɔ. ⁵ Xɔse ke Enɔku ɖo wɛ wanu na ye do kwɛ do sɔn yi sɛxwe, e ko do ku nɔ, ɖo gbɔxwe na Mawu do kwɛ do sɔn, ye ɖe kunnu do e wu tun e mɔ jɛ oŋu na Mawu. ⁶ Vɔ na ɛmɛ ɖe hɔn nɔ jɛ xɔse, e hɔn kpewu na jɛ oŋu na Mawu, ɖo, ɛmɛ ke ba tɛkpɔ Mawu nɔ, ɖo na kandeji tun Mawu lɔ mɔ le, bo nɔ tu axɔ na ɛmɛ ke nɔ kan-ɛ nɔ ye. ⁷ Xɔse kena Nɔwe ɖo wɛ dɔn na Mawu do xo okpa ni-i do onu kena ye hɔn kpɔn nɔ hɔndyo ye wu, e bo sɔ oxo lɔ do yɔ oxo vivɛ, kpo sisi ɖiɖo na Mawu kpo le gbigbɔ mɛ, bo ta ɖaka ɖaxo a do hwlɛn hwɛndo e tɔn gan. xɔse xin lɔ ke e ɖo, wɛ dɔn na e do do ɛhwɛ na ɛgbɛ lɔ bo trɔzun cinnɔsɔtɔ na ɛgbɛ jijwɛ ke ye nɔ yi gbɔn xɔse mɛ. ⁸ Xɔse kena Abraxamu ɖo wɛ dɔn na, ke Mawu yɔ-ɛ, e yi ogbe bo se tonu, bo sɔn oto ke we cinnɔ na e na ɖu lɔ mɛ, e bo sɔn e ko nyɔ ofi kena e yi nɔ lɔ can. ⁹ Xɔse ke e ɖo xin lɔ wɛ dɔn na, e do va jɛ oxwe do nyidan ke we ogbe na mawu xo ni-i lɔ ɖi jonɔ ha, bo nɔ avɔ xɔye mɛ e mɔ lɔ ke wɛ Izaki kpo Jakɔbu can ke ɖu ogbe xixo xin lɔ we oguye, nɔ avɔxɔye mɛ ɖo. ¹⁰ Ɖo Abraxamu o tre kpɔn toxo ke ɖo dodwe sinsyɛnxu nɔ, Mawu tete wɛ bo ta toxo lɔ we oyɛ bo mɔ nyi toxo lɔ gbátɔ. ¹¹ Xɔse kena Sala tete can ɖo wɛ dɔn e nyi ajikponɔ bo ku nyɔxo ganke bo kpɔn ɛfɛnu Mawu tɔn bo do yi gomi, ɖo e kan Mawu ke nyi gbejinɔtɔ bo kan atanŋu lɔ ji. ¹² I lɔ ke wɛ dɔn na ɛmɛ ɖokpo gee ke gbaza o dɛ na, ji ɛmɛ susu gbagbagba, ye bo le ɖi jiŋukunsin we suhweviye ha, bo do maxlɛ-maxlɛ ɖi ɛxutakɔ ha. ¹³ Xɔse xin lɔ mɛ wɛ, ye ɛmɛ xin lɛye ku le seŋu, onú ke we atanŋu na ye kan na ye, ye ko yi ye can, vɔ ye bo noú lɛye le dindyɔn daan bo do hwezɔn na ye, bo nywɛ tun jonɔ ye kpo omɔzɔntɔye mɛ hye mɔ nyi le nyidan ji. ¹⁴ Le oxojɔxo mɛ, ɛmɛ kena lɔ oxo ɖo e mɔ ha nɔ ye, ye o ɖexlɛ nɔ ceɖe-ceɖe tun oto ɖe mwɛ hiye mɔ kan nɔ. ¹⁵ E do nyi oto ke mɛ na etɔn le lɔ wɛ le ayixa me na ye wɛ, bɛ ye o na kpɔn omɔ a bo trɔ sɔn. ¹⁶ Le oxojɔxo mɛ, ye o kan oto nywɛ nɔ, i we gɔnmɛ wɛ nyi sɛxwe tɔn. I wɛ dɔn ŋunya hɔn wa Mawu na ye do yɔ-ɛ tun Mawu ye tɔn. Ɖo, e jra toxo ɖe do onyi na ye. ¹⁷ Xɔse ke Abraxamu ɖo wɛ dɔn na hwekenu Mawu wasi didokpɔn ni-i e sɔ ovyɔ ɖokpo gee Izaki sɔ na e lɔ ke Mawu xo ogbeye ganke. ¹⁸ Mawu o lɔ ni-i tun byo « Izaki ji wɛ o na gba okun gbɔn ». ¹⁹ E susu-i tun, ɛmɛ mɔ do ku can, Mawu mɔ kpewu na fɔn-ɛ. I wɛ, e trɔ yi ovyɔ ɖi ɛmɛ ke ye fɔn sɔn ɛmɛ kukuye mɛ ha. ²⁰ Xɔse lɔ can ke Izaki ɖo wɛ dɔn na e do xo fifa we ɛɖɛ na Jakɔbu kpo Esawi do onu ke na va jɔ le swɛ godo ye wu. ²¹ Xɔse ke na Jakɔbu ɖo wɛ dɔn na hwekenu e ba ku nɔ e xo fifa we ɛɖɛ na Jozɛfu we vikpɛye ɖokpo-ɖokpo. E bo zyɔn okpotin e tɔn do sɛn Mawu. ²² Xɔse ke na Jozɛfu ɖo wɛ dɔn na, hwekenu na e tɛkpɔ vivɔnu na ɛgbɛ e tɔn nɔ e lɔ oxo do tɔn na Izlayɛli vikpɛye na va tɔn le Ejiputi wu, e bo na ye ogbetaye do oxu e tɔnye wu. ²³ Xɔse ke Mɔyizi we jitɔye ɖo, wɛ dɔn na, ke ye ji-i vɔ, ye sɔ-ɛ sɔ hwla na osunzan atɔn, ye kpo tun ovi lɔ mɔ nyɔhwɛn, ye ko vɔ ogbeta ke xɔlu ɖetɔn-ɛ. ²⁴ Xɔse ke Mɔyizi ɖo, wɛ dɔn na ke e ehwɛn, ye mɔɔ ká mɔ yɔ he tun Faraɔn we nyɔnuvi vyɔ. ²⁵ E yi ogbe bo ɖu aya kpo Mawu we otogun sɔ hugan tun ni a va se vivi le onu nyanyla mɛ na oganxixo oviiɖe. ²⁶ E bo sɔ ŋunya ke me na e gbɔn ɖi ke ye ŋunya wu Klisi ɖo ha, do kpɔn onú kena vɛ oho hugan wu dɔkun ke le Ejiputi ye, ɖo ŋukunsin e tɔnye axɔtu ke gbɔn nɔ lɔ ji ²⁷ Xɔse ke ɖo wɛ dɔn na e lɛ le Ejiputi, e ko vɔ xɔlu lɔ we aɖi dido ɖo, e nɔ ote gliŋu bo le ɖi ɛmɛ ke kpɔn Mawu ke ye hɔn nɔ lɔ nɔ ha. ²⁸ Xɔse kena e ɖo lɔ, wɛ dɔn na e do ɖu vivayi we oxwe bo hu ɛhun lɔ, e xin ɛmɛ crɔntɔ lɔ ko mɔ do ɖo alɔ Izrayɛli we ovi tantyɛn ye wu nɔ. ²⁹ Xɔse kena Izrayɛli vikpɛye ɖo wɛ dɔn na ye gbɔn ɛxu ve mɛ va yi ɖi nyidan xuxu ha, vɔ Ejiputitɔ kena do kpɔn ye ye ku. ³⁰ Xɔse wɛ dɔn na Izrayɛli vikpɛye do lɛto do Jeliko we adokpaye le onyihinhɔn acowe gblamɛ, i xin godo adokpa lɛye bo mɔ. ³¹ Xɔse wɛ dɔn Raxabu kpaconɔ lɔ hɔn do crɔn kpo ogunfɔnye, ɖo e yi onudokantɔ lɛye le fifa mɛ. ³² Onu nɛ ko na mɔ lɔ? Ɖo ganmɛ na hwe do, na ko na do lɔ oxo do Jedenyɔ, Balaki Sanmusɔn, Jɛfute, Davidi, Samiyɛli kpo mawu we oxolɔɖonyitɔye wu, ³³ ye ɛmɛ xin lɛye, do xɔse kena ye ɖo wu, ye ɖu le xɔluɖdutoye ji, bo zan ɛgbɛ jijwɛ, ogbe ke Mawu xo na ye bo cɛ, ye bo do ogan onu na kinnikinni ajaŋutaye, ³⁴ yee ci ozo hɛhɛhɛ dɛnkpwe we oku bo gbɔn ata na ye ye trɔ kpɔn hɔnhlɔn le hwekenu adɔn ye tɔn ye gɔ, bo ɖe kanlinsu ke ye nyi sɔ xlɛ le ahwangbeji, ye bo nya ahwankpa jonɔye do ogbe. ³⁵ Xɔse wɛ dɔn na nyɔnu ɖeye we ɛmɛ ke na kuye, do fɔn sɔ oku vɔ, ye bo do vivɛ sise taŋu na ɛmɛ ɖeye, ye ɛmɛ xin lɛye bo gbɛ tun ye ni mɔ ká ɖe hye tɔn le vivɛ sise xin lɔ mɛ, ye mɔ do kpɔn fifɔn sɔn oku ke nyɔhwen hu. ³⁶ Ɛmɛ ɖeye le, ye bo ko ye, bo do oxa na ye, ɖeye bo le ye bo do caba na ye bo do ye ogan. ³⁷ Ye tɔ ɛkpɛn ɖeye bo hu ye. Ye sɔ saka do zɛ ɛmɛ ɖeye, ɛmɛ ɖeye ku le dɛnkpwe nu. Ɛmɛ bo zan fuflu we ɛgbɛ, ɛmɛ ɖeye do lɛngbɔ kpo gbɔgbwɛ we gbaza, onu ti ko le ye si co ye mɔ nɔ de ofun na y a bo da aya na ye nɔ. ³⁸ Ɛgbɛ lɔ mɛ ninɔ hɔn jɛ na ye, ye nɔ flu nɔ gbɛ faaye ji kpo osɔye mɛ nɔ, a mɔ flu ɛkpɛn ɖaxo-ɖaxo we oguye mɛ nɔ, kpo nyidan we ogun ɖaxo-daxoye mɛ nɔ. ³⁹ Kpo xɔse kena ɛmɛ xinye ɖo ye bo ɖe kunnu nywɛ do ye wu xinye, ganke ye hɔn yi-i onu ke we atanŋu Mawu kan na ye lɛye can. ⁴⁰ Ɖo Mawu ojra onu ke mɔ nyɔhwɛn hugan wu e xin sɔ ɖonyi na ye, na ye ko do nyi ɛmɛ ke sɔgbe nɔ míye mɛvo.