¹ Yesu we ɛmɛdindɔn kpo nɔvi xɔsetɔ ke le Judeye se tun ɛmɛ kena mɔ hɔn nyi Jwifuye can mɔ yi Mawu we oxo lɔ. ² Hwekenu na Piyɛ va gbɔn va Jeluzalɛmxɔsetɔ Jwifuye do ɛhwɛ ni-i bo lɔ ni-i tun: ³ «O yi ɛmɛ kena hɔn nyi Jwifuye we xwegbe bo ɖunu kpo ye!» ⁴ Vɔ Piyɛ bo va jɛ ke onu lɔ jɔ ɖo we gɔnmɛ ɖiɖe na ye ji. E lɔ na ye tun: ⁵ «Ko le Jope gbeɖokpo wɛ le hwekenu na ko xo ɛɖɛ nɔ, ko va bu do ɖye, bo kpɔn le ɖiɖexlɛ ɖe mɛ, onu di avɔ ɖaxo ɖe ha, bo le vuvlu le azwe ɛnɛ etɔnye ji. Bo jɛte sɔn sɛxwe bo va kaka kɔn ye. ⁶ Ko bo glo avɔ lɔ mɛ kpɔn ganji, bo kpɔn kanlin ke nɔ zɔn afɔ ɛnɛ ji, kpo kena nɔ nɔ ogbe mɛ ye, kpo kena nɔ dɔn adɔ gbɔn nyidan mɛ ye, kpo oxɛ kena nɔ dɔn gbɔn jɛhɔn mɛ ye.» ⁷ Ko bo va se ogbe ɖe ke lɔ nanɔ lɔ byo:«Cite, Piyɛ, hu a bo ɖu!» Ko bo ɖo e wu tun: ⁸ « Oo, Xwetɔ, ɖo onu ɖuɖyu alo onu ke hɔn mɛ ɖe hɔn ɖyɛ onu tɛye mɛ kpɔn.» ⁹ Vɔ ogbe lɔ bo mɔ lɔ zɔnwegɔ ke tun:«Onu ke na Mawu sɔ trɔ onu mimɛ, lɔ ka mɔ sɔ do kpɔn onu ɖuɖyu.» ¹⁰ Ogbe lɔ bo lɔ oxo na zɔn wɛ zɔn atɔngɔ lɔ onu lɛye bisese bo mɔ siin jihwe. ¹¹ I wɛ ɛmɛ atɔn ke ye sɔ ɖodan-a sɔn Sezale ye va va oxwe ke gbe na mí le lɔ. ¹² Gbigbɔ lɔ bo va lɔ na-a tun ko mɔ xodo ye ma xo onu ti kpɔn. Nɔvye xɔsetɔ atrekpo klɛye bo va xodo mí bo va ɖyɛ oxwe dahwe lɔ we xwegbe. ¹³ E bo va to na mí kena e kpɔn ɛwɛndotɔ Mawutɔn le ote le oxwe etɔn gbe ɖo bo do lɔ ni-i tun:«Ɖo ɛmɛye ɖodan Jope na ye ave kplɔ Simɔ ke ye nɔ yɔ tun Piyɛ do va. ¹⁴ E na va lɔ oxo ɖe ke ji na lɔ kpo xwedo tɔwe na zɔn do a do kpɔn hwlɛnga na mi.» ¹⁵ Hwekenu ko va jɛ oxo lilɔ ji wɛ Gbigbɔ Kinkwɛn va jɛte do ye ji ɖi míye ha. ¹⁶ Ko bo va flin oxo Mawutɔn ke lɔ tun:«Jan na lɛ Mawu we ɛsin na ɛmɛ kpo ɛsin kpo vɔ miye, Gbigbɔ Kinkwɛn wɛ ye na do va lɛ Mawu we ɛsin na mi.» ¹⁷ E nyi tun Mawu va na oninina ɖokpo lɛye wu mɛ ke hɔn nyi Jwifuye kpo míye ke kan do Yesu-Klisu ji ye, mɛ nɛ lɛ ko nyi na do cite kpanta wu Mawu? ¹⁸ Ke ye va se onu xin lɛye vɔ, ye bo va bɔnu cɛncɛncɛn bo va jɛ Mawu kinkanfu ji tun:«Mawu ɖoli jijɔ na mɛ ke hɔn nyi Jwifuye na ye can gba a do kpɔn ɛgbɛ mavɔmavɔ.» ¹⁹ Xɔsetɔ kena o kankan le Jeluzalɛmu do ofun ɖe na ɛmɛ ke o nɔ oji bɛ sɔn hwekenu ye hu Etyɛnu, ye bo siin Fenisi, Ciplu kpo Antyɔcu. Ye bo jla oxo lɔ na mɛ ke nyi Jwifuye kɛɖe nɔ. ²⁰ Vɔ mɛɖeye ke sɔn Ciplu kpo Silɛnu kpo le ye mɛ bo nɔ va yi Antyɔcu bo nɔ va jla Xwetɔ Yesu we oxo lɔ na Jwifuye. ²¹ Alɔ Mawutɔn bo le ye ji wɛ ɛmɛ susuye bo va kan do Yesu ji bo trɔ jimɛ. ²² Ke agunvi ke le Jeluzalɛmu ye va se oxo xin lɔ, ye bo va sɔ Banabasi ɖodan kaka Antyɔcu. ²³ Gankemɛ na e va bo kpɔn ɛfɛnu Mawutɔn lɔ, oji jɔ-ɛ e bo do zozo lanmɛ na ye tun ye ni mɔɔ sɔ oji yetɔn blebu a mɔɔ sɔ bla do Xwetɔ lɔ wu gbanŋ-gbanŋu. ²⁴ Ɖo ɛmɛ nywɛ wɛ e nyi, bo gɔ kpo Gbigbɔ Kinkwɛn kpo xɔse. Ɛmɛ susuye bo mɔ va kan do Yesu lɔ ji. ²⁵ Banabasi bo va yi Tasi a do ve kan Sɔlu. ²⁶ Hwekenu e va kpɔn-ɛ, e kplɔ-ɛ do va Antyɔcu. Ye bo sɔ owxe ɖokpo blebu ɖo te bo do kplan onu wu ɛmɛ susuye gbɔn agunye mɛ. Antyɔcu lɔ wɛ ye va yɔ onukplanv lɛye le tantɛntɔn tun Klisutɔye. ²⁷ Le hwexinlɔnu, oxolɔɖenyitɔ mawutɔnye o jɛte sɔn Jeluzalɛmu do va Antyɔcu nɔ. ²⁸ Mɛɖokpo le ye mɛ bo nɔ nyi Agbwisi bo cite kpo Gbigbɔ Kinkwɛn kpo bo lɔ tun xovɛ ɖe mɔ na va tɔn le ɛgbɛ lɔ mɛ. Xovɛ xin lɔ bo na tɔn le xɔlu Klodu we hwenu. ²⁹ Onukplanvi lɛye bo va sɔ gbeta dogbɔn onu ke wu ye na kpe a do kpe do ye nɔvyɔ ke le Jude ye wu. ³⁰ Ye bo wasi ɖemɔha bo nɔ sɔ oho sɔ ɖodan agunmɛhyɔn kena le Judeye dogbɔn Banabasi kpo Sɔlu we alɔye mɛ.