¹ Hwekenu ye va ɖegbe na mí tun míye mɔ na mɔ do tɔjihun a mɔ do yi Itali we oto lɔ mɛ, ye va sɔ Pɔlu kpo ogantɔ buye kpo sɔ do asi na sɔjakanwekoga kena ye nɔ yɔ tun Jalwisi ke le ahwangbɛ Hlɔmatɔyetɔn mɛ. ² Mí bo do tɔjihun ɖaxo ɖe ke sɔn Adramiti, bo na ve gli do fi kena tɔjihun nɔ gli do le Azi we kansinmɛ ye. Mí bo ɖyɛ emɛ bo sɔn nɔ. Alisitaki ke nyi Tɛsalonikitɔ bo sɔn Masedwanu we kansinmɛ bo le tɔjihun lɔ mɛ kpo mí. ³ Le ŋukɔnɖegbe etɔn, mí nɔ te le Sidɔn, Julwisi lɔ nɔ nyɔ dɔmɛ do Pɔlu wu, i wɛ e na gb e wu-i byo ni mɔ ve kpɔn hadwe etɔnye, a mɔ do yi onu ke we ohyan e ɖo ye le ye si. ⁴ Ke mí lɛ le blɛ, mí gbɔn Ciplu we otɔdodomɛ we oto lɔ to trelele do sɔn nɔ, ɖo tɔjihun lɔ o kpe jɛhɔn nɔ. ⁵ Mí gbɔn ɛxu kena le Silisi kpo Panfili we kansinmɛ ye ji, bo ve jɛte le Mila kpodo Lwisi we kansinmɛ. ⁶ Sɔjakanwekoga lɔ bo kpɔn tɔjihun ɖe le blɛ, ke sɔn Alɛsɛndri do va yi Itali nɔ, e bo na na mí tɔjihun xin lɔ mɛ. ⁷ Mí bo zɔn dɛɖɛ le otɔ lɔ ji na azan susu, e hɔn le bɔbwɛ ɖe na mí keŋu gbɔxwe mi do va jɛ Kinidi. Kena jɛhɔn lɔ hɔn na na mí na do yi ŋukɔn ɖemɔ, mí gbɔn Salumɔnu, bo sin Klɛti otɔdodomɛ lɔ we oto mɛ. ⁸ Mí jɛ tagba susu taŋu gbɔ́xwe mí do zɔn yi ŋukɔn, bo gbɔn ɛxu lɔ to, bo va yi jɛ ofi kena ye nɔ yɔ tun, tɔjihunglityɔn nywɛye, e bo bɔ do Lase we toxo wu. ⁹ Mí gun ganmɛ susu, ɛxu lɔ ji gbingbɔn bo zun fɔku ɖaxo ɖe we nu, ɖo Jwufuye we onu bibla we azan o va yi, otɔji gbingbɔn le hwexin lɔ nu bo nɔ nyi fɔku ɖaxo we nuɖe. Pɔlu bo tɔ́gbe tɔjihunkuntɔ lɔ byo: ¹⁰ «Hadwe tɛye ko kpɔn nɔ lɔ byo otɔji gbingbɔn lɔ mɔ ɖo afɔku. Tɔjihun lɔ kpodo agban ke le emɛye na la mí, míye tete ye can we ɛgbɛ mɔ crɔn.» ¹¹ Vɔ sɔja lɔ bo ɖeji do onu kena tɔjihunkuntɔ lɔ kpo mɛ ke tɔn nyi tɔjihun lɔ lɔ ni-i nɔ ye wu, sɔ hugan wu oxo kena Pɔlu o lɔ ni-i nɔ. ¹² Emɔke e hɔn nyɔ na ye a nɔ tɔjihunklityɔn xin lɔ le vivɔ hwenu. I wɛ dɔn gbɛtɔ susu le ɛme ke le tɔjihun lɔ mɛ ye mɛ, bo yigbe byo hiye a mɔ zɔn yi ŋukɔn, e xin na e na kpewu na jɛ e ji, hiye mɔɔ jɛte le tɔjihunglityɔn ɖe kena ye nɔ yɔ byo Fenisi a mɔɔ nɔ blɛ le vivɔsun lɔ mɛ, tɔjihunglityɔn xin lɔ le Klɛti, bo kpan ŋukɔn afɔgbe do yi hweyixɔ kpodo tagbe do yi hweyixɔ. ¹³ Jɛhɔn yɛɛ ɖe bo xwi xixo sɔn afɔgbe danhɔn, ye bo bu-i nɔ lɔ byo, ye mɔ na kpewu a mɔ sɔn ɖi kena ye mɔ lɔ-ɛ ɖo san mɛ ha. Ke ye ɖe ogan gbaja kena hɛn tɔjihun lɔ ɖo te lɔ tɛ, ye jɛ mɔ bo gbɔn otɔdodomɛ we oto Klɛti we ɛxu to. ¹⁴ Vɔ zaanɖe jɛhɔn sinsyɛnxu nyinyla ɖe kena ye nɔ yɔ tun Elakilɔ sɔn otɔdodomɛ we oto lɔ mɛ, bo xwi xixo kpan ŋukɔn wu ye. ¹⁵ Jɛhɔn lɔ bo xwi tɔjihun lɔ dindɔn, tɔjihun lɔ na nɔ te le ŋukɔn na jɛhɔn lɔ e bo glo, i wɛ mí gbɔ jɔ míaɖe do jɛhɔn lɔ bo dɔn mí do sɔn nɔ. ¹⁶ Mí gbɔn afɔgbe na otɔdodomɛ lɔ we oto oviɖe ye bo nɔ yɔ-ɛ tun Koda, e bo gbo jɛhɔn na mí viiɖe, ganke e syɛnxu do mí taŋu gb ɔxwe mí do va kpewu na mía we alɔ do kpe tɔjihun ovi kena mí na do hwlɛn míaɖe gan lɔ ji. ¹⁷ Ye bo kɔ tɔjihun ovi lɔ do tɔjihun ɖaxo lɔ mɛ, e xin we godo ye bo sin okan lɛdo tɔjihun lɔ. Kena ye vɔ nɔ tun ye mɔ na ve gba do kɔgundu mɛ le Siti we ɛxuto, ye ɖe gangbaja kena tɔjihun lɔ o dɔn gbɔn otɔ lɔ we ŋukɔn nɔ lɔ tɛ, jɛhɔn bo dɔnye do sɔn. ¹⁸ Jɛhɔn sinsyɛnxu lɔ gbɛ do aya na mí nɔ nyinylatɔn, gbɔɔn ŋukɔnɖegbe etɔn, ye gbɔjwe jɛ agban ke le tɔjihun lɔ mɛ ye ɖe flɛn ji do ɛxwu mɛ. ¹⁹ Le nyatɔngbe etɔn, tɔjihunkuntɔ lɛye tete wɛ sɔ alɔ yetɔn do bɛ odanwanu ke le tɔjihun lɔ mɛye sɔ flɛn do ɛxu mɛ. ²⁰ Mí hɔn mɔ kpɔn ohwe we ŋumɛ gbɔɔn do kpɔn sunhwevi we ŋumɛ, gbɔɔn na azan susu, jɛhɔn lɔ bo mɔ syɛnxu nɔ. Mí hɔn mɔ va ɖo omɔnu kpinkpɔn ti tete can byo mí mɔ na gan can. ²¹ Mí hɔn mɔ ɖu nu ti gbɔɔn na azan susu. I wɛ Pɔlu va nɔ te le ŋukɔn na tɔjihunkuntɔ lɛye bo lɔ na ye lɔ byo:«Hadwe tɛyee, mi o na ɖ'oto oxo kena ko lɔ na mi san, a bo nɔte le Klɛti, e xin mí hɔn mɔ kpe afɔku kiye nɔ, onu xinye ko gu ɛmɛ nɔ. ²² Vɔ syɛ, ko byɔ sɔn mia kɔn nɔ tun miye mɔɔ d'oji, ɖo ɛmɛ ti hɔn ku ci emɛ le mia mɛ nɔ, tɔjihun lɔ jan wɛ na la mi. ²³ Ɖo le ozan kle mɛ, Mawu ke tɔn na ko nyi bo sɛn nɔ, i we ɛwɛndotɔ ɖe ze do ŋumɛ na, ²⁴ bo lɔ lɔ byo:«Pɔlu jikan ni ka so we, o ɖo na yi ɛhwɛ ŋukɔn le xɔlu ɖaxo Hlɔmatɔn lɔ we ŋukɔn, i xɛn, Mawu le dɔmǝnyinyɔ etɔn mɛ mɛ, e hwlɛn mɛ ke kpo ikpo le tɔjihun lɔ mɛ ye gan do gbɔn e ji. ²⁵ E xin wutu, hadwe tɛyee, mi ɖeji . Ko kan do Mawu ji tun ke e mɔ lɔ-ɛ ɖo, mɛ e mɔ na jɔ ɖo. ²⁶ Tɔjihun míaton lɔ bo ɖo na ve gba le otɔdodomɛ lɔ we oto ɖe mɛ dandan.» ²⁷ Nyɔwenɛgɔgbe etɔn we ozan mima ozan dodomɛ, jɛhɔn ɖaxo lɔ mɔ gbɛ dɔn mí do sɔn nɔ gbɔ́n aɖusi, amyɔ le ɛxu ke ye nɔ yɔ tun Adryatiki lɔ ji. Tɔjihunkuntɔ lɛye bo bu-i nɔ lɔ byo mí mɔ tɛkpɔ ŋudan ɖe nɔ wɛ ha. Ye bo sin onu kpinkpɛn ɖe do okan ²⁸ wu bo sɔ do otɔ lɔ mɛ, bo do jlɛ kena otɔ lɔ tito ɖo kpɔn e bo nyi abɔ oko, ke mi tɛyi ŋukɔn viɖe, y mɔ jlɛ ke bo kpɔn abɔ fɔtɔn. ²⁹ Ke ye vɔ nɔ lɔ byo tɔjihun míatɔn mɔ na ve gba do ɛkpɛn ɖaxo ɖe wu, ,ye sɔ ogangbaja ɛnɛ sɔ do ɛxu lɔ mɛle godo na tɔjihun lɔ, bo ba nɔ taŋu tun ŋkɔ ni mɔ ya wu ɖe. ³⁰ Vɔ tɔjihunkuntɔ lɛye bo ba nɔ naa si le tɔjihun lɔ mɛ. I wɛ ye ɖe tɔjihun ovi lɔ jete do otɔ lɔ mɛ; bo kan ojo tun hiye mɔ va ve ɖo gangbaja do ŋukɔn na tɔjihun lɔ nɔ. ³¹ Pɔlu bo lɔ na sɔjaga lɔ kpo sɔja lɛye lɔ byo:«Na mɛ xinye hɔn nɔte le tɔjihun lɔ mɛ, miye mi hɔn kpewu na gan.» ³² I wɛ sɔja lɛye gbokan na tɔjihun vitwe lɔ, bo jo-e do, ɛxu bo dɔn-ɛ do sɔn. ³³ Keŋu gbɔxwe na ŋukɔn na do ɖe, Pɔlu do kpakpa lanmɛ na ɖokpo-ɖokpo yetɔnye, ye mɔ do kpewu a mɔ ɖu nu, e bo lɔ na ye lɔ byo:«Egbe wɛ e kpe nyihɔn wenɛ na mí do le omɔkpinkpɔn mɛ xovɛ-xovɛ, mí ́ko ɖu nuti. ³⁴ E xin wutu ko byɔ mi nɔ lɔ byo miye mɔɔ ɖu nu, ɖo e hyan na mi a do nɔ ɛgbɛ. Mɛ ti hɔn na bu oɖa ke le ota ni-i we ɖokpo tete le e mɛ le mi a mɛ.» ³⁵ Ke Pɔlu lɔ oxo xin lɛye vɔ, e sɔ kpɔnnɔ bo do ɛkpɛ naa Mawu le mɛ biseseye we ŋumɛ, bo kan-ɛ bo jɛ ɖuɖu ji. ³⁶ I wɛ ayixa jɛ do na ye mɛ bisese, ye bo xwi onuɖuɖu. ³⁷ Mí mɛ sandi owe ota acowe kpo atrekpo (276) wɛ le tɔjihun lɔ mɛ. ³⁸ Ke gomi gɔ mɛ ɖokp-ɖokpo vɔ, ye sɔ ɛjinukunye we agbanye sɔ flɛn do otɔ lɔ mɛ, na tɔjihun lɔ a do woɖo. ³⁹ Kena ŋukɔn va ɖe, tɔjihunkuntɔ lɛye hɔn mɔ nyɔ fi kena mi va le can, vɔ ye bo kpɔn byo mí mɔ ɖyɛ nyidan xuxu mɛ do ofi ɖe, ye bo mɔ kpɔn ɛxuta ɖe, i wɛ ye sɔ gbeta byo, na hiye amɔ kun tɔjihun lɔ do yi blɛ lɔ. ⁴⁰ Ye bo tun okan na ogangbaja lɛye, bo jo ye do ɛxu mɛ, zɔnɖokpo ye bo mɔ tun okan na tɔjihun lɔ we okɔjɔnu lɔ. E xin we godo ye do avɔ ɖaxo ɖe do ŋukɔn na tɔjihun lɔ, jɛhɔn bo do dɔn ye do sɔn yi ɛxu lɔ to nɔ. Vɔ ⁴¹ tɔjihun lɔ bo ve do ota kɔgudu mɛ, ɛxu bo gba do e wu nɔ aɖusi-amyɔ. Tɔjihun lɔ we ŋukɔn bo jan ci kɔgudu lɔ mɛ, ɛxu lɔ we zingidi bo hɔ godo na tɔjihun lɔ. ⁴² Sɔja lɛye bo wasi tito nɔ a do hun ogantɔ lɛye, na ɛmɛ ɖe ko mɔ do lin otɔ bo a do si nɔ. ⁴³ Vɔ sɔja kanwekoga lɔ ɖo jlo bo ba na hwlɛn Pɔlu gan, e bo gbɛ na ye lɔ byo ye ni mɔ koo zɔn do tito xin ji. E mɔ lɔ na mɛ ke nyɔ otɔ linlinye tun ye mɔɔ zɔn jɛ otɔ lɔ mɛ tantɛn, a mɔɔ siin ageji. ⁴⁴ Ɛmɛ gbokpweye mɔ jɛ ɛtɛ na ye, a mɔɔ xɛ oxwlɛkpoye alo tɔjihun lɔ we kinkanye ji. Ɖemɔ lɔ wɛ ye hɛn ɖo gbɔɔn na ɛmɛ bisese do tɔn jɛ ageji, nuti ko wa mɛ ti.