¹ Xɔlu Aglipa lɔ na Pɔlu lɔ byo:«Omɔ ɖiɖe le na we o mɔ do lɔxo a bo do ɖexlɛ tun ɛhwɛ tɔwe mɔ jɔ.» I wɛ Pɔlu kɔ alɔ etɔn, bo va lɔ xo kiye a do ɖe xlɛ tun ɛhwɛ hetɛye mɔ jɔ: ² «Xɔlu Aglipa ojijɔ-ɔ na ko na do lɔ xo le ŋukɔn tɔwe le egbe a do ɖexlɛ byo ɛhwɛ tɛye mɔ jɔ, do ɛhwɛ kena Jwifuye mɔ do na nɔ ye bisese wu, ³ ɖo Jwifuye we akɔtanuye kpodo oxo kiye kena ye nɔ dɔn nɔ ye bisese, o nyɔ ye ganji. Ko ɖe kuku na we tun, i mɔ do agbɔxo a mɔɔ ɖ'oto wu. ⁴ Ɛgbɛ kena ko zan sɔn hwanjɛvimɛ tɛye gbɔɔn, sɔn titɔ eji gbɔɔn, le otogun tɛye mɛ le Jeluzalɛmu, Jwifuye bi wɛ nyɔ-ɛ. ⁵ Sɔn san xoxoxo gbɔn wɛ ye nyɔ-ɔ, na ye ba, ye mɔ ɖe kunnu byo ko mɔ nɔ Falizitɔye we ogbɛ mɛ. ⁶ I wɛ syɛ ye do ɛhwɛ na nɔ, ɖo omɔ ke ko kpɔn na atanŋu ke na Mawiu kan na mí a dagbwɔye nɔ wu, ⁷ togun míatɔn we akɔta weve lɛye can bo kpɔn omɔ na atanŋu kinkan xin lɔ we cicɛ nɔ, ye mɔ sɛn Mawu nɔ kpo zozo kpo le keklo kpo azan kpo. Xɔlu Aglipa, oxo xin lɔ wu wɛ Jwifuye o do ɛ hwɛ na nɔ do. ⁸ Ŋunɛ dɔn na ɛmɛ ti hɔn do le mi mɛ Jwifuye mɛ, bo kan do eji byoMawu mɔ kpewu mɔ na fɔn ɛmɛ kukuye sɔn oku? ⁹ Bo tete, ko bu susu san byo ko mɔ ɖo na wa ahwan gbɔn walɔ bisese mɛ kpan ŋukɔn Yesu Nazalɛtitɔn we nyikɔ. ¹⁰ Onu xin lɔ wɛ ko wa le Jeluzalɛmu. Do gbɔn acɛ kena ko yui le avɔsantɔ Mawu Mawutɔn ɖaxoye si, bo tete, ko wle xɔsetɔ susu do gankpamɛ. I wɛ nz ye ba hu ye nɔ, ko nɔ na gbe. ¹¹ Ganmɛ-ganmɛ ko nɔ gbɔn Jwifuye we okpletyɔnye, a bo do dɔn oto na ye, bo nɔ zin ye ji na ye a do kɔn acɔn do Yesu wu. Aɖi nɔ wlo do ye wu taŋu, ko mɔ ɖe fun na ye gbɔɔn a mɔ yi toxoye mɛ le oto godo. ¹² Emɔke wɛ ko yi Damasi nɔ Mawu we avɔsantɔ ɖaxoye bo na acɛ wu-u taŋu, bo sɔ odan sɔ do asi na. ¹³ Le ganweve mɛ emɔha, Xɔlu, le hwekenu na ko le mɔji, ko kpɔn kinklɛn ɖe kena sɔn jiŋukunsin e bo ta lilɛ do bo kpo mɛ ke na zɔn lɛye. Kinklɛn xin lɔ bo syǝnxu hugan wu ohwe we kinklɛn. ¹⁴ I wɛ mí mɛ biseseye ve jɛ nyi, ko bo va se ogbe ɖe, e bo lɔ na nɔ le Heblegbemɛ nɔ tun lɔ byo: "Sɔlu, Sɔlu, ŋunɛ dɔn na o do ɖe ofun na nɔ? E na syɛnxu do we na o na do tri oto le ŋukɔn na ɖi onyi ke syɛnta nɔ le ŋukɔn na kplɔtɔ etɔn we otin tintrɔn ha." ¹⁵ Ko bo kanse lɔ byo: "Mɛ nɛ lɛ o nyi, Xwetɔ?" I wɛ Xwetɔ lɔ lɔ na lɔ byo: "Bo wɛ nyi Yesu ke o ɖe fun na nɔ lɔ. ¹⁶ Vɔ, ganke, fɔn, a bo nɔte; ɖo onu ke dɔn na ko do ɖe ɖiye xlɛ we xɛn: Ko can we o mɔ do nyi odansɔvi kpodo kunnuɖetɔ na onu ke na ko ɖe sɔ xlɛ we ye. ¹⁷ Ko na hwlɛn we le mɛ ke nyi Jwifuye kpo mɛ ke hɔn nyi Jwifuye we otogunye si. Ko bo ɖo we ɖodan otogun xin lɛye kɔn nɔ. ¹⁸ Omɔ do hun ŋukunsi na ye, a mɔ trɔ okɔ na ye le vuvlu mɛ a do yi kinklɛn mɛ. Ye mɔ lɛ le satana we acɛ gɔ a do va Mawu kɔn. E nyi ye kan do jiye, ye mɔ kpɔn sisɔkɛ na onunyinyla yetɔnye, a bo va nyi cinnɔɖutɔ kpo xɔsetɔye." ¹⁹ I wɛ dɔn xɔlu Aglipa, ko hɔn gɔn onu ma se na onu kena Maawu ɖe xlɛ wu lɔ nɔ. ²⁰ Vɔ ko bo jla Mawu we oxo lɔ na Damasitɔye gbɔxwe gbo va lɔ na Jeluzalɛmutɔye can, bo mɔ ve lɔ na mɛ ke na le Jude we kansinmɛye bisese ye kpodo ɛmɛ ke hɔn nyi Jwifuye can; Ko bo lɔ na ye byo ye mɔ ɖɔli jijɔ a mɔ lɛkɔ va Mawu kɔn; A mɔɔ ɖe afɔ adodweye, a mɔɔ do ɖexlɛ lɔ byo hiye mɔ ɖɔli jijɔ. ²¹ Onu ke dɔn na Jwifuye do wle-o le Mawu we oxwe lɔ gbe xɛn xin; ye bo do hɔnhlɔn nɔ a do hu-u. ²² Vɔ, do gbɔn Mawu we alɔgɔ mɛ, ko le afɔte nu gbɔɔn do va jɛ egbe, bo nɔ ɖe kunnu nɔ, le ɛmɛ kpaaye kpo mɛjɔmɛye we ŋukɔn nɔ, ko ko nɔ lɔ oxo ti zɛ gbɔn oxo kena oxolɔɖenyitɔ Mawutɔnye kpodo Mɔyizi o lɔ san byo, ye mɔ na jɔ ye wu. ²³ I wɛ nyi lɔ byo Klisu lɔ na ɖu aya. E bo na nyi ɛmɛ tantɛntɔn kena fɔn sɔn oku le ɛmɛ kukuye mɛ, e bo ɖo na jla kinklɛn lɔ na ɛmɛ ke nyi Jwifuye kpodo ɛmɛ ke hɔn nyi Jwifuye.» ²⁴ Ke Pɔlu o lɔ oxo ɖemɔha nɔ a do ɖexlɛ tun ɛhwɛ hetɛye mɔ jɔ, otoga Fɛsitusi bo d'axwa bo lɔ byo:«Pɔlu o bɛ ohǎ; onunynyɔ tɔwe ɖaxo lɔ do oha wu we.» ²⁵ Pɔlu bo ɖe ewu ni-i lɔ byo:«Ɛmɛɖaxo Fɛsitusi ko hɔn bɛ oha mɔ, vɔ, oxo ke sɔgbe kpodo xojɔxo lɔ kpo wɛ ko lɔ nɔ. ²⁶ Xɔlu Aglipa nyɔ oxo ke ko lɔ nɔ xin lɛye bi, i wɛ dɔn na ko do lɔ-ɛ no kpodo kandeji kpo le ŋumɛ etɔn. Ko bo kandeji tun onu ti mɔ hɔn le na e mɔ hɔ nyɔ, ɖo onu lɛye hɔn jɔ le hwihwlatɛnxo. ²⁷ Xɔlu Aglipa, hɔn kan do oxo kena oxolɔ ɖenyitɔ Mawutɔnye lɔ ji wɛɛ? Ko nyɔ-ɛ byuo i mɔ kan do e ji.» ²⁸ Xɔlu Aglipa bo lɔ na Pɔlu lɔ byo:«O bu-i o na na na ko na trɔ zun Klisutɔn le ganxixo oviɖe mɛ wɛ haa? ²⁹ Pɔlu bo lɔ ni-i lɔ byo: E drɔn ganxixo viɖe o, alo ganxixo susu o, ko byɔ Mawu nɔ tun i kpodo mɛ ke le bwɛ egbe bo ɖo oto wu nɔ ye bisese a mɔ va nɔ ke ko le ɖo ha vɔ, mi ko na nɔ caba mɛ ³⁰ Otoga lɔ kpodo otokplɔtɔ kpodo Belenisi kpodo ɛmɛ ke le onyi xinnɔ le blɛ lɛye, bisese cite. ³¹ Ye bo tɛyi zɔga, bo va lɔ na yeɖeye lɔ byo: Dahwe xin lɔ hɔn wa onu ti ke jɛ na oku alo caba mɛ ni nɔ.» ³² Aglipa bo lɔ na Fɛsitusi lɔ byo:«E hɔn do lɔ byo xɔlu ɖaxo Hlɔmatɔn mɛ mɔ na ɖɔ ɛhwɛ hetɛye wɛ, o mɔ jo-e do.»