1 Pɔlu kpo Silasi kpo gbɔn Anfipolisi kpo Apoloni we toxoye mɛ, bo va jɛ Tɛsalonikitɔye we toxo mɛ. Jwifuye bo ɖo okpletyɔn yetɔn do blɛ. 2 Pɔlu yi okpletyɔn xin lɔ ɖi krna e o nɔ wasi ɖo ha. Jwifuye we gbɔjwɛzan atɔ wɛ e sɔ, ɖe kplɔ ɖe do, bo do jɛ jɛtun na ye sɔn Mawu we oxo lɔ wu. 3 E ɖe i we gɔnmɛ na ye nɔ bo ɖe xlɛ ye nɔ tun, Klisu mɔ ɖo na ɖu aya, a mɔɔ fɔn oku. E bo mɔ lɔ na ye lɔ byo:«Klisu lɔ wɛ nyi Yesu ke we xo ko lɔ na mi lɔ.» 4 Mɛɖeye le Jwifuye mɛ bo xodo Pɔlu kpodo Silasi: Glɛkiye, kpo ɛmɛ susu ke hɔn nyi Jwifuye, bo nɔ vɔ na Mawu nɔ kpo sisi kpo ye, kpodo nyɔnusi mɛjɔmɛ susuye can. 5 Vɔ Jwifuye bo bɛ ɛwu hwihwan taŋu, bo ve da tovi nyinyla nuvɔnɔye bo nɔ ɖisa gbɔn mɔji nɔ ye. I wɛ ye cite bo yi Jazɔn we xwegbe a do ve ba Pɔlu kpo Silasi kpo a do kplɔ ye do yi togun lɔ we ŋukɔn. 6 Ke ye hɔn kpɔn ye ye wle Jazɔn kpo nɔvi xɔsetɔ ɖeye, bo kplɔ ye do yi toxo lɔ we ogaye we ŋukɔn, bo do axwa nɔ bo lɔ nɔ tun:«Mɛ kiye wɛ hɛn aglajijɛ vaa ɛgbɛ lɔ mɛ bisese, syɛ ye va mía we tomɛ? Jazɔn bo yi ye do i we xwegbe. 7 Ye mɛ bisese wɛ nɔ gba osɛ kena xɔlu ɖaxo Hlɔmatɔn Seza do lɛye, ɖo ye nɔ lɔ byo xɔlu bu mɔ mɔ le mɔ nɔ yi Yesu.» 8 Oxo xin lɔ hlu otogaye kpo otogun lɔ bisese d'ewu. 9 Oho wɛ Jazɔn kpo xɔsetɔ gbokpweye sɔ ɖ'enyi gbɔxwe ye do jo ye do. 10 Zɔnɖokpo nɔvi xɔsetɔ lɛye na na Pɔlu kpo Silasi kpo sɔn yi Bele le ozan lɔ mɛ. Ke ye ve jɛ oto lɔ mɛ, ye ɖyɛ Jwifuye we okpletyɔn. 11 Jwifu xin lɛye bo ɖo dɔmɛ faa hugan wu Tɛsalonikitɔye. Ye bo yi Mawu we oxo lɔ kpo akpakpa ɖaxo ɖe. Ŋukɔnɖiɖe-ŋukɔnɖiɖe, ye mɔ gbeje Mawuxo lɔ kpɔn nɔ, a do kpɔn tun oxo kena Pɔlu kpodo Silasi kpo o lɔ nɔ lɔ sɔg e jaa. 12 Ɛmɛ susu le ye mɛ bo kan ddo Xwetɔ lɔ ji. 13 Vɔ, ke Jwifu Tɛsalonikitɔnye se tun Pɔlu mɔ jla Mawuxo lɔ le Bele can nɔ, ye va blɛ lɔ ,can a mɔ do hlu otogun lɔ d'ewu, aa bo mɔ do zingidi te. 14 I wɛ nɔvi xɔsetɔ lɛye na na Pɔlu sɔn yi ɛxuto zɔnɖokpo, vɔ Silasi kpo Timɔte bo ci Bele lɔ. 15 Ɛmɛ ke va yi ɖo Pɔlu nɔ lɛye bo xodoe gbɔɔn do yi atɛnu.Pɔlu bo do ɛwɛn na ye lɔ byo, ye mɔɔ lɔ na Silasi kpo Timɔte tun ye ni mɔɔ va kpɔn he le Atɛnu lɔ le mandɛn-mandɛn mɛ.E xin we godo ye bo lɛkɔ. 16 Hwekenu na Pɔlu o tre kpɔn Silasi kpo Timɔte le Atɛnu nɔ, oji ofyɛ ni-i nɔ do kena oto lɔ gɔ kpo yehweye kpo o wu. 17 Le Jwifuye we okpletyɔn e nɔ jɛ jɛtun kpo mɛ ke na hɔn nyi Jwifu, vɔ bo nɔ vɔ na Maawu bo nɔ ɖo sisi ni-i ye. Ŋukɔnɖiɖe-ŋukɔnɖiɖe e nɔ jɛ tagba kpo ɛmɛ ke e gbɛ kpɔn le dogbajiye can. 18 Gbeta ke nyi Epikitɔye kpo Sitoyisitɔye we onukplan-ɛmɛtɔ ɖeye bo jɛ jɛtun kpo-e nɔ. Ɖiye bo kɛnse nɔ tun lɔ byo:«Ŋunɛ lɛ oxovlolɔtɔ xin lɔ o lɔ nɔ?» Ɖiye bo lɔ nɔ tun lɔ byo:«E le ɖi oto buye mɛ we yɛhweye we oxo wɛ e lɔ nɔ.» Nu ke dɔn na ye do lɔ emɔ nɔ wɛ nyi tun Pɔlu o jla Yesu kpo fifɔn sɔn oku etɔn we oxo nɔ. 19 Ye kplɔ Pɔlu do yi otomɛhyɔnye we gbɛta ke ye nɔ yɔ tun Alewopaji we ŋukɔn bo lɔ lɔ byo:«Mí na kpe wu a nyɔ onu yɔyɔ ke o kplan ɛmɛ nɔ lɔ? 20 Ɖo mí hɔn se onu xin ha ye kpɔn, mí bo ba na kpɔn onu jɛ oxo xin lɛye wu.» 21 Vɔ Atɛnutɔye bisese kpodo jonɔke le Atɛnu we oto lɔ mɛ ye, o nɔ sɔ ganxixo susu a do lɔ alo a mɔ do se oxo yɔyɔ ke le to ji ye. 22 I wɛ Pɔlu cite le otomɛhyɔn lɛye mɛ bo lɔ lɔ byo:«Atɛnutɔye ko kpɔn byo sinsɛnnɔye mɛ mi mɔ nyi taŋu le onu biosese mɛ. 23 Ɖo hwekenu na ko gbɔn mia we tomɛ nɔ, ko kpɔn yehwe miatɔnye bo mɔ kpɔn avɔsangba ke wu na ye wlan do tun:"Yɛhwe kena mɛɖe hɔn nyɔ." Onu kena mi hɔn nyɔ vɔ bo sɛn nɔ lɔ we oxo wɛ ko lɔ na mi nɔ, 24 Mawu ke ɖo ɛgbɛ lɔ bisese kpo onu ke le emɛye bo nyi Xwetɔ na sɛxwe kpodo nyidan kpoye, e hɔn nɔ nɔ sinsɛnxɔ kena gbɛtɔye wasi kpodo alɔ kpo mɛ. 25 E hɔn hyan byo gbɛtɔ a mɔ kpe ŋukunsin do e wu ɖi onu ɖe mɛ e mɔ hyɛn ha, ɖo e lɔ wɛ nɔ na ɛgbɛ wu gbɛtɔ bisese, gbigbɔ kpodo onu ɖekpokpwe. 26 E na na otogun ɖokpo gee ke tɔn sɔn gbɛtɔ ɖokpo mɛ, jɛ xwe do nyidan lɔ bisese ji, e bo ɖo ganmɛ vovweye bo mɔ ɖo odo na nɔtyɔ yetɔnye. 27 Mawu wa e mɔ, e xin, gbɛtɔye mɔ do bɛ-ɛ ɖi ŋuvanɔye ha, tanyɔɔ ye mɔ va kpɔn-ɛ. Ganke le xojɔxo mɛ Mawu ko le dindɛnnu na ɖokpo-ɖokpo míatɔnye. 28 Ɖo e lɔ mɛ wɛ míye mí kpɔn ɛgbɛ le, bo yi nɔ bo gbɔn nɔ; i jan wɛ bo dɔn na mí do le. Ɖi kena mía we ohajitɔ ɖeye o lɔ ɖo ha, lɔ byo:«I we vikpɛye wɛ míye can mí nyi.» 29 Ke e nyi tun Mawu we vikpɛye wɛ mí nyi, mí hɔn kpewu na ɖe susu byo Mawu mɔ le ɖi sika alo oganwe alo ɛkpɛn we yɛhweye kena gbɛtɔye wasi dogbɔn danuwiwa kpodo ye we susuye mɛ. 30 Vɔ, Mawu myɔ ŋukunsin do onu kena gbɛtɔye wa le ganxixo ke mɛ ye le mannywɛ mɛ, bo lɔ nɔ syɛ na gbɛtɔye bisese le ofi ɖekpokpwe kena yee le byo ye mɔɔ ɖɔli jijɔ. 31 Ɖo, e ɖo azan ɖe a do ɖo kojo na gbɛtɔ gbɔn ɛhwɛ jijɔ ji, gbɔn ɛmɛ ke e o can lɔ ji. Mawu can ɛmɛcican xin lɔ sɔn oku bo do ɖe xlɛ ɛmɛ bisese tun i mɛ mɔ nyi ɛhwɛɖɔtɔ kena he mɔ can lɔ xojɔxo. 32 Kena ye se Pɔlu lɔ finfɔn sɔn oku we oxo, ɛmɛ ɖye o ko-e nɔ, ɖeye bo lɔ nɔ byo: Gan bu mɛ can, omɔ lɔ oxo d'ewu na mí.» 33 I wɛ Pɔlu lɛ le ye kɔn. 34 Ganke ɛmɛ ɖeye bo tɛ do ewu, bo trɔ zun xɔsetɔye. Ɛmɛ xin lɛye we ɖeye nyi Denisi ke le otomɛhyɔn lɛye mɛ, kpodo nyɔnusi ke we nyikɔ nyi Damalisi, kpodo mɛ buye can.