¹ Klisu na mí vivo, na mía do vo taŋu,. I wɛ dɔn mi nɔ ote gliŋu, mi bo ka vɛ do ota kannumyɔ we agban ɖe gɔ. ² Blɔ Pɔlu wɛ o lɔ oxo na mi no: na mi mɔ na na ye gboda na mi nɔ, hun odan ke Klisu wasi lɔ hɔn mɔ va ɖe ale ti tɔn na mi. ³ Ko mɔ ɖo ɛkpɛn e ji nɔ ke na ɛmɛ ɖekpokpwe ke ye gbo ada na tun e mɔ ɖo ma zɔn gbɔn osɛn lɛye bi ji. ⁴ Mi mɛ ke jlo na nyi ɛme jijwɛ dogbɔn osɛn lo ji zinzɔn gbɔn mɛ ye, mi o dɔn miaɖe tɛ le Klisu lɔ wu, bo bu Mawu we ɛfɛnu lɔ. ⁵ Vɔ miye, mi le omɔ kpinkpɔn mɛ taŋu tun Mawu a sɔ mi do kpɔn ɛmɛ jijwɛ dogbɔn xɔse mɛ. E xin lɔ wɛ mi tre kpɔn nɔ gbɔn Gbigbɔ Kinkwɛn ji. ⁶ Ɖo ada gbigbo alo ada ma gbo hɔn nyi onu ti na ɛmɛ ke le Klisu Yesu mɛ, vɔ xɔse ke nɔ wa odan dogbɔn owanyiyi mɛ wɛ le vivɛɖe. ⁷ Mi o lo yi ŋukɔn nɔ saan nywɛnɖe ma a! ɛmɛ nɛ lɛ va ɖo mi te bo tu omɔ do mi, na mi hɔn mɔ do se otonu na oxojɔxo lɔ nɔ? ⁸ Oxo ke ye lɔ n a mi, mi bo kan do e ji, e hɔn sɔn Mawu lɔ kɔn. ^{9 10} Kpɔnɔtinkɛn oviiɖe jan wɛ nɔ na na yɛvowɔ nyinya lɔ bisese nɔ fɔn. Ganke ko kan do mia ji le Xwetɔ lɔ mɛ tun miye mɔɔ ɖo ayixa bu nɔ zɛgbɔn ke ko ɖo wu. Vɔ ɛmɛ ke hlu mi do ewu nɔ lɔ, e mɔ do nyi ɛmɛ ɖekpokpwe wɛ can Mawu na dɔn oto etɔn ni-i. ¹¹ Ke kan blɔ, nɔvi xɔsetɔye, e nyi tun ko mɔ gbɛ lɔ nɔ tunye mɔ ɖo na gbo ada, Ŋunɛ dɔn na ye mɔ do ɖe ofun na mi nɔ? Na e do nyi bo ha wɛ, bɛ ɛmɛ ti hɔn mɔ cite nɔ do Klisu we oku ke e ku le otinsoga ji, we oxo wu nɔ. ¹² Ɛmɛ ke hɔn dɔn hunya-hunya va miamɛ nɔ ye, ye ni mɔ ko gbo ada ɖoɖyo vɔ ye ni le e wu gbɔɔn a bo ta yeɖe. ¹³ Nɔvi xɔsetɔye, miye, vivo wɛ Mawu yɔ mi na. Vɔ mi ko sɔ vivo xin lɔ ɖo ota a do wasi gbaza we ojloye, vɔ dogbɔn owanyiyi mɛ, mi nyi odansɔviye na miaɖeye. ¹⁴ Ɖo osɛn lɔ bi xinnɔ nyi do oxo ɖokpo gee ji. I wɛ nyi:« O na yi owan na hawetɔ ɖi lɔ tete ha.» ¹⁵ Vɔ na mi xu aɖu miɖeye nɔ, bo vunvun miadeye nɔ, mi cɔ miaɖe e hɔn nyi emɔha, mi na vɔ okun na miaɖeye. ¹⁶ Ko lɔ na mi nɔ tun: mi nɔ jo miaɖe do na Gbigbɔ Kinkwɛn a kplɔ mi, mi ko mɔ do zɔn do gbaza we ojlo ye ji nɔ. ¹⁷ Ɖo gbaza we ojloye nɔ cite kpanta Gbigbɔ Kinkwɛntɔnye, Gbigbɔ Kinkwɛn tɔn ye can bo nɔ cite kpanta gbazatɔnye. Ye cite kpanta yeɖeye, e xin mi ko mɔ kpewu a wa onu ke jlo mi nɔ. ¹⁸ Vɔ na Gbigbɔ Kinkwɛn lɔ kplɔ mi nɔ, mi hɔn mɔ le osɛn lɔ gɔ. ¹⁹ Onu ke gbaza nɔ jlo na wa ye mi nyɔ ye nywɛɖe, ye wɛ nyi: ɛgbɛ ɖuɖyu zinzan, onu ɖuɖyu wiwasi, alɛdida, ²⁰ yɛhwe sinsɛn, kpajlɛ wiwasi, owan gbigbɛ na ɛmɛ, ojle wiwa, ewu hwinhwan, aɖi nyinyla dido, onu dindɔn ye, mimaye, ɛmɛji ninɔye, ²¹ ŋubia ahannumu, onu ɖu zɛ ojlɛ wu, kpodo onu ke le ɖi onu xinye ha. Ko ɖo afɔ afɔ ji na mi nɔ, ɖi kena ko wasi saan ha, tun byo: ɛmɛ ke hɔn wasi onu emɔhatɔnye, hɔn dyɛ Mawu we Xɔluɖuɖu lɔ mɛ nɔ. ²² Vɔ Gbigbɔ Kinkwɛn we okun sinsɛn ye wɛ nyi : Owanyiyi, jijwɛ, fifa, agbɔxo dido, dɔmɛnywɛ, onywɛ wiwa, xɔse, ²³ dɔmɛfaa kpodo ɛmɛɖe ji ɖuɖu, osɛn lɔ hɔn cite kpanta onu xin lɛye . ²⁴ Ɛmɛ ke nyi Klisu Yesutɔnye kan gbaza lɔ kpo ojlo etɔnye bi. ²⁵ Ke e nyi tun : ɛgbɛ ke mi le, Gbigbɔ Kinkwɛn wɛ na mi, mia zɔn ɖi kena Gbigbɔ lɔ kplɔ mi nɔ ɖo ha. ²⁶ Mi ko na mia nɔ nyigo, mi ko na mia nɔ kan oxo do miaɖeye nu, ŋubya ni bo ko nɔ miamɛ.