¹ Míye can ɖi kena ɛmɛ susu gbagbagba xinye ke trɔ do mí bo ɖe xɔse sɔ xlɛ ye, míye can mía gbɛ agban kinkpɛn ɖekpokpwe kpo onunyinyla ke nɔ yawu tɛ mía wu, mí mɔ do vivɛnu le odun gaga ke afɔnu na mi lɔ mɛ. ² Mía sɔ ŋukunsin míatɔn sɔ ɖo Yesu lɔ ji trululu, e lɔ ji wɛ xɔse míatɔn bɛ sɔn e bo na na na e na sɔgbe. Do jijwɛ kinkpɔn ke le onyi ni-i wu, e do oji le otinsokpoli lɔ ji, bo yi ogbe na ŋunya e bo va yi hlɔn onyi le aɖusi mɛ na Mawu we xɔlu zinkpwe lɔ. ³ Le oxojoxo mɛ mi bu susu do, e lɔ ke do oji le ogu kena onunyinlawatɔye fɔn do eji nu, e xin mi ko mɔ do jo miaɖe do awakanmɛ ku ɛmɛ gba ayi do na mi nɔ. ⁴ Ahwan ke mi wa kpaŋukɔn onu nyinyla nɔ, mi hɔn ka fun-i gbɔɔn do yi oku hɔn ɖyo. ⁵ Mi boo wɔn apkakpa do lanmɛ na ɛmɛ we oxo ke ye lɔ na mi ɖi vikpɛviye ha byo: « ovi tɛye na xwetɔ Mawu do oto na we nɔ ko sɔ do yɔ onu vovo, e nyi na e gbɛ onu na we nɔ, ko na alɔkanmɛ a ku we. ⁶ Ɖo Xwetɔ Mawu lɔ nɔ dɔn oto na ɛmɛ ke e yi owan na, e bo nɔ do oxa na ovi ɖekpowe ke e yi owan na.» ⁷ Mi do oji le oto dindɔn lɛye nu. kplan wɛ Mawu opklan mi nɔ ɖi vikpeye ha. I wanu na mi do se vivɛ nɔ, ovi nɛ lɛ le na otɔ hɔn nɔ dɔn oto ni-i? ⁸ Na enyi byo ye hɔn nɔ dɔn oto na miye, ɖi kena e nɔ nyi ɖo na vikpɛye bi ha, hubɛ agaviye hwɛn mi nyi xin, mi hɔn nyi ovi jɔ ovi. ⁹ Miatɔ nyidan ji tɔnye le bo nyi okplan na ɛmɛ tɔye, mi bo nɔ ɖo sisi na ye. Hubɛ zɔn nɛmu -nɛmu ɖe hwɛn mi na sɔ miaɖe sɔ hwe na miatɔ a mɔ do kpɔn ɛgbɛ wɛɛ? ¹⁰ Ɖo oganxixo oviiɖe wɛ miatɔye nɔ dɔn oto na mi ɖi kena enyɔ na ya ɖo ha, vɔ Mawu dɔn na mí na onywɛ míatɔn, míye can mɔ do trɔ zun ɛmɛ kinkwɛnye ɖi i tete ŋutɔ ha. ¹¹ Hwekenu ye dɔn oto ɖe kpokpwe na ɛmɛ nɔ, e hɔn nyi jijwɛ kpinkpɔn we onu ɖe, onu lilo wɛ e nɔ hɛn do va. vɔ do va yi nɔ, ɛmɛ ke na ye do oto xin lɛye, e nɔ hɛn fifa kpo ɛgbɛ jijwɛ zinzan we walɔ do va na ye. ¹² Hubɛ mi bo vlu alɔ miatɔn ke kuyɛ nɔ ye, a bo do hɔnhlɔn klita miatɔn ke hunhun nɔ ye. ¹³ Mi jra omɔ ɖo na afɔ miatɔnye, i xin tɛkunɔ we afɔ ko mɔ do wɛn nɔ, vɔ, e mɔ do gɔ̀ ni-i. ¹⁴ Mi ba fifa mɛ ninɔ kpo ɛmɛ bi, mi mɔ zan ɛgbɛ kinkwɛn, na e xin lɔ tɔn dɛn le emɛ, ɛmɛti hɔn kpɔn xwetɔ Mawu lɔ nɔ. ¹⁵ Mi nɔ ŋuzɔn na ɛmɛti ni ko tɔn le xwetɔ Mawu lɔ we ɛfɛnu lɔ, ɛmɛ ti ni ko ci ɖi otinkyɔn vivɛ kpaɖa-kpaɖa ha, kena na jɛ wuwu ji a mɔ va do adɔn ɛgbɛ susu. ¹⁶ Mi nɔ ŋuzɔn na ɛmɛti ni ka nyi ɛgbɛ ɖuɖyu zan tɔ a lo osu ɖu na onutɔ ɖi Esawi ha, e lɔ ke ovi tantyɛn nyinyi etɔn we ɛcɛ sɔ sa do onuɖuduka ɖokpo wu. ¹⁷ Xojoxo do va yi nɔ, ɖi kena mi nywɛ ɖo ha, hwekenu na e va jro tun he didaye mɔɔ xo fifa we ɛɖɛ na he, ye gbɛ-ɛ, e bo ɖe kuku kpo ɖasin le ŋumɛ ganke, ɖe wa na ti ko mɔ le ni-i ¹⁸ Mi hɔn tɛkpɔ onu ke mi hɛn mi na ɖo alɔ e wu, ozo ke hun, ahun ke tu, vuvlu ke do, jɛhɔn sinsyɛnxu ke xo, ¹⁹ okpɛn we ogbe ke ɖi kpo ogbe ke tun onu. Ɛmɛ ke se ye tun ye bo gbɛ tun ye mɔɔ ka mɔ lɔ oxo ɖe do eji na hye bu, ²⁰ ɖo ye hɔn kpewu na zɔn do osɛn ke lɔ ji, i wɛ: « ɛmɛ ɖe kpokpwe ke na ɖo alɔ oso lɔ wu, e mɔ do nyi kanlin wɛ can, ye na tɔ ɛkpɛn wi gbɔɔn e mɔ ku. ²¹ Onu ke jɔ lɔ wɛ do vivɔ taŋu gbɔɔn Mɔyizi bo lɔ tun byo: « ko vɔ nɔ taŋu bo titɔ nɔ.» ²² Vɔ miye Sinyɔ we ose wɛ mi tɛkpo, bo tɛkpɔ Mawu ɛgbɛgbyo lɔ we toxo, i wɛ Jeruzamu sɛxweto me tɔn lɔ, bo tɛkpɔ ɛwɛndotɔ ahwankpɔ kena le agɔɖuɖu we okpleye. ²³ Mi bo tɛkpɔ vikpɛ tantyɛn kena nyikɔ yetɔn le winwlan se sɛxweye, we kpikple. Mi bo tɛkpɔ ke nyi ɛmɛbi we ɛwɛn do tɔ, mi bo tɛkpɔ ɛmɛ jijwɛ ke na na ye sɔgbe ye we gbigbɔ. ²⁴ Mi tɛkpɔ Yesu ke nyi ocancica yɔyɔ lɔ we ɛmɛmɛjraɖotɔ, mi bo tɛkpɔ ɛhun etɔn ke kɔn ɖo onyi lɔ, ɛhun xin lɔ bo mɔ lɔ oxo nɔ nywɛɖe hugan wu Abɛli tɔn. ²⁵ Mi nɔ ŋuzɔn mi ko do ogbe na ɛmɛ ke lɔ oxo na mi nɔ. Ɖo na e nyi byo otodindɔn hɔn gɔn ma jɛ ye ɛmɛ ke nɔ gbɛ ogbe na ɛmɛ ke xo okpa na ye le nyidan ji nɔ ye ji, zn nɛmu-nɛmu ɖe wɛ, miye can otodindɔn na jɛ mia ji na e nyi byo mi ogbe na ɛmɛ ke le sɛxwe bo lɔ oxo na mi. ²⁶ Le hwexinnu ogbe etɔn hunhun nyidan lɔ, syɛ e kan atanŋu byo: « ko mɔ na hunhun ɖokpo bu, e ko nyi elɔ ɖoɖyo hwɛn jiŋukinsi can.» ²⁷ Oxogbe ke nyi « ko mɔ na hunhun» o ɖexlɛ tun onu ɖiɖo ye na hunhun a bo bu, exin onu ke hɔn kpewu na hunhun ye mɔ do onyi. ²⁸ Kena enyi xɔluɖutɔ ke hɔn kpewu na hunhun wɛ mi o nyi nɔ, bɛ mía hɛn ɛfɛnu ke lɔ wu. Ɛfɛnu xin lɔ ji wɛ mí gbɔn bo do sɛn Mawu nɔ gbɔn walɔ ke na jɛŋu ni-i mɛ, mí bo lo sɛn-ɛ nɔ kpo ɛmɛɖe sɔ hwe kpo vivɔ. ²⁹ Ɖo Mawu míatɔn ozo ke nɔ fyɔ ke wɛ e nyi.