¹ le san xoxoxo, ɛmɛ kuku ye wɛ mi nyi do onumasɔgbe kpodo onu nyinyla wiwa miatɔnye wu. ² E xin lɛ ye wɛ mi nɔ jo miaɖe do na san, a bo se otonu na ɛmɛ ke kpa acɛ na ɛgbɛ ke nɔ xɔ luvi ke kpa ɛcɛ na hɔnhlɔn nyinyila ke na le jɛhɔn mɛ ye we oga, gigbɔ nyinyla xin lɛye we oga bo wa odan nɔ syɛ le ɛmɛ ke na nɔ gbɛ otonu sise na Mawu ye mɛ. ³ Míye can, mi le maxɔ se tɔ xin lɛ ye mɛ san, mi mɛ bisese, mi bo nɔ jo miaɖe do na gbaza miatɔn we ojlo nyinylaye, bo nɔ wasi do ojlo gbazatɔn xin lɛye kpodo susu miatɔnye ji. Ke e nyi tun ɖ'emɔ wɛ mí o le san, ovi ke Mawu sin xo mɛ do san wɛ mi o nyi ɖi ɛmɛ ɖelɛye ha. ⁴ Vɔ Mawu we dɔmɛ nyinyɔ e glò do wanyinyi ɖaxo kena e ɖo na mi wu, ⁵ mi ye ke o nyi ɛmɛ kuku do onumasɔgbe miatɔn wu, e va lɛ kɔ na mido va ɛgbɛ yɔyɔ ke le Yesu mɛ lɔ mɛ. Do gbɔn ɛfɛnu mɛ w mikpɔn hlwɛngan. ⁶ Mawu fɔn mi sɔn oku dokpɔ bo mɔ sɔ mi sɔ xinnɔ onyi le sɛxwe le Yesu Klisu mɛ. ⁷ E wasi e mɔ na le hwenu ke na va ye, i a do kpewu a va xlɛmi dɔkun ɖaxo ɛ fɛnu lɔ tɔn. E xlɛ mi onu e mɔhatɔn do gbɔn domɛ ny wɛ ke le Yesu Klisu lɔmɛ. ⁸ Ɖoo do gbɔn ɛfɛnu lɔ mɛ wɛ mi kpɔn hwlɛngan le, do gbɔn xɔse miatɔnji, e ke lɔ ko sɔn miakɔn, onu nina Mawutɔn wɛ. ⁹ Ehɔn nyi do gbɔn odan wiwa miatɔnye wu hwɛn, e xin ɛmɛ ɖe ko mɔ sɔ-ɛ do nyigo nɔ. ¹⁰ Ɖo Mawu we wasi mí, le ɖokpo kena mí le le Yesu Klisu mɛ, na do wa odan onywɛ ke e o jla ɖo ɖenyi ye wu, e xin mí mɔ do zɔn zɔnlin kpwe. ¹¹ Mí flin tun le san xoxo, le gbazamɛ mí hɔn nyi Jwifutɔye o. Ye bo nɔ yɔ mí tun ada magbotɔye, a bo yɔ ye ɖe tun ɛmɛ ke gbo adaye. Vɔ ada gbigbo xin lɔ bo nyi gbazamɛ we onu kena gbetɔ nɔ sɔ alɔ etɔn tete nɔ do wasi. ¹² Ɖo le hwexinnu, mío klan le Klisu wu. Mí nyi jonɔ na otogun Izrayɛlitɔn. Mí nyi jonɔ na okancica ajɔgbe Mawutɔn lɔ tɔn. Kand'eji ti hɔn mɔ va le na mí do oswɛ ke gbɔnnɔye wu. Mí va ci ɖi ɛmɛ ke hɔn ɖo Mawu ye ha le Ɛgbɛ lɔ mɛ. ¹³ Mí o dɛɛn le Mawu wu san, vɔ syɛ, mí mɔ va bɔ do ewu do gbɔn Ɛhun Yesu Klisu tɔn lɔ mɛ. ¹⁴ Ɖo i wɛ nyi fifa míatɔn. E sɔ owe lɛye do wasi ɖokpo. Kpodo gbaza etɔn kpo, e va hɔ ado ke o klan míye kpo Mawu mɛ nɔ san. ¹⁵ E hu acɛ na Jwifuye we osɛn kpodo ogbeɖiɖe etɔnye kpo onu ke ji na ye na zɔndoye, exin, dogbɔn elɔ ji mɛ ke nyi Jwifu kpodo ke hɔn nyi Jwifu mɔ do trɔ zun otogun yɔyɔ ɖokpo gee, emɔ wɛ e hɛn fifa va ɖo. ¹⁶ Do gbɔn oku ke na eku le otinsogaji mɛ, esɔ ye ɛmɛ owe lɛye do wasi gbaza ɖokpo gee, bo na na ye trɔ jɛ okpɔ kpodo Mawu, ɖemɔ wɛ e gu okun na okɛn lɔ ɖo le otinsoga lɔ ji. ¹⁷ E va do fifa we ɛwɛn na mímɛ ke le dindɛnnu san na Mawu ye, bo mɔ va do fifa we ɛwɛn nywɛn na mɛ ke tɛkpwɛ ye can. ¹⁸ Ɖo dogbɔn Yesu mɛ, mi mɔ ɖo omɔkpinkpɔn na do nyi yemɛ owe lɛye tɔn le Mawu Otɔ lɔ mɛ le gbigbɔ etɔn ɖokpo lɔ mɛ. ¹⁹ Hun enyi e le emɔha, mimɛ ke hɔn nyi Jwifu san ye, hɔn mɔ nyi jonɔ alo ɛmɛbuti. Vɔ mi mɔ va nyi ɛmɛ ke bɔ do ɛmɛ ɖe d'ovo Mawutɔnye wu, bo na mɔ nɔ akɔta Mawutɔn mɛ. ²⁰ Mi va trɔ zun oxɔ ke we dodwe nyi ɛmɛdindɔnye kpo Mawu we ogbeɖotɔye. Klisu Yesu lɔ tete bo nyi azweji we ɛkpɛn lɔ. ²¹ Elɔ ji wɛ oxɔ lɔ bisese nɔ xlɔnnyi do bo nɔ yi jihwe, exin, e mɔ do nyi oxwe mimɛ na Xwetɔ lɔ. ²² Kena mí wasi ɖokpo kpodo Klisu lɔ, míye can mi nyi ɛkpɛn kena ye do wasi oxɔ lɔ we akpa ɖeye, mimɛ bisese mɔ do nyi ofi ke na Mawu we Gbigbɔ na nɔ nɔ.