¹ Ɛmɛ ɖeye sɔn Jude bo va Antyɔcu bo kplan onu wu nɔvi xɔsetɔye nɔ tun:«E nyi na hɔn gbɔ ada ɖi kena Mɔyizi we osɛn lɔ ɖo ha, be hɔn ke^wu na kpɔn hwlɛngan.» ² Hwekenu Pɔlu kpo Banabasi kpo va dɔn onu kpo ye, nɔvi xɔsetɔye, va jlo tun Pɔlu, Banabasi kpo nɔvi xɔsetɔ ɖeye, a mɔ yi Jeluzalɛmu le ɛmɛdindɔnye kpo agunmɛhyɔnye kɔn a mɔ do ve lɔ oxo do oxo xin lɔ wu. ³ Agun lɔ bo va ɖo ye ɖodan, ye bo va gbɔn Fenisi kpo Samali we kansinmɛ bo do lɔ kinkando e ji kosiyetɔn na ɛmɛye nɔ. E bo hɛn jijwɛ ɖaxo ɖe va na nɔvi xɔsetɔ lɛye. ⁴ Ke ye va jɛ Jeluzalɛmu, agun lɔ, kpo ɛmɛdindɔnye, kpo agunmɛhyɔnye yi ye ganji, ye bo va to onu ke Mawu wasi do gbɔn ye ji ye na ye. ⁵ Falizitɔ ɖeye kena kan do Yesu ji ye bo cite bo lɔ nɔ tun:«Ye ɖo na gbo ada na ye a bo mɔ ɖo na zɔn gbɔn Mɔyizi we osɛn lɔ ji dandan.» ⁶ Ɛmɛdindɔn lɛye kpo agunmɛhyɔnye bo va kple a do bu tamɛ kpɔn do oxo xin lɔ wu. ⁷ Le onudindɔn gaga ɖe we godo, Piyɛ va cite bo lɔ na ye nɔ lɔ byo:«Nɔvyee mi, mi nyɔ-ɛ tun, e mɔ dɛn viɖe syɛ na Mawu do can le mia mɛ na do gbɔn onu tɛye mɛ, kosiye a do se Mawu we oxo lɔ a bo do kan do e ji. ⁸ Wɛ Mawu ke nyɔ oji ɖokpo-ɖokpo, bo v asɔ ye bo do wasi kunnuɖetɔ etɔnye do gbɔn Gbigbɔ Kinkwɛn ke e na ye ɖi míye ha ji ⁹ wɛ ovogbingbɔn ti ko mɔ va le dodomɛ na míye kpo yee kpo, ɖo e xla ɛwu na oji yetɔnye gbɔn xɔseji. ¹⁰ Syɛ ɖe, ŋunɛ jɔ na mi do va tɛn Mawu kpɔn nɔ, a do sɔ agban kpinkpɛn do okɔ ji na onukplanvi kena míatɔye, gbɔɔn do jɛ míye teteye can hɔn kpewu na hɛn ye ota na yee? ¹¹ Vɔ mi kan do e ji tun mí mɔ na kpɔn hwlɛnga do gbɔn ɛfɛnu Xwetɔ Yesutɔn lɔ mɛ ɖi yee ha.» ¹² Togun lɔ bisese bo va bɔnu cɛncɛncɛn le gankemɛ na Pɔlu kpo Banabasi kpo o lɔ josiye kpo ŋudandonu ke Mawu wasi na kosiye do gbɔn yee ji nɔ. ¹³ Hwekenu na ye lɔ oxo vɔ, Jaki va yi oxo bo lɔ nɔ lɔ byo:«Nɔvyee, mi ɖo ot wu. ¹⁴ Simɔ o to kena Mawu dogbɔn ɛfɛnu etɔn mɛ va kpe do kosiye wu na do kpewu a can togun ɖokpo ke wu na nyikɔ etɔn na nɔ le ye mɛ ye bi na mi. ¹⁵ Wɛ oxolɔɖenyitɔye we oxo ɖe bo va ca kpo onu xin lɔ, ɖi kena ye o wlan ɖo tun: ¹⁶ "Onu xin ye we godo, ko na trɔkɔ va bo na va gbaa Davidi we oxo ke o mu san lɔ. Ko na va fɔn-ɛ cite a bo vɔ jlɛ ɖo. ¹⁷ E xin gbɛtɔ gbokpweye kpo kosi ke wu na nyikɔ etɔn le ye, mɔ do va ba Xwetɔ lɔ kpɔn." ¹⁸ Onu kena Xwetɔ ke wasi onu ke lɛye o lɔ nɔ ye bo nyɔ-ɛ xoxoxo lɔ xɛn xin. ¹⁹ I wɛ dɔn, le onukpinkpɔn tɛye mɛ ko hɔn jlo na mía va caka tamɛ na kosi ke kan do Yesu ji ye; ²⁰ vɔ mía wlan do asi na ye tun ye ni mɔɔ cɔ yeɖeye do onu ɖuɖyu ke ye do san avɔ na yɛhweye, ogalilɔye kpo ye ni mɔ ka ɖu kanlin ke ye tu gbigbɔ do na bo do hu ye gbɔɔn a do ɖu ɛhun can. ²¹ Sɔn xoxo hwenu gbɔn wɛ ɛmɛ ɖeye o nɔ lɔ oxo bo xlɛ osɛ Mɔyizitɔn lɔ na ɛmɛye nɔ gbɔn agunxɔye mɛ le gbɔjwɛzanyegbe tɛgbɛ gbɔn toxo lɛye mɛ nɔ.» ²² Wɛ ɛmɛdindɔnye kpo agunmɛhyɔnye, kpodo agun lɔ bisese, ye va can Jwidi ke ye nɔ yɔ tun Basabasi kpodo Silasi, ye bo nyi ogaye le agun mɛ, bo sɔ ye sɔ ɖodan Antyɔcu bɔ do Pɔlu kpo Banabasi wu. ²³ Ye bo wlan wema ke do asi na ye:«Míye ɛmɛdindɔnye, agunmɛhyɔnye kpo nɔvi xɔsetɔye, mi do ogbe na miye ke nyi kosi bo le Antyɔcu, Sili kpo Silisi kpo! ²⁴ Mí se tun ɛmɛ ɖeye ke mí hɔn na ogbe wu ɖeye, bo sɔn mía kɔn bo mia kɔn mɔɔ va gba ayixa do na mi nɔ kpo onukpinkplan ɖeye kpo. ²⁵ E bo va nyɔ na mí wɛ do gbɔn ogbenɔkpɔ mɛ mi bo va sɔ gbeta bo can nɔvi xɔsetɔ ɖeye sɔ bɔ do Banabasi kpo Pɔlu, ²⁶ ke sɔ ɛgbɛ yetɔn do sanvɔ na Xwetɔ Yesu-Klisu lɔ bo sɔ ɖodan mi. ²⁷ Mí sɔ Jwidi kpo Silasi sɔ ɖodan mi na ye a do va lɔ onu ɖokpo lɛye ke na mi. ²⁸ Ɖo e nyɔ na Gbigbɔ Kinkwɛn kpo míye can tun mí mɔ hɔn mɔ do agban bu ti na mi nɔ zɛ gbɔn ke le vivɛɖe lɔ wu: ²⁹ na mi a jɔ onu ke ye do sanvɔ na yehweye ɖuɖu do, ɛhn ɖuɖu do, kanlin ke ye tu gbigbɔ do na bo do hu ye ɖuɖu do a bo jo ogalilɔ do. E nyi tun mi hɛn onu xin lɛye bo zɔn gbɔn yee ji, e na wa onywɛ na mi. E yi zaanɖe.» ³⁰ Ye bo va ɖo ye ɖodan, ke ye va jɛ Antyɔcu, ye va kple togun lɔ bo sɔ weme lɔ sɔ na ye. ³¹ Ke ye va xlɛ wema lɔ vɔ, ye kpɔn jijwɛ do hɔnhlɔn ke ye do lanmɛ na ye lɔ wu. ³² Jwidi kpo Silasi kpo, ke nyi Mawu we oxolɔɖenyitɔye can, bo va lɔ oxo susu na nɔvi xɔsetɔ lɛye na ye a do do oji a bo lido le xɔse mɛ. ³³ Hwekenu ye va nɔ blɛ lɔ na azan susu vɔ, nɔvi xɔsetɔ lɛye bo va lɛkɔ na ye le fifa mɛ ɖodan mɛ ke ɖo ye ɖodan lɛye. ³⁴ (E bo jlo Silasi na ni a do ci Antyɔcu.) ³⁵ Vɔ Pɔlu kpodo Silasi bo nɔ Antyɔcu lɔ taŋu kpo ɛmɛ susu buye, le blɛ lɔ ye bo nɔ do kplan onu wu ɛmɛye a bo mɔ do lɔ Xwetɔ lɔ we oxo na ɛmɛye nɔ. ³⁶ Azan viɖe godo, Pɔlu bo va lɔ na Banabasi lɔ byo:«Mí a trɔkɔ a bo do vee kpɔn nɔvi xɔsetɔ ke mí o lɔ Xwetɔ lɔ we oxo na le toxo lɛye bi mɛ tun naɖe lɛ ye mɔ leɖo ja.» ³⁷ Banabasi bo jlo na kplɔ Jan-Maki. ³⁸ Vɔ Pɔlu bo va gbɛ tun ni mɔ ka kplɔ-ɛ. Ɖo Jan-Maki lɔ o jo ye do sɔn Panfili gbɔn e ko kpe do ye wu le odan yetɔn mɛ. ³⁹ Onudindɔn bo va ɖyɛ dodomɛ na ye gbɔɔn ye bo va klan le yeɖe wu. Banabasi bo va kplɔ Maki ye bo ɖyɛ tɔjihun mɛ bo do siin Ciplu. ⁴⁰ Vɔ Pɔlu bo kplɔ Silasi bo do sɔn le hwekenu na nɔvi xɔsetɔye va byɔ ɛfɛnu Mawutɔn do Pɔlu ji we godo. ⁴¹ E bo gbɔn Sili kpo Silisi bo do do hɔnhlɔn lanmɛ na agunye nɔ.