¹ Piyɛ kpo Jan o yi sinsɛn xɔmɛ nɔ, a do ve xo ɛɖɛ le ogan acɛnnɛ gɔ lɔ mɛ. ² Dahwe ɖe ke kpibɔ sɔn gbe ke gbe ye o ji-i gbɔɔn, ye bo nɔ kɔ-ɛ sɔ ɖo agbo Mawutɔn ke ye nɔ yɔ tun agbonywɛ lɔ nu le gbe bi gbe, e bo nɔ do va byɔ onu wu ɛmɛ ke nɔ va yi Mawu we oxwe lɔ gbe ye. ³ Ke dahwe kplibɔ nɔ lɔ kpɔn Piyɛ kpo Jan va ɖyɛ sinsɛnxɔ lɔ mɛ nɔ, e bo byɔ onu wu ye. ⁴ Iwɛ Piyɛ kpodo Jan kpo o kpɔn-ɛ nɔ tlululu, Piyɛ bo lɔ tun byo:« kpɔn mi ganji». ⁵ Dahwe lɔ bo kpɔn ye nɔ tlululu, e bo bu-i tun ye na sɔ onu ɖe na he mɛ ha. ⁶ Vɔ Piyɛ bo lɔ ni-i tun:« ko hɔn ɖo oho, ko ko mɔ ɖo sika, vɔ, onu ke ko ɖo, ko na na we. Le Yesu Klisu Nazalɛtitɔn we nyikɔ mɛ, cite a bo zɔn zɔnlin!» ⁷ Piyɛ bo sɔ aɖusi lɔ etɔn bo kɔ dahwe lɔ cite. Haŋu ɖokpo kpoŋu, hɔnhlɔn ɖe bo ɖyɛ afɔkanye mɛ na dahwe lɔ, ⁸ e bo cite hayaŋu bo jɛ zɔnlin zɔn ji, bo ɖyɛ sinsɛnxɔ Mawutɔn lɔ mɛ kpo ye, bo zɔn zɔnlin nɔ, bo dɔn yi oji nɔ, bo kanfu wu Mawu nɔ. ⁹ Otogun lɔ bisese bo kpɔn ke e zɔn zɔnlin nɔ, bo mɔ kanfu Mawu nɔ ɖo. ¹⁰ Ke ye kpɔn-ɛ, ye nyɔ-ɛ ganji tun dahwe xin lɔ mɛ mɔ nɔ xinnɛnyi le sinsɛnxɔ Mawutɔn we xɔmɔnu, sinsɛnxɔ lɔ we agbo ke ye nɔ yɔ tun «agbonywɛ» lɔ we ŋukɔn a bo do byɔ onu wu ɛmɛye nɔ, onu ke Mawu wa ni lɔ bo kpaca do ɛmɛye bi. ¹¹ Dahwe lɔ ko mɔ lɛ kɔ le ɛtɛ na Piyɛ kpo Jan, onu lɔ kpaca do otogun lɔ bi, ye bo va xa do Piyɛ kpo Jan le tɛnxo ɖe kena ye nɔ yɔ tun Salumɔ we dogba ji, ke nyɔ bo mɔ jɔhun. ¹² Ke Piyɛ kpɔn kena ye kpɔn ye nɔ ɖo, e lɔ na otogun lɔ tun:« Izrayɛlitɔye, ŋunɛ jɔ, adɔngigɔ lɔ wɛ kpaca do mi nɔ? Ŋunɛ dɔn na mi do kpɔn mi nɔ ɖ'emɔha lɔ, ɖi míye tete wɛ wa onu ɖe gbɔn míye tete we hɔnhlɔn mɛ alo Mawu sinsɛn míatɔn wɛ dɔn na dahwe lɔ do zɔn zɔnlin alo dɔŋuɖunu kpinkpɔn na ɛmɛ míatɔn wɛ lɛgbe? ¹³ Mawu Ablaxamutɔn, Izakitɔn, Jakɔbutɔn ke nyi Mawu míatɔye tɔn wɛ o do gigo na Yesu ke nyi iwe odansɔvi, Yesu xinlɔ wɛ mi sɔ sa na otogunye, ke na mi o gbɛ le Pilati we ŋukɔn, le gankemɛ na Pilati o jlo na jo-e do. ¹⁴ Vɔ mi bo gbɛ Yesu ke nyi ɛmɛ kinkwɛn kpo ɛmɛ jijwɛ, bo byɔ Pilati tun ni mɔ jo ɛmɛhutɔ do na hiye, ¹⁵ mi bo hu hlɛngantɔ lɔ. Vɔ Mawu bo fɔn-ɛ sɔn oku, iwe finfɔn sɔn oku lɔ godo míye bo kpɔn-ɛ. ¹⁶ Syɛ, do gbo xɔse ke na mí ɖo do hɔnhlɔn ke na le Yesu we nyikɔ mɛ ji, wɛ dɔn na nyikɔ xin lɔ do do hɔnhlɔn lanmɛ na dahwe xin ke mi kpɔn nɔ bo mɔ nyɔ-ɛ. Xɔse kena mí ɖo do Yesu ji, wɛ gɔ adɔn ni le mimɛ bisese we ŋumɛ. ¹⁷ Syɛ, nɔvyee, ko nyɔ-ɛ tun miye kpodo miawe gaye kpo, onu ke mi wa kpo Yesu, manyɔ-ɛ mɛ wɛ mi wasi le. ¹⁸ Vɔ Mawu o lɔ saan dogbɔn oxolɔɖenyitɔ etɔnye bise ji byo Klisu lɔ mɔ na ɖu aya, oxo xinlɔ wɛ cɛ nɔ. ¹⁹ Ke e nyi ɖ'emɔha, hun mi ɖɔli jijɔ miatɔnye, a mɔ trɔ va Mawu kɔn, e mɔ do sɔ ɛhwɛ miatɔnye sɔ kɛ mì, ²⁰ exin fifa we oganxixoye mɔ sɔn Xwetɔ Mawu lɔ kɔn a mɔ va na mi le hwekenu na e sɔ Klisu kena e o can na mi saan lɔ, a mɔ sɔ ɖodan mi, iwɛ nyi Yesu lɔ. ²¹ Vɔ syɛ Yesu lɔ ɖo na nɔ sɛxwe gbɔɔn do yi hwekenu na Mawu na jla onu bisese ɖo, ɖi kena e o lɔ ɖo sɔn saan xoxoxo dogbɔn iwe oxolɔɖenyitɔ Kinkwɛn etɔnye ji. ²² Ɖo Mɔyizi lɔ san lɔ byo: "Xwetɔ Mawu miatɔn na can ɛmɛ ɖokpo le mianɔvyɔye mɛ na mi, e mɔ nyi oxolɔenyitɔ ɖi bo ha. Mi mɔ ɖo oto wu oxo etɔnye bisese kena e na lɔ na mi ye. ²³ Ɛmɛ ɖekpokpwe ke hɔn na va ɖo oto wu oxolɔɖenyitɔ xinlɔ, ye na hu-i a bo ɖe-e tɛ le otogun lɔ mɛ." ²⁴ Oxolɔɖenyitɔye bisese ke lɔ oxo sɔn Samyɛli ji gbɔɔn do va jɛ ɛmɛ ke va xodwe ye ji, ye o lɔ oxo saan do azan kiye wu. ²⁵ Miye cinnɔsɔtɔye wɛ mi nyi na oxo kena oxolɔɖenyitɔye lɔ kpodo okancica kena Mawu wasi kpo mia dagbwɔye le hwekenu na e lɔ na Ablaxamu tun byo: " Xwedo ke le nyidan lɔ ji ye bisese na kpɔn dona dogbɔn iwe jijimɛviye ji." ²⁶ Miye wɛ nyi ɛmɛ tantyɛntɔn ke na Mawu can, iwe odansɔvi bo sɔ-ɛ ɖodan, e mɔ do lɛ okɔ na ɖokpo-ɖokpo miatɔnye le onunyinyla miatɔnye mɛ, a mɔ do dó na mi.»