¹ Ŋukɔnɖegbe atɔɔn gɔ gbe etɔn we godo, avɔsantɔye we ga Ananyasi kpodo otomɛhyɔn ɖeye va Sezale we toxo lɔ mɛ, kpodo ɛhwɛyidotana-ɛmɛtɔ ke ye nɔ yɔ byo Tɛtulusi. ² Ye bo va jɛ Pɔlu we ɛhwɛ na otoga Felisi. Ye bo yɔ Pɔlu do va, i wɛ Tɛtulusi lɔ jɛ ɛhwɛ dido ni-i ji ɖ'eleha: ³ «Ɛmɛ ɖaxo Felisi, i wɛ dɔn na mí do ɖo fifa adodwe, do gbɔn onu nyinywɛ tɔwe mɛ ɖiɖɔliye va oto míatɔn mɛ. Ɛmɛ ɖaxo Felisi, ofi ɖekpokpwe ke mi nɔ yi le oganɖekpokpwe mɛ, mi nɔ yi onu xin lɛye we nyɔna, mi bo do ɛkpɛ etɔn na we nɔ. ⁴ Vɔ, na ko hƥɔn do yi ganmɛ susu le siwe nɔ, ko ɖe kuku na we tun le dɔmɛnywɛ tɔwe mɛ, mɔɔ ɖo oto wu mí na ganxixo viɖe. ⁵ Mi kpɔn tun dahwe ke oxu wɛ enyi bo xa ohlo na togun lɔ. E nɔ hɛn hunnyahunnya va Jwifu ke le ɛgbɛ bi mɛ mɛ. I wɛ nyi oga na Nazalɛtitɔye we sinsɛngbɛ. ⁶ E trɛ jɛ gbagba na do ɖu su na Mawu we oxwe lɔ, mí bo wle-e. [Mí jlo na ɖo kojo ni-i ɖi kena osɛn míatɔn lɔ-ɛ ɖo ha, ⁷ vɔ, ahwanga Lisyasi bo va dɔn-ɛ tɛ le alɔmɛ na mí kpo hɔnhlɔn kpo. ⁸ E bo lɔ na ɛmɛ ke o do ɛhwe na Pɔlu nɔ lɛye tun ye ni mɔɔ va yi kɔn we] O hɛn o na kan oxo wu itete se , e xin o mɔ do nyɔ-ɛ tun ɛhwɛ ke mí mɔ do ni-i nɔ lɔ xojɔxo mɛ.» ⁹ Jwifuye bisese bo yi gbe do oxo kena Tɛtulusi lɔ lɔ ji byo xojɔxo mɛ. ¹⁰ Kena otoga lɔ na ogbe wu Pɔlu tun ni mɔ lɔ xo, e yi oxo bo lɔ lɔ byo: «Ko nyɔ-ɛ byo oxwe nɛmu ɖe xɛn wɛ o ɖu ɛhwɛɖɔtɔ le oto ke mɛ, E xin wu wɛ ko na lɔ xo kpodo kandeji kpo a do ɖe xlɛ-ɛ lɔ byo ɛhwɛ tɛye mɔ jɔ. ¹¹ Na o ba o mɔ kan do se na oxo ke: Nyɔweve xɛn gbɔn wɛ ko va Jeluzalɛmu a do va sɛn. ¹² Ɛmɛ ti hɔn kpɔn le Mawu we xwegbe alo Jwifuye we okpletyɔn alo toxo lɔ mɛ ko bo dɔnnu alo ko bo do hunnya-hunnya ɛmɛye mɛ nɔ. ¹³ Ye hɔn kpewu na ɖe xlɛ-ɛ tun ɛhwɛ ke na ye mɔ do na nɔ syɛ mɔ nyi xojɔxo. ¹⁴ Vɔ ko nyɔ-ɛ le ŋumɛ tɔwe lɔ byo: Mawu míadagbwɔyetɔn wɛ ko sɛn nɔdo gbɔn Xwetɔ Yesu lɔ we omɔ ji. Omɔ xin lɔ wɛ ye yɔ nɔ tun sinsɛngbɛ bu. Oxo ke ye wlan do osɛn lɔ mɛ ye bisese kpodo kena oxolɔɖenyitɔ Mawutɔnye wlan ye bisese blɔ ko kan do bi ji. ¹⁵ Ko bo kpɔn omɔ na Mawu nɔ, yee can ghba bo kpɔn omɔ na Mawu nɔ tun: Mawu mɔ na fɔn ɛmɛ jijwɛye kpo ɛmɛ ke hɔn nyi ɛmɛ jijwɛye sɔn oku. ¹⁶ I wɛ dɔn bo can ko nɔ jɛ tagba na ayixa tɛye ni ka do va do ɛhwɛ na le Mawu kpo gbɛtɔye we ŋukɔn. ¹⁷ O0xwe nɛmu ɖe xɛn na ko do lɛ le Jeluzalɛmu, i wɛ ko gbɔn va a mɔ do va kpedo oto tɛye wu a bo mɔ do wasi onu nina na Mawu. ¹⁸ Ke e nyi ɖo na ye do va kpɔn-ɔ xɛn xin, blɔ ke o sra ɛwu le Mawu we oxwe lɔ gbe. Ɛmɛ ti ko do agunto gbɔɔn na hunnya-hunnya ɖe do le can. ¹⁹ Vɔ Jwifu ɖeye ke sɔn Azi we kansinmɛ ye, bo le blɛ. Na ye na do do nuɖe we ɛhwɛ na-a wɛ, Jwifu xin lɛye wɛ na va ŋukɔn tɔwe a mɔ do do ɛhwɛ na. ²⁰ Alo ɛmɛ kena le bwɛ ye, na onunyin yla ɖe le, ko bo hu ɛhwɛ etɔn le hwekenu na ko yi ɛhwɛɖɔtɔ ɖaxoye we ŋukɔn, ye ni bo lɔ. ²¹ Tanyɔ oxo kena ko do axwa bo do lɔ le ye mɛ jan wɛ ye na do do ɛhwɛ na, ko lɔ lɔ byo: «Do ɛmɛ kukuye we finfɔn sɔn oku wu, wɛ ye do do ɛhwɛ na nɔ le egbe le ŋumɛ miatɔn.» ²² Otoga Felisi nyɔ Xwetɔ lɔ we omɔ ganji. E bo nya ye bo lɔ lɔ byo:«Na ahwanga Lisyasi va, ko mɔ ɖɔ ɛhwɛ miatɔn.» ²³ E bo va ɖegbe na sɔja kanwekoga lɔ tun ni mɔ hɛn Pɔlu do gankpa mɛ, vɔ a bo na vivo wu-i, a bo ɖe omɔ na hadwe etɔn na i a nɔ kpe do e wu. ²⁴ Ke azan viɖe va yi vɔ, otoga Felisi kpodo osyɔ kpo bo va. Osyɔ lɔ bo nyi Jwifu, ye bo nɔ yɔ-ɛ tun Drusiyi. Otoga lɔ bo ɖo ɛmɛ ɖodanye tun ye ni mɔɔ ve yɔ Pɔlu do va. E bo ɖo oto wu oxo kena Pɔlu o lɔ nɔ do xɔse ɖi ɖo do Klisu Yesu ji wu. ²⁵ Vɔ kena Pɔlu o lɔ oxo nɔ do ɛgbɛ jijwɛ zinzan, ɛmɛɖe ji ɖu le kpodo kojo ɖiɖo kena gbɔnnɔ lɔ kpo wu, vivɔ jɛ Felisi ji, e bo lɔ lɔ byo: «Syɛ, o hɛn o na sɔn, vɔ na ko va kpɔn hwenu ɖe ko na va yɔ we.» ²⁶ Felisi lɔ bo bu-i nɔ tun Pɔlu mɔ na na oho wu he mɛ ha, i wɛ dɔn na e nɔ do ɖo ɛmɛ ɖoɖɛn nɔ ganmɛ-ganmɛ, ye mɔ xo davɛ nɔ. Oxwe owe we godo, Pɔsuwisi Fɛsitusi va ɖɔli Felisi. ²⁷ Vɔ, a do nyi ɛmɛ nywɛ le ŋumɛ na Jwifuye Felisi jo Pɔlu do gankpa mɛ.