¹ Pɔlu va jɛ Dɛbu, e xin we godo e bo va yi Lisri, wɛ onukplanvi ɖe bo le blɛ lɔ ye bo nɔ yɔ-ɛ tun Timɔte, e bo bo nyi nahwe Jwifutɔ ɖe ke kan do Xwetɔ lɔ ji we vi, Otɔ bo nyi Glɛkitɔ. ² Nɔvi xɔsetɔ kena le Lisri kpo Ikɔnuye bo nɔ ɖe kunnu onywɛ do Timɔte lɔ wu. ³ Pɔlu bo jlo na kplɔ-ɛ do ɛtɛ; bo va kplɔ-ɛ bo gbo ada ni-i keŋugbɔxwe do Jwifu ke le kansin lɛye mɛ wu, ɖo ye mɛ bi wɛ nyɔ-ɛ tun Glɛkitɔ mɛ mɔ nyi Otɔ. ⁴ Hwekenu ye gbɔn toxoye mɛ nɔ, ye nɔ lɔ gbeta ke Yesu we ɛmɛdindɔnye kpodo agun mɛhyɔn Jeluzalɛmutɔnye sɔ, na agunye nɔ, na yee a do zɔn gbɔn e ji. ⁵ Agun lɛye bo va syɛnxu le xɔse mɛ, xɔsetɔye bo su do e ji nɔ ŋukɔnɖiɖe-ŋukɔnɖiɖe. ^{6 7 8} Pɔlu kpo ɛmɛ ke xo do-e ye bo bo gbɔn Fliji kpo Galasi we kansinye mɛ, le hwekenu na Gbigbɔ Kinkwɛn gbɛ na ye tun ye ni mɔ ka jla Mawuxo lɔ le Azi we kansinmɛ. Hwekenu ye va tɛkpɔ Misi, ye jlo na dyɛ Bitini vɔ Gbigbɔ Yesutɔn bo bɛ na ye. Ye bo va gbɔn Misi bo va tɔn do Trawasu. ⁹ Mawu bo de nuɖe xlɛ Pɔlu le ozan mɛ: e kpɔn Masedwanutɔ ɖe, kena yɔ-ɛ bo lɔ ni-i nɔ lɔ byo:«Va Masedwanu na va kpe do mí a wu.» ¹⁰ Hwekenu Pɔlu kpɔn onuɖexlɛ xin lɔ, zɔnɖokpo Pɔlu bo lɔ tun mía yi Masedwanu ɖo Mawu yɔ mí tun mí mɔɔ ve jla oxo hetɛye le blɛ lɔ. ¹¹ Mí bo va do tɔjihun le Tlowasi bo zɔn tlelele bo ve jɛ Samɔtrasi we tomɛ, le ŋukɔnɖɛgbe etɔn mí bo va jɛ Nɛyapolisi. ¹² Mí bo lɛ le blɛ bo va jɛ Filipu ke nyi Masedwanu we toxo ɖokpo mɛ, Toxo xin lɔ mɛ tɔ ye bo ɖo acɛ ɖi Hlɔmatɔye ha. Mí bo va nɔ ble lɔ na azan viɖe. ¹³ Le gbɔjwɛzangbe Jwifuyetɔn, mí tɔn le toxo lɔ mɛ bo do va yi otɔ ɖe to bo bu-i nɔ tun ofi ke ye nɔ xo ɛɖɛ le ɖe mɔ le blɛ mɛ ha. Mí bo va xinnɔnyi bo jɛ oxo lilɔ ji na nyɔnusi ke kple le blɛ lɛye. ¹⁴ Nyɔnusi ɖe le ye mɛ, bo nɔ nyi Lidi, e bo nɔ sɔn Tyati we tomɛ bo nɔ sa avɔ vɛ adodoeye, bo nɔ vɔ Mawu kpo sisi kpo. E bo ɖo oto wu mi nɔ, Xwetɔ Mawu lɔ bo hun Oji etɔn, e mɔ do tɛ oto a bo do se oxo kena Pɔlu o lɔ nɔ lɔ. ¹⁵ Ke ye lɛ Mawusin na Lidi i kpo xwedo etɔn kpo. E xibn we godo e bo yɔ mí bo lɔ lɔ byo:«Na mi kpɔn byo ko mɔ le ogbeji na Xwetɔ lɔ, mi bo ɖyɛ oxwe tɛyegbe a bo nɔ blɛ.» E bo zin mia ji taŋu na mi a do yi ogbe a mɔ doà nɔ ble lɔ. ¹⁶ Hwekenu na mí siin ɛɖɛxogbe nɔ, nyɔnuvi emɛ xixo ɖe ke mɛ na dangbwe we gbigbɔ le, va kpe mí. ¹⁷ Nyɔnuvi xin lɔ bo nɔ zan gbigbi xin lɔ a bo nɔ do kan onu na ɛmɛ. Odan xin lɔ wɛ e nɔ wa bo nɔ do hɛn oho susu do va Xwetɔ etɔnye. Nyɔnuvi xin lɔ bo jɛ ɛtɛ na míye kpo Pɔlu kpo bo do axwa nɔ lɔ byo:«Mɛ kiye Mawu we odansɔvi wɛ ye nyi bo xlɛ hwlɛngan lɔ we omɔ wu mí nɔ.» ¹⁸ Nyɔnuvi xin lɔ bo wasi onu xin lɔ na azan susu. Ke aɖi wle Pɔlu e trɔ okɔ bo lɔ na gbigbɔ lɔ tun:«Ko ɖe ogbe do we le Yesu Klisu we nyikɔ mɛ lɔ byo i mɔ tɔn lee emɛ.» Gbigbɔ lɔ bo tɔn le emɛ zɔnɖokpo. ¹⁹ Ke nyɔnuvi xin lɔ we xwetɔ kpɔn tun, hiye mɔ hɔn mɔ kpewu mɔ na zɛn a do ba oho, ye wle Pɔlu kpo Silasi bo kplɔ ye do yi dogba jile otoga ye kɔn. ²⁰ Ke ye kplɔ ye do yi Hlɔmatɔye we kojoɖotɔ lɛye kɔn, ye lɔ na ye tun:«Dahwe kiye, o hlu mía we toxo d'ewu nɔ; Jwifuye wɛ ye bo nyi. ²¹ Ye bo kplan okɔtanu buye wu ɛmɛyee nɔ. Ye ko na ogbe xin ha wu mí mɛ Hlɔmatɔye na mí na do yi gbe na akɔtanu xin lɛye gbɔɔn a do zɔn gbɔn yeji can.» ²² Togun lɔ no cite kpan ŋukɔn Pɔlu kpo Silasi kpo, kojoɖotɔ Hlɔmatɔyetɔn bo na na ye ɖe awu le okɔ na ye, bo ɖegbe tun ye ni mɔ bɔ oxa ɖo na ye. ²³ Ke ye xo ye nywɛɖe vɔ, ye bo va tu ye do ogankpa mɛ, bo ɖegbe na gankpa cɔtɔ lɔ byo ni mɔ kpeŋu do ye wu mɔɔ cɔ ye nywɛɖe. ²⁴ Ke gankpa cɔtɔ lɔ se ogbe ɖiɖe xin lɔ, e sɔ ye sɔ flɛn do gankpa lɔ mɛ daan bo do ogan afɔ nan ye. ²⁵ Le zanga weve mɛ emɔha, Pɔlu kpo Silasi o ji ohan ke kenfu wu Mawu ye nɔ, ogantɔ gbokpweye bo se nɔ. ²⁶ Haŋu zɔnɖokpo, nyidan lɔ bo hunhun kpo hɔnhlɔn kpo taŋu, gbɔɔn gankpa lɔ we dodwe ye can bo hunhun; le zɔnɖokpo kpoŋu gankpa lɔ we ohɔnye bisese bo hun wɛ mɛ ke gbɛ le gankpa lɔ mɛ ye bisese we kpɛŋubɛye bo hun. ²⁷ Ke gankpacɔtɔ lɔ fɔn bo kpɔn gankpa lɔ we ohɔnye le hunhun, e lyɔ dɛnkpwe itetetɔn bo do hu eɖe, ɖo, e bu-i nɔ tun mɛ ke le gankpa lɔ mɛ ye bisese mɔ si mɛ ha. ²⁸ Vɔ Pɔlu bo do axwa sinsyɔn bo lɔ byo:«Ko wa onu nyinyla ɖe na ɖiwe, mí mɛ bisese wɛ le bwɛ.» ²⁹ Ogankpacɔtɔ lɔ bo byɔ zogbɛn, bo hwlɛndo do ɖyɛ ogantɔ lɛye ji, bo hunhun nɔ tititi gbɔɔn bo ve jɛnyi do afɔnu na Pɔlu kpodo Silasi kpo. ³⁰ E bo kplɔ ye tɔn bo lɔ na ye tun:«Xwetɔ ŋunɛ ko na wa na do kpɔn hwlɛngan?» ³¹ Pɔlu kpo Silasi kpo bo yi ogbe ni-i tun: «Kan do Xwetɔ Yesu Klisu ji i kpo hwɛndo tɔwe mɔ kpɔn hwlɛngan.» ³² Ye bo lɔ Xwetɔ lɔ we oxo ni-i bo mɔ lɔ na ɛmɛ ke le i we xwegbeye can. ³³ Le oganxixo xin lɔ mɛ, gankpacɔtɔ lɔ bo kplɔ Pɔlu kpo Silasi kpo do sɔn bo ve klɔ abi yetɔnye mɛ na ye, zɔnɖokpo ye bo lɛ Mawu we ɛsin na e lɔ kpo ɛmɛ etɔnye bisese. ³⁴ E bo kplɔ ye do yi i we xwegbe bo na ye onuɖuɖu, e bo le jijwɛ ɖaxo ɖe mɛ i kpodo hwɛndo etɔn bisese ɖo kena ye xɔse bo kan do Xwetɔ Mawu lɔ ji wu. ³⁵ Ke ŋukɔn ɖe, kojoɖotɔ lɛye ɖo sɔjaye ɖodan ye a do vee lɔ na ogankpacɔtɔ lɔ tun ni mɔɔ ɖe dahwe xin leye tun na ye a mɔ sɔn. ³⁶ Gankpacɔtɔ lɔ bo lɔ oxo xin lɔ na Pɔlu byo:«Kojoɖotɔ lɛye ɖo ɛmɛ ɖodan byo ye ni mɔɔ ɖe ogan na mi. Hun syɛ mi tɔn a bo sɔn le fifa mɛ.» ³⁷ Vɔ Pɔlu bo lɔ na sɔja lɛye tun lɔ byo:«Ye nɔ kojo ma ɖo na mi, bo bɔ oxa ɖo na mi, le ɛmɛye bisese we ŋumɛ, miye ke nyi Hlɔmatɔye ye bo sɔ mi sɔ flɛn do gankpa mɛ, syɛ ye bo ba na ɖe mi tɔn le owi mɛ wɛɛ? Gbeɖe kpɔn, e hɔn na jɔ ɖemɔ, yetete ni va amɔ ɖe mi tɔn.» ³⁸ Sɔja lɛye bo lɔ oxo xin lɔ na kojoɖotɔ lɛye, ye bo vɔ ɖo ye nyɔ-ɛ tun Pɔlu kpodo Silasi kpo mɔ nyi Hlɔmatɔye. ³⁹ Kojoɖotɔ lɛye bo va ɖekuku na ye, e xin we godo ye bo ɖe ye tɔn le gankpa lɔ mɛ bo byɔ ye tun ye ni mɔɔ tɔn le oto lɔ mɛ. ⁴⁰ Ke Pɔlu kpodo Silasi kpo tɔn le gankpa lɔ mɛ vɔ, ye sɔn yi Lidi ɔn, ke ye kpɔn nɔvi xɔsetɔye le blɛ, ye na ye akɔnkpinkpan bo lɛ le ye kɔn bo sɔn.