¹ Fɛsitusi va kansin ke mɛ na Sezale we toxo le; ŋukɔɖiɖe atɔngɔgbe etɔn, e lɛ le Sezale lɔ bo yi Jeluzalɛmu. ² Avɔsantɔ ɖaxoye kpodo Jwifuyee we ɛmɛ ŋukunsinlejiye, va kpɔn-ɛ bo do jɛ Pɔlu we ɛhwɛ ni-i; ³ Ye bo ɖe kuku ni-i nɔ tun ni mɔɔ wasi dɔmɛ nywɛ na hiye a mɔ trɔkɔ na Pɔlugbɔɔn a mɔɔ do va Jeluzalɛmu, e xin, ye bo bla Pɔlu lɔ we gbe a do hu-i le mɔji. ⁴ Vɔ, Fɛsitusi bo lɔ na ye tun Pɔlu mɔ le gankpamɛ le Sezale, hetete can mɔ na lɛkɔ sɔn le azan viɖe godo. ⁵ E bo mɔ lɔ na ye lɔ byo:«E ny na dahwe xin lɔ wa onu nyinyla ɖe, hun oga miatɔnye ni bo xodwe a do va yi Sezale lɔ, a bo do ve do ɛhwɛ ni-i le blɛ.» ⁶ Fɛsitusi bo nɔ ye jkɔn na azan atrotɔn do yi owo emɔha bo va trɔ kɔ siin Sezale. Ŋukɔnɖegbe etɔn, e yi tɛnxo le ɛhwɛɖɔxwe lɔ, bo byɔ byo, ye mɔɔ ve Pɔlu do va; ⁷ Ke Pɔlu va, Jwifu ke sɔn Jeluzalɛmuye, lilɛ do-e, bo do ɛhwɛ nyinyla susu ni-i, vɔ ye hɔn kpewu bo exlɛ tun ɛhwɛ xin lɛye mɔ nyi xojɔxo. ⁸ Pɔlu o hwlɛn ota na eɖe nɔ bo lɔ byo:«Ko hɔn wa onunyinyla ti, ko ko gba Jwifuye we osɛn ti, ko ko jɛ agɔ ɖe do Mawu xwe lɔ gbɔɔn do jɛ do xɔlu ɖaxo Hlɔmatɔn lɔ can.» ⁹ Vɔ, kena Fɛsitusi ba na nyi ɛmɛ nywɛ le Jwifuye kɔn, e va kanse wu Pɔlu tun:«O ba na yi Jeluzalɛmu na ye a do vee ɖɔ ɛhwɛ tɔwe le bo-ete we ŋumɛ?» ¹⁰ Pɔlu bo ɖo ewu lɔ byo:«Xɔlu ɖaxo Hlɔmatɔn we ɛhwɛɖɔxwe wɛ ko le, blɛ lɔ wɛ ye ɖo na ɖɔ ɛhwɛ na le. Ko hɔn jɛ agɔ ti do Jwifuye, ɖi kena itet o nywɛ ganji ɖo ha. ¹¹ Na ko jɛ ɛhwɛ mɛ xojɔxo, bo wa onu nyinyla ɖe kena jɛ na oku, kɔn gbɛ oku, vɔ, na xojɔxo ti hɔn le ɛhwɛ kena mɛ xinye o do na nɔ ye mɛ, ɛmɛ ti hɔn ɖo acɛ na do sɔ-ɔ sɔ do asi na ye. Ko byɔ byo, xɔlu ɖaxo Hlɔmatɔn, i tete a mɔ ɖɔ ɛhwɛ tɛye. ¹² I wɛ ke Fɛsitusi lɔ xo kpodo aɖaŋuɖetɔ etɔnye vɔ, e lɔ byo:«O byɔ byo xɔlu ɖaxo Hlɔmatɔn mɛ mɔ na ɖɔ ɛhwɛ tɔwe, i wɛ dɔn o na yi xɔlu lɔ we ŋukɔn.» ¹³ Azan vide va yi we godo, xɔlu Agripa kpodo nɔvyɔ nyɔnusi Belenisi, va Sezale a do va ba Fɛsitusi kpɔn. ¹⁴ Kena ye nɔ blɛ lɔ na azan susu, Fɛsitusi lɔ Pɔlu we oxo na xɔlu lɔ, bo lɔ byo:«Dahwe ɛ le bwɛ Felisi bo jo-e do gankpamɛ. ¹⁵ Hwekenu na ko yi Jeluzalɛmu, avɔsantɔ ɖaxoye kpodo Jwifuye we otomɛhyɔnye va jɛ i we ɛhwɛ na, na ma do do ɛhwɛ ni-i. ¹⁶ Ko bo ɖo ewu na ye lɔ byo, e mɔ hɔn le Hlɔmatɔye we walɔ mɛ byo ye a mɔ ɖɔ oku we ɛhwɛ na mɛɖe, ke ɛmɛ lɔ kpo ɛmɛ ke do ɛhwɛ ni-i nɔ lɛye kpo hɔn kpe ŋumɛ, ye ɖe omɔ ni-i, e mɔ do lɔ xo e mɔ do hwlɛn ota na eɖe le ɛhwɛ ke ye do ni nɔ ye mɛ gbɔxwe. ¹⁷ I wɛ dɔn hwekenu na ye va bwɛ kpɔkpɔ, ko ɖo ŋukunsin do ewu; vɔ ŋukɔnɖegbe etɔn, ko bo na gbe tun ye ni mɔɔ kplɔ dahwe xin lɔ do va. ¹⁸ Kena ye va kple, ɛhwɛdo-ɛmɛtɔ etɔnye hɔn do ɛhwɛ nyinyla ɖe ni-i ɖi kena ko bu-i ɖo nɔ ha. ¹⁹ Onu wɛ ye dɔn kpo-e nɔ kpoŋu do sinsɛn yetetetɔnye wu, kpodo dahwe ɖe ke ye nɔ yɔ tun Yesu wu. Dahwe xin lɔ bo o ku , vɔ Pɔlu bo lɔ nɔ tun e mɔ le ɛgbɛ. ²⁰ Kena ko hɔn nyɔ oxo kena ko na lɔ do oxo xin lɔ wu, ko bo sɔ ɖo ŋumɛ na Pɔlu tun na e ba, e ma mɔ yi Jeluzalɛmu na ye a mɔ do ɖɔ ɛhwɛ etɔn lɔ le blɛ. ²¹ Vɔ, Pɔlu bo yɔ ɛhwɛ lɔ do xɔlu ɖaxo Hlɔmatɔn kɔn, bo byo oxo hetɛye ni mɔ nɔ nyi gbɔɔn na xɔlu ɖaxo lɔ a mɔ ɖe gbeta ɖe tɔn do ewu. I wɛ wanu ko do byo ye ni mɔɔ tu-i do gankpamɛ gbɔɔn do jɛ hwekenu na ko mɔ na sɔ-ɛ sɔ ɖodan xɔlu ɖaxo lɔ.» ²² I wɛ Aglipa lɔ na Fɛsitusi lɔ byo:«Bo-ete can ba na se dahwe lɔ we numɛ gbe.» Fɛsitusi bo ɖo ewu ni-i lɔ byo:«Swɛ o na ɖo oto wu-i.» ²³ Ŋukɔnɖegbe etɔn Aglipa kpo Belenisi kpo va, ye bo yi ye we jonɔ kpo yɛyi kpo, ye bo ɖyɛ ɛhwɛɖɔxwe lɔ, ahwangaye kpodo ɛmɛjɔmɛ otolɔ mɛ tɔnye, kpo bo xodo ye. ²⁴ I wɛ Fɛsitusi lɔ, lɔ byo:«Hɔlu Aglipa kpodo ɛmɛ ke le bwɛ kpo mi biseseye, mi kpɔn dahwe ke nɔ, Jwifuye we otogun ye bisese wɛ va jɛ i we ɛhwɛ na-a, sɔn Jeluzalɛmu gbɔɔn va jɛ bwɛ ke can, bo do axwa nɔ byo dahwe ke mɔ hɔn mɔ jɛ na nɔ ɛgbɛ. ²⁵ Le blɔ kɔn ye ko kpɔn byo e mɔ hɔn wa onu ɖe ke mɔ jɛ na oku. Vɔ kena elɔ tete lɔ tun xɔlu ɖaxo Hlɔmatɔn mɛ mɔ na ɖɔ ɛhwɛ hetɛye, ko sɔ gbeta a bo do ɖo-e ɖodan ekɔn. ²⁶ Kena ko hɔn ɖo oxo tututu ti bo na wlan ɖodan xɔlu ɖaxo lɔ do ɛhwɛ etɔn lɔ wu, i wɛ wanu na ko do yɔ-ɛ do va ŋukɔn miatɔn le taji ko yɔ-ɛ do va ŋukɔn tɔwe xɔlu Aglipa, e xin na mi kan oxo se wu-i vɔ, ko mɔ do kpewu a kpɔn oxo ɖe a mɔ wlan. ²⁷ Ɖo ko kpɔn tun e mɔ hɔn sɔ gbe na ye mɔ na do sɔ ogantɔ sɔ ɖodan ɛmɛ, ye ko na kpewu a wlan ɛhwɛ kena ye do ni-i nɔ ye.»