1 Dahwe ɖe le toxo Sezaletɔn mɛ, nyikɔ etɔn bo nɔ nyi Kɔnɛyi, e bo nyi sɔjakanwekoga le ahwangbɛ Italitɔn mɛ. 2 Dahwe xin lɔ kpo xwedo etɔn bo nɔ vɔ na Mawu, bo mɔ nɔ sɛn Mawu kpo sisi kpo. E bo nɔ na oho susu wu Mawu bo nɔ xo ɛɖɛ nɔ le hwebisese nu nɔ. 3 Le hwedo gantɔn mɛ emɔha, e va kpɔn cede-cede le ɖiɖexlɛ ɖe mɛ ɛwɛndotɔ Mawutɔn ɖe va e kɔn. Ɛwwɛndotɔ lɔ bo lɔ ni-i tun:«Kɔnɛyi!» 4 Kɔnɛyi bo va kpɔn ɛwɛndotɔ lɔ nɔ tlululu nɔ gbɔɔn vivɔ bo va jɛ e ji e bo ɖo e wu ni-i tun:«Xwetɔ, ŋunɛ jɔ?» Ɛwɛndotɔ lɔ bo lɔ ni-i tun lɔ byo:«Ɛɖɛ tɔweye kpo onywɛ wiwa tɔwe ɖadan ayanɔye kɔn cite bo va le ote le ŋukɔn na mMawu ɖi onunina ke ye hɔn kpewu na wɔn gbeɖe ha. 5 Syɛ ɖo ɛmɛye ɖodan Jope na ye a ve kplɔ dahwe ɖe ke ye nɔ nyi Simɔ, ye bo mɔ nɔ yɔ-ɛ tun Piyɛ kɔn. 6 E bo zɛ dahwe ɖe ke nɔ nyi Simɔ bo nyi olangbazadanwatɔ we xwegbe wɛ oxwe lɔ bo le ɛxuto.» 7 Ke €w€ndotɔ ke lɔ oxo na Kɔnɛyi nɔ lɔ va sɔn le e kɔn, Kɔnɛyi yɔ odansɔvi etɔn ŋusunglo owe kpo soja ke le agɔ ni-i bo nɔ vɔ na Mawu ɖokpo. 8 Kɔnɛyi bo va jɛ onu ke jɔ lɔ ji bo sɔ lɔ na ye bo va sɔ ye sɔ ɖodan Jope. 9 Ŋukɔnɖegbe etɔn le gan weve mɛ emɔha, ke ye le omɔ lɔ ji bo va tɛkpɔ toxo lɔ nɔ, Piyɛ bo xɛ sanŋu takpwe ɖe ji bo do xo ɛɖɛ nɔ. 10 Xovɛ bo va ci-i e bo jlo na ɖunu. Vɔ gankemɛ na ye ɖo oànuɖuɖu lɔ ni-i nɔ, e va jɛnyi bo bu do eɖe, 11 bo va kpɔn sɛxwe hun wɛ onu ɖi ohun ha bo jɛte, onu ɖi aja ke ye nɔ ɖo do wle ohwe ha ɖaxo ɖe bo jɛte do nyidan ji, bo yi azwe ɛnɛ lɛye bi. 12 Le aja lɔ mɛ kanlin ke nɔ zɔn zɔnlin kpo afɔ ɛnɛye, ke nɔ zɔn zɔnli kpo dɔmɛye kpo oxɛ hamɛ-hamɛye wɛ le emɛ. 13 Ogbe ɖe bo va lɔ oxo ni-i tun:«Cite, Piyɛ, hu a bo ɖu!» 14 Vɔ Piyɛ bo lɔ tun:«Oo, Xwetɔ ɖo kɔ hɔn ɖu onu ɖuɖyu ti gbɔɔn do ɖu onu ke hɔn mɛ ti kpɔn.» 15 Vɔ zɔnwegɔ, ogbe lɔ va lɔ ni-i tun:«Onu kena Mawu sɔ trɔ zun onu mimɛ, ka mɔ yɔ-ɛ tun onu ɖuɖyu.» 16 Ogbe lɔ bo oxo ni-i zɔn atɔn kpecyo wɛ zɔn atɔngɔ godo sɛwehun lɔ bo mɔ siin sɛxwe. 17 Hwekenu na Piyɛ gbɛ bu tamɛ kpɔn nɔ do onu ke e kpɔn le ɖiɖexlɛ lɔ mɛ wu nɔ, mi kpɔn, me ke na Kɔnɛyi ɖo ɖodan lɛye, ke ye o ken omɔ lɔ se ye bo jlɛ na ye, ye bo zɔn gbɔɔn ba va oxwe lɔ we agbo ji. 18 Ye bo va do axwa bo kanse nɔ tun Simɔ ke ye mɔ nɔ yɔ tun Piyɛ le bwɛ ja. 19 Hwekenu na Piyɛ gbɛ bu tamɛ kpɔn nɔ do ɖiɖexlɛ lɔ nɔ, Gbigbɔ Mawutɔn lɔ ni-i tun:«Kpɔn, ɛmɛ atɔn o kan we nɔ. Cite, 20 jɛte, a bo xodo ye. Ka vɔ a do xɔ do ye ɖo blɔ tete wɛ ɖo ye ɖodan we.» 21 Piyɛ bo jɛte bo lɔ na ɛmɛ lɛye tun:«Bo wɛ nyi ɛmɛ ke mi kan nɔ lɔ, ŋunɛ jɔ na mi do va?» 22 Ɛmɛ lɛye bo va ɖo e wu ni-i tun:«Sɔjakanwekoga ke ye nɔ yɔ tun Kɔnɛyi, bo nyi ɛmɛ jijɔ, bo nɔ sɛn Mawu, wɛ togun Jwifuyetɔn bisese bo nɔ ɖe kunnu onywɛ do e wu wɛ ɛwɛndotɔ mimɛ Mawutɔn v alɔ oxo na tun ni mɔɔ ve kplɔ we do va oxwe etɔngbe na ni a mɔ do se ɛwn ɖe le nu we.» 23 Piyɛ bo va yi jonɔ yetɔn ye bo nɔ kpɔ kpo-e. Ŋukɔnɖegbe etɔn we kɛklɛnu, e bo cite bo xo do ye bo do sɔn. Xɔsetɔ Jopetɔn ɖeye can bo xodo-e. 24 le ŋukɔnɖegbe etɔn, ye bo va Sezale. Kɔnɛyi bo o le ote kpɔn ye bo yɔ ɛmɛ bɔ do ɛmɛ wu kpo hadwe vɛna-vɛna etɔnye can. 25 Hwekenu na Piyɛ o ɖyɛ oxwe lɔ gbe nɔ, Kɔnɛyi ve kpe-e bo jɛ klita do akɔnmɛ ni-i bo do onu do ni-i. 26 Piyɛ bo fɔn-ɛ cite bo lɔ ni-i tun:«Cite, gbɛtɔ we blɔ can gba ko nyi.» 27 Piyɛ bo jɛ jɛtun kpodo Kɔnɛyi nɔ bo do ɖyɛ oxwe lɔ gbe, ke e ɖyɛ oxwe lɔ gbe e kpɔn ɛmɛ susu kple le ofi lɔ. 28 E bo lɔ na ye tun:«Miye tete mi nyɔ-ɛ tun Jwifuti mɔ hɔn ɖo na do oha gbɔɔn a do dyɛ oxwe mɛ ke na hɔn nyi Jwifu ti tɔn gbe vɔ Mawu bo va ɖe xlɛ wu tun mɛɖe ni mɔ ka mɔ yɔ mɛɖe tun ɛmɛ ɖuɖyu alo ɛmɛ mamɛ-mamɛ. 29 E xin lɔ wɛ dɔn na ko hɔn do va kɛ onu ti le ganke mɛ na o yɔ-ɔ gbɔxwe do va. Ŋunɛ jɔ na o do yɔ?» 30 Kɔnǝyi bo va ɖo e wu ni-i tun: "E o wasi ŋukɔnɖiɖe ɛnɛ syɛ le ogan ke mɛ pɛpɛpɛ, le hwedo gantɔn mɛ, ko xo ɛɖɛ nɔ le oxwe tɛye gbe ko bo va kpɔn dahwe ɖe do awu ke klɛn nɔ ɖe le ote. 31 E bo lɔ na nɔ lɔ byo: "Kɔnɛyi Mawu se ɛɖɛ tɔwe, bo mɔ kpɔn onunywɛ ke o wa na ayanɔye nɔ ɖodan. 32 Ɖo ɛmɛ ɖodan Jope na ye a ve kplɔ dahwe ɖe ke we nyikɔ nɔ nyi Simɔ ye bo mɔ nɔ yɔ-ɛ tun Piyɛ do va oxwe tɔwe gbe. E bo le olangbazadanwatɔ ke ye nɔ yɔ tun Simɔ we xwegbe, oxwe lɔ bo le ɛxuto. 33 {Zɔɖokpo ko bo va sɔ ɛmɛye sɔ ɖodan we o bo wasi ganji bo va. Syɛ mí mɛ bisese mí le Mawu we ŋukɔn na do se ɛwɛn kena Mawu do na we tun lɔ mɔɔ do na mí lɔ.} 34 Piyɛ bo va kɛnu bo lɔ tun:«Ko nyɔ-ɛ le xojɔxo mɛ tun Mawu mɔ hɔn nɔ ɖe ɛmɛɖe do ovo na ɛmɛɖe. 35 Vɔ le togun ɖekpokpwe mɛ, mɛ ke nɔ vɔ ni-i a bo sɛɛn a bo nɔ wasi oni jijɔ wɛ nɔ jɛŋu ni-i. 36 Mi nyɔ oxo kena Mawu sɔ dɔdan togun Izryɛlitɔn lɔ, bo do jla ɛwɛn nywɛ fifatɔn gbɔn Yesu Klisu ke nyi Xwetɔ na mɛ bi lɔ ji. 37 Mi bo o nyɔ onu kena jɔ le Judeye bisese, bɛ sɔn Galile, le hwekenu na Jan va jla ɛwɛn nywɛ ke nyi Mawu we ɛsin lilɛtɔn lɔ, 38 onu ke kan Yesu Nazalɛtitɔn lɔ, kena Mawu sɔ Gbigbɔ Kinkwɛn kpo hɔnhlɔn etɔn kpo do si ami ni-i ɖo. E bo nɔ yi of ɖekpokpwe a bo wa onu nywɛye a bo mɔ gɔ adɔn na ɛmɛ kena lɛgba o do adɔn wu ye nɔ ɖo Mawu le kpo-e. 39 Mí bo nyi kunnu ɖetɔ na onu ke e wasi sɔn Jwifuye we tomɛ gbɔɔn do va jɛ Jeluzalɛmu- Yesu xin lɔ wɛ ye hu bo kɛɛ do otinsokpoli ji. 40 Dahwe xin lɔ, Mawu bo fɔn-ɛ le azan etɔn atɔngɔ gbe bo ɖe omɔ ni-i tun ni mɔɔ sɔ eɖe sɔ xlɛ, 41 e ko nyi ɛmɛ bisese hwɛn e na sɔ eɖe a sɔ xlɛ Vɔ mɛ ke nyi kunnuɖetɔ keye na Mawu o can san ye- mímɛ ke o ɖu bo nu kpo-e le hwekenu e fɔn sɔn oku we godo ye kɛɖɛ wɛ sɔ eɖe sɔ xlɛɛ. 42 E bo ɖe ogbe na mí na mía do jla a bo ɖo ɛkpɛn e ji na togun lɔ bisese tun he mɛ Mawu mɔ can ɖi kojoɖotɔ ha na ɛmɛ gbɛgbɛye kpo ɛmɛ kukuye. 43 E lɔ lɔ wɛ oxolɔɖenyitɔye bisese nɔ ɖe kunnu na nɔ, tun mɛɖekpokpwe kena mɔ kan do e ji mɔ na kpɔn ɛhwɛ sɔ kɛ na onunyinyla etɔnye le Yesu lɔ we nyikɔ mɛ.» 44 Hwekenu na Piyɛ gbɛ lɔ oxo nɔ, Gbigbɔ Kinkwɛn jɛte do mɛ ke gbɛ se oxo lɔ nɔ ye bisese ji. 45 Ke Jwifu ke xodo Piyɛ do va ye kpɔn tun Mawu mɔ na Gbigbɔ Kinkwɛn wu mɛ ke na mɔ hɔn nyi Jwifuye can, e bo kpaca do ye taŋu. 46 Ɖo ye va se mɛ ke hɔn nyi Jwifu lɛye o lɔ oxo bo kanfu Mawu do ogbe buye mɛ nɔ. Piyɛ bo va lɔ na ye tun: 47 «Ye na kpewu na va gbɛ Mawu we ɛsin lilɛ na mɛ ke nyi Gbigbɔ Kinkwɛn ɖi míye ha ye wɛɛ?» 48 E bo va ɖe ogbe na ye tun ye ni mɔɔ lɛ Mawu we ɛsin na ye le Yesu-Klisu we nyikɔ mɛ. Ye bo va byɔ Piyɛ tun ni mɔɔ nɔ hiye kɔn na azan viiɖe.