¹ Ke mí gan le fɔku xin lɔ mɛ vɔ, mí va se byo otɔdodomɛ we oto xin lɔ, mɔ nɔ nyi Maluta. ² Oto lɔ mɛ tɔye, yi mí kpo dɔmɛ nywɛ kpodo taŋu, ye bo va bɔ ozo ɖaxo ɖe na mí, mí bo lɛdo-e, ɖo oju xwi jija vivɔ bo ci ɛmɛ nɔ. ³ Pɔlu bo bɛ onu xuxu ɖɛye na kɔn do ozo lɔ mɛ ja, kpoŋ, zɔnɖkpo, zakpata ɖe jan wɛ tɔn le onukpɔ lɔ mɛ ɖo zozo gblɔ-ɛ e bo kunkpla alɔ ni-i. ⁴ Kena Malutatɔye kpɔn zakpata lɔ, e bo kunkpla alɔ na Pɔlu, ye jɛ lilɔ ji na yeɖeye lɔ byo:«Dandanmɛ dahwe xin ɛmɛhutɔ ɖe jan wɛ e na nyi, ɖo e gan le ɛxu si co yɛhwe ke we kojoɖiɖo ko ba na jo-e do ɛgbɛ.» ⁵ Vɔ Pɔlu bo mimi zakpata lɔ do ozo lɔ mɛ. Onu ti ko wa i tete. ⁶ Ye bo bu-i nɔ tun Pɔlu mɔ na tɛ wɛ ha alo e mɔ na jɛnyi a mɔ ku zɔnɖokpo wɛ ha. Vɔ kena ye nɔte kaka gbɔɔn na ganxixo susu, onunyinyla ti ko wa Pɔlu, susu yetɔnye va ɖɔli, ye bo lɔ byo yɛhwe mɛ e mɔ nyi. ⁷ Le blɛ lɔ, nyidan ɖeye le bo nyi oto lɔ mɛ tɔ ye we ga tɔn. Oga lɔ bo nɔ nyi Publiwisi, e bo yi mí ɖi hwadweye ha, bo yi mí do oxwe etɔngbe na nyatɔn. ⁸ Publiwisi lɔ otɔ bo le adɔn jɛn ji, vivɔ bo cɔ-ɛ, e bo wɛn nɔ sinsyɔn. Pɔlu bo va yi bo ve kpɔn-ɛ bo xo ɛɖɛ ni-i bo ɖo alɔ ta ni-i adɔn lɔ bo gɔ ni-i. ⁹ Do exin lɔ wu, adɔnnɔ ke gbɛ le otolɔmɛye bisese va Pɔlu kɔn, ye bo kpɔn adɔngigɔ. ¹⁰ Ye nɔ wlebyo na mi taŋu, ke mí ba va sɔn nɔ, ye na mí onu ke we ohyan mí ɖo le omɔ zinzɔn lɔ mɛye bisese wu mí. ¹¹ Osun atɔn godo mí bo ɖyɛ tɔjihun ɖe ke sɔn Alɛsandri mɛ. Tɔjihun xin lɔ bo nɔ Maluta lɔ le vivɔ hwenu. Ye bo wlan do e wu lɔ byo: hohovi. ¹² Mí va yi jɛ Silakwisi bo nɔ blɛ na ŋukɔnɖiɖe atɔn. ¹³ Ke mí lɛ le blɛ, ɛxuto wɛ mí gbɔn nɔ gbɔɔn do ve jɛ Hlejyo. Le ŋukɔnɖegbe etɔn, jɛhɔn cite sɔn afɔgbe i wɛ le ŋukɔɖiɖe owegblamɛ mí ve jɛ Puzɔlu. ¹⁴ Mí kpɔn nɔvi xɔsetɔ ɖeye, le blɛ lɔ ye bo ɖe kuku na mí na mí do nɔ ye kɔn kɔsiɖa ɖokpo. Ke mi wasi ɖo do yi Hlɔma xɛn xin. ¹⁵ Nɔvi xɔsetɔ ke le Hlɔma bo se tun mí mɔ gbɔnnɔ ye, ye va kpe mí le kaka ofi ke ye nɔ yɔ tun tunApwisi we dogba ji kpodo jonɔyitɔ aatɔn lɛye. Kena Pɔlu kpɔn ye, e do ɛkpɛ na Mawu, bo mɔ ɖo akɔnkpinkpan. ¹⁶ Ke mi va jɛ Hlɔma, ye ɖe mɔ na Pɔlu, e mɔ do nɔ ovɔ le oxwe ɖe gbe, sɔja ɖokpo mɔ cɔ-ɛ nɔ. ¹⁷ Nyatɔngɔgbe etɔn, Pɔlu kple Jwifu ŋukunsinlɛjiye bo lɔ na yue lɔ byo:«Nɔvyee, ko hɔn wa nuti do togun miatɔn alo kpan ŋukɔn akɔta mia dagbwɔyetɔnye, ganke ye bo wle-o le Jeluzalɛmu, bo sɔ-ɔ sɔ jo na Hlɔmatɔye. ¹⁸ Kena ye kan oxo se wu vɔ, Hlɔmatɔ lɛye jlo na jo-o do, ɖo ko hɔn wa onu ti ke jɛ na oku. ¹⁹ Vɔ Jwifuye bo gbɛ, ko bo gbɛ va yɔ ɛhwɛ lɔ do xɔlu ɖaxo Hlɔmatɔn kɔn, susu tɛye ko nyi byo ma do ɛhwɛ na togun tɛye. Onu ke wanu na ko do byɔ byo ma mɔ kpɔn mi xɛn xin. ²⁰ Ɛmɛ kena Izrayɛli vikpɛye le omɔ kpinkpɔn mɛ na wɛ dɔn na ko do le caba kiye mɛ.» ²¹ Ye boɖo ewu ni-i lɔ byo:«Mí hɔn yi wema ɖe sɔn Jude do wu we. Mía nɔvyɔ Jwifu ɖe ko sɔn blɛ danhɔn do va ɖo gbe ɖe alo do va lɔ oxo nyinyla ɖe do wu we can. ²² Vɔ, mí ba na se le nuwe, onu ke itete o lin do sinsɛngbɛ tɔwe xin lɔ wu lɔ, ɖo mí nyɔ-ɛ tun le fi bisese ɛmɛye nɔ cite kpan ŋukɔn wu-i.» ²³ Ye bo ɖo azan ni-i. Kena azan lɔva sɔgbe, ye mɛ susu bo va ekɔn le ofi kena e zɛ lɔ. Sɔn kɛklɛ gbɔɔn do yi hwedo, Pɔlu bo ɖe onuye we gɔnmɛ na ye nɔ, bo ɖe kunnu do Mawu we xɔluɖuɖu lɔ wu nɔ. Do gbɔn Mɔyizi we osɛn lɔ kpodo oxolɔɖenyitɔ Mawutɔnye we wemaye mɛ, e bo ɖexlɛ byo oxo kena ye mɔ se do Yesu wu ye mɔ nyi xojɔxo. ²⁴ Ɛmɛ ɖeye kando eji, vɔ ɛmɛ ɖeye ko kan do e ji. ²⁵ Hwekenu na ye sɔn nɔ, mí ma bo ɖyɛ ye mɛ. Pɔlu bo lɔ na ye kpoŋu lɔ byo:«Ɛhwɛ jɔ na Gbigbɔ Kinkwɛn na e do lɔ na mia dagbɔwɔye dogbɔn oxolɔɖenyitɔ Mawutɔn Ezayi ji tun: ²⁶ «Yi togun xin kɔn, o mɔ byo:m mi na se kpodo oto miatɔnye kpo ganji vɔ mi hɔ se gɔnmɛ ni-i nɔ; ŋukunsin na le te na mi ganke, mi ko va kpɔnnu nɔ. ²⁷ Ɖo togun xin we ayixa ku, ye tu oto yetɔye, bo myɔ ŋukunsin yetɔnye, na ŋukunsin yetɔnye ko do kpɔn onu nɔ, oto yetɔnye ko do kpɔn onu nɔ, oji ye yetɔnye ko do se nugɔnmɛ nɔ, na ye a do va trɔ ji mɛ, ko mɔ do va gɔ adɔn na ye. ²⁸ Mi nyɔ-ɛ lɔ byo: Mawu mɔ sɔ hlɛngan we oxo etɔn ke le lɔ mɔ sɔ ɖdan ɛmɛ ke mɔ hɔn nyi Jwifuye. Ye lɛye maa va se-e.» ²⁹ Ke Pɔlu lɔ xo xin lɛye vɔ, Jwifu lɛye bo sɔn, bo va dɔn onu kpo yeɖeye nɔ tete. ³⁰ Pɔlu bo nɔ ofi kena e xaya lɔ na oxwe blɛbu. E bo nɔ yi ɛmɛ ke nɔ va kpɔn-ɛ nɔ ye bisese. ³¹ E mɔ jla xɔluɖuɖu Mawutɔn lɔ nɔ, a mɔ kplan onu wu ɛmɛye nɔ do Xwetɔ lɔ Yesu KLisu lɔ wu kpodo ojiɖiɖe kpo, onu ti ko nɔ xɛ omɔnu ni-i.