¹ Nɔvye xɔsetɔye, na mi vɛ gbo ɛmɛɖedo e bo wa onu masɔgbe nɔ, ² mi nɔ hɛn agban kpo miaɖeye, e xin mi mɔ do zɔn do Klisu we osɛn lɔ ji. ³ Ɖo na ɛmɛ ɖe sɔ eɖe do kpɔn ɛmɛjɔ mɛ, vɔ e ko nyi onu ti, elɔ tete wɛ blɛ eɖe ɖu nɔ. ⁴ Vɔ ɛmɛ ɖokpo-ɖokpo ni gbeje odan i tete tɔn kpɔn exin na e nyi tun e na sɔ do mla, e mɔ do mla na i tete ɖokpo gee, e ko mɔ nyi dogbɔn ɛmɛ ɖe sɔ jlɛ do ɛmɛ gbokpweye wu mɛ nɔ o. ⁵ Ɖo ɛmɛ ɖokpo ɖokpo na hɛn agban i tete tɔn. ⁶ Ɛmɛ ke ye o kplan Mawu we oxo lɔ nɔ, ni na na ɛmɛ ke o kplan-ɛ nɔ lɔ, a do mɛ le onu nywɛ etɔnye bisese mɛ. ⁷ Mi ko mɔ blɛ miaɖe ɖu: ɛmɛ ɖe hɔn nɔ flu Mawu, onu ke gbɛtɔ do, i wɛ e na gbɛn. ⁸ Ɛmɛ ke xwa onu ke gbaza etɔn jlo, e na ɖe onu ke nɔ tɔn sɔn gbaza lɔ mɛ, i wɛ nyi oku, ɛme ke xwa onu ke Gbigbɔ Kinkwɛn lɔ jlɔ, e na yi onu ke nɔ tɔn sɔn Gbigbɔ Kinkwɛn lɔ mɛ, i wɛ nyi ɛgbɛ mavɔmavɔ. ⁹ Agbɔ ni ko kpe mi do onu nywe wiwasi wu, ɖo na lanmɛ hɔn ku mi, mi na va ɖu ale etɔn le hwekenu na ogan etɔn na va xo. ¹⁰ I wɛ dɔ, ke omɔ ɖiɖe gbɛ kpɔtɔ le na mi, mi wasi onu nywɛ na ɛmɛ bisese le ota ji, na nɔvi xɔsetɔye. ¹¹ Mi kpɔn kena wemakun lɛye glo ɖo, blo tete wɛ wlan wema ke lɔ ɖodan mi nɔ kpodo alɔ tɛye kpɔ. ¹² Ɛmɛ ke jlo tun hiye a mɔ jɛŋu na gbetɔye, o zin mia ji nɔ na mia do gbo ada, onu ke le ota ji na ye jan we nyi tun, ye ko mɔ do de ofun na ye do Yesu we otinsoga lɔ wu nɔ. ¹³ Ɖo emɛ ke gbo ada nɔ xin lɛye, ye tete hɔn nɔ zɔn gbɔn osɛn lɔ ji, ye jlo t_un miye can mɔ gbo ada. ¹⁴ Blɔ onu ɖokpo ke ko na do mla lo jaan wɛ nyi Xwetɔ miatɔn we otinsoga lɔ. Do oku etɔn le otinsoga ji, ɛgbɛ xin lɔ nyi onu kuku na-a, blɔ can bo nyi onu kuku na ɛgbɛ lɔ. ¹⁵ Ɖo adagbigbo hɔn le vivɛ ɖe gbɔɔn na adamagbo can do le vivɛɖe? Vɔ atrɔ zun onu yɔyɔ wɛ le vivɛɖe. ¹⁶ Fifa kpodo dɔŋuɖunu kinkpɔn Mawutɔn ni nyi ɛmɛ ke nɔ zɔn do tito ke lɔ ji ye, tɔn, a bo mɔ nyi, Izrayɛli Mawu lɔ tɔn. ¹⁷ Hun bɛ sɔn syɛ, ɛmɛ ti ni ko mɔ do vivesise na do blɔ, abikpa ke le gbaza tɛye wu ye, o ɖe xlɛ tun bo mɔ nyi Yesutɔn. ¹⁸ Nɔvye xɔsetɔye Xwetɔ míatɔn Yesu Klisu we ɛfɛnu ninɔ kpodo mi. Ami!