1 Vɔ le hwexinlɔnu, Sɔlu gbɛ gblɔn okudan na Xwetɔ lɔ we onukplanviye nɔ, bo va yi avɔsantɔ ɖaxo Mawutɔn lɔ de 2 Bo byɛ wema ke e na hɛn a do yi agunxoɔ ke le Damasiye mɛ, na e va kpɔn ŋusunglo ɖeye alo nyɔnusi ɖeye ke gbɛ zɔn gbɔn Yesu we omɔ lɔ ji nɔ ye le blɛɛ, e mɔ do do caba alɔ na ye a bo kplɔ ye do va Jeluzalɛmu. 3 Hwekenu na e le omɔ lɔ ji bo siin, boo lo tɛkpɔ Damasi nɔ, haŋu ɖokpo kpoŋu kinklɛn ɖe bo jɛte sɔn jihwe bo lilɛ do-e, 4 e bo va jɛnyi bo se ogbe ɖe ke lɔ ni-i nɔ tun:«Sɔlu, Sɔlu, ŋunɛ jɔ na o do ɖe ofun naa nɔ?» 5 Sɔlu bo va lɔ tun:«Mɛnɛ lɛ o nyi Xwetɔ?» Xwetɔ lɔ bo va ɖo e wu ni-i tun:«Blɔ wɛ nyi Yesu ke o ɖe ofun na nɔ lɔ; 6 vɔ cite, a bo ɖyɛ Damasi we toxo lɔ mɛ, ye bo na va lɔ onu kena o na wasi lɛye na we.» 7 Mɛ ke kpo Sɔlu kpo o yi tomɛ nɔ lɛye ye hɔn mɔ kpewu o kɛ onu nɔ ɖo vivɔ o hu ye nɔ; ɖo ye se ogbe ke lɔ oxo lɔ nɔ, vɔ ye ko kpɔn mɛ ti nɔ. 8 Sɔlu bo cite le nyidan mɛ, hwekenu na e hun ŋukunsin etɔnye, e hɔn mɔ kpewu mɔ kpɔn onu ti nɔ; ye bo va hɛn alɔ ni-i bo kplɔ-e do siin Damasi. 9 E bo nɔ onumakpɔn, onuɖemaɖu kpo ɛsinmanu na ŋukɔnɖiɖe atɔn. 10 Onukplanvi ɖokpo bo le Damasi ye bo nɔ yɔ-ɛ tun Ananyasi; Xwetɔ lɔ bo lɔ xo ni-i do gbɔn ɖiɖexlɛ ɖe mɛ bo lɔ ni-i tun:«Ananyasi.» E bo yi gbe tun:«Kpɔn bo xɛn, Xwetɔ.» 11 Xwetɔ lɔ bo lɔ ni-i tun:«Cite a bo yi omɔ vitwe ke ye nɔ yɔ tun omɔ jijɔ lɔ ji, a bo ɖyɛ Juda we xwegbe, a bo kan dahwe ke sɔn Tasi we tomɛ, ye bo nɔ yɔ-ɛ tun Sɔlu we tamɛ se; 12 ɖo e xo ɛɖɛ nɔ bo kplɔn le ɖiɖixlɛ ɖe mɛ tun dahwe ɖe mɔ nɔ nyi Ananyasi mɔn ɖyɛ oxwe lɔ gbe mɔɔ ɖo alɔ hɛjiye mɔ xo ɛɖɛ na he nɔ na he a mɔ mɔ do jɛ onukpinkpɔn ji.» 13 Vɔ Ananyasi bo ɖo e wu tun:«Xwetɔ, ko o se mɛ susu nɔ lɔ dahwe xin we xo ke e nɔ do aya na togun tɔwe ɖo le Jeluzalɛmu ɖo. 14 E bo va yi acɛkpikpa we wema bo do gbɔnnɔ a do va wle mɛɖekpokpwe ke gbɛ yɔ nyikɔ tɔwe nɔ ye.» 15 Vɔ Xwetɔ bo lɔ ni-i tun:«Yi, odanwanu ke ko can wɛ e nyi na, na ni a do jla nyikɔ tɛye na kosiye, xɔlu ye kpo Izrayɛli we vikpɛye; 16 ko na va ɖe aya kena e na va ɖu do nyikɔ tɛye we tamɛ a sɔ xlɛ-ɛ.» 17 Ananyasi bo va yi, bo ɖyɛ oxwe lɔ gbe. Bo ɖo alɔ ota ni-i, bo lɔ ni-i tun:«Nɔvye Sɔlu, Xwetɔ Yesu ke ɖe eɖe sɔ xlɛ we le mɔji le hwekenu na o gbɔnnɔ wɛ ɖoo ɖodan na na mɔ do jɛ onu kpinkpɔn ji a bo mɔ do gɔ kpo Gbigbɔ Kinkwɛn kpo.» 18 Zɔnɖokpo jan wɛ onu ɖeye ke le ɖi ohwe we afan ha ye bo flɛ le ŋukunsin ji na Sɔlu, e bo mɔ jɛ onu kpinkpɔn ji; e bo cite ye bo lɛ Mawu we ɛsin ni-i; 19 e bo va ɖu onu bo kpɔn hɔnhlɔn. E bo nɔ kpɔ kpo onukplanvi Damasitɔn ye na azan susu. 20 Bɛ sɔn ganxinme, e jɛ Yesu we xo lɔ ji gbɔn agunxɔye mɛ tun e mɔ nyi Ovi Mawutɔn. 21 Mɛ ke na se e lɔ oxo emɔhatɔn nɔ ye e bo kpaca do ye nɔ ye bo lɔ no tun:«E hɔn nyi dahwe kena nɔ hu emɛ ke nɔ lɔ oxo le nyikɔ ke lɔ mɛ hwɛn xin wɛɛ? Va wɛ e va a do va do caba na ye a bo kplɔ ye do sɔn na avɔsantɔ ɖaxoye.» 22 Vɔ Sɔlu bo mɔ do hɔnhlɔn do lɔ oxo lɔ nɔ, gbɔɔn Jwifu kena le Damasi ye bo flu e bo do ɖe xlɛ ye nɔ tun Yesu mɛ mɔ nyi Klisu lɔ. 23 Le azan susu we godo, Jwifuye va bla ogbe na do hu Sɔlu. 24 Vɔ Sɔlu bo se okpa. Ye bo nɔ cɔ toxo lɔ we agboye nɔ ozan kpo keklo kpo, a do kpewu a hu-i tɛ. 25 Vɔ le ozan ɖokpo mɛ onkplanvi Sɔlutɔnye sɔ-ɛ do jaxwi ɖe mɛ bo ɖiɖi-i jɛ ote do toxo lɔ we oglikpa godo. 26 Kena Sɔlu va lɛkɔ va Jeluzalɛmu, e ba na ɖyɛ onukplanvi lɛye mɛ, vɔ onukplanvi lɛye bo vɔ ni-i nɔ, ɖo ye hɔn ka kan do e ji tun e mɔ trɔ zun onukplanvi Yesutɔn. 27 Vɔ Banabasi bo va kplɔ-ɛ sɔ ve na oxolɔɖenyitɔye. E bo va to na ye kena Sɔlu kpɔn Xwetɔ lɔ le mɔji ɖo, Xwetɔ lɔ mɔɔ lɔ oxo ni-i, kpo kena e lɔ oxo le Yesu we nyikɔ mɛ, kpo kpakpa ɖo na ɛ Damasi ɖo. 28 Bɛ sɔn hwexinnu en bo nɔ xodo ye bo yi a bo gbɔn kpo ye nɔ a bo do tó oxo ye na ye nɔ. E bo nɔ lɔ xo nɔ kpo kandeji kpo nɔ le Xwetɔ lɔ we nyikɔ mɛ 29 a bo mɔ lɔ oxo kpo Jwifutɔ ke nɔ do Glɛkigbeye can nɔ; vɔ yee bo gbɛ ba nɔ nɔ kena ye na hɛnɖo a do hu-i. 30 Kena nɔvyɔ xɔsetɔye se okpa lɔ, ye va kplɔ Sɔlu do siin Sezale, bo do sɔ-ɛ sɔ ɖodan Tasi. 31 Ɖemɔ wɛ agunye va kpɔn fifa ɖo le Jude, le Galile kpo Samali we kansinmɛ, bo va lido bo nɔ zɔn zɔnlin le vivɔ ɖiɖo na Mawu mɛ wɛ dogbɔn Gbigbɔ Kinkwɛn we hɔnhlɔn mɛ ɛmɛ ye mɛ, agunviyee bo su bo e ji. 32 Syɛ kena Piyɛ o ɖisa gbɔn kansin lɔ bisese mɛ nɔ, e va yi xɔsetɔ ke le Lidaye can gba kɔn. 33 Le blɛ lɔ, Piyɛ kpɔn dahwe ɖe ke ye nɔ yɔ tun Ene, ke o le onyihinhlɔn le ojan etɔn ji sɔn oxwe atrotɔn gbɔn, ɖo e kplibɔ. 34 Piye bo lɔ ni-i tun:«Ene, Yesu Klisu gɔ adɔn na we. Cite a bo xaa ojan tɔwe.» Zɔnɖokpo kpoŋu dahwe lɔ bo cite. 35 Ɖemɔha wɛ Lida kpo Salɔntɔ ke kpɔn onu xin lɔ va kan do Xwetɔ lɔ ji ɖo xɛn xin. 36 Syɛ onukplanvi nyɔnusi ɖe le Jope ye bo nɔ yɔ-ɛ tun Tabita, ke we gɔnmɛ nyi«Dɔkasi». Nahwe xin lɔ nɔ wa onwɛ a bo mɔ kpedo ayanɔye wu taŋu. 37 E va jɔ wɛ nahwe xin lɔ va jɛ adɔn gbɔɔn bo ku; ke ye lɛ ɛsin na ocɔ etɔn vɔ, ye sɔ-ɛ sɔ ve ɖo sanŋu ji. 38 Ke Lida we toxo lɔ hɔn dɛn le Jope wu, wɛ onukplanvi lɛye bo va se tun Piyɛ mɔ le blɛ lɔ, ye bo va sɔ ŋusunglo owe sɔ ɖodan Piye tun, le kukɖiɖe mɛ:« Ka dɛn xodo mí.» 39 Piyɛ bo cite bo xodo dahwe lɛye. Ke Piyɛ va ye kplɔ-ɛ do yi sanŋu lɔ ji. Wɛ kposyu susu ye bo va le ote le blɛ lɔ kpo avi kpo, bo sɔ awu ɖaxoye kpo awu oviye ke na Dokasi nɔ wasi le hwekenu na e le ye kɔn sɔ xlɛ Piyɛ. 40 Piyɛ bo va ɖe mɛ bisese tɔn le oxɔ lɔ mɛ, bo va jɛ klita bo do xo ɛɖɛ nɔ; e xin we godo, e bo va lilɛ okɔ bo kpɔn ocɔ lɔ, bo lɔ tun:«Tabita, cite!» E bo hun ŋukunsin, ke e kpɔn Piyɛ e bo va xinnɔ onyi. 41 Piyɛ bo va na alɔ wu-i bo do sɔ-ɛ cite. Ke e va yɔ xɔsetɔye kpo kposyu lɛye, bo sɔ gbɛgbɛ etɔn sɔ xlɛ ye. 42 Onu xin lɔ va gba kpe Jope we toxo lɔ bisese mɛ, wɛ ɛmɛ susu bo vaa kan do xwetɔ lɔ ji. 43 Piyɛ bo va nɔ Jope lɔ na azan susu le dahwe ɖe ke ye nɔ yɔ tun Simɔ, dahwe xin lɔ bo nyi olangbazadanwatɔ.