¹ I wɛ dɔn, blɔ mɛ ke n a le gankpa mɛ do Xwetɔ lɔ we odan wu, ko byɔ mi nɔ tun mi mɔ zan ɛgbɛke sɔgbe kpodo oyɔ ke na mi yi lɔ. ² Mi nɔ sɔ miaɖe sɔ hwe, a bo nɔ wasi dɔmɛfaa, a bo nɔ kuhun. Mi nɔ kuhun do miaɖeye ji le owanyiyi mɛ. ³ Mi jɛ tagba bi abo sɔ fifa ke bla mi do miaɖe wu, a do hɛn ɖokpo wiwasi kena gbigbɔ kinkwɛn na mi lɔ ɖo te. ⁴ Gbaza kpo Gbigbɔ ɖokpo gee wɛ le, ɖemɔke miye can, omɔkpikpɔn kena ye yɔ mi na lɔ, nyi ɖokpo gee. ⁵ Xwetɔ ɖokpo gee kpo xɔse ɖokpo gee wɛ le, Mawu we ɛsin lilɛ ɖokpo gee wɛ le, ⁶ Mawu ɖokpo gee wɛ le bo nyi otɔ na mɛbisese, bo kpa ɛcɛ na mɛbisese, bo nɔ wa odan le mɛbisese mɛ, bo le mɛbisese mɛ. ⁷ Ɖokpo ɖokpo míatɔn yi onunina kpatakli, ebo sɔgbe kpo onunina kena Klisu na lɔ. ⁸ I wɛ dɔn enyi wiwlan tun byo: kena eyi jihwe daan, e kplɔ ɛmɛ ke le gankpamɛ ye do sɔn. E na onu otogu lɔ. ⁹ Ŋunɛlɛ ye lɔ nɔ bo do tun : E yii jihwe daan:, ote hwɛn ejɛ gbɔn bo va ŋudan ji wɛɛ? ¹⁰ ɛmɛ ke jɛ te lɔ, ke wɛ yi jihwe daan bo gbɔn jiŋukunsi wu, exin, emɔ do gɔ ɛgbɛ lɔ mɛ bisese. ¹¹ E lɔ tete wɛ na onuniana hamɛ-hamɛye. E na na ɛmɛ ɖeye nyi ɛmɛdindɔnye, ɖeye nyi ɛwɛndotɔye, ɖeye nyi Ɛwɛn Nywɛ Mawutɔn jlatɔye, ɖeye nyi agunkplɔtɔye, ɖeye bo nyi onukplan ɛmɛtɔye ¹² exin, e mɔ do jla xɔsetɔye ɖ'enyi na odan kena ye na wa na agun ke nyi Klisu we gbaza lɔ a do yi ŋukɔn le xɔse mɛ, ¹³ gbɔɔn mimɛ bisese mɔ wasi ɖokpo le xɔse mɛ, a bo nyɔ Mawu we ovi lɔ bi, a bo hwɛn le xɔse mɛ, a bo le ɖi Klisu lɔ ha, ninɔmɛ míatɔn mɔ sɔgbe kpodo etɔn sesese. ¹⁴ Exin, mí hɔn mɔ nyi vikpɛye nɔ, onukpinkplan ɖekpokpwe we jɛhɔn ko mɔ dɔn mí do yi cincrɔn mɛ nɔ, ɖi tɔjihun ke xosi nɔ ha. Gbɛtɔye ko mɔ blɛ mí ɖu nɔ kpodo aglanmɛ we oxo yetɔnye a bo do dɔn mí a bo do dɔn mí a do yi onu nyinyla mɛ nɔ. ¹⁵ Vɔ enyi tun mí jla oxojɔxo lɔ nɔ le owanyiyi mɛ, mí na hwɛn le onu ɖekpokpwe mɛ a bo do tɛkpɔ Klisu ke nyi ota lɔ nɔ. ¹⁶ E lɔ wɛ na na alɔklan hamɛ-hamɛye kple bo wasi gbaza ɖokpo, kpetyɔ hamɛ-hamɛye bo hɛn gbaza lɔ ɖote nywɛnɖe. Exin, na alɔklan ɖokpo-ɖokpo o wa odan etɔn nɔ ɖi kena e jɛ ɖo ha, gbaza lɔ bisese mɔ hwɛn nɔ a bo yi ŋukɔn nɔ le owanyiyi mɛ. ¹⁷ Ko mɔ gbɛ tɛɖɛ oxo ke ko lɔ na mi nɔ le Xwetɔ Yesu lɔ mɛ nɔ tun: mi mɔ ka zan ɛgbɛ ɖi kena mɛke hɔn nyɔ Mawu ye nɔ zan ɖo ha, susu yetɔnye bo nɔ dɔn ye do ɖyɛ onumanyɔtanaye mɛ. ¹⁸ Susu yetɔnye do vuvlu, i wɛ dɔn onumanywɛ kena oji sinsyɛn yetɔnye nɔ hɛn do va wu, ɛgbɛ zinzan yetɔn nɔ gbɔnvo na ke na Mawu nɔ kan. ¹⁹ Ayixa yetɔnye hɔn le ɛgbɛ, ye bo jo yeɖe do na ɛgbɛ ɖuɖyu zinzan kaka gbɔɔn onu ti ko mɔ va ɖo yete nɔ le onu ɖuɖyu wiwa mɛ nɔ can. ²⁰ Miye, okplan ke na mi yi do Klisu wu hwɛn nyi exin. ²¹ Le xojɔxo mɛ, Yesu lɔ we oxo wɛ ye lɔ mi bo se, ye bo kplan onu wu mi do xojɔxo ke le emɛ, ²² mi ɖo na jo walɔ xixo miatɔn saantɔnye do, na mi wasi ɖemɔha nɔ, mi na jo ninɔmɛ saantɔn kena mi ɖo ye do, ninɔmɛ xinlɔ we ɛmɛblɛɖu we ojloye nɔ dɔn ɛmɛ do yi cincrɔn mɛ. ²³ Mi jo miaɖe do na Gbigbɔ ke o wa odan le miamɛ nɔ a na na zinzin miatɔn a gbɔn va yɔyɔ, ²⁴ mi mɔ sɔ ninɔmɛ yɔyɔ lɔ a sɔ do ɖi awu ha, Mawu wɛ ɖo ninɔmɛ xin lɔ, e bo nɔ ɖe eɖe sɔ xlɛ gbɔn ɛgbɛ jijwɛ zinzan kpodo ɛgbɛ mimɛ zinzan ke nɔ tɔn sɔn xojɔxo lɔ mɛ,mɛ. ²⁵ I wɛ dɔn, mi jo ojo kinkan do, ɖokpo-ɖokpo miatɔnye ni nɔ lɔ xojɔxo na hatɔ,ɖo mi nyi gbaza ɖokpo we alɔklanye. ²⁶ Na aɖi wle mi, mi ka wa onu nyinyla, aɖi lɔ ni ko nɔ miaji gbɔn ohwe mɔ yi oxɔ d'eji. ²⁷ Mi ka jo omɔ ti do na lɛgba. ²⁸ Ɛmɛ ke nɔ jɛ ajo san, ni jo ajo jijɛ do, ni tɛnkpɔn a bo wa odan kpodo alɔ etɔnye kpo ayixa onywɛ, exin, e mɔ do ɖo onu ke na kpedo ɖɛmɛ ke le ohyan mɛ wu. ²⁹ Oxo nyinyla ti ni ka nɔ tɔn sɔn onu miatɔnye mɛ o,vɔ,na mi na lɔ oxo janwɛ, ni nyi oxo nywɛ ke na na do hɔnhlɔn lanmɛ na ɛmɛ a bo wa onywɛ na ɛmɛ ke na nɔ ɖo oto nɔ ye. ³⁰ Mi ka mɔ na na Gbigbɔ mimɛ a ci dɔŋuɖunu mɛ, elɔ lɔ wɛ Mawu sɔ do ɖo josido mia wu na okantuntun we azan lɔ gbe. ³¹ Onu vɛ le ɛmɛ wu ɖekpokpwe, aɖi dido taŋu ɖekpokpwe, axwa dido ɖekpokpwe, acɔn kɔn do ɛmɛ wu ɖekpokpwe kpo danu wiwa ɖekpokpwe ni ka nɔ miamɛ. ³² Mi nyɔ dɔmɛ do miaɖeye, a bo nɔ kpɔn dɔŋuɖunu na miaɖeye, a bo nɔ sɔ ɛhwɛ sɔ kɛ miaɖeye ɖi kena Mawu sɔ kɛ mi le Klisu mɛ ɖo ha.