¹ Onu xinye we godo, Pɔlu lɛ le Atɛnu bo do sɔn-i Kolɛnti. ² Le blɛ e kpɔn Jwifu ɖe ke ye nɔ yɔ tun Akilasi, ye bo ji-i le Pɔn. Dahwe xin lɔ kpodo osyɔ kena ye nɔ yɔ tun Plisili, lɛ le Itali syɛ e hɔn dɛn. Ɖo xɔlu ɖaxo ke ye nɔ yɔ tun Klodu ɖegbe byo Jwifuye bisese mɔ lɛ le Hlɔma we tomɛ. Pɔlu bo va bɔ do Plisili lɔ kpodo Akilasi lɔ wu. ³ Ke e nyi tun odan ɖokpo ŋumyɔ wɛ ye nɔ wa, Pɔlu gbɔjwɛ ci ye kɔn, ye bo nɔ do wa podan do okpɔ. Avɔxɔ wɛ ye nɔ wasi. ⁴ Le Jwifuye we gbɔjwɛzan ɖekpokpwegbe, Pɔlu nɔ lɔ oxo nɔ le ye we okpletyɔnye, a mɔ do na na ɛmɛ ke nyi Jwifuye kpo mɛ ke hɔn nyi Jwifuye can. ⁵ Kena Silasi kpodo Timɔte sɔn Masedwanu we kansinmɛ bo va, Pɔlu sɔ eɖe blebu bo do sanvɔ na Mawu we oxo lɔ. E nɔ ɖe onu gɔnmɛ na Jwifuye nɔ byo Yesu mɛ mɔ nyi Klisu lɔ. ⁶ Vɔ Jwifuye cite kpan ŋukɔ wi bo kɔn acɔn d'ewu nɔ, i wɛ e hunhun awu etɔnye we finfinye bo lɔ na ye lɔ byo:«Na e jio onuɖe na mi, mi mɔ sɔ kpan. E hɔn mɔ kan blɔ do fiɖe. Bɛ sɔn syɛ, ɛmɛ ke hɔn n yi Jwifuye kɔn wɛ ko na yi.» ⁷ Pɔlu bo tɔn le okpletyɔn lɔ bo sɔn dahwe ɖe ke ye nɔ yɔ tun Titwisi Jusitusi we xwegbe e bo nɔ vɔ na Mawu. Oxwe etɔn bo le axa na Jwifuye we okpletyɔn lɔ tututu. ⁸ Ganke Klisipwisi okpletyɔn lɔ we ga, bo kan do Xwetɔ lɔ ji, i kpo xwedo etɔn bisese. Kolɛntitɔ susu ke ɖoto Pɔlu, Yee can bo kan do Xwetɔ lɔ ji, ye bo lɛ Mawu we ɛsin na ye. ⁹ Le ozan ɖe mɛ Xwetɔ lɔ ɖe onu ɖe xlɛ Pɔlu tun:«Ka vɔ, lo lɔ oxo nɔ kpoŋu, ko mɔ bɔnu. ¹⁰ Ɖo bo tete le kpo we ɛmɛti ko ɖo alɔ wuwe nɔ a do wa onu nyinyla ɖe kpo we, ɖo gbɛtɔ susu wɛ nyi tɛye le toxo ke lɔ mɛ.» ¹¹ Pɔlu bo nɔ Kolɛnti lɔ na ioxwe atrekpo sunzan atrekpo, do kplan Mawuxo lɔ wu ɛmɛye nɔ. ¹² Hwekenu na Galyɔn ɖu oga, le Akazi we kansinmɛ, Jwifuye ɖo gbekpɔ bo cite kpanŋukɔn Pɔlu. ¹³ Ye bo lɔ nɔ lɔ byo:«Dahwe ke o do ɛmɛye nɔ na ye a do sɛn Mawukpodo walɔ kena osɛn lɔ gbɛ.» ¹⁴ Oxo lɔ wɛ Pɔlu ba na lɔ kpoŋu, Galyɔn bo yi oxo bo ɖ'ewu na Jwifuye tun:«Jwifuye, e do nyi byo danu ɖe onunyinyla ɖaxo ɖe we xo wɛ, ko mɔ ɖo to mi ganji ɖi ke e jɛ ɖo ha. ¹⁵ Vɔ ke e nyi byo onudindɔn do xogbeye, nyikɔye kpodo osɛn miyeteteyetɔn wu wɛ, e kan miye teteye. Ko hɔn ɖɔ onu xin ye we ɛhwɛ nɔ.» ¹⁶ I wɛ Galyɔn lɔ nya ye le ɛhwɛɖɔxwe lɔ. ¹⁷ Ye mɛ bisese bo wle Sosutɛnu Jwifuye we okpletyɔnga lɔ, bo xo-e nɔ le ɛhwɛɖɔxwe lɔ xwe ŋukɔn, vɔ Galyɔn hɔn kɛ onu d'emɛ na ye. ¹⁸ Pɔlu lɔ mɔ nɔ Kolɛnti lɔ dindɛn , e xin we godo e bo va lɛ le nɔvi xɔsetɔ lɛye kɔn bo do tɔjihun elɔ kpodo Plisili kpodo Akilasi ye bo sin Sili we kansinmɛ. Vɔ, gbɔxwe e na do sɔn, e xwlɛ ota le Sankle ɖo e kan atanŋu ɖe na Mawu. ¹⁹ Ke ye ve jɛ Efɛzi, Pɔlu lɛ le Plisili kpo Akilasikɔn. E bo yi Jwifuye we okpletyɔn bo do ve lɔ oxo kpodo ye. ²⁰ Ye bo lɔ ni-i lɔ byo:«Nɔ mía kjɔn le bwɛ viɖe!» Vɔ Pɔlu ko yigbe na ye. ²¹ E lɛ le ye kɔn bo lɔ na ye tun:«Na Mawu ba ko na trɔ va mia kɔn.» E bo do tɔjihun le Efɛzi we toxo lɔ mɛ bo sɔn. ²² Kena Pɔlu ve jɛ Sezale, e do ogbe na agunviye le Jeluzalɛmu, e xin we godo e bo trɔ sin Antyɔcu ke na le Sili we kansinmɛ. ²³ E bo nɔ blɛ lɔ viɖe, zanɖe e bo trɔ sɔn. E bo mɔ gbɔn Galile kpo Fliji we kansinmɛ ɖekplɔɖedo, bo do do hɔnhlɔn lanmɛ n,a on ukplanvi lɛye nɔ. ²⁴ Jwifu ɖe kena ye ji le Alɛsandri ye bo nɔ yɔ-ɛ tun Apolosu, e va Efɛzi. E nyi ɛmɛ ɖe bo bi do ɛɖɛ nu, bo nyɔ wiwlan kinkwɛn lɛye ganji. ²⁵ Ye bo kplɔn-ɛ kena ye nɔ zɔn gbɔ Mawu we omɔ ji ɖo.E bo nɔ jla Yesu we oxo lɔ nɔ, a mɔ kplan onu wu ɛmɛye do ojlɛji kpodo zozo kpo vɔ Jan we ɛsin ke e lɛ na ɛmɛye jan wɛ e bo nyɔ. ²⁶ E bo jɛ oxolɔji le Jwifuye we okpletyɔn kpo kandeji ɖe kpo. Ke Plisili kpodo Akilasi se oxo lilɔ etɔn, ye kplɔ-ɛ a do ve e ɖe Mawu we oxo lɔ we gɔnmɛ ni-i ganji. ²⁷ Ke Apolosu ba na yi Akayi we kansinmɛ, nɔvi xɔsetɔye na akɔnkpikpan wu-i bo wlan wema do asi ni-i na onukplanvi Akayitɔnye a do yi-i nywɛnɖe. Ke e va jɛ toxo lɔ mɛ, e va kpe do mɛ ke trɔ zun xɔsetɔye wu taŋu. ²⁸ Ɖo e nɔ lɔ oxo kpo hɔnhlɔn, a mɔ ɖe xlɛ Jwifuye le agbaŋugba byo oxo yetɔn mɔ nyi ojo, a mɔ ɖe xlɛ ye do gbɔn wiwlan kinkwɛn lɛye mɛ tun, Yesu mɛ mɔ nyi Klisu.