¹ Ke mí lɛ le ye kɔn, mí dyɛ otɔjihun mɛ bo zɔn trɔlɔlɔ bo yi otɔdodomɛ we oto (oto ke le Otɔ we dodomɛ) kena ye nɔ yɔ tun Hlodɛsi mɛ, mí mɔ lɛ le blɛ bo mɔ va yi Patala. ² Mí kpɔn tɔjihun ɖaxo ɖe le blɛ ke na yi Fenici we kansinmɛ nɔ, mí bo ɖyɛ e mɛ bo sɔn. ³ Ke mí kpɔn oto ke le otɔ we dodomɛ ye bo nɔ yɔ-ɛ tun Ciplu ɖodan nɔ, mí gbɔn i we afɔgbe bo do sin Sili we kansinmɛ. ⁴ Mí bo ve gli tɔjihun lɔ do Tilu, ɖo blɛ xin lɔ wɛ tɔjihun lɔ ba ɖe agba do nɔ. Mí bo nɔ blɛ lɔ na azan acowe, ɖo mí kpɔn onukplanvi ɖeye le blɛ. Dogbɔn Gbigbɔ Kinkwɛn we oxo lilɔ ji na ɛmɛ, onukplanvi lɛye lɔ na Pɔlu tun ni mɔ ka yi Jeluzalɛmu. ⁵ Vɔ ke azan ke mí na do nɔ blɛ lɛye va yi vɔ, mí jɛ mɔ. Hwekenu na mí zɔn afɔ bo sɔn nɔ, mí ɖyɛ tɔjihun lɔ mɛ, ye lɛye bo va lɛkɔ sin oxwe yetɔnye gbe. Wɛ míye mí va jɛte le Vɔ ke azan ke mí na do nɔ blɛ lɛye va yi vɔ, mí jɛ mɔ. Hwekenu na mí zɔn afɔ bo sɔn nɔ, ⁶ mí ɖyɛ tɔjihun lɔ mɛ, ye lɛye bo va lɛko sin oxwe yetɔnye gbe. Wɛ míye mí va jɛte l ⁷ tɔjihun lɔ mɛ le Putolemayisi. Ke mí do gbe na nɔvi xɔsetɔ ke le blɛ lɛye vɔ, mí nɔ ye kɔn na ŋukɔnɖiɖe ɖokpo. ⁸ Ŋukɔnɖegbe etɔn, mi lɛ le toxo xin lɔ mɛ, bo va Sezale, mí bo zɛ ɛwɛnnywɛjlatɔ Filipu we xwegbe.E bo yi ɛmɛ ɖokpo ɖokpo le ɛmɛ acowe lɛye ke ye ca le Jeluzalɛmu lɛye. ⁹ Filipu lɔ bo ɖo ovi nyɔnuvi ɛnɛ ke le alɔji ye, Mawu bo nɔ lɔ oxo na ye, ye bo nɔ do i we ɛwɛn. ¹⁰ Mí bo nɔ blɛ na azan susu, i wɛ oxolɔɖenyitɔ Mawutɔn ɖe ke ye nɔ yɔ tun Agayiwisi sɔn Jude bo va mía kɔn, ¹¹ bo sɔ Pɔlu we akpakan do bla afɔ kpodo alɔ etɔnye, bo lɔ byo:«Oxo kena Gbigbɔ Kinkwɛn o lɔ nɔ xɛn: ɛmɛ ke tɔn na nyi akpakan ke, ke Jwifuye na bla-ɛ ɖo le Jeluzalɛmu xɛn nyi ke, ye bo na sɔ-ɛ sɔ jo na mɛ ke hɔn nyi Jwifuye.» ¹² Ke mí se oxo xinlɛye, míye kpo mɛ ke na le blɛ lɛye, mí ɖe kuku na Pɔlu tun ni mɔ ka yi Jeluzalɛmu. ¹³ Pɔlu bo ɖ'ewu lɔ byo:«ŋunɛ we avi lɛ mi vi nɔ do gba ayixa do na-a nɔ? Blɔ e hɔn nyi bibla ɖoɖyo hwɛn ko le gbesisɔ mɛ na, ko mɔ le gbesisɔ byo ye a mɔ hu-u do Xwetɔ Yesu lɔ we nyikɔ wu le Jeluzalɛmu.» ¹⁴ Ke na mí hɔn kpewa na e do kan do oxo míatɔn ji, mí bo gbɛ bonu. Mí bo lɔ lɔ byo:«Xwetɔ Mawu lɔ we ojlo ni mɔɔ nyi wiwa.» ¹⁵ Ke azan xin lɛye va yi vɔ, mí xotɛ saki míatɔnye bo va siin Jeluzalɛmu. ¹⁶ Nukplanvi ɖeye ke le Jeluzalɛmu bo xo do mí ye, kplɔ mí do yi dahwe ɖe ke ye nɔ yɔ tun Manasɔn de, e bo nyi Ciplutɔ mí bo zɛ ekɔn. Dahwe xin lɔ nyi onukplanvi syɛ edɛn. ¹⁷ Ke mí gbɔn va Jeluzalɛmu, nɔvi xɔsetɔ lɛye yi mí kpo jijwɛ. ¹⁸ Ŋukɔnɖegbe etɔn, míye kpo Pɔlu kpo bo yi Jaki de. Agunmɛhyɔnye bisese can do va. ¹⁹ Ke Pɔlu do ogbe na ye vɔ, e lɔ onu kena Mawu wa na ɛmɛ ke hɔn nyi Jwifuye dogbɔn odan kee e wa mɛ ɖe kplɔ ɖe do. ²⁰ Ke ye se oxo xin lɛye, ye bo xwi Mawu kinkanfu, bo lɔ na Pɔlu nɔ tun lɔ byo:«Nɔvye, o kpɔn; Jwifu akpo (1000) nɛmu ɖe wɛ trɔ zun xɔsetɔye, ye mɛ bisese kpakpa bo nɔ sɔ ye nɔ na osɛn lɔ. ²¹ Vɔ ɛmɛye bo lɔ nɔ tun lɔ byo, i mɔ kplan onu wu Jwifu ke gbakpeye nɔ tunye ni mɔɔ ɖekɔ le Mɔyizi we osɛn lɔ wu, ye mɔ koo gbo ada na ye we vikpɛye gbɔɔn a mɔ do zɔn gbɔ Jwifuye we akɔnu wiwaye ji can. ²² Syɛ ŋunɛ mí na wa? Mi se syɛ tun i mɔ va. ²³ Onu ke mi na lɔ na we syɛ, i wɛ o na wa: ŋusunglo ɛnɛ diye le mía kɔn, ye bo kan atanŋu na Mawu. ²⁴ Kplɔ ye, i kpo ye kpo mɔ ve sra ɛwu, o mɔ zan oho do ye wu, ye mɔ do xlɛ ota na ye. E xin mɛ bisese mɔ do nyɔ-ɛ tun oxo kena hiye mɔ lɔ do i wu we nɔ mɔ hɔn nyi xojɔxo, vɔ itete can mɔ zɔn do Mɔyizi we osɛn lɔ ji nɔ. ²⁵ Vɔ ke kan kosiye, ke va trɔ zun xɔsetɔye, mí wlan wema ɖodanye byo, ye ni mɔ ko mɔ ɖu olan ke ye do,sanvɔ na yɛhwe, ye ni mɔ koo ɖu ɛhun emɔha ke ye mɔ koo ɖu kanlin ke ye tu gbigbɔ do xo na do huye, ye mɔ ɖe yeɖe do vo le ɛgbɛ ɖuɖyu zinzan wu.» ²⁶ Le ŋukɔnɖegbe etɔn, Pɔlun kplɔ ŋusunglo ɛnɛ lɛye, bo ɖyɛ Mawu we oxwe lɔ gbe, e bo lɔ azan ke gbe na ɛwu sisra lɔ na vɔ , e mɔ do na avɔsanu kena e na hu na Mawu do ɛmɛ ɖokpo-ɖokpo we tamɛ. ²⁷ Ɛwu sisra yetɔn we azan acowe lɛye wɛ va kpe nɔ kpoŋu, Jwifu Azi we kansinmɛtɔ ke kpɔn Pɔlu le Mawu we oxwe lɔ gbe ye, fɔn otogun lɔ bisese do e ji, bo wle ye. ²⁸ Ye bo d'axwa nɔ lɔ byo:«Izrayɛli vikpɛye mi va kpedo mía wu loo! Dahwe ke nɔ kplan onu wu ɛmɛye bisese nɔ gbɔn ofi bisese, a do lɔ oxo nyinyla do Izrayɛli we otogun lɔ wu, Mɔyizi we osɛn lɔ, kpodo Mawu we oxwe lɔ wu xɛn nyi ke. E bo kplɔɔ ɛmɛ ke hɔn nyi Jwifuye, do ɖyɛ Mawu we oxwe Kinkwɛn lɔ gbe, do ɖu osu na oxwe lɔ.» ²⁹ Ɖo ye kpɔn elɔ kpo Tlofimu ke nyi efɛzitɔ lɔ le toxo lɔ mɛ, ye bo bu-i nɔ tun byo Pɔlu kplɔ-ɛ do ɖyɛ Mawu we oxwe lɔ gbe mɛ ha. ³⁰ Ozin bo tɔ le toxo lɔ mɛ seŋu, otovi lɛye bo tɔn gbligbligbli sɔn ofi ɖekpokpwe bo va do axwa nɔ hoo le ofi lɔ. Ye wle Pɔlu bo ɖe-e tɔn le Mawu we oxwe lɔ gbe, bo tu ohɔn lɛye zɔnɖokpo. ³¹ Ye ba na hu Pɔlu, ke ahwanga Hlɔmatɔn, e do oto oxo lɔ mɛ bo lɔ byo, Jeluzalɛmu we toxo lɔ bisese mɔ hlu. ³² Zɔnɖokpo ahwanga lɔ kplɔ sɔjaye kpodo sɔjakanwekogaye ye bo bɛ wedun yi otogun lɔ mɛ. Ke ye kpɔn ahwanga lɔ kpo sɔjaye kpo yue tre bo dokpo Pɔlu lɔ xixo. ³³ I wɛ ahwanga lɔ tɛkpɔ Pɔlu bo yi-i, bo byo ye ni mɔ do caba owe ni-i. E xin we godo, e bo kan oxo wu ye se lɔ byo:«Mɛɛ lɛ e nyi? Ŋunɛ e wa?» ³⁴ Vɔ, le otogun lɔ mɛ, ye le axwa nu na mɛɖeye lɔ e ke, mɛɖeye mɔ lɔ bu nɔ. Kena ahwanga lɔ hɔn kpewu na se oxojɔxo ɖe le hunnyahunnya xin lɔ mɛ, e ɖe gbe tun ye ni mɔɔ kplɔ Pɔlu yi ahwankpa lɔ mɛ. ³⁵ Ke Pɔlu jɛ ahwankpa lɔ we kpekanji, sɔja lɛye gbɔjwɛ kɔ-ɛ, do adan kena otogun lɔ o jɛ nɔ wu. ³⁶ Ɖo otogun lɔ zɛtɛye wɛ kplɔ-ɛ do, bo do axwa nɔlɔ byo «Mi bu omɔ nu ni-i!» ³⁷ Ke ye ba ɖyɛ ahwankpa lɔ mɛ kpo-e nɔ, Pɔlu lɔ na ahwanga lɔ lɔ byo:«Ko na kpewu na lɔ oxo ɖe na we?» ahwanga lɔ bo do ɛwu ni-i lɔ byo:«O se glɛkigbe wɛɛ? ³⁸ I hwɛn nyi Egiputɔ kena hɛn ogu finfn va toxo lɔ mɛ, ye bo kplɔ ɛmɛhutɔ akpo ɛnɛ (4000) do ɖyɛ gbɛfaji le azan ɖe mɛ wɛɛ?» ³⁹ Pɔlu bo ɖo e wu lɔ byo:«Blɔ, Jwifu wɛ ko nyi, ye bo ji-u le Tasi, le Silisi we kansinmɛ, toxo ŋukunsin le e ji ɖe mɛ wɛ ko sɔn. Ko ɖe kuku na we na ogbe wu na ma lɔ oxo na togun lɔ.» ⁴⁰ Ahwanga lɔ bo na ogbe wi, Pɔlu bo nɔ te le kpekan lɛye ji bo wa alɔ na togun lɔ, ye mɔ do ɖo da. Ye mɛ bisese bo ɖo ɖa, Pɔlu bo lɔ na ye do Heblegbemɛ lɔ yo: