¹ E va jɔ, wɛ le Ikɔnu Pɔlu kpo Banabasi nɔ ɖyɛ Jwifuye we okpletyɔnye bo lɔ oxo kpo alɔkpa ɖe gbɔɔn Jwifu susu kpo mɛ ke hɔn nyi Jwifuye can susu bo kan do e ji. ² Vɔ Jwifu diye kena hɔn kan do Xwetɔ lɔ ji ye v do mɛ ke na hɔn nyi Jwifuye na ye a do ɖe susu nyinyla do xɔsetɔ lɛye wu. ³ Ye bo nɔ blɛ lɔ na azan susu, bo lɔ oxo nɔ kpo ojiɖiɖe ɖaxo kpo bo do ɖe kunnu na ɛfɛnu Mawutɔn lɔ nɔ. Mawu o wasi onu emɔha tɔn ye nɔ josiye kpo ŋudandonuye a do nyi wiwasi dogbɔn Pɔlu kpo Banabasi we alɔ mɛ. ⁴ Vɔ togun lɔ bo va ma ɖo owe: akpa ɖeye le Jwifuye ji, akpa owegɔ bo le ɛmɛdindɔn lɛye ji. ⁵ Hwekenu na Jwifuye kpo kosiye kpo va ɖo ogbekpɔ do lɔ na oga yetɔnye tun ye ni mɔɔ do aya na Pɔlu kpo Banabasi kpo a mɔɔ tɔ ɛkpɛn wu ye gbɔɔn ye mɔ ku, ⁶ ɛmɛdindɔn lɛye bo se okpa bo va si bo do bo siin toxo Likawoni, Lisitle kpo Dɛbu kpo kansin ke lilɛ do ye mɛ. ⁷ I wɛ le blɛ lɔ ye bo jɛ ɛwɛn nywɛ lɔ jijla ji. ⁸ Dahwe ɖe bo le Lisitle lɔ e bo nyi tɛkunɔ sɔ jijimɛ etɔn gbɔn e ko zɔn zɔnlin kpɔn. ⁹ Dahwe xin lɔ bo se oxo kena Pɔlu o lɔ nɔ. Pɔlu bo va kpɔn-ɛ tlululu bo kpɔn tun dahwe lɔ mɔ ɖo xɔse ke mɔ na gɔ adɔn ni-i. ¹⁰ E xin e bo va do axwa bo lɔ ni-i tun:«Cite do afɔ tɔweye ji.» Dahwe lɔ bo dɔn bo jɛ zɔnlin zinzɔn ji zɔnɖokpo. ^{11 12 13} Ke ɛmɛ susu xin lɛye kpɔn onu kena Pɔlu wasi lɔ, e kpaca do ye ye bo jɛ lilɔ ji kpo axwa kpo do Lykawoni we ogbe mɛ tun:«Mawuye sɔ gbɛtɔ we gbeza bo sɔ do bo do jɛte va mía de. Ye bo nɔ yɔ Banabasi tun «Ze» a bo yɔ Pɔlu tun «Mɛlku», ɖo e lɔ lɔ wɛ nyi Mawuxolɔtɔ ke le taji lɔ. ¹⁴ Vɔ ke Pɔlu kpo Banabasi kpo se onu xin lɔ, ye vun awu yetɔnye bo do wedun bo ve jɛ dodomɛ na togun kpo axwa kpo ¹⁵ tun:«Gbɛtɔye mi, ŋunɛ jɔ na mi do wa emɔha nɔ? Gbɛtɔ bo ɖo sise le lanmɛ ɖi miye ha ye ke wɛ mí nyi ma. Ɛwɛn nywɛ ke na na mi na lɛkɔ sɔn onu vɔvɔ xinye we godo a bo va lɛkɔ va Mawu ɛgbɛgbɛ ke ɖo jiŋukunsin kpo nyidan, ɛxu kpo onu ke le emɛye bisese kɔn wɛ mi hɛn va na mi. ¹⁶ Le hwenu ke va yi ye, e jo togunye do ye bo zɔn zɔnlin do gbɔn omɔ yetetetɔnye ji. ¹⁷ Vɔ e hɔn dokpo kunnu ɖiɖe do onu kena e yi wu dogbɔn onywɛ wiwa etɔnye mɛ kpɔn. E nɔ na oju nɔ ja sɔn jiŋukunsin, ɛji bo nɔ jɛ na mi, onuɖuɖu bo nɔ le mia si ganji, mi bo nɔ le jijwɛ mɛ taŋu. ¹⁸ Banabasi kpo Pɔlu lɔ ɖemɔha co ganke, e hɔn fa gbɔxwe togun do jo avɔ ke ye va san nɔ lɔ do. ¹⁹ Jwifu ɖeye ke le Antyɔcu kpo Ikɔnu ye va do togun lɔ. Ye bo va tɔ ɛkpɛn wu Pɔlu bo dɔn-ɛ tɔn le toxo lɔ mɛ, bo bwi tun e mɔ ku mɛ ha. ²⁰ Vɔ hwekenu na onukplanvi lɛye lilɛ do-e, e va cite bo ɖyɛ toxo lɔ mɛ. Le ŋukɔnɖiɖegbe etɔn, Pɔlu kpo Banabasi bo siin Dɛbu. ²¹ Hwekenu ye jla ɛwɛn nywɛ lɔ gbɔn toxo lɔ mɛ bo mɔ wasi onukplanvi susu vɔ, ye va lɛkɔ yi Lisitlu, Ikɔnu, kpodo Antyɔcu. ²² Ye hɔn nɔ gɔ ogbekpikpa kpo hɔnhlɔn dido lanmɛ na onukplanvi lɛye tun ye ni mɔɔ do vivɛnu le xɔse mɛ bo nɔ lɔ na ye tun:«Do gbɔn ofuɖe na ɛmɛ susu mɛ wɛ mí na kpewu na ɖyɛ xɔluɖuɖu Mawutɔn mɛ le.» ²³ Le agun ɖokpo-dokpo mɛ, ye can agunmɛhyɔnye, bo sɔ ɖo ye nu, i wɛ kena ye bla onu bo xo ɛɖɛ vɔ, ye sɔ ye bo do alɔmɛ na Xwetɔ ke ji na ye kando lɔ. ²⁴ Ye gbɔn Pisidi do tɔn do Panfili. ²⁵ Kena ye lɔ Mawuxo lɔ na Pɛji vɔ, ye bo sin Atali. ²⁶ Blɛ lɔ wɛ, ye ɖyɛ tɔjihun mɛ le, a do siin Antyɔcu. Antyɔcu lɔ wɛ ye sɔ ɖ'enyi, na ye a do kpɔn Xwetɔ Mawu we ɛfɛnu, a do wa odan kena ye wasi nɔ syɛ. ²⁷ Hwekenu ye va lɛkɔ va Antyɔcu bo va yɔ togun xɔsetɔyetɔn lɔ bisese kple, ye va kpin otan onu kena Mawu wasi kpo ye kpo kena Mawu va hun omɔ xɔsetɔn na kosiye ɖo na ye. ²⁸ Pɔlu kpo Banabasi bo va nɔ blɛ kpo onukplanvi lɛye na azan susu.