1 Avɔsantɔye we oga lɔ ka Etyɛnu se tun:«Xojɔxo wɛ nyi oxo xin lɛye?» 2 Etyɛnu bo ɖo e wu ni-i tun:«Nɔvyee kpo didayee, mi ɖo oto wu: Mawu gigonɔ ke tɔn do ŋumɛ na míadagbwɔ Ablaxamu le gankemɛ e le Mezopotami, gbɔxwe e do va yi ci Calan; e bo lɔ ni-i tun: 3 "Tɔn le oto tɔwe mɛ, a bo va siin oto ke ko na va ɖe xlɛ we lɔ mɛ."» 4 E bo va tɔn le Caludetɔye we oto lɔ mɛ bo va siin Calan. Le hwekenu na otɔ va ku godo, Mawu va kplɔ-ɛ do va oto ke mɛ na mi le syɛ. 5 E hɔn na nyidan ti wu-i gbɔɔn do ni-i vitwe ɖe ke ji e na do afɔ tete can. Vɔ e bo fyan ajɔgbe ni-i tu, he mɔ na va sɔ oto xin lɔ a mɔ sɔ ni-i e lɔ kpodo jijimɛvi etɔnye. ( vɔ Ablaxamu ko o ɖo ovi ti san) 6 Mawu bo lɔ ni-i tun jijimɛvi etɔnye mɔ na va nyi jonɔ le ot ɖe mɛ, wɛ ot lɔ mɛ tɔye na va sɔ ye do ɖo kannumyɔnɔye a bo do aya na ye na oxwe sandi ɛnɛ. 7 Ko bo na va ɖo kojo na oto ke na sɔ ye do wasi kannumyɔnnɔ lɔ, Mawu wɛ lɔ ɖemɔha, e xin we godo ye na va tɔn le blɛ lɔ a bo va wasi sinsɛn na le bwɛ.» 8 E bo va wasi okancica kpo Ablaxamu dogbɔn adagbigbo ji, Ablaxamu bo va ji Izaki, bo gbo ada ni-i le ŋukɔnɖiɖe artotɔngɔgbe; Izaki bo va ji Jakɔbu, Jakɔbu bo va ji míadagbwɔ weve lɛye. 9 Míadagbwɔ lɛye bo va hwan ɛwu do Jozɛfu, gbɔɔn bo va sɔ-ɛ sɔ sa na ye a do sɔ-ɛ do siin Egiputi, Mawu bo le okpɔ kpo-e, 10 e bo ɖe-e tɔn le vivɛsise etɔnye bisese mɛ, bo ni-i ɛfɛnu etɔn kpo onunyinyɔ kpo le Falawɔn ke nyi xɔlu Egiputitɔn we ŋumɛ. Falawɔn bo va sɔ sɔ ɖo oga le Egiputi we oto lɔ kpo oxwe etɔn nu. 11 Xɔvɛ ɖaxo ɖe bo va tɔn le Egiputi kpo Kana we oto lɔ mɛ; wɛ míatɔye hɔn mɔ ɖo onuɖuɖu ti. 12 Vɔ kena Jakɔbu va se tun onuɖuɖu mɔ le Egiputi, e va ɖo míatɔye ɖodan tantɛntɔn. 13 Owegɔ, Jozɛfu bo va ɖe eɖe sɔ xlɛ nɔvyɔye; wɛ Falawɔn can va nyɔ Jozɛfu we xwedo. 14 Jozɛfu bo va lɔ na nɔvyɔye tun ye ni mɔɔ ve lɔ na he didaye, tun ni mɔ va Egiputi, kpo xwedo lɔ bisese: ye mɛ bisese bo nyi gbɛtɔ kanɖeko-atɔɔn. 15 Ɖemɔha wɛ Jakɔbu va Egiputi ɖo. E xin we godo, itete bo va ku, otɔ lɔ can bo ku. 16 Ye bo kɔ ye bo do va yi Sicɛmu, bo va ɖi ye do yɔgun kena Ablaxamu xɔ kpo oho kpo le Amɔ we vikpɛye si. 17 Hwekenu na ajɔgbe ke Mawu fyan na Ablaxamu lɔ o tɛkpɔ nɔ, togun lɔ va glo ɖeji bo mɔ su nɔ le Egiputi, 18 gbɔɔn do va jɛ hwekenu na xɔlu bu va kpacɛ le Egiputi; xɔlu ke na hɔn nyɔ Jozɛfu. 19 Xɔlu xin lɔ bo va blɛ togun míatɔn ɖu bo do aya na míatɔye, gbɔɔn do jɛ ganke mɛ na ye va jo vikpɛ yetɔnye mɛyɛ ye do, ye mɔ ku. 20 Ye bo ji Mɔyizi le hwexin lɔ nu. E bo nyɔ kpɔn le ŋumɛ na Mawu taŋu , ye bo tɔju wu-i le otɔ we xwegbe na sunza atɔn. 21 Ganke mɛ na ye va jo-e do, Falawɔn we vi nyɔnuvi bo va tɔju wu-i bo hɛɛn ɖi ovi itetetɔn ha. 22 Mɔyizi bo hwɛn le Egiputi kpo okplan yetɔnye kpo; bo va syɛnxu le oxolilɔ kpo onuwiwa etɔnye mɛ. 23 Hwekenu e va ɖo oxwe kanɖe, e va va gbigbɔ mɛ ni-i tun he a mɔ ve kpɔn he nɔvye Izrayɛli vikpɛye kɔn. 24 Ke Mɔyizi va kpɔn Egyputitɔ ɖokpo va tafu wu Izrayɛlitɔ ɖokpo nɔ, e va xo ɛvun do ota na nɔvyɔ lɔ gbɔɔn bo va hu Egiputitɔ lɔ. 25 E bo bu-i nɔ tun he nɔvyɛ lɔ mɔ na nyɔ-ɛ tun Maawu mɔ va gbɔn he ji ye nɔ a do va wa alɔgɔ na hiye nɔ wɛ ha, vɔ ye ko va nyɔ-ɛ ɖo emɔha. 26 Ŋukɔɖiɖegbe etɔn, e bo va kpɔn Izrayɛlitɔ owe ɖeye o wa ojlɛ nɔ. E bo jlo na gbo ɛhwɛ lɔ na ye; e bo lɔ tun: "Nɔvi-nɔvi wɛ mi nyi ma; ŋunɛ jɔ na mi do do aya na miaɖe nɔ? 27 Vɔ mɛ ke o do aya na vɔvyɔ nɔ lɔ bo va tintlin bo lɔ ni-i tun: "Mɛnɛ lɛ sɔ we do ɖo oga kpo ɛhwɛgbotɔ do mía nu? 28 O jlo na hu ɖi kena o hu Egiputitɔ lɔ ɖo swɛ ha wɛ?" 29 Hwekenu na Mɔyizi se onu xin lɛye vɔ, e si. E bo va nyi jonɔ le Madyan we tomɛ, ofi ke na e va ji ovi owe le. 30 Le oxwe kanɖe we godo, ɛwɛndotɔ Mawutɔn ɖokpo va ze do ŋumɛ na Mɔyizi le Osó Sinayitɔn ji, le klilitin ɖe ke jizo nɔ mɛ. 31 Ke mɔyizi kpɔn ozo lɔ, e kpaca do-e, wɛ ganka mɛ na e tɛkpɔ nɔ a do kpɔn-ɛ ganji, e bo va se Xwetɔ Mawu we ogbe le ozo lɔ mɛ ke lɔ nɔ tun: 32 "Bo wɛ nyi Mawu didaweyetɔn, Mawu Ablaxamutɔn, Mawu Izakitɔn, kpo Mawu Jakɔbutɔn." Mɔyizi bo jɛ tititɔ ji tititi gbɔɔn e ko kpewu na kɔ okɔ a mɔ do kpɔn-ɛ can. 33 Xwetɔ Mawu bo lɔ ni-i tun: "Ɖe fɔkpa tɔweye, ɖo tɛnxo ke o le lɔ nyidan kinkwɛn wɛ e nyi. 34 Ko kpɔn aya kena togun tɛye o ɖu nɔ le Egiputi we tomɛ nɔ. Ko va se winwɛn yetɔnye i wɛ dɔn ko do jɛ ote na ma do hwlɛn ye gan. Syɛ, yi; ko ɖo we ɖodan Egiputi." 35 Mɔyizi xin lɔ ke na ye o gbɛ, le hwekenu na ye lɔ tun: "Mɛnɛ lɛ sɔ we do ɖo oga kpo ɛhwɛɖɔtɔ? we nyi mɛ ke Mawu va sɔ ɖodan ɖi oga kpo emɛhwlɛngatɔ kpo ha. Mawu ɖo-e ɖodan dogbɔn alɔ ɛwɛndotɔ ke va lɔ oxo ni-i le klilitin ke ji ozo nɔ lɔ mɛ. 36 Mɔyizi bo va kplɔ ye tɔn le Egiputi we oto lɔ mɛ dogbɔn ŋudandonuye kpo josiye wiwa mɛ le Egiputi kpo ɛxuvɛ lɔ we ŋukɔn, kpo zogbeji na oxwe kanɖe. 37 Mɔyizi xin lɔ ɖokpo jan wɛ lɔ na togun Izrayɛlitɔn lɔ tun: "Mawu na va sɔ mɛɖokpo le mia nɔvyɔye mɛ na mi e bo na nyi Mawu we oxolɔɖenyitɔ le mia mɛ ɖi bo ha." 38 E lɔ ɖokpo lɔ ke wɛ le dodomɛ na ye, le zogbe lɔ ji kpo ɛwɛndotɔ Mawutɔn ke lɔ xo ni-i le Osó Sinayitɔn lɔ ji. Dahwe xin lɔ ke nɔ kpo míatɔye; dahwe xin lɔ ke nɔ yi oxo ɛgbɛtɔnye bo nɔ va lɔ na mí. 39 Dahwe xin lɔ wɛ míatɔye gbɛ tonu sise na; ye boo nya-ɛ wɛ le oji yetɔnye mɛ ayixa yetɔnye bo mɔ trɔkɔ siin Egiputi. 40 Le hwexin lɔ nu, ye va lɔ na Alɔ tun: "Wasi yɛhwe ke na va kplɔ mí ye na mí. Mɔyizi ke va kplɔ mí tɔn le Egiputi lɔ, mí hɔn nyɔ onu ke wɛɛ." 41 Ye bo va hu nyibuvi ɖokpo bo do san avɔ na Yehwe lɔ, ye bo va kpɔn jijwɛ do onu kena alɔ yetɔnye wasi wu. 42 Vɔ Mawu bo va lɛ godo do ye bo jo ye do ye bo nɔ sɛn sunhweviye ke le jihwe ye; ɖi kena e o nyi wiwlan ɖo le oxolɔɖenyitɔye we wema mɛ ɖo ha tun: "Togun Izrayɛlitɔn bo wɛ mi va hu kanlin bo do san avɔ na le zogbeji ganke mɛ na mi nɔ zogbeji na oxwe kanɖe? 43 Mi bo va yi gbe na yɛhwe Mɔlɔki tɔn, kpodo sunhwevi yɛhwe Hlefanutɔn, onu tita xinye wɛ mi wasi boo sɛn nɔ: Blɔ can ko na bɛ mi tɔn, mi bo na va gbɔn Babilɔnu wu." 44 Míadagbwɔye ɖo avɔxɔ ke mɛ na okancica kunnuɖiɖetɔn lɛye le wiwlan le, le zogbe lɔ ji, ɖi kena Mawu o ɖegbe bo lɔ na Mɔyizi ɖo ha, tun ni mɔɔ wasi ɖi kena e kpɔn ɖo ha. 45 Avɔxɔ xin lɔ wɛ míadagbwɔye, ye hɛn le zɔnlin zinzɔn yetɔnye mɛ, gbɔnɔn bo hɛɛn do va oto lɔ mɛ kpo Jozwe. Onu xin lɛye jɔ le hwekenu na Mawu va nya ɛmɛye le oto ɖeye mɛ bo va sɔ do alɔ mɛ na míadagbwɔye. E bo le emɔha kaka do jɛ Davidi we hwenu, 46 ke va kpɔn ɛfɛnu le Mawu kɔn; e bo va jlo tun ye a mɔ gba oxɔ ɖokpo na Mawu Jakɔbutɔn. 47 Vɔ Salomɔ wɛ bo va gba oxwe xin lɔ na Mawu. 48 Vɔ Mawu ɖaxo hɔn nɔ nɔ oxwe kena gbɛtɔye gb a mɛ; ɖi kena e o lɔ ɖo na oxolɔɖenyitɔ etɔn ɖo ha tun: 49 "jiŋukunsin wɛ nyi xɔlu zinkpwe tɛye, nyida bo nyi afɔji ɖo nu tɛye. Oxwe nɛ ha lɛ mi na kpewu na gba naa? Xwetɔ wɛ lɔ ɖemɔ, "Fye lɛ nyi gbɔjwɛ we tɛnxo tɛye? 50 Na e hɔn nyi alɔ tɛye wɛ wa onu xin ye bi nɔ?" 51 Mi mɛ gbetɔ otasyɛntɔtɔye kpo oji syɛntɔye mi nɔ tu oto do Mawu, mi bo nɔ tri oto le ŋukɔn na Gbigbɔ Kinkwɛn; mi bo nɔ wasi onu ɖi kena miadagbwɔye wa ɖo san ha. 52 Oxolɔɖenyitɔ e nɛ lɛ drɔn na miatɔye hɔn do aya na va yi? Ye bo jɛ oxolɔɖenyitɔlɛ ke va lɛye hu hu ji gbɔxwe na ɛmɛ jijwɛ lɔ a do va; wɛ syɛ, miye can mi va trɔ zun ofuɖena-ɛmɛtɔye kpo ɛmɛ-hutɔye kpo, 53 miye kena yi osɛn ke na Mawu we ɛwɛndotɔ lɛye lɔ na mi ye ji, vɔ mi ko va hɛn e wu.» 54 Hwekenu na mɛ ke le ɛhwɛdɔtɛnxo lɛye se oxo xin lɛye vɔ, oji yetɔnye yi abi, ye bo va jɛ aɖukunkun ɖu ji do Etyɛnu wu. 55 Vɔ elɔ, ke e o gɔ kpo Gbigbɔ Kinkwɛn kpo, e sɔ ŋukunsin etɔnye bo kpɔn jihwe nɔ tlululu bo va kpɔn gigo Mawutɔn. E bo va kpɔn Yesu le ote le aɖusi mɛ na Mawu. 56 Etyɛnu bo lɔ tun:«Mi kpɔn, ko kpɔn jiŋukunsin hun, wɛ Ovi Gbɛtɔtɔn lɔ bo le ote le aɖusi mɛ na Mawu.» 57 Vɔmɛ ke le ɛhwɛɖɔtɛnxo lɛye bo va do axwa sinsyɔn, bo tu oto yetɔnye, wɛ le ogbenɔkpɔ mɛ, ye zɔn gidi-gidi bo ɖi cɔn Etyɛnu. 58 Ye bo va ɖe-e tɔn le toxo lɔ mɛ bo jɛ ohwan titɔ-ɛ ji: ɛmɛ ke tɔ ohwan wu-i nɔ lɛye bo ɖe awu yetɔnye sɔ ɖo hwanjɛvi ɖe ke we nyikɔ nyi Sɔlu kɔn. 59 Hwekenu na ye tɔ ohwan wu Etyɛnu nɔ, e xo ɛɖɛ bo lɔ na Mawu nɔ tun:«Xwetɔ Yesu, yi gbigbɔ tɛye.» 60 E bo jɛ klita, bo do axwa kpo ogbe sinsyɔn bo lɔ byo:«Xetɔ, ka do onu nyinyla ke lɔ we ɛhwɛ na ye. Kena e lɔ oxo xin lɔ vɔ kpoŋu, e bo myɔ onu.»