¹ Hwekenu na Piyɛ kpodo Jan gbɛ lɔ oxo nɔ, avɔsantɔ Mawutɔnye, Mawu we oxwecɔtɔye kpodo Sadusitɔye va. ² Aɖi bo wle ye taŋu ɖo Piyɛ kpo Jan o plan onu wu ɛmɛye nɔ do Yesu wu kpodo fifɔn sɔn oku etɔn kpo wu. ³ Ye bo va wle ye do gankpamɛ gbɔɔn ŋukɔn bo ɖe, ɖo hwedo bi wɛ ye wle yee. ⁴ Vɔ mɛ ke se oxo ke Piyɛ kpo Jan lɔ lɛye le togun lɔ mɛ susu bo kan do e ji wɛ ŋusunglo ke kandeji ye bo na yi ye mɛ kanɖewo emɔha. ⁵ Le ŋukɔnɖegbe etɔn, toga lɛye, otomɛhyɔn lɛye kpo osɛnkplan-ɛmɛtɔye va kple le Jeluzalɛmu. ⁶ Anu, ke nyi avɔsantɔ Mawutɔnye we ga, Kayifu, Alɛsandlu kpo mɛ ke gbɛ tɔn sɔn avɔsantɔ ɖaxoye we kunkan mɛ ye can bo va kple. ⁷ Hwekenu ye va sɔ Piyɛ kpo Jan sɔ ɖo dodomɛ, ye va kan se wu ye tun:«Do gbɔn hɔnhlɔn enɛ ji, alo nyikɔ mɛnɛtɔn mɛ lɛ mi wasi onu xin lɛye le nɔ?» ⁸ I wɛ Piyɛ, ke o gɔ kpo Gbigbɔ Kinkwɛn, lɔ va lɔ na ye tun lɔ byo:«Miye, otokplɔtɔye kpo otomɛhyɔnye, ⁹ e nyi tun mi va kan oxo se wu mi nɔ egbe do onu nywɛ ke mi wasi do gɔ adɔn na dahwe adɔnnɔ ɖe, tun naɖe dahwe xin lɔ hɛnɖo do kpɔn adɔngigɔ jaa? ¹⁰ Na mi mɛ bisese ni nyɔ-ɛ gbɔɔn do jɛ Izrayɛli we oto lɔ bisese tun do gbɔn nyikɔ Yesu Klisu Nazalɛtitɔn, ke mi o kaan do otinsokpoli ji wɛ ŋukunɖiɖe atɔngɔ gbe etɔn e bo fɔn sɔn ɛmɛ kukuye mɛ; do gbɔn elɔ lɔ ji wɛ dahwe ke le ote le ŋukɔn na mi xin lɔ le lanmɛ syɛn le( le nywɛɖe le). ¹¹ Yesu Klisu wɛ nyi ɛkpɛn kena mi mɛ oxɔwatɔye o gbɛ, vɔ bo va nyi azweji we ɛkpɛn na mi. ¹² Hwlɛngan hɔn mɔ le mɛ ti mɛ, ɖo nyikɔ ti hɔn mɔ le le nyidan ji bwɛ, ke ye na gbɛtɔye wɛ mí na kpɔn hwlɛngan le emɛ.» ¹³ Ke ye va kpɔn Piyɛ kpo Jan we oji titri, bo va nyɔ- tun gbɛtɔ kpaa ye mɛ ye mɔ nyi, ye mɔ ko yi suklu kpɔn can, e kpaca do ye, ye bo va flin tun Piyɛ kpo Jan mɔ nɔ xodo Yesu saan. ¹⁴ Ɖo dahwe ke kpɔn adɔn gigɔ lɔ le kpɔ kpo ye, ye hɔn mɔ va kpɔn oxo ti bo na lɔ do onu xin lɔ wu. ¹⁵ Vɔ ke ɛwɛɖɔtɔ lɛye va ɖegbe na Piyɛ kpo Jan kpo tun ye ni mɔ tɔn le ɛhwɛɖɔxwe lɔ, ɛhwɛɖɔtɔ lɛye bo va jɛ oxo lɔ gbeje kpɔn ji le yeɖeye mɛ. ¹⁶ Ye bo va lɔ nɔ tun:«Ŋunɛ lɛ mi na va wa na ɛmɛ ke lɛye? Ɖo Jeluzalɛmutɔye bisese wɛ o nyɔ ŋudandonu kpatakli ke na ye emɛ xin lɛye o wasi, míye mi ko kpewu na gbɛ syɛ tun ojo mɛ. ¹⁷ Vɔ na onu ke ye wasi nɔ lɔ ni ko do va gbakpe gbɔn oto lɔ mɛ bi, mía gbɛ na ye syɛ tun ye ni mɔ ka mɔ lɔ dahwe xin lɔ we oxo na mɛti.» ¹⁸ Ye bo va yɔ Piyɛ kpo Jan kpo bo va gbɛ na ye tun ye ni mɔ ka mɔ lɔ oxo ɖe alo a mɔ mɔ kplan onu wu ɛmɛ ɖe le Yesu we nyikɔ mɛ gbeɖe. ¹⁹ Vɔ Piyɛ kpo Jan bo va ɖo ɛ wu na ye bo lɔ byo:«Mi kpɔn le miaɖeye mɛ tun e nyɔ na ye na se tonu na miye a bo vɛtoli na Mawu jaa. ²⁰ Ɖo onu ke na mí kpɔn bo se ye mí hɔn kpewu na gɔn lilɔ.» ²¹ Hwekenu na ye mɔ va gblɔn adan buye do ta na Piyɛ kpo Jan, ye va jo ye do. Ye hɔn va kpewu kpɔn onu ke ye na do dɔn oto na ye ti; ɖo togun lɔ ni o kanfu Mawu nɔ do onu ke o jɔ lɔ wu. ²² Dahwe ke kpɔn adɔn gigɔ lɔ e o ɖo hu oxwe kanɖe. ²³ Hwekenu na ye va jo Piyɛ kpodo Jan kpo do vɔ, ye va lɛkɔ bo ve lɔ onu ke na Mawu we avɔsantɔye kpo oto mɛhyɔnye lɔ na ye nɔvyɔ xɔsetɔye. ²⁴ Hwekenu na ye se oxo xin lɔ vɔ, ye mɛ bisese va kɔ ogbe do yi oji boo lɔ na Mawu nɔ tun:«Xwetɔ, lɔ ke ɖo jiŋukunsin kpo nyidan kpo, bo ɖo ɛxu kpo onu ke le emɛye bisese, ²⁵ lɔ ke na do gbɔn Gbigbɔ Kinkwɛn ji, bo do lɔ gbɔn míatɔ Davidi ke nyi odansɔvi tɔwe we onu mɛ tun: "Ŋunɛ jɔ na hunnya-hunnya do le mɛ ke na hɔn nyi Jwifuye mɛ wɛ otogunye bo nɔ bla ogbe onu vɔvɔtɔ na ɛmɛye? ²⁶ Xɔlu nyidan ji tɔn ye cite do kpɔ, wɛ ogaye va cite kpan ŋukɔn wu Xwetɔ Mawu kpo Klisu." ²⁷ E le emɔha co ganke, xɔlu Elodu kpodo Pɔnsu Pilati ye va cite le togun lɔ mɛ, ye kpodo togun lɛye kpo togun Izrayɛli tɔn kpo va cite kpan ŋukɔn odansɔvi kinkwɛn tɔwe, Yesu, ke o si ami na lɔ. ²⁸ Ye nɔ kple a do wasi onu keye na itete o o jlo na wasi kpo hɔnhlɔn tɔwe kpo ojlo tɔwe mɛ san ye. ²⁹ Syɛ, Xwetɔ, kpɔn kena ye o gblɔn adan ɖo na mí saan, a bo do hɔnhlɔn lanmɛ na mí mɛ ke nyi odansɔvi tɔwe ye na mía do jla oxo tɔwe kpo kanɖejI ɖaxo kpo. ³⁰ Na nɔ drɛn alɔ tɔwe, na adɔngigɔye; na nɔ ɖe josiye xlɛ kpo ŋudandonuye ni nɔ jɔ le idansɔvi tɔwe Yesu we nyikɔ mɛ.» ³¹ Kena ye xo ɛɖɛ vɔ, ofi ke na ye kple do lɔ jɛ hunhunhun ji wɛ ye mɛ ke le ofi lɔ bisese ye va gɔ kpo Gbigbɔ Kinkwɛn kpo, bo va jɛ Mawu we oxo jla ji kpo akpakpa ɖaxo kpo. ³² Xɔsetɔye we ogbɛ kpikple lɔ bo ɖo ogbenɔkpɔ, ayixa ɖokpo kpo susu ɖokpo wɛ nɔ kplɔ ye wɛ mɛti hɔn nɔ lɔ le ye me tun onu ke he mɔ ɖoo mɔ nyi heɖokpo gee tɔn. Vɔ ye bo nɔ kɔn onu yetɔnye bi do okpɔ. ³³ Kpodo hɔnhlɔn ɖaxo ɖe kpo wɛ ɛmɛdindɔn lɛye nɔ do ɖe kunnu na fifɔn sɔn oku Xwetɔ Yesu tɔn lɔ, wɛ ɛfɛnu ɖaxo ɖe bo va le ɖokpo-ɖokpo yetɔnye ji. ³⁴ Ɛmɛ ti hɔn va le ye mɛ bo va ɖo ohyan onu ɖe tɔn jɔ e gbe ɖe; ɖo mɛ ke ɖo nyidan ye alo oxwe ɖe ye nɔ sa ye, ³⁵ a bo sɔ oho lɔ a sɔ va na ɛmɛdindɔn lɛye. Wɛ ye nɔ va ma oho lɔ na xɔsetɔye, ɖi kena mɛ ɖokpo-ɖokpo o ɖo ohyan etɔn ɖo ha. ³⁶ Jozɛfu, kena tɔn sɔn Levi we akɔta mɛ, ye bo ji-i le Ciplu, ɛmɛdindɔn lɛye bo va ɖo nyikɔ ni-i tun Banabasi 'ke we gonmɛ nyi tun ɛmɛ ke nɔ do kpakpka lanmɛ na ɛmɛ). ³⁷ E ɖo ogle ɖe san; e bo va sa ogle lɔ, bo sɔ oho lɔ do va na ɛmɛdindɔn lɛye.