¹ Owannyinyi nɔvi tɔn ke mí ɖo na míanɔnyɔye, mi ɖo ŋukɔn yiyi le emɛ. ² Mi ko wɔn jonɔ yiyi, ɖo, do gbɔn exin lɔ mɛ, ɛmɛ ɖeye yi Mawu we ɛwɛndotɔye we jonɔ ma kpɔn onu jɛ e wu. ³ Mi ɖoŋu do ɛmɛ ke le gankpa mɛ ye wu ɖi miye kpo ye kpo wɛ le ogankpa lɔ mɛ ha. Mi ɖoŋu do ɛmɛ ke ye do aya na nɔ ye wu, ɖi agbaza miatɔn wɛ ye o do aya ɖokpoŋumyɔ lɛye na nɔ ha. ⁴ Ɛmɛ bi sese ni ɖo bubu na osu ɖiɖe alo nyɔnu ɖiɖe osu kpo osi mɔ nɔ ogbe ji na yeɖe, ɖo, Mawu na ɖɔ ɛhwɛ na ɛgbɛ ɖuɖyu zan tɔ ye kpo afɔdogbetɔye. ⁵ Mi ko na na owannyinyi na oho a ɖu le mia ji. onu ke le mia si ni kpe mi, ɖo Mawu tete lɔ byo : « ko hɔn jo we do nɔ, ko ko ma ɖe alɔ le wu we nɔ.» ⁶ Ɖo exin wu mí hɛn mí na lɔ kpo kandeji tun lɔ byo : « Xwetɔ Mawu lɔ wɛ nyi alɔgɔtɔ tɛye ko hɔn mɔ vɔ na onu ti nɔ, onu nɛ lɛ ɛgbɛtɔ na kpewu wa na?» ⁷ Mi ɖoŋu do mia we kplɔtɔ ke jra Mawu we oxo lɔ na mi ye wu, mi bu susu do kena ye zan ye we ɛgbɛye ɖo gbɔɔn do yi oku ye wu, mi kpɔn do xɔse yetɔn wu a bo do ɖo xɔse. ⁸ Yesu-Klisu, ke e le le swɛ, ke jan wɛ e le le egbe, bo mɔ na nɔ emɔ gbɔɔn do yi mavɔ-mavɔ. ⁹ Mi ko jo miaɖe do na okplan hamɛ-hamɛ bubuye a bu omɔ na mi. Ɖo e nyɔhwɛn byo ɛfɛnu lɔ a do hɔnhlɔn ayixa e ko nyi onuɖuɖuye hwɛn, onuɖuɖu xin lɛye ko ɖe ale ɖe na ɛmɛ tɛ do ye wu ye. ¹⁰ Mí ɖo avɔsinsan we agba ke ji na avɔsantɔ ke nɔ wa odan le avɔxɔ lɔ mɛ ye hɔn ɖo ɛcɛ ti a mɔ do ɖu onu ke ye do san avɔ le agba lɔ ji ye. ¹¹ Ɖo avɔsantɔye we oga lɔ nɔ hɛn kanlinye we ɛhun a do ɖyɛ tɛnxo kinkwɛn taŋu lɔ, a bo sɔ na do ota na onu nyinlaye, vɔ kanlin lɛye we olanye ye nɔ tɔ ozo wu ye le dindyɔnnu daan ɖo ovo na ofi kena ɛmɛ nɔ nɔ. ¹² I wɛ dɔn na Yesu do ɖu aya le toxo lɔ godo, a mɔ do sɔ ehun i tete ŋutɔ tɔn do sra ɛwu na otogun lɔ. ¹³ E le emɔ, mía tɔn yi ofi kena ɛmɛye nɔnɔ a mɔ va yi ɖu aya ɖokpoŋumyɔ lɔ kpo-e. ¹⁴ Ɖo mí hɔn ɖo toxo ka na na nɔ onyi kaka do yi le ɛgbɛ ke mɛ vɔ toxo ke ba va nɔ lɔ wɛ mí kan nɔ. ¹⁵ Mía nɔ kanfu Mawu tɛgbɛ gbɔn Yesu ji ɖi avɔsinsan ha, i lɔ wɛ nyi onu ke nɔ tɔn onu mɛ na ɛmɛ ke nɔ ɖe kunnu na yi we nyikɔ ye. ¹⁶ Mi ko wɔn onu nywɛ wiwa, a bo ko wɔn onunina ɛmɛ ɖo avɔsinsan xin ha ye wɛ nɔ jɛŋu na Mawu. ¹⁷ Mi nɔ se tonu na kplɔtɔ miatɔye a bo sɔ miaɖe sɔ hwe na ye. Ye nɔ kpeŋu do mia we klaye wu nɔ lɛ ogan ɖekpokpwe mɛ bo ɖo na va jo kɔnŋuta etɔn. Hwexinnu, ye mɔ wasi-i kpo jijwɛ e ko nyi winwɛn nɔ, ɖo exin lɔ hɔn ɖe ale ɖe na mi nɔ. ¹⁸ Mi nɔ xo ɛɖɛ do ota na mí, ɖo kandeji byo mi nɔ ɖo ayixa nywɛ, i wɛ le onu ɖekpokpwe mɛ mi nɔ ba na zan walɔ nywɛ. ¹⁹ Ko byɔ mi nɔ vivɛɖe tun miye mɔ xo ɛɖɛ na Mawu a ɖe omɔ na ma mɔ yawu va mia kɔn. ²⁰ Fifa we Mawu kena gbɔn ɛhun okan cica mavɔ-mavɔ tɔn ji do fɔn lɛngbɔ kplɔtɔ ɖaxo lɔ, Xwetɔ míatɔn Yesu lɔ sɔn ɛmɛ kukuye mɛ, ²¹ ni na mi a le ogbe sisɔ na onunywɛ ɖekpokpwe a mɔ do wa ojro etɔn. Mí gbɔn Yesu-Klisu lɔ ji a mɔ do wa onu jɛŋu ni-i le mia mɛ. Yesu-Klisu lɔ tɔn wɛ nyi gigo sɔn mavɔ do yi mavɔ! Ami! ²² Nɔvi xɔsetɔye ko byɔ mi nɔ tun miye mɔ ɖo oto kpo ohun kuku, akpa ɖiɖo lanmɛ we oxo xinye ke ko lɔ na mi. Onu ke ko wlan ɖodan mi lɔ can hɔn su. ²³ Ko jro tu na mia nywɛ byo ye mɔ jo mía nɔvyɔ Timɔte do na e yawu lɛkɔ va, bo kpo i kpo na va mia kɔn. ²⁴ Mi do ogbe na kplɔtɔ miatɔnye kpo xɔsetɔye. ²⁵ Ɛmɛ ke na le Itali ye do ogbe ɖodan mi. Mawu we ɛfɛnu ninɔ kpo mi 'mɛ bi sese! Ami!