¹ Hwekenu na pɛntecotu zan va sɔgbe, ye ɛmɛ bisese va kple do ofi ɖokpo. ² Haŋu ɖokpo kpoŋu, ozin ɖe tɔ sɔn sɛxwe le ɖi jɛhɔn sinsyɛnxu ɖe ɖegbe, bo gɔ pxwe ke gbe ye xinnɔnyi le lɔ seŋu. ³ I wɛ onu ɖe ye le ɖi ozo ɖɛye ha, bo ze do ŋumɛ na ye, bo ma jɛ ɖokpo ɖokpo yetɔnye ji. ⁴ Ye mɛ bisese bo gɔ kpodo Gbigbɔ kɛnklɛn. Ye bo jɛ oxo lɔ ji do ogbe voe-voe ye mɛ ji, ɖi ke na Gbigbɔ kinkɛn lɔ na ɛmɛ ɖokpo ɖokpo ɖo ha. ⁵ Vɔ le gbexinlɔ gbe, Jwifutɔye ke nɔ ɖo sisi na Mawu ye, ye sɔn ɛgbɛ lɔ mɛ bisese mɛ bo va le Jeluzalɛmu. ⁶ Ke ɛmɛ susu xin lɛye kpɔn ozin ke na tɔlɔ, ye va do agunto hoo, do se oxo kena Yesu we ɛmɛ dindɔn lɛye o lɔ nɔ, e bo kpaca do ye ɖo ye mɛ ɖokpo ɖokpo o se oxo lɔ nɔ le, itete we ogbe ke ye nɔ do le ye tete we tomɛ nɔ. ⁷ Onu ke jɔ lɔ bo hu nu do ye taŋu, ye bo lɔ byo:« Mi kpɔn mɛ ke lɔ oxo nɔ ke lɛye, Galiletɔye hwɛn ye nyi wɛɛ? ⁸ Ŋunɛ dɔn na, ɖokpo ɖokpo míatɔnye, do se oxo lilɔ yetɔnye do anɔnugbe míatɔnye mɛ nɔ? ⁹ Le miamɛ, mɛɖeye sɔn Patí, mɛɖeye Mɛdi, mɛɖeye bo sɔn Elamu, mɛbuye bo sɔn Mɛzopotami, Jude, Kapadɔsi, Pɔn kpo Azí, ¹⁰ ɖeye bo sɔn Fliji, Panfili, Ejipu, Libi ke bɔ do Silɛnu wu kpodo ɛmɛ ke sɔn Hlɔmá ye, ¹¹ Klɛti, Alabu, Jwifu vi jijiye, ɛmɛɖeye bo do nyi mɛ ke va xodo Jwifuye we osɛn nɔ ye, ganke mí bo se onu nywɛ-nywɛ ke Mawu wasi do ogbe míatɔnye mɛ nɔ!» ¹² Ayixa bo gbado na ye mɛ bisese, ye bo lɔ na yeɖe nɔ tun :«enɛ mɔ nyi ke? » ¹³ Vɔ, mɛbuye bo ko ɛmɛdindɔn, onukplanvi Yesu tɔn lɛye nɔ byo:«Ahan mɛ ye mɛ bi mɔ nu mu.» ¹⁴ Iwɛ Piyɛ kpo ɛmɛdindɔn weɖokpo gbokpwe lɛye cite, e bo kɔ ogbe yi ji bo lɔ byo:«mi mɛ Judetɔye kpodo mi mɛ ke nɔ nɔ Jeluzalɛmu ye, mi ɖo too a bo se oxo ke we gɔnmɛ. ¹⁵ Ɛmɛ ke na mi kpɔn nɔ kye, ti hɔn nu ahan mu ɖi kena mi bu-i ɖo ha, ɖo ogan acɛnnɛ kɛklɛnu tɔn jan wɛ o xo nɔ. ¹⁶ Vɔ, oxo kena oxolɔdenyitɔ Jowɛli lɔ saan wɛ o jɔ nɔ:(Jowɛli 2:28) " ¹⁷ Mawu lɔ tun," le azan kpotwi lɛye mɛ," ko na kɔn Gbigbɔ kinkwɛn tɛye do ɛmɛ ɖekpokpwe ji, miawe vikpɛ ŋusunglo kpo nyɔŋusiye mɔ trɔ zun bo we oxolɔɖenyitɔye, ko na nɔ ɖe onu sɔ xlɛ miawe hwanjɛviye, a mɔ lɔ oxo na miawe nyɔxonɔye gbɔn odrɔ mɛ. ¹⁸ Le azan xin lɛye mɛ, ko na kɔn Gbigbɔ Kinkwɛn tɛye do odansɔvi ŋusunglo kpo nyɔŋusi tɛyee mɛ, ye mɔ trɔ zun oxolɔɖenyitɔ tɛyee. ¹⁹ Ko na wasi ŋudandonu le jiŋukunsin kpodo nyidan ji, ɛhun, ozo, azɔ mɔ tun driɖiɖiɖi. ²⁰ Ohwe na va do vuvlu, osun mɔ va bya ɖi ɛhun ha, gbɔxwe na Xwetɔ Mawu lɔ we gigo zan ɖaxo lɔ na gbo va. ²¹ Exin ɛmɛ ɖekpokpwe ke na yɔ Xwetɔ lɔ we nyikɔ mɔ kpɔn hwlɛngan". ²² Izrayɛli vikpɛye, mi ɖo to-o a mɔ se oxo kiye: Yesu Nazalɛtitɔn, gbɛtɔ kena Mawu d'asi do eji le miamɛ, dogbɔn odan ɖaxo ŋudandonu, onukpaca ɛmɛ kpo josi ke na e wasi le miamɛ gbɔn Mawu tete ji, miye tete bo nywɛ ɖo ha. ²³ Dahwe xin lɔ wɛ ye sɔ jo na mi, ɖi kena Mawu tete jlo ɖo ha, e bo wasi iwe tito sɔn saan xoxoxo. Mi bo hwi dogbɔn ɛmɛ ke na hɔn nɔ ɖo sisi na Mawu ye we alɔ mɛ, ye bo kɛ-ɛ do otinsoga ji (otinsokpoli ji). ²⁴ Vɔ Mawu bo fɔn-ɛ sɔn oku, bo tun oku we vivɛsiseye we okan ni-i, ɖo oku we hɔnhlɔn hɔn kpewu na hɛn do ɛcɛ etɔn mɛ. ²⁵ Ɖo Davidi o lɔ do Yesu lɔ wu saan lɔ byo: "Ko nɔ kpɔn Xwetɔ tɛye tɛgbɛ le ŋukɔn tɛye, e bo mɔ le aɖusimɛ na, exin bo we ayixa ko mɔ do gbado nɔ. ²⁶ I wɛ dɔn na oji do jɔ-ɔ nɔ, ko bo ji jijwɛ we ohanye nɔ. Bo we gbaza can mɔ do nɔ ɛgbɛ kpodo kand'eji kpo. ²⁷ Ɖo Xwetɔ hɔn jo okla tɛye do na okutomɛ nɔ, o ko jo ɛmɛ kinkwɛn tɔwe do na e nyɔn ci yɔgunmɛ nɔ. ²⁸ O sɔ ɛgbɛ we omɔ bo sɔ xlɔ-ɔ, lɔ Mawu tɛye, o sɔ jijwɛ tɔwe do gɔ-ɔ ɖo o le kpo". ²⁹ Piyɛ bo yi eji bo lɔ byo:«Nɔviyee, ma lɔ oxo ke na mi kpo kand'eji kpo, míadagbwɔ Davidi e ku ye bo ɖi-i, i we yɔgun bo le miakɔn kaka va do egbe. ³⁰ Vɔ, Mawu we oxolɔɖenyitɔ wɛ e nyi, e bo ny-ɛ lɔ byo Mawu mɔ ta onu mɔ kan atanŋu na he tun jijimɛvi tɔwe ɖokpo na va ɖu xɔlu le xɔlu zinkpwe tɔwe ji. ³¹ Davidi lɔ, o kpɔn Klisu lɔ we fifɔn sɔn oku lɔ we ɖiɖexlɛ saan, i wɛ dɔn e do lɔ oxo sɔn ewu lɔ byo:"Mawu hɔn jo-e do okutomɛ nɔ, i we gbaza ko nyɔ ci yɔgunmɛ nɔ." ³² Piyɛ mɔ yi eji ke bo lɔ byo: Yesu xin lɔ, Mawu fɔn-ɛ sɔn oku, mímɛ ke nyi ɛmɛdindɔn etɔnye bisese bo kpɔn-ɛ le finfɔn sɔn oku lɔ godo, mímɛ bi bo mɔ nyi kunnuɖetɔ etɔnye. ³³ Mawu bo kɔ-ɛ sɔ ɖo aɖusilɔ etɔn mɛ, Yesu bo yi Gbigbɔ Kinkwɛn sɔn Otɔ lɔ si, ɖi kena e o kan iwe atanŋu ɖo saan ha, bo ma na miye, iwɛ nyi onu kena mi se nɔ bo mɔ kpɔn nɔ kiye. ³⁴ Ɖo Davidi elɔ, ye hɔn kɔ-ɛ do sin sɛxwe, vɔ e bo lɔ tun: "Xwetɔ Mawu lɔ na Xwetɔ tɛye tun, xinnɔnyi le aɖusi mɛ na-a, ³⁵ gbɔɔn do yi hwekenu na ko na sɔ kɛntɔ tɔweye sɔ do afɔ tɔweye gɔ." ³⁶ Syɛ, Izrayɛli we vikpɛye mimɛ bisese mi ɖo na nyɔ-ɛ ganji tun Mawu mɔ sɔ Yesu xinlɔ kena mi ka do otinsogaji lɔ mɔ do wasi Xwetɔ kpo Klisu.» ³⁷ Kena ye se oxo xin lɛye vɔ, ye we ayixa gbado ye bo kanse Piyɛ kpo ɛmɛdindɔn gbokpwe lɛye tun: «Mía nɔvyɔye, naɖe mi na hɛnɖo?» ³⁸ Piyɛ bo ɖo ewu na ye tun: «Mi ɖoli jijɔ miatɔnye a bo lɛ Mawusin le Yesu Klisu we nyikɔ mɛ. Mawu mɔ sɔ onu nyinyla miatɔnye sɔ kɛ mi, a mɔ na Gbigbɔ Kinkwɛn etɔn wu mi. ³⁹ Ɖo atanŋu kena Mawu kan lɔ nyi miatɔn, bo nyi mia we vikpɛye tɔn, bo mɔ nyi ɛmɛ ke le dindyɔnnu ye bisese tɔn, ye mɛ susu kena mía we Xwetɔ Mawu lɔ na va yɔ ye, mɔ do nyi Xwetɔ lɔ tɔn.» ⁴⁰ Piyɛ lɔ oxosusu na ye, bo do dó hɔnhlɔn lanmɛ na ye, ye mɔ do kan dó Yesu ji, e bo mɔ lɔ na ye tun: «Mi hwlɛn miaɖeye gan le jijimɛvi nyinyla kiye mɛ.» ⁴¹ Ye mɛ ke yi gbe na Piyɛ we oxo ye, ye lɛ Mawusin na ye i wɛ le gbe xin lɔ gbe, gbɛtɔ akpo atɔn emɔha (3000) wɛ va jɛ onukplanvi lɛye ji. ⁴² Ye nɔ do vivɛnu a do se onukpinkplan Yesu we ɛmɛdindɔn lɛye tɔn a mɔ nɔ okpɔ le nɔviwiwa mɛ, amɔ do ɖu onuɖuɖu kinkwɛn kpɔkpɔ a bo mɔ do xo ɛɖɛye kpɔkpɔ. ⁴³ Ɖokpo-ɖokpo yetɔnye nɔ vɔ nɔ ɖo onu kpaca ɛmɛ kpodo ŋudandonu susuye nɔ jɔ nɔ dogbɔn Yesu we ɛmɛdindn lɛye ji. ⁴⁴ Ye mɛ xɔsetɔ lɛye bisese bo le kpɔkpɔ, ye bo nɔ ma onu kena ye ɖo ye bisese kpo yeɖeye. ⁴⁵ Ye nɔ sa nyidan kpo ɖɔkunnu yetɔnye a bo má oho lɔ le yeɖeye mɛ, ɖi kena ɛmɛ ɖokpo-ɖokpo ɖo i we ohyan ɖo ha. ⁴⁶ Gbe bisese gbe, ye nɔ do vivɛnu a do kple do okpɔ le oxwe Mawutɔn gbe. Le oxwe yetɔnye gbe, ye nɔ ma kpɔnnɔ a bo ɖu le kpɔkpɔ ninɔ mɛ, a bo mɔ ma onuɖuɖu yetɔnye kpo jijwɛ kpo dɔmɛfaa. ⁴⁷ I wɛ ye nɔ kafu Mawunɔ, Otogun bi-i mɔ ɖe dɔmɛnywɛ sɔ xlɛ ye nɔ. I wɛ ŋukɔnɖegbe-ŋukɔnɖegbe, ɛmɛ ke na Xwetɔ lɔ hlwɛngan ye, e nɔ sɔ ye a sɔ kpe na yè.