¹ Oxo ke ko lɔ nɔ xɛn: na cinnsɔtɔ gbɛ nyi vikpɛvyu, ov gbingbɔn ti hɔn mɔ le e lɔ kpodo ɛmɛxixɔ mɛ, vɔ, elɔ bɛ bo kpa na onu bisese. ² Ganke, e ɖo na nɔ agɔ na ɛmɛ ke o kpe ŋukunsin do e wu nɔ ye, kpodo onujikpɔntɔye, gbɔɔn do yi ogan ke otɔ ɖo mɛ. ³ Miye can, hwekenu na mi nyi vikpɛviye, ɛmɛxixɔye wɛ mi nyi le agɔ na ɛgbɛ mɛ bwɛ we hɔnhlɔnye. ⁴ Vɔ ke ogan lɔ va xo, Mawu dɔn ovyɔ ɖodan nyɔnusi bo ji-i, e bo nɔ osɛn lɔ gɔ, ⁵ a bo do tu axɔ do ota na ɛmɛ ke le osɛ lɔ go na ɛgbɛ mɛ bwɛ we hɔnhlɔnye. ⁶ Ke e nyi tun Mawu we vikpɛye wɛ mi nyi oxojɔxo, e sɔ ovyɔ we Gbigbɔ sɔ ɖodan oji miatɔnye mɛ. Gbigbɔ lɔ bo nɔ do axwa nɔ tun :« Aba, Didaye.» ⁷ I wɛ dɔn, hɔn mɔ nyi ɛmɛ xixɔ, Mawu we vi wɛ o nyi, ke enyi tun ovyɔ wɛ o nyi, Mawu na na we cinnɔ ke e jlaɖo ɖenyi na vikpɛ etɔnye. ⁸ Saan xoxoxo, hwekenu na mi hɔn nyɔn Mawu, mi nyi ɛmɛ xixɔ na yɛhwe ke hɔn nyi Mawu ye. ⁹ Vɔ syɛ ke mi nyɔn Mawu, ma trɛ lɔ na mi tun ke Mawu nyɔn mi, naɖe mi na mɔ trɔ yi ɛgbɛmɛ bwe we hɔnhlɔn ke hɔn ɖo acɛ ɖe bo n yi onu maɖinu ye kɔn ɖo bo mɔ jlo nɔ na do va yi nyi ɛmɛxixɔ na ye? ¹⁰ Ayixa miatɔnye nɔ lɛn azan ɖeye, sunzan ɖe ye, oganxixo ɖeye kpodooxwe ɖeye ji. ¹¹ Onu ke do vivɔ na-a nɔ wɛ nyi tun odan ke ko wa le mia mɛ, na do nyi vɔvɔ sesese wɛɛ? ¹² Nɔvye le xɔse mɛ ye, ko ɖe kuku na mi nɔ, mi trɔ a bo le ɖi bo ha, ɖi kena bo can trɔ bo le ɖi miye ha do. ¹³ Mi hɔn wa onu nyinyla ɖe kpo. Mi nywɛ ganji tun Adɔn ke ko jɛ nɔ wɛ dɔn na ko do jla Ɛwen Nywɛ lɔ na mi tantyɛn. ¹⁴ Kena goto tɛye va le do adɔn ke ko je lɔ wu, e zin mia ji taŋu, ganke mi hɔn do vɔ nɔ cangbɔɔn do gbɛ-ɔ can. Vɔ, mi yi-u ɖi Mawu we Ɛwendo tɔha, bo yi-u di Klisu Yesu tete ha. ¹⁵ Syɛ, fye lɛ jijwɛ miatɔn saantɔ lɔ le? Ɖo ko na ɖe kunu ke do mia wu, e na do kpewu jɛ e ji wɛ, hun miu o na ɖe ŋukunsin miatɔnye a bo sɔ na-a. ¹⁶ Syɛ ɖe oxjɔxo ke ko lɔ na mi nɔ lɔ wɛ dɔn na ko do trɔ zun kɛntɔ miatɔn. ¹⁷ Kena ɛmɛ xinye wa ɖaŋu tɛ do mia wu ɖo nɔ xin, e hɔn le ayixa onywɛ ɖe ji, ye jlo nɔ na tɛyi le wu ye, na do tɛ do ye wu taŋu. ¹⁸ Onu ke nyɔhwɛn wɛ nyi tun, onu nywɛ we akpakpa ninɔ sɔ mi le ogan ɖekpokpwe mɛ, ni ko nyi hwekenu na ko le miakɔn ɖodyo. ¹⁹ Vikpɛ tɛye e mi, ko mɔ gbe se vive lɔ nɔ, gbɔɔn do yi hwekenu na mi na wa onu ɖi Klisu lɔ ha. ²⁰ E jlo tun ma mia kɔn sye a bo do nyɔ ogbe ke na ko na do lɔ oxo na mi, ɖo ko hɔn mɔn nyɔ ke ko na hɛn ɖo do oxo miatɔn wu. ²¹ Mi mɛ ke jlo nɔ na nɔ osɛn lɔ gɔ ye, mi ɖo oxo ke wu na-a, mi hɔn se oxo ke na osɛn lɔ lɔ wɛɛ? ²² Ɖo ye wlan tun Ablaxamu mɔ ji ovi ŋusunglo owe, e ji ɖokpo le Agaa ke nyi ɛmɛxixɔ wu, bo mɔ ji ɖokpo le Saala ke hɔn nyi ɛmɛxixɔ wu. ²³ Ɛmɛxixɔ we ovi ŋusunglo, ye ji-i ɖi kena ye nɔ ji ovi ɖo kpoŋu, vɔ nyɔnu ke hɔn nyi ɛmɛxixɔ lɔ we vi ŋusunglo, dogbɔn Mawu we ogbexixo mɛ wɛ ye ji-i le. ²⁴ Onu hwihwla ɖe le blɛ: Nyɔnu lɛye nyi okancica owe. Okancica ɖokpo sɔn Sinayi we oso ji, , i wɛ nyi Agaa, ke ji ɛmɛxixɔ ye. ²⁵ Agaa wɛ nyi Sinayi we oso le Alabi. Agaa lɔ wɛnyi Jeluzalɛmu we toxo le egbe, ɖo toxo xinlɔ ɖokpo otovi etɔnye nyi kannumyɔ. ^{26 27} Vɔ Jeluzalɛmu sɛxwetɔn le eɖe si, i wɛ nyi míanɔ. Ɖo, e le winwla le Mawu we oxo lɔ mɛ tun kpɔn jijwɛ ajikpo nɔ lɔ ke hɔn ji ovi nɔ! Do jijwɛ we axwa, lɔ ke hɔn se ovi jiji we vivɛ! Ɖo nyɔnu ke ye gbɛ ɖenyi lɔ we vikpɛye na su hugan wu nyɔnu ke ɖo osuye. ²⁸ I wɛ dɔn, mimɛ nɔvi xɔsetɔye, ajɔgbe we vikpɛye wɛ mi nyi ɖi Izaki ha. ²⁹ Vɔ le saan, ovi ke ye ji ɖi kena ye nɔ ji ovi ɖo ha kpoŋu lɔ, ɖe ofun na ovi ke ji dogbɔn Gbigbɔ Kinkwɛn ji lɔ. Ɖemɔha ke wɛ e jɔ ɖo nɔ egbe. ³⁰ Vɔ ɖe, oxo nɛ lɛ Mawu xo lɔ lɔ? E lɔ tun:« Nya ɛmɛxixo xinlɔ kpo ovyɔ ŋusunglo xin, ɖo ɛmɛxixɔ lɔ we vi hɔn ɖu cinnɔ kpodo nyɔnu ke hɔn nyi ɛmɛxixɔ lɔ we ovi nɔ.» ³¹ I wɛ dɔn nɔviye xɔsetɔye, mi hɔn nyi ɛmɛxixɔ lɔ we vikpɛye vɔ nyɔnu ke hɔn nyi ɛmɛxixɔ lɔ we vikpɛye wɛ mi nyi.