¹ Kena hunnya-hunnya lɛye ɖote le Efɛzi we toxo lɔ mɛ, Pɔlu kple on ukplanvi lɛy bo na ye akɔnkpinkpan. E xin we godo e bo lɛ le ye kɔn bo sin Masedwanu we kansinmɛ. ² E gbɔn kansin xin lɔ mɛ do do akpakpa lanmɛ na xɔsetɔye na oganxixo susu, e xin we godo, e bo sɔn yi Glɛsitomɛ. ³ E bo nɔ blɛ na sunzan atɔn. Hwekenu na e ba do tɔjihun nɔ a do yi Sili we kansimɛ, e se tun Jwifuye mɔ bla gbe na he nɔ, e bo sɔ gbeta a do lɛkɔ a mɔ gbɔn Masedwanu do sɔn. ⁴ Mɛ ke xodoe ye xɛn: Sopatɛ ke nyi Piliwisi we vi bo nɔ sɔn Bele we tomɛ, Alisitaki kpodo Segɔndusi ke sɔn Tɛsaloniki, Gayiwisi ke sɔn Dɛbu, Timɔte, Ticiki, Tlofimu ke sɔn Azi we kansinmɛ. ⁵ Ye mɛ xin lɛye bo jɛ ŋukɔn na mí bo ve nɔte kpɔn mí le Tlowasi. ⁶ I wɛ míye mí do tɔjihun le Filipu le kpɔnnɔ ma ɖo tinkɛn we oxwe godo. Ŋukɔnɖegbe etɔn atɔngɔ we godo mí bo ve bɔ do ye wu le Tlowasi we toxo lɔ mɛ, mí bo nɔ blɛ lɔ na kɔsiɖa ɖokpo. ⁷ Le azan tantɛntɔngbe na kɔsiɖa lɔ, mí bo kple na do ɖo onuɖuɖu Kinkwɛn lɔ. Ke e nyi byo Pɔlu ɖo na sɔn le iwe ŋukɔnɖegbe, e lɔ xo na xɔsetɔ lɛye nɔ, bo drɛn afɔ na oxo etɔn gbɔɔn do ve jɛ zangan weve mɛ emɔ. ⁸ Zogbɛn susu bo le tita le sanŋu ke ji na mí kple le lɔ. ⁹ I wɛ hwanjɛvi ke ye nɔ yɔ tun Etikusi xlɔnnyi le sɛflɛ nu bo ɖyɛ bo ɖyɛ awlɔnmɛ taŋu le hwekenu na Pɔlu mɔ gbɛ lɔ oxo na xɔsetɔ lɛye nɔ. Kena awlɔn mu-i, eflɛ sɔn sanŋu atɔngɔ lɔ ji bo va jɛ nyidanji. Ye bo kɔ-ɛ e bo le kuku. ¹⁰ Vɔ Pɔlu bo jɛte, bo hwlɛndo do yi ekɔn, bo xwi, bo kɔ-ɛ do alɔmɛ bo lɔ tun:«Ayixa ni ka gbado na mi, e le ɛgbɛ!» ¹¹ Ke na Pɔlu mɔ trɔ siin sanŋu lɔ ji nɔ, e ma kpɔnnɔ lɔ, ye bo ɖu,exin we godo, e bo mɔ lɔ oxo gbɔɔn na oganxixosusu ɖe, jɛ kɛklɛnu, ke e lɔ oxo vɔ, e bo sɔn. ¹² I wɛ ye kplɔ hwanjɛvi lɔ va e bo le ɛgbɛ, i wɛ ye kpɔn akɔnfifa ɖaxo ɖe. ¹³ Míye mí do tɔjihun do yi Asosu, jɛ ŋukɔn na Pɔlu le blɛ lɔ wɛ mí na Pɔlu le, ɖo itete o sɔ gbeta a do zɔn afɔ do yi. ¹⁴ Ke e va kpe mí le Asɔsu lɔ, mí kɔ-ɛ do tɔjihun lɔ mɛ, do sɔ yi Mitilɛnu. ¹⁵ Sɔn blɛ xin wɛ mi mɔ gbɔn ɛxuji le bo do va yi Ciyo le ŋukɔnɖɛgbe etɔn, nyatɔngɔgbe mí bo ve jɛ Samɔsu i wɛ ŋukɔnɖegbe ɛnɛgɔ etɔn, mí jɛ Milɛ. ¹⁶ Ɖo Pɔlu o sɔ gbeta a do gbɔn Efɛzi we toxo lɔ we ŋukɔn, e ko mɔ do gu ganmɛ le Azi we kansinmɛ lɔ nɔ, ɖo, e hwlɛndo nɔ, a do yawu ve jɛ Jeluzalɛmu le Pɛntekotu we azan lɔ gbe. ¹⁷ Hwekenu na Pɔlu le Milɛ we toxo lɔ mɛ, e ɖo ɛmɛye ɖodan efɛzi we toxo lɔ mɛ byo ye a mɔ yɔ agunmɛhyɔnye do va. ¹⁸ Ke ye va e kɔn vɔ, e lɔ na ye lɔ byo:«Mi nyɔ ninɔ mɛ ke ko zan kpan ŋukɔn wu mi le le ganɖekpokpwe mɛ, sɔn gbekegbe na ko do afɔ Azi we kansinmɛ. ¹⁹ Ko wadan na Xwetɔ lɔ kpo ɛmɛɖesɔhwe taŋu, kpodo ɖasin le ŋumɛ, ɖo vivɛsise kena Jwifuye we ogbe bibla do ɛmɛ wu hɛn va na-a ye wu. ²⁰ Mi bo nyɔ-ɛ tun, onu ke mɔ ɖo ale na mi, ko mɔ hɔn ɖe okɔ le ti wu, ko lɔ oxo Mawutɔn lɔ na mi, bo kplan onu ye wu mi le dogbaye ji kpodo xwegbeye can. ²¹ Ko lɔ xo na Jwifuye kpodo ɛmɛ ke hɔn nyi Jwifuye can, e xin ye mɔ do lɛkɔ va Mawu kɔn dogbɔn jijɔ ɖiɖɔli yetɔn mɛ, a mɔ ɖo xɔse na mía we Xwetɔ Yesu lɔ. ²² Syɛ ko sin Jeluzalɛmu nɔ, ɖo Gbigbɔ Kinkwɛn byo, bo mɔ ɖo na yi dandan, ko ko nyɔ onu ke ba ve jɔ do jiye le blɛ nɔ. ²³ Vɔ, onu kena ko nyɔ-ɛ jan wɛ nyi byo, dogbɔn toxo ɖokpo ɖokpo mɛ, Gbigbɔ Kinkwɛn nɔ ɖo ɛkpɛn e ji na byo caba kpo vivɛsise mɔ tre kpɔn nɔ le blɛ. ²⁴ Vɔ, ko hɔn nɔ lo onuti do ɛgbɛ tɛye wu ɖi nu ke vɛ na-a ha, onu kena blɔ ko nɔ ba nɔ jan wɛ nyi vivɔnu na odun ke ko nɔ. Kpodo odan kena Xwetɔ Yesu lɔ sɔ do asi na-a. I wɛ nyi tun ma jla Mawu we ɛfɛnu we ɛwɛn nywɛ lɔ. ²⁵ Syɛ, mi kpɔn, mi mɛ bisese ke we dodomɛ ko nɔ bo do jla xɔluɖuɖu Mawutɔn lɔ, hɔn kpewu na kpɔn ŋumɛ tɛye. ²⁶ I wɛ dɔn ko do ɖo ɛkpɛn e ji na mi nɔ tun mɛ ti we ɛhun hɔn kɔn ɖenyi gbɔn alɔ tɛye mɛ. ²⁷ Ɖo ko hɔn hwla onu ti do mi le hwekenu ko jla ojlo Mawutɔn lɔ nɔ. Mi cɔ miaɖe do togun kena Gbigbɔ Kinkwɛn sɔ mi do ɖo kplɔtɔ na ye wu, mi mɔ do kplɔ agun Mawutɔn ke na e xɔ kpodo itete we ɛhun. . Ko nyɔ-ɛ byo na ko sɔn ɛmɛ ke le ɖi ohladanwatɔye ha, ma mɔ ɖyɛ mia mɛ, a bo wa onu n yinyla kpo togun lɔ. Ɛmɛye na cite le mia mɛ a bo nɔ kan ojoye nɔ, a do dɔn onukplanvi lɛye do ɛtɛ ²⁸ Mi cɔ miaɖe do togun kena Gbigbɔ Kinkwɛn sɔ mi do ɖo kplɔtɔ na ye wu, mi mɔ do kplɔ agun Mawutɔn ke na e xɔ kpodo itete we ɛhun. . ²⁹ Ko nyɔ-ɛ byo na ko sɔn ɛmɛ ke le ɖi ohladanwatɔye ha, ma mɔ ɖyɛ mia mɛ, a bo wa onu n yinyla kpo togun lɔ. ³⁰ Ɛmɛye na cite le mia mɛ a bo nɔ kan ojoye nɔ, a do dɔn onukplanvi lɛye do ɛtɛ ³¹ Mi nɔ ŋuzɔn. A bo flin tun le oxwe atɔn we gbagblamɛ ko hɔn jo oxo lilɔ na mi do ozan kpo keklo kpo ɖasin le ŋumɛ. ³² Syɛ ko sɔ mi sɔ do alɔ mɛ na Mawu bo jo mi do na ɛfɛnu we xo etɔn. Mawu ɖo hɔnhlɔ bo na do na mi nukɔn yiyi le xɔse mɛ, a bo do na cinnɔ wu xɔsetɔye bisese. ³³ Oho mɛɖe tɔn alo sika mɛɖe tɔn hɔn bya ŋukunsin na-a. ³⁴ Miye tete mi nyɔ-ɛ tun alɔ tɛye kiye mɔ wadan na ohyan tɛye kpodo ɛmɛ ke xodo ye we ohyanye. ³⁵ Le onu bisese mɛ ko ɖe xlɛ mi tun, mi mɔ ɖo na nɔ wa odan ɖo emɔ, a bo do kpewu a gɔ alɔ na ayanɔye. Mi bo ɖo na nɔ dɔŋuɖunu do Xwetɔ Yesu lɔ we xo ye wu, i tete wɛ lɔ lɔ byo:«Nyɔna le onu na ɛmɛ mɛ hugan wu onu yi le ɛmɛ si.» ³⁶ Ke Pɔlu lɔ oxo vɔ, e jɛ klita kpo ye mɛ bisese a do xo ɛɖɛ. ³⁷ I wɛ ye mɛ bisese dɔn kpla Pɔlu kpo ɖasin le ŋumɛ taŋu, bo kpla asi okɔ ni-i. ³⁸ Ye bo le onulilo mɛ taŋu, ɖo, e lɔ na ye byo ye mɔ hɔn mɔ kpɔn ŋumɛ hetɛye nɔ. E xin we godo, ye bo kplɔ-ɛ do yi tɔjihun lɔ kɔn.