¹ Wɛ, dahwe ɖe le ye bo nɔ yɔ-ɛ tun Ananyasi, osyɔ bo nɔ nyi Safila, e va sa akpaɖe na ogle yetɔn lɔ, ² bo va sɔ oho lɔ we akpa ɖe sɔ hwla (Osyɔ bo nyɔ-ɛ ganji tun e mɔ sɔ oho emɔha tɔn sɔ hwla), bo va sɔ akpaxwe gbokpwe ke drɔn lɔ sɔ na ɛmɛdindɔn lɛye. ³ Vɔ Piyɛ bo va lɔ ni-i tun:«Ananyasi, ŋunɛ jɔ na satana do va gɔ oji tɔwe mɛ gbɔɔn o bo va blɛ Gbigbɔ Kinkwɛn ɖu nɔ bo va ɖe le ogle ke o sa lɔ we oho wu? ⁴ Hwekenu na hɔn sa-ɛ tɔwe jan hwɛn e nyi wɛɛ? Ke na o mɔ sa-ɛ ɖe tɔwe lɔ ke jan hwɛn e mɔ nyi wɛɛ? Naɖe lɛ o lin onu xin ha lɔ kpɔn ɖo le oji tɔwe mɛ? E hɔn nyi gbɛtɔye hwɛn o kan ojo na, vɔ Mawu wɛ o kan ojo na.» Hwekenu na e se oxo xin lɛye vɔ, Ananyasi va jɛnyi bo ku. ⁵ Vivɔ ɖaxo ɖe bo va jɛ mɛ ke na se oxo xin lɛye bisese hu ji. ⁶ Hwanjɛvye bo va bo cɔn avɔ do-e bo kɔ-ɛ bo ve sɔ ɖi. ⁷ E na wasi ɖi oganxixo atɔn emɔha, osyɔ can va, e ko nyɔ-ɛ tun onu ɖe mɔɔ jɔ. ⁸ Piyɛ bo lɔ ni-i tun:«Lɔ na tu oho xin lɔ jan mɛ mi mɔ do sa ogle lɔ.» E bo va yi ogbe na Piyɛ tun :«Ɛɛn, oho xin lɔ jan wɛ.» ⁹ Wɛ Piyɛ va lɔ ni-i tun:«Naɖe lɛ mi va ɖo ogbe do okpɔ, na do tɛn Gbigbɔ Mawutɔn kpɔn ɖo? ¹⁰ Kpɔn, ɛmɛ ke ve ɖi suwe ye gbɛ le agbo lɔ ji, ye bo na kɔ i can gba syɛ.» E bo va jɛnyi le tenxo ɖokpo lɔ mɛ kpoŋu bo ku, hwanjɛvi lɛye bo va kpɔn-ɛ le kuku; ye bo kɔ-ɛ bo ve ɖi-i do oswɔ we axa. ¹¹ Vivɔ ɖaxo ɖe bo va jɛ agun lɔ bisese kpo mɛ ke gbɛ se onu xin lɛye bisese ji. ¹² Josi susu kpodo ŋudandonu susu bo jɔ nɔ le togun lɔ mɛ do gbɔn ɛmɛdindɔn lɛye ji nɔ. Ye bo le Salumɔ we dogba ji. ¹³ Vɔ mɛ ti ko va xa a do bɔ do ye wu can. E le ɖemɔ co, togun lɔ bo nɔ kanfu wu ye nɔ susu. ¹⁴ Wɛ ɛmɛ susu, ŋusungloye kpo nyɔnusiye kpo va kan ko Xwetɔ lɔ ji, ye bo va gɔ na xɔsetɔ lɛye, ¹⁵ gbɔɔn ye bo nɔ ve kplɔ adɔnnɔye a sɔ hlɔn ojɛnye ji le omɔ viviye ji na hwekenu Piyɛ na va gbɔn blɛ va sɔn nɔ ha, ɛyɛ etɔn mɔ do kpewu a gɔ adɔn na mɛɖeye le ye mɛ. ¹⁶ Mɛ susu bo nɔ va sɔn oto ke lilɛ do Jeluzalɛmu mɛ bo nɔ va hɛn adɔnnɔye kpo mɛ ke na gbigbɔ nylakanye o do tagba na nɔ ye do va, ye bo nɔ kpɔn adɔngigɔ. ¹⁷ Vɔ avɔsantɔye we ga lɔ cite kpo ɛmɛ ke le e kɔnye (bo le Sadusitɔye we gbɛta mɛ ye); bo va hwan ɛwu do ye nɔ taŋu. ¹⁸ Ye bo va wle ɛmɛdindɔn lɛye bo sɔ ye bɛ ye sɔ do gankpa oto lɔ tɔn mɛ. ¹⁹ Vɔ le ozanmɛ, ɛwɛndotɔ Mawutɔn ɖokpo va va bo hun gankpa lɔ we ohɔn, bo ɖe ɛmɛdindɔn lɛye tɔn bo lɔ na ye tun: ²⁰ «Mi lɛkɔ siin agunxɔlɔmɛ a bo jla oxo ɛgbɛtɔn ke lɛye na otogun lɛye bisese.» ²¹ Hwekenu ye se emɔha, ye va ɖyɛ agunxɔlɔ mɛ le kɛklɛnu fu-u bo jɛ onukplan ɛmɛye ji. Vɔ avɔsantɔ Mawutɔn ɖaxo ɖokpo va, kpo mɛ ke le okpɔ kpo-e ye, bo va yɔ okple mɛ bisese, kpo oto mɛhyɔn Izrayɛlitɔnye, bo va ɖo ɛmɛye ɖodan tun ye mɔ ve kplɔ ɛmɛdindɔn lɛye le gankpa mɛ do va. ²² Vɔ ɛmɛcɔtɔ ke na ye ɖo ɖodan gankpa mɛ ye hɔn kpɔn Piyɛ kpo Jan lɔ le gankpa lɔ mɛ, ye bo lɛkɔn bo va ɖo ogbe na ye tun: ²³ «Mí kpɔn gankpa lɔ le tutu ganji wɛ ɛmɛcɔtɔ lɛye bo le ohɔn lɔ ji; vɔ ke mí va hun ohɔn lɔ bo ɖyɛ gankpa lɔ mɛ, mí hɔn kpɔn mɛ ti le e mɛ.» ²⁴ Kena Mawu we oxecɔtɔye we ga kpo avɔsaantɔ ɖaxo Mawutɔn lɔ se oxo xin lɛye vɔ, ayixa gbado na ye wɛ ye va kanse wu yeɖeye nɔ tun naɖe lɛ e na va nyi ɖo. ²⁵ Wɛ mɛ ɖokpo va ye kɔn bo lɔ na ye lɔ byo:«Mɛ kɛ ye na mi wle do gankpa mɛ lɛye, ye le agunxɔ lɔ mɛ bo kplan onu wu togun lɔ nɔ.» ²⁶ Wɛ Mawu we oxwecɔtɔye we oga lɔ kpo ɛmɛcɔtɔ lɛye va yi na do ve kplɔ ye do va, vɔ e hɔn nyi kpo zigidi kpo nɔ, ɖo ye vɔ nɔ tun togun lɔ mɔ na gbɛ tɔ ɛkpɛn wu hiye gbɔɔn a mɔɔ hu hiye. ²⁷ Hwekenu na ye va kplɔ ye do va, ye sɔ ye sɔ ɖo ɛmɛ kena kple lɛye we ŋukɔn. Avɔsantɔ ɖaxo lɔ bo va kan oxo se wu ²⁸ ye lɔ byo:«Mí gbɛ na mi tun mi mɔ ka mɔ kplan onu wu ɛmɛye le nyikɔ xin lɔ mɛ, vɔ okplan miatɔnye kɛɖɛ bo gɔ Jeluzalɛmu we oto lɔ bi mɛ, mi bo jlo na sɔ dahwe xin lɔ we oku a sɔ kpla okɔ na mí.» ²⁹ Vɔ Piyɛ kpo ɛmɛdindɔn lɛye bo ɖo e wu na ye tun:«Mawu wɛ mí ɖo na se tonu na e hɔn nyi gbɛtɔye hwɛn. ³⁰ Mawu míatɔye tɔn wɛ fɔn Yesu sɔn oku, Yesu kena mi hu, bo kɛɛ do otin ɖe ji. ³¹ Mawu kɔ-ɛ do oji le aɖusi mɛ etɔn na ni a do nyi xɔluvi kpo hwlɛngantɔ, na do na Izrayɛlitɔye a doli jijɔ, ye mɔ do sɔ ɛhwɛ yetɔnye can a mɔ sɔ kɛ ye. ³² Míye mi nyi kunnu ɖetɔye na onu xin lɛye, kpo Gbigbɔ Kinkwɛn kena Mawu na mɛ ke se tonu ni-i ye.» ³³ Ke na ɛmɛ kena kple lɛye se ɖemɔha, aɖi wle ye taŋu, ye bo jlo na hu ɛmɛdindɔn lɛye. ³⁴ Vɔ Falizitɔ ɖe ke nɔ nyi Gamalyɛli, bo nyi osɛnkplan-ɛmɛtɔ wɛ togun lɔ bo nɔ ɖo sisi ni-i, va cite bo ɖegbe tun ye mɔ ɖe ɛmɛdindɔn lɛye tɔn na cɛju viɖe. ³⁵ E xin we godo, e bo va lɔ na ye tun:«Izrayɛlitɔye, mi cɔ miaɖeye taŋu do onu ke mi va wa kpo ɛmɛ kiye nɔ wu. ³⁶ Ɖoo e hɔn dɛn syɛ, mi do kpɔn dahwe ɖe ke ye nɔ yɔ tun Tedasi ke va cite bo lɔ nɔ tun he mɔ nyi ɛmeɖaxo, wɛ gbɛtɔ, na yi ɖi sandi ɛnɛ (400) emɔha, bo va bɔ do e wu. Ye bo va hu-i, wɛ mɛ ke nɔ se tonu ni-i ye bisese bo va gbado bo va zun onu vɔvɔ. ³⁷ E lɔ we godo, mí mɔ va kpɔn Juda ke sɔn Galile we kansinmɛ, bo va cite bo kplɔ ɛmɛye susu do ɛtɛ le hwekenu na xɔlu ɖaxo ɖe ogbe tun ye ni mɔɔ xlɛ tovi ye. I can gba va gu okun, wɛ mɛ ke se tonu ni-i ye va kankan bi. ³⁸ Syɛ, blɔ ko lɔ na mi nɔ lɔ byo, mi mɔ lɛ le mɛxinye kɔn a bo jo ye do xwii, ɖo na e nyi tun tito ke lɔ alo odan ke lɔ gbɛtɔye kɔn wɛ e sɔn, hun e na va jɛnyi. ³⁹ Vɔ na e nyi tun Mawu kɔn wɛ e sɔn, mi hɔn kpewu na ɖu le ye ji; mi na va kpɔn tete can tun Mawu mɛ hiye mɔ fun ahwan kpanta nɔ.» Wɛ mɛ ke na kple lɛye va yi ogbe na oxo kena Gamalyɛli lɔ lɔ. ⁴⁰ E xin we godo, ye bo va yɔ ɛmɛdindɔn lɛye, bo xo ye, bo gbɛ na ye tun ye ni mɔɔ ka mɔ lɔ oxo le Yesu we nyikɔ mɛ, e xin, ye bo va jo ye do. ⁴¹ Ɛmɛdindɔn lɛye bo tɔn le ofi lɔ kpo jijwɛ kpo ɖo ye kpɔn tun hiye mɔ jɛ na ye mɔ do do aya na hiye do Yesu we nyikɔ lɔ wu. ⁴² Co, ŋukɔndide-ŋukɔnɖiɖe, ye nɔ yi Mawu we oxwe lɔ gbe kpo oxweyegbe, a bo kplan onu a bo mɔ lɔ nɔ tɛgbɛ tun Yesu mɛ mɔ nyi Klisu lɔ.