¹ I wɛ dɔn, blɔ Pɔlu ko le gankpa mɛ do Klisu we odan wu do mímɛ ke na hɔn nyi Jwifutɔye we tamɛ. ² Odan kena Mawu sɔ do asi na-a dogbɔn ɛfɛnu etɔn mɛ tun blɔ mɔ wasi na mí, ko kand'eji taŋu tun míye mɔ o se. ³ Ɖi kena ko kɛnu d'ewu kleŋu ɖe va yi ɖo ha, ɖiɖexlɛ ɖe mɛ wɛ Mawu na na ko do va kpɔn onu jɛ onumakpɔndona lɔ wu le xɛn xin. ⁴ Na mí o gbɛ xlɛ-ɛ nɔ, mí na nyɔ ke na ko kpɔn onu jɛ Klisu we onumakpɔndona lɔ wu ɖo. ⁵ Onumakpɔndona xin lɔ, Mawu hɔn ɖe sɔxlɛ jijimɛvi gbɛtɔye tɔn saan, vɔ syɛ egbɔn gbigbɔ etɔn jibo do ɖe-e sɔ xlɛ ɛmɛdindɔye kpo ɛwɛndotɔ mimɛ Mawutɔnye. ⁶ Onumakpɔndona xin lɔ wɛ nyi tun, dogbɔn ɛwɛn nywɛ lɔ ji, ɛmɛ ke hɔn nyi Jwifutɔye kpo ɛmɛ ke nyi Jwifutɔye ɖo cinɔ ɖokpo lɛye, ye nyi alɔklanye na gbaza ɖokpo lɔ, bo mɔ ɖo mima le ajɔgbe ke na Mawu fyan gbɔn Klisu Yesu ji ye mɛ. ⁷ Ko nyi odanwatɔ na Ɛwɛn nywɛ lɔ dogbɔn ɛfɛnu kena Mawu na-a mɛ, e bo wasi-i kpodo hɔnhlɔn etɔn kpo. ⁸ Blɔ ke na nyi kpotwi na xɔsetɔye bisese, ko yi ɛfɛnu xin lɔ, a do jla dɔkun mavɔ ke na le Klisu mɛ we oxo na mɛ ke na hɔn nyi Jwifutɔye ⁹ a bo mɔ do na na ɛmɛ bisese anyɔ kena Mawu na wasi onumakpɔndona etɔn kena e sɔ hwla sɔn xoxoxo gbɔɔn ɖo, elɔ wɛ ɖo onu bisese le ɛgbɛ lɔ mɛ. ¹⁰ Exin, bɛ sɔn syɛ, dogbɔn Agun lɔ ji, acɛ kpikpa kpo ogaɖuɖu ke na le jiŋukunsinye mɔ do nyɔ onunyinyɔ hamɛ-hamɛ Mawutɔn ke na le ye. ¹¹ Mawu wasi exinlɔ e bo sɔgbe kpodo tito mavɔmavɔ ke na e wasi gbɔn Xwetɔ míatɔn Yesu ji. ¹² Ɖokpo ke mí wasi kpo Klisu lɔ kpodo xɔse ke na mí ɖo do eji, hun omɔ na mí na míado tɛkpɔ Mawu kpodo ojiɖiɖe taŋu. ¹³ I wɛ dɔn, ko do byɔ mí nɔ tun ayixa ni mɔɔ ka gbado na mí do vivɛ ke na ko se nɔ do ota míatɔn ye wu, e na hɛn gigo va na mí. ¹⁴ I wɛ dɔn ko nɔ jɛ klita le ŋukɔn na Mawu Otɔ lɔ, ¹⁵ ke mɛ na kunkan ɖekpokpwe ke le sɛxwe kpo ŋudanji, jɔ sɔn, ¹⁶ bo byɛ tun ɖi kena gigo etɔn glo ɖo, ni mɔɔ do hɔnhlɔn ke syɛnxu lanmɛ na mí do gbɔn Gbigbɔ etɔn ji. ¹⁷ Exin, do gbɔn xɔse mɛ, Klisu mɔ nɔ oji míatɔnye mɛ, mí mɔ do aɖɔ do a bo ɖo dodwe le owanyiyi mɛ. ¹⁸ Mi mɔ do kpɔn hɔnhlɔn, míye kpodo xɔsetɔye bisese mɔ do kpɔn onu jɛ kena Klisu we wanyiyi lɔ glo, bo gaga, bo yi oji, bo tito ɖo wu. ¹⁹ Ke mɔ hugan hu ɖemɔ, mí mɔ do nyɔ Klisu we wanyiyi ke hugan hu onuyinyɔ ɖekpokpwe, exin, Mawu we ninɔmɛ mɔ do gɔ ayixa míatɔn mɛ taŋu-taŋu. ²⁰ Mawu kpewu, do gbɔn hɔnhlɔn etɔn ke wa odan le míamɛ nɔ ji, a do wa onu na mí hugan onu kena mí byɔ kpodo ke le oji míatɔn mɛ ye. ²¹ Etɔn wɛ nyi gigo le Agun lɔ mɛ, le Klisu Yesu mɛ, le jijimɛvi bisese mɛ, kaka d'oyi mavɔmavɔ! Ami!