¹ Hwekenu na onukplanvi Yesutɔn lɛye o jɛ e ji bo su nɔ, Jwifu ke nɔ do glɛkigbe ye v jɛ oxo nyinyla lilɔ ji do Ebletɔye wu, ɖo ye ɖe okɔ le kposyu yetɔnye wu le onuɖuɖu ke ye nɔ ma le ŋukɔnɖiɖe-ŋukɔnɖiɖe lɔ mɔ. ² Ɛmɛdindɔn weve lɛye bo va yɔ onukplanvi susu lɛye bo lɔ na ye tun:«E hɔn nyɔ tun míye mí na do jo Mawu we oxo lilɔ do a bo va jɛ onuɖuɖu ma ji. ³ Syɛ, mi can nɔvi ŋusunglo acowe le miaɖeye mɛ ke na ɖo kunnuɖiɖe onywɛ, bo gɔ kpo Gbigbɔ Kinkwɛn kpo onunyinyɔ, kena mí na va sɔ odan xin lɔ a sɔ do asi na. ⁴ Míye, mí na do vivɛnu le ɛɖɛxixo kpo Mawuxo jijla mɛ.» ⁵ Oxo ke ye lɔ lɔ bo jɛŋu na togun lɔ bisese. Ye bo va can Etyɛnu, ke ɖo xɔse taŋ bo mɔ gɔ kpo Gbigbɔ Kinkwɛn, ye bo can Filipu, Plɔcɔ, Nikanɔ, Timɔ, Pamenasi, kpo Nikola, ke na sɔn Antyɔcu. ⁶ Xɔsetɔ lɛye va kplɔ mɛ ke na ye can lɛye do va na ɛmɛdindɔn lɛye, ye bo va ɖo alɔ ota na ye bo do xo ɛɖɛ na ye. ⁷ Kena Mawu we oxo lɔ o gbakpe nɔ, onukplanvi lɛye va jɛ susu ji le Jeluzalɛmu. Wɛ avɔsantɔ susu ye bo va kan do eji bo ɖo xɔse. ⁸ I wɛ Etyɛnu, ke gɔ kpo Mawu we ɛfɛnu kpo hɔnhlɔn Mawutɔn kpo, va wasi ŋudandonu ɖaxoye kpo josi ɖaxo-ɖaxoye le togun lɔ mɛ nɔ. ⁹ Vɔ Jwifu ɖeye ke va sɔ Silɛnu kpo Alɛsandri we toxo mɛ ye, kpo Silisi kpo Azi we kansinmɛtɔye bo sɔn Jwifuye we okpletyɔn ke ye nɔ yɔ tun ɛmɛ ke ye ɖe ogan na ye we okpletyɔn, bo va cite. Mɛ xin lɛye bo va jɛ onu dindɔn ji kpo Etyɛnu. ¹⁰ Vɔ ye ko kpewu na va nɔ ote le ŋukɔn na onunyinyɔ Etyɛnutɔn kpo Gbigbɔ ke le emɛ e do lɔ oxo nɔ lɔ. ¹¹ E xin we godo, ye bo va ve do oho onu na mɛɖeye le nugɔ na ye a do lɔ tun:«Mí nɔ se Etyɛnu nɔ lɔ oxo nyinylaye do Mɔyizi kpo Mawu wu.» ¹² Ɖemɔha wɛ ye va do otogun lɔ, otomɛmɛhyɔnye kpo osɛnkplan-ɛmɛtɔye ɖo, wɛ ye bo ve ɖi cɔn Etyɛnu, bo wle-e, bo va kplɔ-ɛ do yi ɛhwɛɖɔtɔye kɔn. ¹³ Ye bo hɛn kunnuɖetɔ ojokantɔye ke lɔ nɔ tun:«Dahwe ke oxo agɔ-agɔye jan wɛ e nɔ lɔ nɔ do Mawu we oxwe Kinkwɛn lɔ kpo Mɔyizi we osɛn lɔ wu nɔ. ¹⁴ Ɖo mí se e bo lɔ tun Yesu Nazalɛtitɔn xin lɔ mɔ na va gba Mawu we oxwe lɔ a mɔɔ va ɖoli Mɔyizi we akɔnu ke e kplan mí lɛye.» ¹⁵ Mɛ ke xinnɛnyi le ɛhwɛɖɔtɛnxo lɛye bisese bo va fɔ ŋukunsin do Etyɛnu ji bo kpɔn-ɛ nɔ tlululu bo va kpɔn tun ŋumɛ etɔn mɔ ɖi Mawu we ɛwɛndotɔye we ŋumɛ.