¹ Sɔlu can bo yi ogbe na oku Etyɛnutɔn. Gbɛxingbe wɛ ofunɖiɖe daxo ɖe kpannŋukɔn wu agun Jeluzalɛmutɔn bo va bɛ; wɛ xɔsetɔye bisese bo va gbado gbɔn Jude kpo Samali we kansinye mɛ, e bo va nyi tun Yesu we oxolɔɖenyitɔye kɛɖɛ wɛ va ci Jeluzalɛmu. ² Ɛmɛ ke nɔ ɖo sisi na Mawu ye bo va kɔ Etyɛnu we ocɔ bo ve ɖi kpo avi kpo. ³ Vɔ Sɔlu, bo gba agunviye do nɔ, e nɔ gbɔn oxwegbe-oxwegbeye bo nɔ wle ŋusungloye kpo n yɔnusiye, a bo bɛ ye do gankpa mɛ. ⁴ E le ɖemɔha co, xɔsetɔ ke gbado lɛye nɔ ɖi osa nɔ do jla Ɛwɛn Nywɛ lɔ nɔ. ⁵ Filipu bo va yi Samali we oto lɔ mɛ bo lɔ Klisu we oxo na ye. ⁶ Ke ɛmɛye kpɔn bo mɔ se josi kpo ŋudandonu ke na Filipu o wasi nɔ ye, ye bo va tɛ oto le ogbenɔkpɔ mɛ bo do se oxo ke e lɔ nɔ ye ganji. ⁷ Ye mɛ susu ke mɛ na gbigbɔ nylakan o le ye, gbigbɔ nylakan lɛye nɔ tɔn le ye mɛ kpo axwa sinsyɔn kpo; kplibɔnɔ ye kpo tɛkunɔye bo kpɔn adɔngigɔ. ⁸ Wɛ jijwɛ ɖaxo ɖe va nɔnyi le oto xin lɔ mɛ. ⁹ Vɔ dahwe ɖe bo o le oto lɔ mɛ bo nɔ nyi Simɔ, e bo nɔ sɔ gbigbɔ azetɔn a do jlɛ on iu le Samali we oto lɔ mɛ, bo nɔ wasi ɖemɔha na ye a do sɔ-ɛ do yɔ gbɛtɔ ŋukunsin le eji; e bo nɔ kpaca do Samalitɔye kaka. ¹⁰ Samalitɔye vikpɛvyu gbɔɔn do jɛ mɛhyɔn ji nɔ ɖo oto wu-i ganji; bo nɔ lɔ tun: Dahwe ke ɖo hɔnhlɔn Mawutɔn, ke ye nɔ yɔ tun hɔnhlɔn ɖaxo lɔ.» ¹¹ Ye nɔ ɖo oto wu-i, ɖo e edɛn taŋu na i we aze we onujijlɛye nɔ do kpaca wu ye. ¹² Vɔ ganke me na ye va kan do Ɛwɛn Nywɛ kena Filipu o jla nɔ lɔ, ke lɔ oxo do xɔluɖuɖu Mawutɔn kpo nyikɔ Yesu Klisutɔn kpo wu, ye va lɛ Mawu we ɛsin lɔ, ŋusunglo kpo nyɔnusi lɛye bisese. ¹³ Wɛ Simɔ lɔ tete can va kan do e ji; i wɛ ganke mɛ na e lɛ Mawu we ɛsin vɔ, e ci Filipu kɔn wɛ josiye kpo ŋudandonu ke Filipu o wasi nɔ ye, bo nɔ kpaca do-e nɔ. ¹⁴ Syɛ, hwekenu na ɛmɛdindɔn ke le Jeluzalɛmu lɛye se tun Samalitɔye mɔ kan do Mawu we oxo lɔ ji, ye ba va sɔ Piyɛ kpodo Jan bo sɔ ɖodan ye. ¹⁵ Ke Piyɛ kpo Jan kpo va yi, ye va xo ɛɖɛ na ye na ye mɛ ke kan do e ji lɛye a do gɔ kpo Gbigbɔ Kinkwɛn. ¹⁶ Ɖo gbɔɔn do va jɛ ganxinmɛ, Gbigbɔ Kinkwɛn lɔ hɔn ka jɛ ote do mɛ ti ji le ye mɛ hɔnɖyo; Mawu we ɛsin jan wɛ ye lɛ le Xwetɔ Yesu we nyikɔ mɛ. ¹⁷ Wɛ Piyɛ kpodo Jan kpo va ɖo alɔ ota na ye bo do xo ɛɖɛ na ye, ye bo va yi Gbigbɔ Kinkwɛn lɔ. ^{18 19} Ke Simɔ va kpɔn tun Gbigbɔ Kinkwɛn lɔ mɔ nɔ jɛte le gankaemɛ na Piyɛ kpo Jan kpo ɖo alɔ ota na ɛmɛ vɔ, e bo va na oho wu ye. Bo lɔ tun,«mi na hɔnhlɔn xin lɔ wu bo can gba, na e nyi tun ko va ɖo alɔ ota na mɛɖekpokpwe, e mɔ nɔ do yi Gbigbɔ Kinkwɛn lɔ.» ²⁰ Vɔ Piyɛ bo va ɖo e wu ni-i tun:«Na oho tɔwe kpo i kpo ni crɔ, ɖo o lin na do yi onunina Mawutɔn kpo oho kpo. ²¹ Onu ti hɔn kan we le onu klɛye mɛ, ɖo oji tɔwe hɔn mɛ le ŋukɔn na Mawu. ²² Ɖɔli jijɔ le onu nyinyla ke gɔ oji mɛ na we wiwa mɛ, a bo xo ɛɖɛ na Mawu, tanyɔ e na va sɔ ɛhwɛ ojlo nyinyla ke o ɖo ye tɔn a sɔ kɛ ye. ²³ Ɖo ko kpɔn nɔ tun ŋubya kɛɖɛ wɛ gɔ oji tɔwe mɛ, o bo le onunyinyla we gɛdɛ ɖe mɛ.» ²⁴ Simɔ bo ɖo e wu na ye tun:«Miye mi xo ɛɖɛ na, na onu ke mi lɔ xin lɛye ti ko do va jɔ do ji ye nɔ.» ²⁵ Ke Piyɛ kpodo Jan kpo ɖe kunnu bo lɔ Mawu we oxo lɔ vɔ, ye va lɛkɔ siin Jeluzalɛmu; le omɔ lɔ ji, ye bo jla Ɛwɛn oNywɛ lɔ nɔ gbɔn Samalitɔye we toxo viviye mɛ bo do sɔn nɔ. ²⁶ Syɛ ɛwɛndotɔ Xwetɔ lɔ tɔn ɖokpo bo va lɔ oxo na Filipu bo lɔ ni-i lɔ byo:"Cite a bo yi afɔgbe na omɔ Jeluzalɛmutɔn ke yi Gaza lɔ ji." (Omɔ xin lɔ bo nyi zogbeji we omɔ.) ²⁷ E bo vite bo va yi. Le omɔ lɔji, e bo va kpɔn ŋusunglo tita Etyopitɔ ɖe; e bo nyi xɔsudanwatɔ ɖaxo le Kandasi, bo nyi xɔlu nyɔnusi Etyopitɔn. E lɔ lɔ wɛ bo nɔ kpe ŋukunsin do Kandasi we ot lɔ we dɔkunnu ye bisese wu. Dahwe lɔ bon va yi Jeluzalɛmu bo do vee sɛn Mawu. ²⁸ E bo lɛkɔ bo onyi xinnɔ le ahwanhun ɖe mɛ, bo xlɛ oxolɔɖenyitɔ Izayi we wema nɔ. ²⁹ Gbigbɔ lɔ bo lɔ na Filipu tun: «Hlwɛndo a bo xodo ahwanhun xin.» ³⁰ Filipu bo do wedun bo jɛ ɛtɛ na ahwanhun lɔ, bo va se dahwe lɔ o xlɛ oxolɔɖenyitɔ Ezayi we wema nɔ, e bo kan se wu-i tun:«Ose gɔnmɛ na onu ke o xlɛ nɔ lɔ? ³¹ Dahwe Etyopitɔ lɔ bo ɖo e wu ni-i tun:«Naɖe lɛ ko na nyɔ gonmɛ etɔn ɖo na gbɛtɔ ɖe hɔn va tin emɛ na?» E bo va byɔ Filipu tun ni mɔ va ɖyɛ ahwanhun lɔ mɛ a mɔɔ xinnɔnyi le axa na he. ³² Ofi ke dahwe Etyopitɔ lɔ o xlɛ nɔ o lɔ nɔ tun:«Ye kplɔ-ɛ ɖi lɛngbɔ ke ye kplɔ do siin olanhutyɔn nɔ ha; e bo bɔnu cɛncɛncɛn ɖi lɛngbɔvi ke wu na ye xwlɛ ofun le nɔ nɔ bɔnu le ŋukɔn na mɛ ke o xwlɛ ofun le e wu nɔ ɖo ha, e ko kɛ onu tete nɔ can. ³³ Ye ɖee drɔn bo tafu-i bo do dɔ ɛhwɛ nyinyla ni-i. Mɛnɛ lɛ na va lɔ jijimɛvi etɔnye we oxo? Ɖo ye hu-i tɛ le nyidan lɔ ji.» ³⁴ Wɛ dahwe lɔ va kan se wu Filipu tun: «Ko ɖe kuku na we, mɛnɛ we xo lɛ oxolɔɖenyitɔ lɔ o lɔ nɔ? E lɔ tete we xo wɛ e lɔ nɔ, alo mɛ bu?» ³⁵ Filipu bo va ɖo e wu ni-i do gbɔn onu ke na dahwe lɔ xlɛ le Ezayi we wema xin lɔ ji, bo do va lɔ Yesu we oxo ni-i. ^{36 38} Ke ye le omɔ lɔ ji bo sɔn nɔ, ye va tɛkpɔ otɔ ɖe to; dahwe lɔ bo lɔ na Filipu lɔ byo:«Kpɔn, ɛsin xɛn le bwɛ ke; ŋunɛ na gbɛ na tun ko mɔ ka lɛ Mawu we ɛsin lɔ?» ³⁷ Dahwe Etyopitɔ lɔ bo va lɔ tun ye ni mɔɔ ɖo ahwanhun lɔ te, e xin Filipu kpodo dahwe lɔ ɖyɛ otɔ lɔ mɛ; Filipu bo lɛ Mawu we ɛsin na dahwe lɔ. ³⁹ Hwekenu ye va tɔn le otɔ lɔ mɛ vɔ, Gbigbɔ Xwetɔ lɔ tɔn bo va kɔ Filipu do sɔn, dahwe xɔsudanwatɔ lɔ ko mɔ kpɔn-ɛ nɔ, vɔ e bo kpɔn jijwɛ nɔ taŋu bo mɔ do wle omɔ etɔn lɔ. ⁴⁰ Vɔ Filipu yi Azɔtu. E bo jla Ɛwɛn Nywɛ lɔ nɔ gbɔn toxo bisese ke mɛ na e gbɛ gbɔn ye, gbɔɔn do yi Sezale.