¹ Le hwexinlɔnu, xɔlu Elodu wle agunvi ɖeye a do do aya na ye. ² E bo hu Jaki ke nyi Jan nɔvyɔ le dɛnkpwe nu. ³ Ke e kpɔ tun onu xin lɔ mɔ jɛŋu na Jwifuye, e bo mɔ wle Piyɛ can. Hwexinlɔnu bo nyi azan keye mɛ na ye nɔ ɖu kpɔnnɔ ma ɖo tinkɛn we oxwe le. ⁴ E xin we godo ye bo sɔ-ɛ sɔ flɛn do gankpa mɛ bo sɔ sɔjagbɛta ɛnɛ ke mɛ na sɔja ɛnɛ-ɛnɛ le tun ye ni mɔɔ do cɔ Piyɛ. E bo do linlin na do ɖo kojo ni-i le na ye ɖu vivayi we oxwe lɔ godo le otogun ye we ŋukɔn. ⁵ Piyɛ bo le gankpa lɔ mɛ, vɔ xɔsetɔ gbokpweye bo xo ɛɖɛ do ota etɔn mɛ nɔ kpo zozo kpo. ⁶ Gbekegbe na Elodu na ɖo kojo na Piyɛ le togun lɔ we ŋukun, ozan xin lɔ mɛ Piyɛ bo dɔ awlɔn nɔ le dodomɛ na sɔja owe; ye bo bla-ɛ kpo caba owe wɛ ɛmɛcɔtɔye bo le gankpa lɔ we ohɔn ji bo do cɔ gankpa lɔ nɔ. ⁷ Haŋu ɖokpo kpoŋu, Xwetɔ lɔ we ɛwɛndotɔ ɖokpo bo va e kɔn wɛ ozo ke klɛn ganji ɖe bo ta le gankpa lɔ mɛ nyaaa. E bo xo akpa ɖokpo na Piyɛ bo fɔn-ɛ bo lɔ ni-i lɔ byo:«Cite bleŋu.» Hwekenu Piyɛ cite caba ke ye do bla-ɛ lɛye bo gbo le alɔye ni-i. ⁸ Ɛwɛndotɔ lɔ bo lɔ ni-i tun:«Do awu tɔwe a bo sɔ fɔkpa tɔwe can a bo sɔ do.» Piye bo do onu lɛye. Ɛwɛndotɔ lɔ bo lɔ ni-i tun:«Do awu gaga tɔwe a bo xodo!» ⁹ Piyɛ bo xodo ɛwɛndotɔ lɔ bo do tɔn. E ko nyɔ-ɛ tun onu kena ɛwɛndotɔ lɔ mɔ wasi nɔ lɔ mɔ jɔ nɔ xojɔxotɔn nɔ mɛ. E bo bu-i nɔ tun onu mɛ Mawu mɔ ɖexlɛ he nɔ ha. ¹⁰ Hwekenu ye va gbɔn ohɔn tantɛntɔn kpo owegɔ lɔ nu vɔ, ye va agbo ke ye sɔ ogan do wasi agbo xin lɔ nu wɛ ye bo nɔ gbɔn nɔ do ɖyɖ toxo lɔ mɛ ji. Agbo lɔ bo va hun eɖenu le ŋukɔn na ye. Ye bo tɔn bo wle omɔ ɖe kpɔŋu Mawu we ɛwɛndotɔ lɔ bo bu le Piyɛ kɔn. ¹¹ Gankemɛ na Piyɛ va ɖyɛ eɖe mɛ, e lɔ tun:«Ko va nyɔ

le xojɔxo mɛ syɛ tun Mawu mɔ sɔ ɛwɛndotɔ etɔn ɖodan na e do va hwlɛn-ɔ gan le Elodu we alɔ mɛ kpo onu ke na togun Jwifutɔ lɔ o tre kpɔn nɔ lɔ mɛ.»

¹² Ke e va kpɔn onu jɛ onu kena jɔ lɛye wu vɔ, e va siin Jan ke ye nɔ yɔ tun Maki, onɔ we xwegbe, xɔsetɔ susuye bo o kple le blɛ lɔ bo do xo ɛɖɛ nɔ. ¹³ Hwekenu na e xuxu agbo nahwe lɔ tɔn nɔ, nyɔnuvi odansɔvi dokpo ke ye nɔ yɔ tun Hlodu o gbɔnnɔ na do va hun agbo lɔ ni-i. ¹⁴ Ke e va nyɔ-ɛ tun Piyɛ we ogbe mɔ-ɛ, e gɔ kpo jijwɛ ɖaxo ɖe kpo, bo va wɔn agbo lɔ hunhun bo dowedun bo do ve lɔ na ɛmɛ gbokpweye tun Piye mɛ mɔ le agbo lɔ ji. ¹⁵ Ye bo lɔ ni-i tun:«O bɛ oha.» Vɔ e bo tɛɖɛ e ji na ye nɔ tun xoxjɔxo mɛ. Ye bo lɔ ni-i tun:«Ɛsɛ etɔn wɛ.» ¹⁶ Vɔ Piyɛ bo gbɛ xuxu agbo lɔ nɔ wɛ gankemɛ na ye va hun agbo lɔ, ye kpɔn tun Piyɛ mɛ e bo kpaca do ye. ¹⁷ Piyɛ bo sɔ alɔ etɔn bo do lɔ oxo na ye tun ye ni mɔɔ bɔnu wɛ e va to kena Mawu ɖe-e tɔn le gankpa lɔ mɛ ɖo na ye. E bo lɔ na ye tun:«Mi lɔ oxo ke lɛye na Jaki kpo nɔvi gbokpwe ye.» E xin lɔ we godo, e bo lɛ le ye kɔn bo do siin fibu. ¹⁸ Kena ŋukɔn ɖe, sɔja lɛye bo ci jajaja do onu ke jɔ do Piyɛ ji lɔ wuwtu. ¹⁹ Ke Elodu va kan Piyɛ gbɔɔn ye ko va kpɔn-ɛ, e kan oxo se wu sɔja lɛye bo va ɖegbe tun ye ni mɔɔ hu sɔja xxin lɛye. E xin we godo, Elodu bo lɛ le Jude bo va yi Sezale bo nɔ blɛ na azan viiɖe. ²⁰ Elodu bo le okɛn mɛ kpo Tilu kpo Sidɔntɔye taŋu. Ye bo va zɔn okpɔ bo va ekɔn . Ye bo va lɔ oxox kpo Blasitu, kena nɔ kpeŋu do xɔlu lɔ we oxɔ dɔ emɛ wu tun ni mɔɔ kpe do hiye wu. Ye bo va lɔ oxo kpo Elodu a do wasi fifa kpo-e ɖo oto yetɔnye xɔlu lɔ we tomɛ wɛ onuɖuɖu nɔ sɔn nɔ do va na ye. ²¹ Le azan kena ye ɖo ji, Elodu va sɔ xɔlu we awu etɔn bo sɔ do bo xinnɔnyi le xɔlu zinkpwe etɔn ji le dogba ji, bo jɛ oxo ɖe lilɔ ji na togun lɔ kpo acɛ kpikpa kpo. ²² Togun lɔ bo va jɛ axwa do ji tun e ke hɔn nyi ogbe gbɛtɔtɔn ogbe Mawutɔn wɛ!» ²³ Vɔ, haŋu zɔnɖokpo, Xwetɔ lɔ we ɛwɛndotɔ ɖokpo bo va xo-e ɖo onu ke e lɔ nɔ lɛye hɔn kpa gigo na Mawu. Ovɔnye bo va ɖu-i e bo ku. ²⁴ Vɔ oxo Mawutɔn lɔ bo yi oji bo gbakpe nɔ. ²⁵ Banabasi kpo Sɔlu kpo wa odan ke gbe na ye tɔn lɔ vɔ le Jeluzalɛmu. Ye bo va lɛkɔ le blɛ lɔ, bo kplɔ Jan ke ye ɖo nyikɔ na tun Maki.