¹ Blɔ Pɔlu, ke nyi Yesu Klisu we ɛmɛdindɔn do gbɔn Mawu we ojlomɛ, wɛ wlan wema ke dodan xɔsetɔ ke na le Efɛzu bo le ogbeji le klisu mɛ ye. ² Na Mawu miatɔn kpodo xwetɔ Yesu Klisu ni na mi ɛfɛnu kpodo fifa. ³ ɛkpɛ na Mawu ke na nyi otɔ na xwetɔ miatɔn Yesu Klisu ! Elɔ wɛ sɔ gbigbɔ nyɔna mɛ we ɖekpokpwe ke le sɛxwe bodo do na mi ɖo mi le okpɔ kpodo Klisu. ⁴ Gbɔxwe ɛgbɛ lɔ do jɔ, Mawu o can mi ɖenyi na mi a do wasi ɖokpo kpodo klisu, e xin, le ŋumɛ etɔn, mi mɔ do nyi ɛmɛ wiweye, ɛmɛ ke wu na ye hɔn kpɔn ofɛn ti le nɔ le ŋukɔn etɔn. ⁵ Mawu o ɖo-e ɖenyi xoxoxo tu he a mɔ sɔ mi do ɖo vikpɛ etɔnye do gbɔn Yesu Klisu ji. Kena e jlo-e ɖo le dɔmɛ nyinyɔ etɔn mɛ. ⁶ I wɛ dɔn mi a kafu Mawu do ɛfɛnu ɖaxo etɔn kena e kɔn do miaji wu, do gbɔn ovi vɛna vɛna etɔn ji. ⁷ Le elɔ lɔ mɛ, mi kpɔn okantuntun do gbɔn Ɛhun etɔn mɛ, Yesu xin lɔke mɛ, wɛ Mawu sɔ onu masɔgbe miatɔnye sɔ kɛ mi do kena ɛfɛnu etɔn su ɖo wu. ⁸ Ɛfɛnu xin lɔ wɛ e kɔn do mia ji taŋu, bo do na mi onunyinywɛ ke sɔgbe kpodo zinzin ke sɔgbe. ⁹ Onumakpɔndona kena e ɖo ɖe nyi xoxoxo gbɔn ojlo etɔn mɛ, e na na mi kpɔn onu jɛ e wu le klisu mɛ dogbɔn dɔmɛnywɛ etɔn mɛ. ¹⁰ Tito xin lɔ, Mawu na na e na va cɛ le hwe etɔn nu, i wɛ nyi tun, e na kple onu bisese ke na le sɛxwe kpodo nyidan ji ye, do oga ɖokpo we acɛ gɔ, i wɛ nyi klisu lɔ. ¹¹ Klisu lɔ mɛ ke wɛ mi nyi cinnɔsɔ tɔye le, dogbɔn Mawu ke nɔ wasi onu bisese ɖi kena elɔ́ tete jlo ɖo ha. Mawu lɔ o can mi ɖ'onyi xoxoxo ɖi ke na eto-e ɖo ha. ¹² E xin, mi mɛ keye n'a nyi tant yɛnye bo sɔ omɔ kpinkpon miatɔn sɔ ɖo Klisu lɔ ji ye mɔ do kafu Mawu do kena e glo ɖo wu. ¹³ Klisu lɔ mɛ ke wɛ miye can se xojɔxo lɔ le, ɛwɛn nywɛ ke hwlɛn migan lɔ. Elɔ lɔ ke ji wɛ mi kan do, Mawu bo sɔ Gbigbɔ Mimɛ ke we ajɔgbe kena e o do ɖo josi mi. ¹⁴ Gbigbɔ lɔ wɛ nyi kandeji kpatakli na mi tun mi mɔ na va yi cinɔ miatɔn kandeji xin lɔ le nyi na mi gbɔɔn do yi hwekenu na mi na va nyi Mawu tɔn bisese, mi bo na yi cinɔ lɔ, i wɛ dɔn, mi a kafu-i do kena e glo ɖo wu. ¹⁵ I wɛ dɔn kena blɔ can ko se kena mi ɖo xɔse do xwetɔ Yesu ji ɖo kpodo kena mi yi owan na xɔsetɔ ye bisese ɖo, ¹⁶ ko hɔn nɔ dokpo ɛkpɛ ma do na Mawu do ota miatɔn mɛ gbeɖe, ko nɔ flin mi le ɛɖɛ xixo tɛye ye mɛ. ¹⁷ e xin, xwetɔ miatɔ Yesu Klisu we Mawu, Otɔ ke tɔn nyi gi go, mɔ do na mi onunyinyɔ we gbigbɔ ke na ɖe ɛmɛ kena e nyi sɔ xlɛ mi a bo na na mi a nyɔ-Ɛ ganj. ¹⁸ Ni na na kinklɛn etɔn a ta do oji miatɔnye mɛ, na mia do nyɔ kena cinnɔ ke mi na ɖo mima le e mɛ kpodo xɔsetɔye, we gigo lɔ glo ɖo. ¹⁹ Mi mɔ mɔ nyɔ kena hɔnhlɔn etɔn ke o wa odan le mimɛ xɔsetɔye mɛ nɔ, glo bo hungan hu onu bisese ɖo. Hɔnhlɔn xinlɔ we, Mawu ɖe sɔ xlɛ kpodo ɛcɛ kpikpa etɔn, ²⁰ le Klisu mɛ bo do fɔn-ɛ le ɛmɛ kukuye mɛ bo sɔ va xinnɔnyi le aɖusi etɔn mɛ bo sɛxwe. ²¹ Klisu lɔ hugan ɛcɛ kpikpa ɖe kpokwe, oga ɖuɖu ɖekpokpwe, hɔnhlɔn ɖekpokpwe kpodo xɔluɖuɖu ɖekpokpwe kpodo nyikɔ ɖekpokpwe kena ye na gbɛyɔ́ le ɛgbɛ egbetɔn ke mɛ kpodo ɛgbɛ ke na gbɔ̀n nɔmɛ. ²² Mawu sɔ onuye bisese, sɔ do Klisu lɔ we ɛcɛ gɔ, bo sɔ-ɛ sɔ ɖo agun lɔnu, e bo nyi ɛmɛ ke hugan hu onu bisese. ²³ Agun lɔ nyi Klisu we gbaza, Klisu lɔ bo le agun lɔ mɛ taŋu, elɔ ke na yi tɛnxo bisese ye le ɛgbɛ lɔ mɛ bi.