1 Syɛ le Antyɔcu we agun mɛ, oxolɔɖenyitɔye kpo onukplan-ɛmɛtɔ ɖaxo ɖeye le blɛ lɔ. Y e wɛ nyi Banabasi, Simɛnyɔ (ke ye sɔ nyikɔ na tun Ɛmɛwi), Liswisi ke nyi Silɛnutɔ, Manayɛnu (ke kpo Elodu kpo hwɛn do okpɔ), kpo Sɔlu can. 2 Hwekenu na ye bla onu bo xo ɛɖɛ nɔ, Gbigbɔ Kinkwɛn va lɔ oxo na ye tun:«Mi sɔ Banabasi kpo Sɔlu kpo sɔ ɖo ovo naa na odan kena ko yɔ ye na lɔ.» 3 Hwekenu na ye va bla onu bo xo ɛɖɛ na ye vɔ, ye va sɔ ye ɖodan. 4 Wɛ Banabasi kpo Sɔlu kpo bo se tonu na Gbigbɔ Kinkwɛn bo va yi Selesi. Blɛ lɔ wɛ ye va ɖyɛ tojihun mɛ le bo do siin oto kena le otɔ we dodomɛ bo nɔ nyi Ciplu. 5 Hwekenu ye va jɛ Salaminu we toxo mɛ, ye jla Mawu we oxo na Jwufuye le okpletyɔn yetɔnye. Jan-Maki can bo xo do ye a do kpe do ye wu. 6 Hwekenu ye gbɔn otɔ lɔ ji gbɔɔn bo va jɛ Pafosu, majikiwsitɔ, bo mɔ nyi oxolɔɖenyitɔ ojokantɔ Jwifutɔ ɖe ye bo nɔ yɔ-ɛ tun Ba-Yesu bo le blɛ lɔ. 7 Dahwe xin lɔ bo nɔ nɔ oga ke nɔ nɔ otɔ we dodomɛ we oto lɔ mɛ, o ɖo zinzin nywɛɖe nyikɔ etɔn bo nyi Sɛjiwisi Polwisi, kɔn. Oga xin lɔ bo va yɔ Banabasi kpo Sɔlu ɖo e jlo na se Mawu we oxo. 8 Vɔ Elimasi «majikiwasitɔ lɔ» (ɖemɔ wɛ ye ɖe nyikɔ etɔn we gɔnmɛ ɖo) e bo cite kpanta ye, bo glɔn omɔ na ye nɔ, na oga lɔ ni ka a do va kando Yesu ji. 9 Vɔ Sɔlu ke ye mɔ nɔ yɔ tun Pɔlu, bo gɔ kpo Gbigbɔ Kinkwɛn, bo va kpɔn-ɛ nɔ tlululu 10 bo lɔ ni-i lɔ byo:«Lɔ ovi lɛgbatɔn o gɔ kpo ayixa gɛdɛ-gɛdɛ kɛɖɛ bo mɔ nyi danuwatɔ kpligidi. O bo nyi kɛntɔ na onu jijɔ wiwa. Gbɔɔn do jɛ hwenɛnu lɛ o na do avaja Mawu we tito onywɛye mɛ jɛ? 11 Syɛ kpɔn, alɔ Mawutɔn jɛ wu we wɛ o na vaŋu. Hɔn mɔɔ kpɔn ohwe nɔ gbɔɔn na hwenu ɖe.» Le tɛnxo lɔ mɛ zɔnɖokpo kpoŋu, e bo ci vuvlu mɛ; bo jɛ otolɛji bo do ba mɛ ke na hɛn alɔ ni-i nɔ. 12 Ke oga lɔ kpɔn onu kena jɔ lɔ, e kan do Xwetɔ lɔ ji zɔnɖokpo ɖo e kpɔn tun onu kena ye mɔ kplan he do Xwetɔ lɔ wu ye mɔ syɛnxu taŋu. 13 Pɔlu kpo hadwe etɔnye bo zɔn tɔjihun lɔ mɛ sɔn Pafosu gbɔɔn bo va Pɛji le Panfili we kansinmɛ. Vɔ Jan-Maki bo va lɛ le ye kɔn bo trɔkɔ siin Jeluzalɛmu. 14 Pɔlu kpo hadwe etɔnye bo lɛ le Pɛji gbɔɔn bo va Antyɔcu le Pisidi we kansin mɛ. Le blɛ, ye bo ɖyɛ okpletyɔn Jwifuyetɔn mɛ le gbɔjwɛzan yeton gbe, bo xinnɔ onyi. 15 Hwekenu ye xlɛ osɛn wema kpo oxolɔɖenyitɔ lɛye tɔn vɔ, oga okpletyɔn lɔ tɔn ye va lɔ nɔ tun:«Nɔvyee, e nyi tun mi ɖo oxo ɖe bo na do do zozo lanmɛ na togun lɔ, mi bo lɔ.» 16 Pɔlu bo va cite bo kɔ alɔ bo lɔ tun:«Izrayɛlitɔye kpo mi mɛ ke nɔ ɖo owi ta na Mawu ye, mi ɖoto a bo se! 17 Mawu Izrayɛlitɔn lɔ o can míadagbwɔye saan togun lɔ ji do e ji le gankemɛ na ye le Egipu we tomɛ, wɛ do gbɔn alɔ dindrɛn etɔn ji e bo va ɖe ye tɔn. 18 E bo kpe do ye wu le zogbeji, na oxwe kanɖe. [Le oxwe kanɖe mɛ emɔha wɛ e kpe do ye wu na le zogbeji.] 19 Hwekenu e crɔn togun acowe le kana, e sɔ ye sɔ na togun míatɔn ɖi cinnɔ ha. 20 Onu xin lɛye bi bɔ jɔ na oxwe sandi ɛnɛ ota atɔɔn (450 ans). Mawu bo va ɖo kplɔtɔye do míadagbwɔye nu gbɔɔn bo wasi do va jɛ oxolɔɖenyitɔ Samyɛli ji. 21 E xin togun lɔ bo va byɔ tun ye mɔ ɖo xɔlu ɖokpo na hiye, Mawu bo sɔ Sawili, ovi Kisitɔn, ke tɔn sɔn Bejamɛn we kunkan mɛ do ɖo xɔlu na ye na oxwe kanɖe. 22 E xin we godo Mawu bo va ɖe Sawili lɔ tɛ le xɔlu zinkpwe lɔ ji, bo va sɔ Davidi do ɖo xɔlu na ye. Davidi xin lɔ wu wɛ Mawu o lɔ do san tun: "Ko kpɔn Davidi ovi Izayitɔn na ni a do nyi gbɛtɔ ayixa tɛye tɔn ke nɔ wa o nu keena ko jlo ye bisese." 23 Le jijimɛvi dahwe xin lɔ tɔn mɛ, Mawu can hwlɛngantɔ ɖokpo na Izrayɛli we togun lɔ, i wɛ nyi Yesu ɖi kena e o fyan ajɔgbe etɔn ɖo ha. 24 Onu ke lɛ ye jɛ jijɔ ji gbɔxwe na Yesu do va va, Jan bo jla Mawu we ɛsin ke na na ye na ɖɔli jijɔ lɔ na Izrayɛli we togun lɔ san. 25 Hwekenu na Jan wa odan etɔn vɔ, e lɔ tun: "Mɛɛ lɛ mi nɔ lin tun blɔ ko mɔ nyi? Ko hɔn nyi ɛmɛ xin lɔ. Vɔ mi ɖo oto, blɔ we godo mɛɖe na va va, mɛ ke na ko hɔn kpewu na tun fɔkpakan etɔnye tete can." 26 Nɔvyee, kpo mi mɛ ke na jɔ le Ablaxamu we kunkan mɛ ye kpo ɛmɛ ke mɛ na mi sɛn Mawu le nɔ ye, míye wɛ ye sɔ hwlɛngan we oxo lɔ sɔ ɖodan. 27 Ɖo mɛ ke le Jeluzalɛmu ye kpo oga yetɔnye hɔn nyɔ-ɛ bo va wasi onu kena oxolɔɖenyitɔye nɔ lɔ naye tɛgbɛ le gbɔjwɛzangbe yetɔnye bo do do ɛhwɛ ni-i. 28 Ye hɔn va kpɔn ɛhwɛjijɔ kena na dɔn na ye na do hu-i co, ye bo byɔ Pilati tun hiye a mɔ hu-i. 29 Hwekenu na onu ke ye wlan do e wu lɛye bisese va nyi wiwasi vɔ, ye va ɖe-e jɛ ote le otinsokpoli lɔ ji bo va sɔ-ɛ sɔ ɖo yɔgun mɛ. 30 Vɔ Mawu bo fɔn-ɛ sɔn oku. 31 E bo va sɔ eɖe sɔ xlɛ ɛmɛ ke kpo i kpo zɔn sɔ Galile gbɔɔn do va yi Jeluzalɛmu ye. Ɛmɛ hin lɛye wɛ nyi kunnuɖetɔ etɔnye na togun lɔ. 32 Syɛ, mí hɛn ɛwɛn nywɛ ke we ajɔgbe ye o fyan na míadagbwɔye; 33 Mawu fyan ajɔgbe xin lɔ na míye, kpo vikpɛ yetɔnye, bo do fɔn Yesu sɔn ɛmɛ kukuye mɛ na mí. I wɛ dɔn ye do wlan le Ohan jiji we wema ota owegɔ tun: "O nyi Ovi tɛye, egbe ko trɔ zun Otɔ na we." 34 Ɖi kena e fɔn-ɛ sɔn oku na gbaza etɔn ko mɔ do nyɔ ci yɔgun mɛ nɔ, wɛ dɔn na e do lɔ tun: "Ko na na mi dona kinkwɛnye ke we ajɔgbe ko fyan na Davidi." 35 I wɛ dɔn e mɔ do lɔ le Ohan jiji we wema akpa bu ji mɛ tun: "Hɔn yi ogbe na ɛmɛ kinkwɛn tɔwe o nyɔ ci yɔgun mɛ nɔ." 36 Ɖo Davidi, hwekenu e va wa odan etɔn bo wasi ojlo Mawutɔnye le hwenu etɔn, e ku, ye bo ɖi-i do otɔ we axa, gbaza etɔn nyɔ ci yɔgun mɛ, 37 Vɔ mɛ ke na Mawu fɔn sɔn oku lɔ hɔn nyɔ ci yɔgun mɛ can. 38 Hun nɔvyee mi mi ɖo na nyɔ-ɛ zɔnɖokpo syɛ tun dogbɔn dahwe xin lɔ ji mɛ wɛ mi jla na mi tun mi mɔ na kpɔn sisɔkɛ na ɛhwɛ miatɔnye. 39 Gbɔn e lɔ lɔ ji wɛ mi na nyi ɛmɛ jijwɛ le ŋumɛ na Mawu le, e hɔn nyi do gbɔn osɛn Mɔyizitɔn ji nɔ hwɛn. 40 E le ɖemɔha, hun mi bo cɔ miaɖeye, na onu kena oxolɔɖenyitɔye o lɔ ni ka va jɔ do mia ji. Ye lɔ tun: 41 "Mi kpɔn; mi mɛ ke na nɔ do ovɔ na ɛmɛye, ni kpaca do mi na mia bu; ɖo le hwe miatɔn nu ko na va wa odan ɖe. Odan kena mi hɔn kpewu na kan do e ji e nyi tun mɛ ɖe mɔ do va xo gbexo etɔn na mi can."» 42 Ke Pɔlu kpo Banabasi kpo va sɔn nɔ, togun lɔ va ɖe kuku na ye nɔ tun na e jɛ gbɔjwɛzan bu gbe ye ni mɔɔ lɔ oxo ke ha ke. 43 Ke okple lɔ kpaa, Jwifu susuye kpo mɛ ke va zɔn gbɔn osɛn yetɔn ji nɔ ye va xɔ do Banabasi kpo Pɔlu wɛ ye lɔ oxo kpo mɛ ke na xodoye lɛye nɔ bo do do hɔnhlɔn lanmɛ na ye nɔ tun ye ni mɔɔ tɛ do ɛfɛnu Mawutɔn lɔ wu. 44 Le gbɔjwɛzangbe ke xodo e xin lɔ, ɛmɛ susu geɖegeɖe va kple a do se Mawu we oxo. 45 Hwekenu Jwifuye kpɔn togun lɔ, ye jɛ ɛhu hwinhwan ji bo jɛ okɔ tɔte na Pɔlu kpo Banabasi kpo we oxo ke ye lɔ nɔ lɔ bo mɔ kɔn acɔn do ye wu nɔ. 46 Vɔ Pɔlu kpo Banabasi bo mɔ lɔ oxo nɔ kpo ojiɖiɖe kpo bo lɔ nɔ tun:«Miye wɛ e jɛ na tun mía lɔ Mawu we oxo lɔ na jɛ ŋukɔn. Vɔ ke mi kpɔn tun mi mɔ gbɛ oxo lɔ bo mɔ kpɔn tun hiye mɔ hɔn jɛ na ɛgbɛ mavɔmavɔ lɔ, mi kpɔn, míye mí na trɔ siin mɛ ke hɔn nyi Jwifuye kɔn. 47 Ɖo, ɖemɔ wɛ Mawu lɔ ɖo na mí tun lɔ byo: "Ko can we na na do nyi kinklɛn na kosiye, a bo do jla Mawu we oxo lɔ gbɔɔn a do yi ɛgbɛ lɔ we vivɔnu."» 48 Kena kosi lɛye se ɖemɔha, ye kpɔn jijwɛ taŋu bo jɛ Xwetɔ lɔ we oxo kinkanfu ji. Mɛ ke Mawu o can ɖenyi na ɛgbɛ mavɔmavɔ ye bo va kan do oxo lɔ ji. 49 Oxo Mawutɔn lɔ bo va gbakpe gbɔn kansin lɔ bisese mɛ. 50 Vɔ Jwifuye do oto lɔ we nyɔnusi ke le ŋukunsin ji bo nɔ vɔ na Mawu ye kpodo oto lɔ we mɛjɔmɛye. Ye bo va cite bo ɖe ofun na Pɔlu kpo Banabasi gbɔɔn va nya ye tɔn le oto yetɔn mɛ. 51 Vɔ Pɔlu kpo Banabasi va hunhun finfinzɔ ke na le afɔ yetɔnyee kpan ŋukɔn wu ye. Pɔlu kpo Banabasi kpo bo lɛ le blɛ bo siin Ikɔnu we toxo mɛ. 52 Onukplanvi lɛye bo gɔ kpo jijwɛ kpo Gbigbɔ Kinkwɛn kpo.