¹ Hwekenu na Apolosu le Kolɛnti wɛ Pɔlu gb ɔn kansin ke le osojiye mɛ bo do va Efɛzi. E bo kpɔn onukplanvi ke le blɛye. ² E bo kan ye se lɔ byo:«Ke mi do kan do Xwetɔ lɔ ji, mi o yi Gbigbɔ Kinkwɛn? Vɔ ye bo ɖ'ewu ni-i tun:«Mí hɔn se kpɔn byo Gbigbɔ Kinkwɛn ɖe mɔ le can.» ³ I wɛ Pɔlu kan ye se lɔ byo:«Mawisin nɛ lɛ mi lɛ?» Ye bo ɖo ewu ni-i lɔ byo:«Jan we Mawisin wɛ mi lɛ.» ⁴ Pɔlu bo lɔ na ye lɔ tun:«Jijɔ ɖiɖɔli we ɛsin wɛ e lɛ na mi, e bo nɔ lɔ na Izrayăli we togun lɔ nɔ lɔ byo, ye ni mɔɔ kan do ɛmɛ ke mɔ le godo na he mɔ gbɔnnɔ lɔ ji, ɛmɛ xin lɔ mɛ mɔ nyio Yesu.» ⁵ Ke ye se oxo xin lɛye vɔ, ye lɛ Mawusin na ye le Xwetɔ Yesu we nyikɔ mɛ. ⁶ Pɔlu bo ɖo alɔ ota na ye Gbigbɔ Kinkwɛn bo jɛte do ye ji, i wɛ ye jɛ ogbe voɖe-voɖeye dido ji. ⁷ Ye bo na yi weve emɔha. ⁸ Pɔlu nɔ yi Jwifuye we okpletyɔn le sunzan atɔn gblamɛ, a mɔ yi oxo kpo kandeji kpo, a mɔ lɔ xo do Mawu we xɔluɖuɖu lɔ wu. E mɔ jɛ tagba nɔ na ɛmɛ ke o ɖo oto wu-i nɔ ye a do kan do oxo lɔ ji. ⁹ Vɔ ɛmɛ susu bo bo nɔ syɛn ota a bo gbɛ kinkan do e ji, ye mɔ lɔ oxo nyinyla nɔ do Xwetɔ lɔ we omɔ wu le togun lɔ we ŋukɔn nɔ. I wɛ Pɔlu lɛ le ye kɔn bo ɖe onukplanvi lɛye do ovo a bo kplan onu wu ye nɔ ŋukɔnɖiɖe-ŋukɔnɖiɖe le Tilanwisi we suklukpamɛ. ¹⁰ Pɔlu wasi emɔha na oxwe owe ha, gbɔɔn Azi we kansinmɛtɔye bisese, Jwifuye wɛ, ɛmɛ ke hɔn nyi Jwifuye, ye mɛ bisese bo se Xwetɔ lɔ we oxo. ¹¹ Mawu mɔ wa ŋudandonu ɖaxo-ɖaxoye gbɔn Pɔlu ji nɔ. ¹² Kaka gbɔɔn ye mɔ sɔ avɔ alo avɔvuye a sɔ va ɖo Pɔlu wu a bo ve sɔ ɖo adɔnnɔye wu, adɔn yetɔnye mɔ gɔ, nylkanye mɔ tɔn le ye mɛ. ¹³ Jwifu ɖeye ke nɔ dan nɔ, a mɔ nya Gbigbɔ nylakanye le ɛmɛye mɛ nɔ ye, va jɛ Xwetɔ Yesu lɔ we nyikɔ yɔ ji, a do xo ɛɖɛ na ɛmɛ ke mɛ na gbigbɔ nylakan le ye, a bo lɔ nɔ tun:«Ko ɖe ogbe na mi tun miye mɔ tɔn le Yesu ke we xo na Pɔlu o lɔ nɔ lɔ we nyikɔ mɛ!» ¹⁴ Emɔha wɛ Jwifuye we avɔsantɔye we ga, kena ye nɔ yɔ tun Seva we vikpɛ acoweye o wa nɔ, ¹⁵ vɔ gbigbɔ nylakan lɔ bo ɖ'ewu na ye tun:«Ko nyɔ Yesu bo mɔ nyɔ Pɔlu ca, vɔ miye mɛ nɛ lɛ mi nyi?» ¹⁶ Wɛ ɛmɛ ke mɛ na gbigbɔ nylakan le lɔ va zɔn jɛ ye ji, i we hɔnhlɔn bo hugan wu ye mɛ bisese tɔn, e bo kpe ye wu bo xo ye mɛ biosese, bo do vivɛsise na ye gbɔɔn ye bo si le oxwe xin lɔ gbe, govɛ-govɛ kpodo abi le goto. ¹⁷ Mɛ ke le Efɛziye, Jwifuye kpo se onu ke jɔ xin lɔ. I wɛ vivɔ ɖaxo ɖe jɛ ye ji, yue bo kanfu wu ke na Xwetɔ Yesu we nyikɔ glo ɖo nɔ. ¹⁸ Ɛmɛ ke kan do Xwetɔ lɔ ji ye mɔ va lɔ onunyinyla ke ye wa san ye nɔ kpo axwa lelele. ¹⁹ Mɛ ke nɔ wasi majiki san ye bo bɛ majiki we wema yetɔnye do va bo tɔzo wu ye le mɛ bisese we ŋumɛ. Oho ke ye do xɔ wema xin leye we kɔnŋuta wɛ nyi oho akpo kanɖewo (50000). ²⁰ Dogbɔn Xwetɔ lɔ we hɔnhlɔn mɛ oxo xin lɔ bo gbakpe nɔ kpodo hɔnhlɔn kpo ²¹ Ke onu xin lɛye jɔ vɔ, Pɔlu sɔ gbeta a do gbɔn Masedwanu kpodo Akiyi a bo do sin Jeluzalɛmu. E bo lɔ nɔ lɔ byo:«Na ko yi Jeluzalɛmu vɔ, ko na va yi Hlɔma can.» ²² I wɛ e sɔ kpedewutɔ owe ke nyi Timɔte kpo Elasi sɔ ɖodan Masedwanu lɔ, itete bo mɔ nɔ Azi na azan viɖe. ²³ Le hwexin lɔ nu hunnya-hunnya ɖaxo ɖe va nɔ nyi le Efɛzi do Xwetɔ lɔ we omɔ wu. ²⁴ Ogandanwatɔ ɖe le bo nɔ nyi Demɛtliwusi, e bo nɔ sɔ oganwe do wasi yɛhwe Atemisi we oxɔ viviye, e xin lɔ bo nɔ hɛn oho susu va na odan xin lɔ watɔye. ²⁵ Dahwe xin lɔ kple ɛmɛ ke nɔwa odan xin ha lɛye, bo lɔ na ye tun:«Nɔvyee mi, mi nyɔ-ɛ tun dɔkun míatɔn, odan ke lɔ mɛ wɛ e nɔ tɔn sɔn. ²⁶ Vɔ mí kpɔn bo se, onu ke Pɔlu xin lɔ o wa nɔ, e ko nyi bwɛ ɖoɖyo hwɛn, e hwe viɖe azi we kansin lɔ mɔ vɔ bisese. E na na ɛmɛ susu kan do oxo lɔ ji, e bo lɛkɔ na ye, bo nɔ lɔ nɔ lɔ byo yɛhwe kena gbɛtɔ mɔ sɔ alɔ etɔn do wasi mɔ hɔn nyi onu sinsɛnye. ²⁷ E hɔn nyi odan míatɔn ɖoɖyo hwɛn e ba kɔn acɔn do nɔ, vɔ, mɛɖe hɔn mɔ va yɔ ́yɛhwe Atemisi we oxɔ lɔ, do yɔ onu nɔ, gbɔɔn a do do gigo ɖe na yɛhwe xin lɔ can, yehwe ke lɔ ke ye nɔ sɛn le Azi we kansinmɛ lɔ bisese kpodo ɛ́gbɛ lɔ mɛ bisese.» ²⁸ Kena ye se oxo xin lɛye, aɖi wle ye taŋu, ye bo xwi axwa dido bo lɔ nɔ tun:«Yɛhwe Atemisi Efɛzitɔye we yɛhwe ɖaxo wɛ.» ²⁹ Ozin bo tɔ le toxo lɔ mɛ bi, i wɛ ye zɔn gidi-gidi bo do va do ahwan hoo le dogba ɖaxo lɔ ji. Ye bo dɔn Gayiwisi kpodo Alisitaki do yi. Gayiwisi kpodo Alisitaki lɔ bo nyi Masedwanutɔye, ye bo nɔ xodo Pɔlu le omɔji yiyi etɔnye mɛ. ³⁰ Pɔlu bo ba na yi otogun lɔ we ŋukɔn, vɔ onukplanvi lɛye bo gbɛ ni-i. ³¹ Hadwe etɔn xɔsudanwatɔ azi we kansimɛtɔ do ɛwɛn ɖodɛn byo ni mɔ ko yi dogba ɖaxo lɔ ji. ³² Ye bo le axwanu, le hwexinlɔnu mɛɖeye o lɔ e ke nɔ, mɛ buye mɔ mɔ lɔ buye nɔ, ɖo togun lɔ hlu gbɔɔn mɛɖe hɔn mɔ va nyɔ onu ke dɔn na ye do va kple lɔ can. ³³ Jwifu ɖe le bo nɔ nyi Alɛsandru, ye bo ɖe onu ke jɔ lɔ we gɔnmɛ ni-i, Jwifu gbokpweye bo ɖe-e do ŋukɔn, i wɛ alɛsandru lɔ kɔ alɔ do jihwe a do ɖe oxo lɔ we gɔnmɛ na otogun lɔ. ³⁴ Vɔ ke ye do josi wu-i tu Jwifu mɛ e mɔ nyi, ye xwi axwa dido gbɔɔn na ganxixo owe emɔha, bo lɔ nɔ tun:«Yehwe Atemisi Efɛzitɔyetɔn yɛhwe daxo wɛ.» ³⁵ Vivɔnu etɔn, wemajikpɔntɔ toxo lɔ tɔn tɛnkpɔn kaka oɖa bo va ɖo le togun lɔ mɛ. E bo lɔ byo:«Efɛzitɔye bisese wɛ nyɔ-ɛ byo toixo Efɛzutɔn mɛ mɔ nɔ cɔ yɛhwe ɖaxo Atemisi we oxɔ, kpodo onutita etɔn ke flɛ sɔn jihwe ye. ³⁶ Mɛ ti ko kpewu na gbɛ oxo xin lɔ.Ke e le emɔ hun mi bo kuhun, a bo bu tamɛ gbɔxwe a wa onu. ³⁷ Ɖo mi kpɔn dahwe xinye va bwɛ, ye ko ɖu osu na yɛhwe míatɔn gbɔɔn do kɔn acɔn do ewu can. ³⁸ E nyi tun Demɛtliwusi kpo i we odanwagbɛ ke le kpo-e ye, ye ɖo ɛhwɛ ɖe na do na ɛmɛ ɖe, ɛhwɛɖɔxwe kpo ɛhwɛɖɔtɔye le. Ye ni ve yɔ ɛhwɛ le blɛ. ³⁹ Na e nyi byo, oxo ɖe le na mí dɔn nɔ, togun ke nɔ gbo ɛhwɛ do osɛn nu lɔ mɔ lɔ-ɛ gbo. ⁴⁰ Na mí hɔn nyɔ wa ye na do ogufinfɔn we ɛhwɛ na mí, do onu ke jɔ egbe wu. Ɖo ɛhwɛ jijɔ ti hɔn le na mí na naa bo do ɖe kple ke mi va kple le bwɛ we gɔnmɛ. ⁴¹ Ke e lɔ oxo xin lɛye vɔ, e nya ɛmɛ lɛye.»